Kisim Ol Pasin Em Ol Inap Helpim Yu Long Kamapim Ol Disaipel
“Go mekim olgeta lain manmeri i kamap disaipel bilong mi.”—MATYU 28:19.
1. Sampela wokboi bilong Jehova bilong pastaim i mas i gat wanem save na tingting bilong mekim laik bilong Jehova?
SAMPELA taim ol wokboi bilong Jehova i mas kisim sampela save na pasin em inap helpim ol long mekim laik bilong em. Olsem: God i tok na Abraham na Sara i bin lusim taun Ur, em taun i gat planti samting bilong skin, na ol i mas kisim ol pasin na ol save bilong helpim ol long sindaun long haus sel. (Hibru 11:8, 9, 15) Bilong kisim lain Israel i go insait long Graun Bilong Promis, Josua i mas i gat strongpela bel, bilip long Jehova, na gutpela save long Lo bilong God. (Josua 1:7-9) Na holi spirit bilong God i bin givim sampela save moa long Besalel na Oholiap na bai tupela inap bosim na mekim gut ol wok bilong wokim na sanapim haus lotu sel.—Kisim Bek 31:1-11.
2. Bai yumi skelim wanem ol askim long wok bilong kamapim disaipel?
2 Planti handet yia bihain, Jisas Krais i givim wok long ol disaipel: “Go mekim olgeta lain manmeri i kamap disaipel bilong mi. . . . Lainim ol long bihainim olgeta tok mi bin givim long yupela.” (Matyu 28:19, 20) I no gat wanpela taim bipo we ol man i bin kisim wanpela gutpela wok olsem. Yumi mas i gat wanem ol pasin bilong mekim wok bilong kamapim disaipel? Olsem wanem yumi inap kisim ol dispela kain pasin?
Kamapim Klia Olsem Yu Laikim Tumas God
3. God i tokim yumi long kamapim ol disaipel, dispela i opim rot long yumi ken mekim wanem?
3 Bilong toktok wantaim ol man na traim long kirapim ol long lotuim God tru, yumi mas laikim tumas Jehova. Ol Israel inap kamapim klia olsem ol i laikim tru God taim ol i givim bel long bihainim ol lo bilong em, givim ol gutpela ofa, na litimapim nem bilong em long ol song. (Lo 10:12, 13; 30:19, 20; Song 21:13; 96:1, 2; 138:5) Yumi ol man bilong kamapim ol disaipel, yumi tu i mas bihainim ol lo bilong God, na tu, yumi mas kamapim olsem yumi laikim Jehova taim yumi tokim ol arapela long ol pasin na ol samting em i tingting pinis long mekim. Yumi mas mekim ol tok i kamapim olsem yumi bilipim tru tok yumi mekim, na mekim ol gutpela tok i kamapim tingting i stap long bel bilong yumi long ol gutpela samting God i promis pinis long givim long yumi.—1 Tesalonaika 1:5; 1 Pita 3:15.
4. Bilong wanem Jisas i amamas long skulim ol man long Jehova?
4 Jisas i laikim tru Jehova, olsem na em i kisim bikpela amamas taim em i toktok long ol samting God i tingting pinis long mekim, long Kingdom, na long lotu i tru. (Luk 8:1; Jon 4:23, 24, 31) Jisas i bin tok: “God i bin salim mi na mi kam, na kaikai bilong mi, em long bihainim laik bilong em na long pinisim wok em i bin givim mi.” (Jon 4:34) Tok man bilong raitim song i mekim i stret long Jisas: “God bilong mi, mi laikim tumas long bihainim laik bilong yu. Lo bilong yu i stap insait long bel bilong mi. Bikpela, mi bin autim gutnius long taim ol planti lain manmeri bilong yu i kam bung. Mi tok olsem, ‘Bikpela i save kisim bek yumi.’ Bikpela, yu save pinis, bai mi autim dispela tok oltaim. Mi no ken pasim maus.”—Song 40:8, 9; Hibru 10:7-10.
5, 6. Bilong kamapim ol disaipel wanem namba wan pasin yumi mas kisim?
