“Kundu Bilong Mekim Kain Kain Krai”
WANPELA MAN LONG SENEGAL I RAITIM DISPELA STORI BILONG KIRAP!
“EM I save krai bikpela tru, sap tru, na i krai sori na i mekim ol singaut. Em i save krai isi na em i save singsing. . . . Em kundu bilong mekim kain kain krai.” Wanem samting i bin kirapim tingting bilong dispela man i raitim stori? Em wanpela kundu bilong Afrika ol i kolim djembe.
Long sampela lain bilong Wes Afrika, djembe em i nambawan kundu ol i save paitim. Ol krai bilong djembe i go stret wantaim ol samting i save kamap long ples, i gat narapela narapela krai bilong en, long taim bilong marit, indai, taim mama i karim nupela bebi, ol bung, taim bilong kamautim kaikai i redi pinis long gaden, na tu long taim wanpela i baim nupela klos.
Ol djembe i kain kain. Long Bekina Faso, Gini, Mali, na Senegal, ol i gat stail bilong ol yet. Ol i wokim long wanpela strongpela diwai, em ol i katim long sais bilong kundu na wokim hul insait long en. Sampela kundu i gat liklik bilas tasol na sampela ol i wokim i gat ol naispela bilas tru long en.
Taim ol i wokim pinis, wanpela man i save gut long wokim kundu bai wokim i kamap wanpela naispela samting bilong mekim musik. Pastaim, em i yusim sisel na sapim sapim, na em i mekim wok long senpepa na sainim gut tru long mak bilong krai em i laik kundu bai mekim. Ating em bai penim insait bilong kundu long wel bilong pam na larim i stap long san bilong drai. Dispela bai mekim na diwai i no ken bagarap.
Ol i wokim het bilong kundu long skin bilong meme em ol i pasim long wanpela ring ain na putim antap long kundu. Ol string i holim strong het bilong kundu na tupela narapela ring i holim ol dispela string. Man bilong wokim kundu i taitim strong ol dispela string long wanem mak? Em i taitim string long mak em i laik bai kundu i krai long en. Em i wok long paitim kundu long kain krai em i save laikim, taim em i wok long stretim mak bilong krai bilong en.
Djembe i save amamasim ol Afrika na ol man i go raun long hap. Taim yu harim ol man i save gut long mekim musik i paitim kundu, bai yu no inap lusim tingting long dispela “kundu bilong mekim kain kain krai.”