“Lukautim Gut Dispela Wok Yu Bin Kisim Long Bikpela”
“Lukautim gut dispela wok yu bin kisim long Bikpela, na yu mas mekim gut dispela wok.”— KL. 4:17.
1, 2. Ol Kristen i gat wanem wok bilong helpim ol manmeri?
YUMI gat bikpela wok bilong helpim ol manmeri i stap klostu long yumi. Ol disisen ol i mekim long nau i makim ol bai abrusim bagarap o ol bai kisim bagarap long taim bilong “bikpela hevi tru.” (KTH 7:14, NW) Man bilong raitim Buk Sindaun i tok: “Sapos kot i tok, na ol i laik kilim man i dai, orait yu mas i go kisim bek dispela man.” Em ol strongpela tok, a? Sapos yumi no mekim wok bilong givim tok lukaut long ol man long ol samting inap painim ol, dispela inap mekim na yumi gat asua long blut bilong ol. Dispela hap bilong Baibel i tok moa: “Nogut yu tok olsem, ‘I no samting bilong mipela [“mipela i no bin save long dispela,” NW].’ Bikpela i save lukautim yu gut na i save skelim gut olgeta tingting bilong yu. Na em i save long as bilong dispela tok bilong yu. Na em bai i bekim pasin long olgeta man wan wan olsem pe bilong pasin ol i bin mekim.” Tru tumas, ol wokboi bilong Jehova i no inap tok “mipela i no bin save long” dispela bagarap i laik painim ol manmeri.—Snd. 24:11, 12.
2 Jehova i tingim laip i bikpela samting. Em i kirapim ol wokman bilong em long wok strong tru long helpim planti man long abrusim bagarap. Olgeta wan wan wokman bilong God i mas tokim ol man long tok bilong Baibel i helpim ol long kisim laip. Wok bilong yumi i wankain olsem bilong wanpela wasman husat i givim tok lukaut taim em i luksave long bagarap i laik kamap. Yumi no laik bai yumi gat asua long blut bilong ol man i stap long rot bilong kisim bagarap. (Ese. 33:1-7) Olsem na em i bikpela samting long yumi wok yet long “autim tok”!—Ritim 2 Timoti 4:1, 2, 5.
3. Dispela stadi na tupela stadi i kamap bihain long en bai skelim wanem ol samting?
3 Dispela stadi bai skelim olsem wanem yu ken winim ol hevi i laik pasim yu long mekim wok i helpim ol man long kisim laip, na olsem wanem yu ken helpim planti manmeri moa. Stadi i kamap bihain long dispela bai skelim olsem wanem yu ken skulim gut ol man long ol tok i tru. Namba tri stadi bai kamapim sampela ripot long ol gutpela samting wok bilong autim tok bilong Kingdom long olgeta hap bilong graun i bin kamapim. Tasol paslain long yumi skelim ol dispela tok, i gutpela long skelim bilong wanem yumi mas tingim tru dispela taim nau yumi stap long en.
As na Planti i No Wetim Gutpela Samting
4, 5. Wanem ol samting i wok long painim ol manmeri? Planti man i save pilim olsem wanem taim hevi i painim ol?
4 Ol samting i wok long kamap long graun i soim olsem yumi stap long taim we pasin bilong “dispela graun i laik pinis” na pinis i klostu tru. Ol manmeri i pilim ol samting em Jisas na ol disaipel bilong em i tok ol dispela samting i makim “taim bilong las de.” Ol dispela bikpela hevi em ol woa, hangre, graun i guria, na ol narapela bikpela bagarap i save putim bikpela hevi long ol man. Planti man i save sakim lo, tingim ol yet tasol, na mekim ol narapela pasin God i no laikim. Long ol manmeri i wok strong long bihainim ol lo bilong Baibel, long ol tu dispela taim nau em taim bilong “planti hevi nogut tru.”—Mt. 24:3, 6-8, 12; 2 Ti. 3:1-5.
5 Tasol planti manmeri i no save long mining tru bilong ol dispela samting i wok long kamap long graun. Dispela i mekim na planti man i tingting planti long seifti bilong ol yet na bilong famili bilong ol. Taim wanpela long famili i dai o narapela bikpela hevi i painim ol man, bel bilong ol i bagarap stret. Sapos ol dispela man i no gat stretpela save long as na ol dispela samting i wok long kamap na wanem samting bai stretim ol dispela hevi, orait ol i no gat gutpela samting bilong wetim.—Ef. 2:12.