5 Pasin bilong laikim God i kirapim ol nupela man, em nau tasol ol i lainim tok i tru bilong Baibel, long kamapim bilip bilong ol. Na sampela taim pasin bilong ol long kamapim strong bilip bilong ol long Jehova na long Kingdom i mekim na ol i kirapim ol arapela long kirap skelim tok bilong Baibel. (Jon 1:41) Pasin bilong laikim tru God em i nambawan samting i kirapim yumi long mekim wok bilong kamapim disaipel. Olsem na oltaim yumi laik ritim na tingim tingim long bel tok bilong Baibel bilong holimpas dispela pasin laikim.—1 Timoti 4:6, 15; KTH 2:4.
6 Yumi no gat tupela tingting, pasin bilong Jisas Krais long laikim tumas Jehova i bin helpim em long givim bel long skulim ol man. Tasol i no dispela samting tasol i mekim na em i mekim gutpela wok long autim tok bilong Kingdom, nogat. Orait, wanem narapela pasin i mekim na Jisas i mekim gutpela wok long kamapim ol disaipel?
Laikim na Tingim Ol Man
7, 8. Jisas i gat wanem tingting long ol man?
7 Jisas i laikim ol man na em i soim olsem em i tingim tru ol. Paslain long em i kam daun long graun em i bin stap olsem “saveman i bosim wok” bilong God. Na long dispela taim em i bin amamas long ol man. (Sindaun 8:30, 31) Taim em i stap man long graun, Jisas i bin sori long ol man, na em i givim nupela strong long ol man i kam long em. (Matyu 11:28-30) Jisas i bihainim pasin laikim na pasin sori bilong Jehova, na dispela i kirapim ol man long lotuim God tru. Kain kain man i bin putim yau long tok bilong Jisas bikos em i soim olsem em i tingim ol na sindaun bilong ol.—Luk 7:36-50; 18:15-17; 19:1-10.
8 Taim wanpela man i bin askim Jisas long em i mas mekim wanem bilong kisim laip oltaim, “Jisas i lukluk long em na i laikim em tumas.” (Mak 10:17-21) Jisas i bin skulim 3-pela manmeri long Betani, na Baibel i tok long ol olsem: “Jisas i laikim tumas Marta wantaim susa bilong en na Lasarus.” (Jon 11:1, 5) Maski Jisas i mas kisim liklik malolo em i wok yet long skulim ol man, long wanem, em i tingim tru ol. (Mak 6:30-34) Pasin bilong Jisas long tingim tru ol man i mekim na em i winim ol arapela man long helpim ol man long kam long lotu i tru.
9. Pol, em man bilong kamapim ol disaipel, i gat wanem pasin?
9 Aposel Pol tu i tingim tru ol man husat em i autim tok long ol. Olsem: Em i tokim ol man long Tesalonaika husat i kamap Kristen: “Mipela i laikim yupela tumas, olsem na mipela i laik givim gutnius bilong God long yupela. Na mipela i redi tu long givim laip bilong mipela bilong helpim yupela, long wanem, yupela i bin kamap pren tru bilong mipela.” Gutpela pasin bilong Pol i mekim na sampela long Tesalonaika ‘i bin lusim ol giaman god na i go long God tru.’ (1 Tesalonaika 1:9; 2:8) Sapos yumi tingim tru ol man, olsem Jisas na Pol i bin mekim, orait yumi tu bai kisim amamas taim yumi lukim ol man i gat laik long “kisim laip i stap gut oltaim” i pilim tru gutnius long bel.—Aposel 13:48.
Lusim Samting Bilong Yu Yet Bilong Helpim Narapela
10, 11. Bilong wanem yumi mas i gat pasin bilong lusim sampela samting bilong yumi yet bilong helpim narapela taim yumi laik kamapim ol disaipel?
