Yumi Ol Manmeri Bilong Bilip

Ol i Autim Bilip Kristen Long Senegal

KIRAP long bipo yet i kam inap nau, pis em bikpela kaikai bilong planti man. Inap planti tausen yia, ol man i bin kisim pis long ol solwara na ol raunwara na ol wara. Sampela aposel bilong Krais Jisas ol i man bilong kisim pis, na ol i bin kisim long raunwara Galili. Tasol Jisas i tokim ol i gat nupela wok bilong kisim pis i kamap, i no bilong kisim ol pis tru. Em wanpela wok bilong spirit na em bai helpim ol dispela man bilong kisim pis na ol dispela pis yet.

Pita em wanpela man bilong kisim pis, na Jisas i tokim em long dispela nupela wok olsem: “Nau yu wok long kisim pis, tasol bihain bai yu wok long kisim ol manmeri i kam long mi.” (Luk 5:​10) Long nau ol i mekim dispela wok long 230 kantri, na wanpela bilong ol dispela kantri em Senegal. (Matyu 24:14) Long dispela hap, ol man bilong “kisim ol manmeri” long taim bilong yumi ol i save strongim bel na tokim ol man long ol gutpela samting ol i wet long en.​​—⁠Matyu 4:​19.

Senegal i stap long hap wes bilong Afrika. Long hap not bilong Senegal, klostu long wesan Sahara, i gat ples wesan nating, na long Kasamansa long hap saut, i gat ol bikbus. Kantri Senegal i save kisim ol hatpela win i kam long ples wesan nating, na tu, ol gutpela win i kol liklik i save kam long solwara Atlantik. Inap olsem 9 milion manmeri i stap long dispela kantri. Ol manmeri bilong Senegal i gat nem olsem man bilong singautim ol man i kam long haus bilong ol. Wan wan man tasol i tok em i Kristen. Planti man ol i wasman bilong lukautim ol sipsip, ol bulmakau, ol kamel, na ol meme. Na tu, i gat ol man bilong wokim gaden​—⁠gaden pinat, koten, na rais. Na i gat ol man bilong kisim pis​—⁠ol i kisim long solwara Atlantik na long ol bikpela wara, na umben bilong ol i save pulap tru. Wok bisnis bilong kisim pis i helpim tru kantri Senegal long ol samting bilong mani. Nambawan kaikai long Senegal na i swit moa yet, em ceebu jën​—⁠ol i wokim long rais, pis, na sayor samting.

Ol Man Bilong “Kisim Ol Manmeri”

Long Senegal i gat 863 manmeri i save givim bel long autim tok bilong Kingdom bilong God. Wok bilong kisim dispela kain pis i kirap long Senegal long 1950 samting. Ol i kamapim wanpela brens-ofis bilong Sosaiti Was Taua long Dakar, em nambawan biktaun, long 1965. Ol misineri bilong kisim “pis” ol i kirap lusim planti longwe kantri na i kam. Wok bilong kisim “pis” i kirap, na wok bilong tokim ol man long ol gutpela samting ol Kristen i wet long en em i wok long kamap strong. Bihain ol i wokim nupela brens-ofis long Almadis, long arere bilong Dakar, na ol i dediketim long Jehova long Jun 1999. Man! Em taim bilong bikpela amamas tru!

I Gat Hatwok Long Kisim Tok i Tru

Ol man bilong autim tok i save bungim ol man bilong kain kain sindaun, na sampela i amamas tru long harim tok bilong Baibel long ol gutpela samting ol inap kisim bihain. Maski planti i no save long ol tok bilong Baibel, ol i amamas tru long kisim save olsem ol tok promis God Jehova i bin mekim long ol gutpela profet long bipo, klostu nau bai ol i kamap tru.

Bilong stap gut long ol lo Kristen, ol man i mas i gat strongpela bel, na moa yet taim famili i strong long ol i bihainim sampela lo na pasin bilong famili. Olsem: Long Senegal planti man i bihainim pasin bilong maritim planti meri. Tingim wanpela man em i gat tupela meri taim em i kirap stadi long Baibel. Olsem wanem? Em bai strongim bel na kisim tok i tru na bihainim lo bilong Baibel i tok em i mas i stap man bilong wanpela meri tasol? (1 Timoti 3:⁠2) Na em bai stap wantaim namba wan meri tasol, em meri em i maritim pastaim? Em i mekim olsem, na nau em i mekim wok olsem wanpela elda long wanpela bikpela kongrigesen long Dakar. Namba wan meri bilong em i kisim tok i tru, na olgeta 12-pela pikinini bilong em, ol tu i kisim tok i tru​—⁠10-pela ol i pikinini bilong namba wan meri na 2-pela i bilong namba tu meri em i lusim pinis.