6. Bilong wanem ‘Bikpela Babilon’ i no bin helpim ol lain bilong en?
6 ‘Bikpela Babilon,’ em olgeta lotu giaman, i no bin mekim gut bel bilong ol manmeri. Nogat tru. Long rot bilong ‘pasin pamuk bilong en,’ em i bin paulim planti manmeri na ol i no save long olsem wanem ol i ken pas gut wantaim God. Na tu, olsem wanpela pamukmeri, lotu giaman i bin pulim na bosim “ol king bilong graun.” Em i yusim ol bilip giaman na wok bilong ol spirit nogut bambai ol manmeri i stap daun long ol gavman. Olsem na lotu giaman i bin kisim strong long bosim ol man, tasol em i bin sakim tru ol tok i tru bilong Baibel.—KTH 17:1, 2, 5; 18:23.
7. Wanem samting i laik painim planti manmeri? Olsem wanem yumi ken helpim sampela?
7 Jisas i tok planti manmeri i wokabaut long bikpela rot i op tumas na i go long ples bilong lus. (Mt. 7:13, 14) Sampela manmeri i stap long dispela bikpela rot, long wanem, long laik bilong ol yet ol i bin sakim ol tok Baibel i skulim ol man long en. Tasol planti narapela i stap long dispela rot, long wanem, ol bikman bilong lotu i bin giamanim ol, o i no bin lainim ol long ol samting em Jehova i laik bai ol i mas mekim. Ating sampela bai senisim pasin bilong ol sapos wanpela i soim ol long Baibel i gat wanem as na ol i mas mekim olsem. Tasol ol manmeri i stap insait long Bikpela Babilon na ol man i wok yet long sakim ol lo bilong Baibel, ol bai kisim bagarap long taim bilong “bikpela hevi tru.”—KTH 7:14, NW.
No Ken “Lusim Wok Bilong Autim Gutnius”
8, 9. Taim ol man i birua long ol Kristen long taim bilong ol aposel, ol Kristen i mekim wanem? Bilong wanem ol i mekim olsem?
8 Jisas i tok ol disaipel bilong em bai autim gutnius bilong Kingdom na kamapim ol disaipel. (Mt. 28:19, 20) Olsem na long olgeta taim ol Kristen tru i bin tingim olsem bilong stap gut long God na kamapim bilip bilong ol, ol i mas insait long wok autim tok. Ol disaipel bilong Jisas long bipo i no lusim wok autim tok, maski ol man i birua long ol. Ol i bilip olsem Jehova bai strongim ol, na ol i beten askim em long helpim ol long ‘strong tru long autim tok bilong em, na no ken pret.’ Jehova i harim beten bilong ol, na em i givim holi spirit long ol, na ol i autim tok bilong God na ol i no pret.—Ap. 4:18, 29, 31.
9 Taim ol man i kirap paitim ol disaipel bilong Jisas, yu ting ol i no strong moa long autim gutnius? Nogat, i no olsem. Ol bikman bilong lotu Juda i les tru long wok bilong ol aposel long autim tok, na ol i holim ol, tok long bagarapim ol, na wipim ol. Tasol ol aposel “i no lusim wok bilong autim gutnius. Nogat. Ol i tokaut klia olsem, Jisas em i dispela man God i bin promis long salim i kam.” Ol i save olsem ol i mas ‘bihainim tok bilong God tasol. Ol i no ken bihainim tok bilong ol man.’—Ap. 5:28, 29, 40-42.
10. Wanem ol traim i painim ol Kristen long nau? Gutpela pasin bilong ol inap kamapim wanem samting?
10 Planti wokman bilong God long nau i no bin karim hevi long han bilong ol man i paitim o kalabusim ol long wanem ol i autim tok, nogat. Tasol ol hevi na traim i save painim olgeta Kristen tru. Olsem: Maus bilong bel bilong yu inap kirapim yu long bihainim pasin em planti man i no laikim o i mekim na yu stap narapela kain. Ating ol wanwok, wanskul, o neiba i ting yu narakain man, long wanem, ol stiatok bilong Baibel i as bilong ol disisen yu mekim. Tasol tingting kranki bilong ol i no ken pasim yu. Ol manmeri bilong dispela graun i stap long tudak long ol samting bilong spirit, tasol ol Kristen i mas ‘stap olsem lait.’ (Fl. 2:15) Ating sampela man i gat gutpela bel ol bai lukim gutpela pasin bilong yu na dispela bai kirapim ol long litimapim nem bilong Jehova.—Ritim Matyu 5:16.
11. (a) Sampela man inap mekim wanem taim yumi autim tok? (b) Wanem kain hevi i bin painim aposel Pol, na em i mekim wanem?