10 Ol man i save gut long kamapim ol disaipel, ol i gat pasin bilong lusim sampela samting bilong ol yet bilong helpim narapela. Ol i no ting pasin bilong kisim planti mani samting em i namba wan samting. Jisas i tokim ol disaipel: “Ol man i gat planti samting ol bai i hatwok tru long i go insait long kingdom bilong God.” Ol disaipel i kirap nogut long dispela tok, tasol Jisas i tok moa olsem: “Ol pikinini, man i laik i go insait long kingdom bilong God, em i gat hatwok. Kamel i laik i go insait long hul bilong nil bilong samap, em i no gat hatwok olsem maniman i laik i go insait long kingdom bilong God.” (Mak 10:23-25) Bilong ol disaipel i ken tingting strong long kamapim ol disaipel, Jisas i kirapim ol long ol i no ken tingim tumas ol samting bilong skin. (Matyu 6:22-24, 33) Bilong wanem pasin bilong lusim sampela samting bilong yumi yet bilong helpim narapela i save helpim yumi long kamapim ol disaipel?
11 Em bikpela wok long lainim man long ol samting Jisas i tokim ol man long mekim. Man i laik kamapim wanpela disaipel em i save mekim stadi long Baibel long olgeta wik wantaim man i gat laik long save long tok i tru. Sampela man bilong autim tok bilong Kingdom i bin lusim wok mani fultaim na kisim wok haptaim na bai ol i gat sampela taim moa long painim ol man i gat gutpela bel. Planti tausen Kristen i bin lainim nupela tok ples bilong autim tok long ol man bilong ol arapela tok ples i sindaun long hap bilong ol. Sampela Kristen i bin lusim ples na i go long narapela hap o narapela kantri bilong mekim bikpela wok moa long autim tok. (Matyu 9:37, 38) Bilong mekim olsem ol i mas i gat pasin bilong lusim sampela samting bilong ol yet bilong helpim narapela. Tasol bilong mekim gut wok bilong kamapim disaipel i gat sampela samting moa yumi mas mekim.
No Ken Les Kwik Tasol No Ken Westim Taim
12, 13. Bilong kamapim ol disaipel, bilong wanem pasin bilong i no les kwik em i bikpela samting?
12 Pasin bilong i no les kwik em narapela pasin em inap helpim yumi long kamapim ol disaipel. Ol tok Kristen yumi autim em ol tok man i mas kirap kwik long bihainim, tasol planti taim yumi mas lusim bikpela haptaim bilong kamapim ol disaipel na yumi no ken les kwik. (1 Korin 7:29) Jisas i no les kwik long brata bilong em Jems. Maski Jems i bin save gut long wok autim tok bilong Jisas, i gat sampela samting i mekim na em i no kamap disaipel hariap. (Jon 7:5) Tasol i luk olsem Jems i bin kamap disaipel namel long taim Krais i dai na Pentikos 33 C.E., long wanem, Baibel i tok em i bin bung na beten wantaim mama bilong em, ol brata bilong em, na ol aposel. (Aposel 1:13, 14) Jems i kamap gutpela disaipel, na bihain em i kisim bikpela wok insait long kongrigesen Kristen.—Aposel 15:13; 1 Korin 15:7.
13 Olsem ol fama, ol Kristen i wok long kamapim ol samting i save kamap isi isi—pasin bilong kliagut long Baibel, laikim tru Jehova, na kisim pasin bilong Krais. Bilong kisim ol dispela samting man i no ken les kwik. Jems i tok: “Ol brata, yupela i mas strongim bel bilong yupela na karim ol hevi, na wetim Bikpela i kam bek. Yupela i save, man i gat gaden em i save wetim gutpela kaikai i kamap long gaden bilong en. Em i save strongim bel bilong en na stap isi na wetim ren wantaim san i mekim wok bilong tupela pastaim, na bihain em i save kisim kaikai. Orait yupela tu i mas strongim bel na stap isi na karim ol hevi i kamap long yupela. Taim bilong Bikpela i kam bek em i klostu tru. Olsem na bel bilong yupela i mas i stap strong.” (Jems 5:7, 8) Jems i wok long strongim ol wanbilip long “karim hevi, na wetim Bikpela i kam bek.” Sapos ol disaipel i no kliagut long wanpela samting, orait Jisas i no les long ol, em i stori gut long ol o kamapim wanpela tok piksa samting bilong kliaim tingting bilong ol. (Matyu 13:10-23; Luk 19:11; 21:7; Aposel 1:6-8) Nau Bikpela i stap pinis, olsem na yumi tu i no ken les kwik taim yumi wok long kamapim ol disaipel. Yumi mas skulim gut ol man husat i kamap disaipel bilong Krais long nau, na yumi no ken les.—Jon 14:9.
