Nupela Wastaua Bilong Stadi
DISPELA magasin yu ritim em namba 1 Wastaua bilong stadi. Mipela i laik stori long sampela nupela samting bilong dispela magasin.
Wastaua bilong stadi i bilong ol Witnes Bilong Jehova na ol Baibel sumatin i wok long kamap strong na pas gut wantaim Jehova. Ol bai wokim wanpela tasol bilong dispela Wastaua long olgeta mun na em bai i gat 4-pela o 5-pela stadi insait long en. Sediul bilong ol dispela stadi bai i stap long karamap bilong Wastaua. Bai i no gat ol piksa long karamap bilong en olsem Wastaua bilong pablik, long wanem, em i no bilong tilim long taim bilong autim tok.
Long pes 2, bai i gat sotpela stori long ol tok i stap long olgeta wan wan stadi, na tu, bai i gat lista bilong ol narapela stori i stap insait. Dispela sotpela stori bilong ol stadi bai helpim ol brata i save lukautim Stadi Wastaua taim ol i redim Wastaua na bai ol i ken stori gut long en long taim bilong miting long kongrigesen.
Bai yu lukim olsem ol stadi i sotpela taim yu skelim wantaim ol stadi long bipo. Dispela i opim rot bilong yumi ken stori gut wantaim long ol bikpela skripsa long taim bilong Stadi Wastaua. Mipela i laik kirapim yu long lukim olgeta skripsa ol i no raitim tok bilong en. Sampela skripsa long stadi ol i raitim tok “ritim” em yupela i mas ritim long taim bilong Stadi Wastaua na stori long en. Yupela i ken ritim ol narapela skripsa sapos i gat taim long mekim olsem. Long sampela stadi, bai i gat ol skripsa ol i raitim tok “skelim.” Ol dispela skripsa i stori liklik tasol long ol bikpela tok bilong paragraf, olsem na i no gat wok long ritim long miting bilong kongrigesen. Tasol ol dispela skripsa i kamapim sampela tok em inap long sapotim tok bilong paragraf. Mipela i laik kirapim yu long ritim ol dispela skripsa taim yu redim Stadi Wastaua. Ating yu inap kamapim tok bilong ol long bekim bilong yu.
Ripot bilong yia bai i no inap i stap moa long Wastaua. Kirap long 2008, em bai stap long Wok Kingdom olsem wanpela namel pepa, na em bai stap tu long Yearbook. Tasol olsem mipela i stori pinis, bai i gat sampela narapela stori insait long Wastaua bilong stadi. Tru ol dispela stori bai i no kamap long ol miting, tasol mipela i laik kirapim yupela long ritim gut ol dispela stori. Ol dispela stori tu i kamapim kaikai bilong spirit i kam long “wokboi i gat gutpela tingting.”—Mt. 24:45-47.
Tasol Wastaua bilong stadi na Wastaua bilong pablik i no narapela narapela magasin, nogat. Tupela wantaim em Wastaua i Tokaut Long Kingdom Bilong Jehova. Tupela wantaim i gat wankain tok i stap long pes 2 i stori long wok bilong Wastaua. Tupela wantaim bai i stap long volium bilong Wastaua. Na bai yu painim stori bilong tupela long dispela hap “Yu Tingim Yet?” em dispela hap bai i stap long Wastaua bilong stadi.
Kirap long 1879 na i kam, maski i gat pait, hevi bilong mani, na pasin birua, nius The Watchtower i bin kamapim tok i tru bilong Kingdom Bilong God. Mipela i beten olsem, Jehova bai blesim yet wok bilong dispela nupela Wastaua bilong stadi. Na mipela i beten olsem Jehova bai blesim yu, man i save ritim dispela nius, taim yu mekim gutpela wok long nupela Wastaua bilong stadi.