11 Yumi mas i gat strongpela bel bambai yumi ken wok yet long autim tok bilong Kingdom. Sampela man, na ol wanblut tu, inap tok bilas long yu o long sampela narapela rot ol i traim long daunim yu. (Mt. 10:36) Planti taim ol man i bin paitim aposel Pol, long wanem, em i stap gut long wok bilong autim tok. Tingim pasin em i mekim taim ol man i birua long em. Em i tok: “Mipela i bin kisim pen, na ol i bagarapim bodi bilong mipela. Tasol taim mipela i kam long yupela, God bilong yumi em i strongim bel bilong mipela, na mipela i no surik long ol dispela birua. Nogat. Mipela i sanap strong na mipela i autim gutnius bilong God long yupela.” (1 Te. 2:2) Pol i mas i gat strongpela bel bambai em i ken wok yet long autim gutnius bihain long ol man i bin holim em, rausim klos bilong em, paitim em long kanda, na putim em long kalabus. (Ap. 16:19-24) Wanem samting i bin strongim bel bilong em long mekim yet wok autim tok? Em strongpela laik bilong em long mekim wok autim tok em wok God i bin givim long em.—1 Ko. 9:16.
12, 13. Sampela i mas karim wanem ol hevi? Ol i bin mekim wanem bilong winim ol dispela hevi?
12 Ating em i hatwok long holimpas pasin bilong givim bel long wok autim tok long ol teritori we planti man i no stap long haus o ol i no laik harim tok bilong Kingdom. Yumi ken mekim wanem long kain taim olsem? Ating yumi mas strongim bel bambai yumi ken autim tok long kain kain taim na ples. Na tu, ating yumi mas autim tok long narapela taim o autim tok moa long ol hap we yumi inap bungim planti man.—Skelim Jo. 4:7-15; Ap. 16:13; 17:17.
13 Sampela narapela hevi em planti i mas karim em ol i go lapun o sik i painim ol, em dispela samting inap pasim ol na ol i no inap mekim bikpela wok bilong autim tok. Sapos yu gat dispela hevi, yu no ken bel hevi. Jehova i save long skel bilong yu na em i amamas long ol samting yu inap mekim. (Ritim 2 Korin 8:12.) Maski wanem ol hevi i painim yu—ol man i birua long yu, ol i les long harim tok yu autim, o yu gat sik—mekim olgeta samting yu inap mekim bilong autim gutnius long ol narapela man.—Snd. 3:27; skelim Mk. 12:41-44.
‘Lukautim Gut Wok Yu Bin Kisim’
14. Aposel Pol i stap wanem kain piksa long ol wanbilip Kristen i ken bihainim? Em i givim wanem tok?
14 Aposel Pol i givim bel tru long mekim wok autim tok, na em i strongim ol wanbilip long mekim wankain samting. (Ap. 20:20, 21; 1 Ko. 11:1) Wanpela man em Pol i bin strongim tru em Arkipus, wanpela Kristen long taim bilong ol aposel. Long pas em i raitim long ol Kolosi, Pol i tok: “Yupela tokim Arkipus olsem, ‘Yu mas lukautim gut dispela wok yu bin kisim long Bikpela, na yu mas mekim gut dispela wok.’ ” (Kl. 4:17) Yumi no save Arkipus em i husat o em i gat wanem kain sindaun, tasol i luk olsem em i bin kisim wok bilong autim tok. Sapos yu wanpela Kristen i dediket pinis, yu tu i kisim wok bilong autim tok. Olsem wanem? Yu wok long lukautim gut dispela wok bambai yu ken mekim gut?
15. Wanem samting i insait long dediket Kristen? Dispela i kirapim yumi long mekim wanem ol askim?
15 Paslain long yumi kisim baptais, yumi bin dediketim laip bilong yumi long Jehova long rot bilong beten. Dispela i makim olsem yumi tingting strong long mekim laik bilong em. Olsem na i gutpela yumi askim yumi yet, ‘Tru tru pasin bilong mekim laik bilong God i nambawan bikpela samting long laip bilong mi?’ Ating yumi gat kain kain wok Jehova i laik yumi mas mekim—olsem wok bilong lukautim famili bilong yumi. (1 Ti. 5:8) Tasol yumi save mekim wanem long hap taim na strong yumi no pinisim long wok? Wanem samting i nambawan bikpela samting long laip bilong yumi?—Ritim 2 Korin 5:14, 15.
16, 17. Ol yangpela Kristen o ol narapela husat i no gat planti narapela wok ol i mas mekim, ol i ken tingting long mekim wanem?