14. Yumi no les kwik, tasol olsem wanem yumi ken mekim gutpela wok long taim yumi tromoi long kamapim ol disaipel?
14 Maski yumi isi long ol man na yumi no les kwik, planti man yumi stadi wantaim ol long Baibel bai i no kisim baptais. (Matyu 13:18-23) Olsem na yumi traim long helpim ol i go inap sampela haptaim na bihain yumi lusim ol na wok long painim ol man husat i laikim tok i tru bilong Baibel. (Saveman 3:1, 6) Tasol sampela man husat i laikim tok i tru bilong Baibel ol i mas kisim bikpela helpim bilong senisim tingting, pasin, na tingting bilong ol long wanem samting i bikpela samting. Olsem na yumi no les kwik, olsem Jisas i no les kwik long ol disaipel husat i nidim sampela haptaim moa bilong kisim stretpela tingting.—Mak 9:33-37; 10:35-45.
Kisim Pasin Bilong Skulim Gut Man
15, 16. Bilong wanem pasin bilong redi gut na kamapim ol tok i no hatwok long kisim i bikpela samting taim yumi laik kamapim ol disaipel?
15 Pasin bilong laikim tumas God, tingim tru ol man, lusim sampela samting bilong yu yet bilong helpim narapela, na yumi no les kwik em ol bikpela samting bilong kamapim ol disaipel. Na tu, yumi mas wok long kisim save long pasin bilong skulim gut ol man na dispela bai helpim yumi long kamapim klia ol tok na bai i no hatwok long ol man long kisim. Olsem: Planti tok em Bikpela Tisa, Jisas Krais, i bin mekim i bin wok gut tru bikos ol dispela tok i no hatwok long kisim. Ating yu inap tingim ol dispela tok bilong Jisas: “Bungim ol gutpela samting bilong yupela long heven.” “Yupela i no ken kisim samting ol i makim bilong God, na givim long ol dok.” “Ol wok bilong God i soim olsem save bilong en em i samting tru.” “Samting bilong Sisar, em yupela i mas givim long Sisar. Na samting bilong God, em yupela i mas givim long God.” (Matyu 6:20; 7:6; 11:19; 22:21) Tasol Jisas i no mekim ol sotpela tok tasol. Taim i stret long mekim em i save eksplenim gut ol tok em i skulim ol long en. Olsem wanem yumi ken bihainim pasin bilong Jisas long skulim man?
16 Bilong kamapim tok i klia tru na i no hatwok long kisim, bikpela samting em long redi gut. Pablisa i no redi gut i save toktok tumas. Pasin bilong em long mekim planti toktok na kamapim olgeta save bilong em long samting em i skulim man long en inap haitim ol bikpela poin. Tasol pablisa i save redi gut i save tingim man em i laik skulim, em i skelim gut long bel ol tok em i laik mekim, na em i kamapim klia ol tok i stret long man. (Sindaun 15:28; 1 Korin 2:1, 2) Em i tingim save sumatin i holim pinis na wanem ol bikpela poin em i mas strongim insait long stadi. Ating pablisa i save long planti gutpela tok, tasol bilong kamapim tok i klia tru em i no ken kamapim ol tok sumatin i no gat wok long en.
17. Olsem wanem yumi ken helpim ol man long wokim tingting long ol tok bilong Baibel?
17 Na tu, Jisas i bin helpim ol man long wokim tingting, em i no tokim ol long ol samting tasol. Olsem: Wanpela taim em i bin tok: “Saimon, yu ting wanem? Ol king bilong dispela graun i save kisim pe bilong ol kain kain takis long husat? Ol i save kisim long ol lain bilong ol yet, o long ol arapela man?” (Matyu 17:25) Yumi mas bosim gut bel bilong yumi, nogut yumi amamas tumas long eksplenim tok bilong Baibel na yumi no larim sumatin long kamapim tingting bilong em yet o kamapim mining bilong samting yupela i stadi long en. Na tu, yumi no laik givim planti askim tumas long ol man. Yumi laik bihainim gutpela pasin, mekim ol gutpela tok piksa, na ol askim i save kirapim gut tingting bilong sumatin. Long dispela rot yumi inap helpim ol long pilim tru ol tok bilong Baibel em ol buk na nius bilong yumi i kamapim.
