Sampela Gutpela Senis Bilong Wastaua!
1 Inap sampela mun i go pinis, ol kongrigesen i bin kisim dispela gutpela toksave: Kirap long Janueri 2008, bai i gat tupela kain Wastaua, wanpela em bilong ol man ausait, olsem bilong pablik, na narapela em bilong lain brata Kristen! Ating yu laik save: ‘Olsem wanem dispela tupela nius i narapela narapela kain? Bilong wanem em i gutpela long yumi gat tupela kain Wastaua? I gat sampela nupela samting bilong dispela tupela nius?’
2 Ol i Narapela Narapela Kain: Wastaua bilong de 1 bilong olgeta mun em Wastaua Bilong Pablik. Olgeta stori i stap long dispela Wastaua i bilong helpim ol man ausait. Wastaua bilong de 15 bilong olgeta mun em Wastaua Bilong Stadi, na yumi no ken tilim dispela long wok autim tok. Insait long en bai i gat olgeta stadi bilong wanpela mun, na sampela narapela stori i stret long ol Kristen i dediket pinis. Yumi ol Witnes bai amamas long ritim Wastaua Bilong Pablik, tasol ol man i no Witnes na i rispek long Baibel, ol bai amamas tru long ritim dispela Wastaua. Tasol nius Kirap! i bilong kain kain man, na tu, long ol man i no bilip tumas na ol man i bilong ol lotu i no gat nem Kristen.
3 Ol Gutpela Samting Bilong En: Long Wastaua Bilong Stadi, bai i no gat wok moa long kamapim mining bilong ol kain tok olsem “painia” na bai ol man i no Witnes i ken kliagut long en, nogat. Dispela Wastaua i ken kamapim tu sampela tok i go stret long ol Witnes Bilong Jehova na ol Baibel sumatin i wok long kamap strong. Olsem wanem long Wastaua Bilong Pablik? Ol stori bilong en na stail bilong raitim ol stori i bilong ol man ausait, olsem na ol man i no Witnes ol bai amamas long ritim olgeta tok bilong dispela Wastaua. Tasol olgeta Witnes Bilong Jehova bai kisim helpim taim ol i ritim Wastaua bilong pablik na bilong stadi. Bai yumi tilim wanpela Wastaua na wanpela Kirap! tasol long olgeta mun, olsem na bai yumi gat wanpela mun olgeta bilong kamapim ol gutpela tok bilong tilim nius.
4 Ol Nupela Samting Bilong En: Wastaua Bilong Pablik bai i gat sampela nupela samting bilong en. Wanpela hap bilong en bai skelim sampela bikpela tok bilong Baibel long pasin i no hatwok long ol man i kliagut long en. Narapela hap bai soim olsem wanem tok bilong Baibel inap helpim ol famili. Bai i gat sampela Baibel stadi projek bilong ol yangpela i ken mekim. Olgeta wan wan Wastaua Bilong Pablik bai i gat wanpela stori i kamapim sampela Baibel ves i skulim yumi long ol pasin bilong Jehova.
5 Mipela i beten askim Jehova long blesim dispela nupela samting bilong Wastaua. Mipela i laik bai planti man moa husat i gat gutpela bel i ken harim gutnius long rot bilong nius Wastaua na Kirap!—Mt. 10:11.