16 Olsem wanem? Yu wanpela yangpela Kristen i dediket pinis na yu pinisim skul o klostu nau bai yu pinisim? Ating yu no gat yet ol bikpela wok bilong lukautim famili. Olsem na yu tingting long mekim wanem long laip bilong yu? Wanem ol disisen bai helpim yu long inapim gut tok promis bilong yu long mekim laik bilong Jehova? Planti ol i bin stretim ol samting long sindaun bilong ol bambai ol i ken mekim wok painia, na long dispela rot ol i bin kisim bikpela amamas na stap belgut.—Sav. 12:1.
17 Ating yu wanpela yangpela man o meri. Yu mekim wok mani fultaim, tasol yu no gat planti narapela wok yu mas mekim, ating wok bilong lukautim yu yet tasol. Yu save amamas long insait long ol wok bilong kongrigesen inap long mak bilong sediul bilong yu. Yu ting amamas bilong yu inap go bikpela moa? Yu bin tingting long mekim bikpela wok moa bilong autim tok? (Sng. 34:8; Snd. 10:22) Long sampela teritori i gat bikpela wok yet long mekim bilong tokim olgeta man long dispela tok i helpim ol long kisim laip. Olsem wanem? Yu inap stretim ol samting long sindaun bilong yu na wok long hap i sot long ol man bilong autim tok bilong Kingdom?—Ritim 1 Timoti 6:6-8.
18. Tupela yangpela marit i bin mekim wanem ol senis long sindaun bilong ol? Wanem samting i kamap?
18 Tingim stori bilong Kevin na Elena, ol i bilong Amerika.a Olsem planti nupela marit long hap bilong ol i save mekim, ol i ting ol i mas baim haus bilong ol. Tupela wantaim i mekim wok fultaim na ol i gat gutpela sindaun. Tasol wok mani na ol wok bilong haus i mekim na ol i no gat bikpela hap taim bilong autim tok. Ol i luksave olsem ol i lusim klostu olgeta taim na strong bilong ol bilong lukautim ol samting bilong ol. Tasol taim ol i lukim sindaun bilong tupela painia marit i stap amamas em ol i no gat planti samting bilong skin, Kevin na Elena i wokim disisen long putim narapela samting i stap nambawan samting long laip bilong ol. Ol i beten askim Jehova long stiaim ol samting ol i laik mekim, na ol i salim haus bilong ol na go sindaun long wanpela flet. Elena i daunim ol aua bilong mekim wok mani na em i kamap wanpela painia. Ol gutpela ekspiriens bilong Elena i strongim Kevin, na em i lusim wok mani fultaim bilong em na kirap mekim wok painia. Bihain, ol i go sindaun long wanpela kantri long Saut Amerika bilong mekim wok long hap i sot long ol man bilong autim tok bilong Kingdom. Kevin i tok: “Oltaim mitupela i bin stap amamas wantaim long marit bilong mipela, tasol taim mipela i wok long inapim ol mak bilong mekim bikpela wok moa bilong God, amamas bilong mipela i kamap bikpela moa.”—Ritim Matyu 6:19-22.
19, 20. Bilong wanem wok bilong autim gutnius i nambawan bikpela wok long nau?
19 Wok bilong autim gutnius em i nambawan bikpela wok bilong mekim long nau. (KTH 14:6, 7) Dispela wok i helpim wok bilong mekim holi nem bilong Jehova. (Mt. 6:9) Long olgeta yia tok bilong Baibel i mekim sindaun bilong planti tausen man i kamap gutpela moa, em ol man i kirap bihainim tok bilong en, na nau God i ken kisim bek ol. Tasol aposel Pol i tok: “Sapos i no gat wanpela i autim tok long ol, olsem wanem bai ol i harim?” (Ro. 10:14, 15) Tru tumas, ol bai no inap harim sapos i no gat ol man bilong autim tok. Gutpela sapos yu tingting strong long mekim olgeta samting yu inap mekim bilong inapim wok autim tok bilong yu.
20 I gat narapela rot na yu ken helpim ol man long tingim tru dispela taim nau yumi stap long en na long save long ol samting disisen bilong ol bai mekim long ol, em long rot bilong mekim gutpela wok tisa. Stadi i kamap bihain long dispela bai skelim olsem wanem yu ken mekim olsem.
[Futnot]
a Mipela i senisim ol nem.
Bai Yu Bekim Olsem Wanem?
• Ol Kristen i gat wanem wok bilong helpim ol manmeri?
• Yumi mas mekim wanem taim ol hevi i laik pasim yumi long mekim wok autim tok?
• Olsem wanem yumi ken mekim gut wok autim tok yumi bin kisim?
[Piksa long pes 5]
Yumi mas i gat strongpela bel bambai yumi ken autim tok taim ol man i birua long yumi
[Piksa long pes 7]
Yu ken mekim wanem sapos yu autim tok long hap we planti man i no stap long haus?