18. Yumi mas mekim wanem bilong kisim pasin bilong ‘skulim gut’ man?
18 Baibel i toktok long pasin bilong ‘skulim gut’ man. (2 Timoti 4:2; Taitus 1:9) Bilong skulim gut man yumi no helpim ol long putim gut long tingting ol tok tasol, nogat. Yumi laik helpim Baibel sumatin long save long olsem wanem tok tru i narapela kain long tok giaman, wanem samting i gutpela na wanem samting i nogut, na olsem wanem savetingting i narapela kain long longlong pasin. Taim yumi mekim olsem na yumi wok long helpim em long kisim pasin bilong laikim Jehova long bel bilong em, ating em bai luksave long as na em i mas bihainim tok bilong Em.
Givim Bel Olgeta Long Kamapim Disaipel
19. Olsem wanem olgeta Kristen i insait long wok bilong kamapim ol disaipel?
19 Kongrigesen Kristen em i wanpela oganaisesen bilong kamapim ol disaipel. Taim nupela man i kamap disaipel, i no dispela wanpela Witnes Bilong Jehova husat i bin painim na helpim em long save long tok bilong Baibel i kisim amamas, nogat. Tingim: Taim ol i bungim ol man bilong painim wanpela pikinini i lus, i gat wanpela man tasol bilong dispela lain i painim dispela pikinini. Tasol taim pikinini i bung gen wantaim papamama, olgeta man i bin wok long painim em i save amamas. (Luk 15:6, 7) Wok bilong kamapim ol disaipel i wankain. Olgeta Kristen i wok long painim ol man husat i laik kamap disaipel bilong Jisas. Na taim wanpela nupela man i kirap kam long ol miting long Haus Kingdom, olgeta Kristen i stap long Haus Kingdom i save helpim nupela man long pilim tru lotu i tru. (1 Korin 14:24, 25) Olsem na, olgeta Kristen i ken amamas olsem i gat sampela handet tausen nupela disaipel i kamap long olgeta yia.
20. Yu mas mekim wanem sapos yu gat laik long skulim ol arapela long tok tru bilong Baibel?
20 Planti ol gutpela Kristen bai amamas long skulim wanpela man long ol pasin bilong Jehova na lotu i tru. Tasol maski ol i traim bes bilong ol, ating ol i no inap. Sapos yu gat dispela hevi, orait wok yet long strongim pasin bilong yu long laikim tumas Jehova, tingim tru ol arapela, lusim sampela samting bilong yu yet bilong helpim narapela, no ken les kwik, na wok long kisim pasin bilong skulim gut man. Na nambawan samting, kamapim laik bilong yu long skulim narapela long tok i tru insait long ol beten bilong yu. (Saveman 11:1) Bel bilong yu i ken stap isi, long wanem, olgeta samting yu mekim bilong lotuim Jehova i save helpim wok bilong kamapim ol disaipel na dispela i givim glori long God.
Yu Inap Stori Long Dispela?
• Bilong wanem wok bilong kamapim disaipel i save traim pasin bilong yumi long laikim tumas God?
• Ol man i laik kamapim ol disaipel i mas i gat wanem ol pasin?
• Wanem samting i insait long pasin bilong ‘skulim gut’ man?
[Piksa long pes 21]
Long rot bilong kamapim ol disaipel, ol Kristen i soim olsem ol i laikim tumas God
[Piksa long pes 23]
Bilong wanem ol man i laik kamapim ol disaipel i mas tingim tru ol man?
[Piksa long pes 24]
Wanem sampela pasin em man bilong kamapim disaipel i mas i gat?
[Piksa long pes 25]
Olgeta Kristen i amamas tru long lukim gutpela wok i kamap long rot bilong kamapim ol disaipel