Ol Stretpela Bilip—Yu Inap Painim We?
WANPELA man long Tibet em i tanim tanim wanpela liklik dram—insait long dram i gat ol hap pepa em i bin raitim ol beten long en. Em i ting long pasin bilong tanim dram, em i kolim gen ol dispela beten. Insait long wanpela bikpela haus long India, i gat wanpela liklik rum ol i makim bilong mekim puja. Puja em wanpela hap lotu we ol man i save givim ofa—paura bilong wokim smok smel, ol plaua, na sampela samting moa—long ol kain kain god na god meri. Inap planti tausen kilomita longwe long India, long wanpela haus lotu long Itali, wanpela meri i brukim skru klostu long wanpela piksa bilong Maria, mama bilong Jisas. Em i holim wanpela rop bis, olsem korona, na beten.
Ating yu yet i bin lukim ol samting em lotu i bin mekim long i stap bilong man. Buk The World’s Religions—Understanding the Living Faiths i tok: “Lotu . . . i bin mekim bikpela wok long i stap bilong ol lain long olgeta hap bilong graun, na i save mekim yet.” Long buk God—A Brief History, John Bowker i tok: “I no gat wanpela lain man i bin kamap we pasin bilong bilip long God—olsem Man bilong bosim na wokim ol samting—i no bin stiaim i stap bilong ol. Dispela tok i stret tu long ol kantri we lotu na gavman i no pas wantaim.”
Tru tumas, ol lotu i bin stiaim i stap bilong planti milion manmeri. Dispela i kamapim klia olsem ol man i gat laik tru long tingim ol samting bilong spirit, a? Long buk The Undiscovered Self, wanpela saveman i gat nem, Dokta Carl G. Jung, i tok ol man i gat laik long lotuim samting i gat bikpela strong, winim strong bilong man yet, na em i tok olsem “long olgeta lain i bin kamap, yumi inap lukim ol samting ol man i bin mekim bilong kamapim dispela laik.”
Tasol planti manmeri i no save bilip long God o tingim ol samting bilong lotu. Sampela man husat i tok i no gat God i stap o ol i holim tupela tingting long God i stap o nogat, ol i gat dispela tingting, long wanem, ol lotu ol i save long en i no bin inapim ol long samting bilong spirit. Tasol klostu olgeta manmeri, na ol man i tok i no gat God i stap, ol i save givim bel long ol lo na pasin ol i bilip long en, olsem dispela i lotu bilong ol.
Inap planti tausen yia ol man i bin wok long inapim laik bilong ol long samting bilong spirit na dispela i bin kirapim ol long traim kain kain lotu. Dispela i mekim na long olgeta hap bilong graun i gat planti kain kain bilip. Olsem: Klostu olgeta lotu i bilip long wanpela samting i gat bikpela strong, winim strong bilong man yet, tasol ol dispela lotu i gat narapela narapela tingting long dispela strong em i husat o wanem samting. Long planti lotu, wok bilong kisim laip oltaim o kamap fri em i bikpela samting. Tasol bilip bilong ol long dispela samting—olsem em i wanem kain laip na rot bilong kisim—em i narapela narapela. I gat planti kain kain bilip, olsem na olsem wanem yumi inap save long ol stretpela bilip em God i laikim?