Ating narapela samting i mekim na sampela i hatwok long kisim bilip Kristen i olsem: Ol i no save long rit rait. Olsem wanem? Man i no save long rit rait, yu ting em i no inap kisim tok i tru na bihainim? Nogat tru! Tingim Marie, em i wanpela mama i gat 8-pela liklik pikinini na i save mekim bikpela wok. Kwiktaim em i save olsem pasin bilong toktok wantaim ol pikinini long wanpela ves bilong Baibel long olgeta de paslain long ol i lusim haus na go long skul, na paslain long em i go long wok, dispela em i bikpela samting. Tasol em i no save long rit, olsem na olsem wanem em inap mekim dispela samting? Long olgeta de long moningtaim tru, em i save kisim buklet Skelim Sampela Tok Bilong Baibel Long Olgeta De na em i go sanap long rot long ai bilong haus bilong em. Em i save askim ol man i wokabaut olsem ol inap rit o nogat. Taim wanpela i tok yes, em i save givim buklet long em na tok strong: “Mi no save long rit. Plis yu kaunim dispela tok long mi.” Em i putim gut yau long ol tok man i kaunim. Kaunim pinis, orait em i tok tenkyu na hariap i go bek long haus bilong stori wantaim ol pikinini long dispela ves bilong Baibel paslain long ol i lusim haus na go long skul!

Olgeta Kain Man i Harim Tok

Long Senegal, yumi inap lukim ol man i sindaun long maket na salim pis, prut, o sayor samting, na ol man i slip aninit long traipela diwai baobab na dring ataya, em wanpela kain ti i save pait liklik. Tupela brata i gat strongpela tingting long autim gutnius long olgeta man ol i bungim, olsem na ol i toktok wantaim wanpela man i singaut long mani, em hap skin bilong em i bagarap. Ol i tok gude pinis, na ol i tok: “Planti man i givim mani long yu, tasol ol i no toktok wantaim yu. Mipela laik tokim yu long wanpela bikpela samting yu inap kisim long bihain.” Man hia i kirap nogut tru. Ol brata i tok moa: “Mipela laik givim wanpela askim long yu. Long tingting bilong yu i gat wanem as na planti pen na hevi i stap?” Man hia i bekim tok: “Em laik bilong God.”

Orait nau ol brata i opim Baibel na toktok gut wantaim em na ol i kamapim as bilong Kamapim Tok Hait 21:⁠4. Em i pilim tru dispela gutpela tok na em i amamas long tupela brata hia i tingim em na toktok wantaim em long Baibel. Aiwara i kamap long ai bilong em. Em i no singaut long mani; em i strong long tupela brata i mas kisim olgeta mani ol man i bin givim long em na i stap long wanpela tin! Em i strong tru long ol i mas kisim, na dispela i pulim ai bilong ol man i wokabaut i go i kam. Tupela brata hia i strong long em yet i mas holim. Bihain em i orait long dispela, tasol em i strong long tupela i mas kam bek lukim em.

Long bikpela yunivesiti long Dakar, umben bilong spirit i kisim sampela moa pis. Long dispela hap, wanpela sumatin i stadi long kamap dokta em i kirap stadi long Baibel. Kwiktaim em i kisim tok i tru, na dediket long Jehova, na kisim baptais. Em i gat laik long mekim wok bilong God olsem wanpela painia, tasol em i amamas tu long ol stadi em i mekim long kamap dokta. Em i bin wokim kontrak wantaim kantri bilong em, olsem na em i mas pinisim ol stadi bilong em. Long wankain taim em i mekim yet ol dispela stadi, em i kirap mekim wok painia haptaim. Bihain liklik long em i kisim pepa i tokaut em i kamap dokta pinis, ol i singautim em i kam long wanpela bikpela haus Betel long Afrika na kamap dokta bilong famili Bethel. Ol i bin autim tok long narapela yangpela man long Yunivesiti Dakar, na nau em tu i mekim wok long helpim famili long Betel long kantri bilong em.

Tru tumas, gutpela samting tru i bin kamap long dispela wok bilong kisim ol manmeri long Senegal. Ol buk na nius bilong Baibel bilong ol Witnes Bilong Jehova em ol man i save laikim tumas, nau ol i wokim long tok ples Wolof, em wanpela tok ples bilong Senegal. Ol man inap harim gutnius long tok ples bilong ol na dispela i bin kirapim planti i gat stretpela bel long kisim save long tok i tru. Ol man long Senegal bilong “kisim ol manmeri” ol i strongim bel na stap gut long wok bilong tokim ol man long ol gutpela samting ol Kristen i save wet long en, na sapos Jehova i mekim gut long dispela wok, ol bai kisim planti “pis” moa.

[Mep/Piksa long pes 31]

(Bilong save ol dispela rait i stap we long pes, lukim buk o magasin)

SENEGAL

[Piksa]

Ol i autim bilip Kristen long Senegal

[Kredit Lain]

Mountain High Maps® Copyright © 1997 Digital Wisdom, Inc.