Pasin Sori Namel Long Ol Man i Mekim Hatpela Pasin

WANPELA man long Barundi i kisim malaria na em i sik nogut tru. Em i mas i go hariap long haus sik. Tasol em bai go olsem wanem? I no gat ka bilong kisim em i go. Tupela gutpela pren bilong em i kam helpim em. Ol i putim em long baiskol na pusim em i go inap faipela aua long ples maunten. Ol i putim em long PMV i kisim em i go long wanpela haus sik. Bihain long sampela de, man hia i kamap orait liklik.

Long narapela hap bilong graun, bihain long saiklon Katrina i bin bagarapim Galf bilong Amerika long Ogas 2005, wanpela lain volantia i painim wanpela haus i bagarap i stap aninit long ol diwai i bin pundaun. Ol dispela volantia i no save long papamama bilong haus, tasol ol i lusim wanpela de olgeta bilong rausim ol diwai na pipia wantaim senso. Mama bilong haus i tok: ‘Long bel olgeta mi laik tok tenkyu tru long dispela lain.’

Ol ripot long TV na niuspepa samting i stori planti long ol pasin nogut na hatpela pasin ol man i save mekim. Planti taim ol dispela stori nogut i save karamapim stori bilong ol man i mekim gutpela pasin na pasin sori long ol narapela. Tasol maski i olsem, ol man long olgeta hap i laik bai narapela i laikim tru ol na i pilim hevi bilong ol. Yumi man i laik bai narapela i sori long yumi! Ating long taim bilong Krismas, planti man moa i save mekim dispela kain tok, em taim we planti man i save toktok o singsing long “bel isi na gutpela taim i go long ol man long graun.”​—Luk 2:​14, King Jems Nupela Testamen.

Ating i hatwok long kamapim pasin sori namel long ol man i no save tingim ol narapela na i no mekim gut long ol. Planti man i ting hatpela pasin na pasin bilong i no tingim ol narapela i helpim ol long stap gut na kisim ol gutpela samting. I luk olsem planti man i bihainim dispela tingting olsem em i savepasin long mekim hatpela pasin na no ken mekim pasin sori. Pasin mangal na pasin bilong ol man long tingim ol yet tasol i save daunim pasin sori.

Ol dispela samting i mekim na planti man i save tingim ol yet pastaim, na ol i no tingim filings na laik bilong ol narapela. Planti taim ol i tok ol man i gat biknem long spot na TV samting, ol i “man tru” em ol i no save mekim gut long ol narapela. Sampela bikman bilong politik i save bihainim wankain pasin.

Olsem na i gutpela long yumi mekim ol dispela askim: Bilong wanem yumi mas pilim hevi bilong ol narapela? Pasin sori i gat strong long helpim ol man? Na wanem samting inap helpim yumi long mekim pasin sori long ol narapela? Stori i kamap bihain long dispela bai skelim ol dispela askim.

[Blok long pes 3]

• Yu ting man i gat pasin sori em i no gat bun?

• Pasin sori i gat strong long helpim ol man?

• Long wanem ol rot yu ken mekim pasin sori?