Yupela Inap Tru Long i Stap Insait Long Kingdom
“God i soim yumi olsem, em i mekim stretpela pasin tasol na em i skelim pasin bilong yumi. . . . Na God bai i mekim yupela inap tru long i stap insait long kingdom bilong em.”—2 TE. 1:5.
1, 2. God bai mekim kot bilong em olsem wanem? Husat bai mekim dispela kot?
LONG yia 50 C.E. samting aposel Pol i stap long Atens. Em i lukim planti god giaman i stap long Atens na dispela i mekim bel bilong en i nogut tru, na em i kirap mekim gutpela wok tru long autim tok. Em i pinisim tok bilong em wantaim wanpela tok ating ol man bilong lotuim ol god giaman i kirap nogut long en. Em i tok: “Nau [God] i tok strong long olgeta man long olgeta ples i mas tanim bel. Em i makim pinis wanpela de bilong em bai i kotim ol manmeri. Na long stretpela pasin bilong en, em bai i skelim pasin bilong olgeta manmeri bilong graun. Na em i bin makim wanpela man bilong bosim dispela kot. Dispela man i bin dai na God i kirapim em bek long matmat. Olsem na yumi ken bilip tru long God i bin givim dispela wok long em.”—Ap. 17:30, 31.
2 Em i bikpela samting long yumi mas tingim olsem God i makim pinis wanpela de bilong kotim ol manmeri. Long tok Pol i mekim long Atens, em i no kolim nem bilong dispela man husat bai mekim kot, tasol yumi save olsem dispela man em Jisas Krais husat i bin kirap bek. Dispela kot Jisas bai mekim bai makim olsem man bai kisim laip o indai.
3. Bilong wanem Jehova i wokim kontrak wantaim Abraham? Husat i gat bikpela wok insait long truim bilong en?
3 Dispela kot bai kamap insait long 1,000 yia. Jisas, em King bilong Kingdom Bilong God, bai mekim dispela kot long nem bilong Jehova, tasol em wanpela tasol bai i no mekim dispela wok. Jehova i makim sampela manmeri namel long olgeta man bilong graun long mekim wok king wantaim Jisas na skelim ol manmeri long dispela taim bilong 1,000 yia. (Skelim Lu. 22:29, 30.) Inap 4,000 yia i go pinis, Jehova i stretim rot bilong dispela De Bilong Kot taim em i wokim kontrak wantaim gutpela wokman bilong em Abraham. (Ritim Stat 22:17, 18.) Dispela kontrak i kirap long 1943 B.C.E. Abraham i no kliagut long dispela kontrak bai mekim wanem long ol man. Tasol yumi long nau i save olsem long rot bilong dispela kontrak lain tumbuna pikinini bilong Abraham i gat bikpela wok insait long truim bilong ol samting God i laik mekim bilong skelim ol man.
4, 5. (a) Husat i namba wan bilong lain pikinini bilong Abraham? Em i tok wanem long Kingdom? (b) Wanem taim rot i op long ol man i ken insait long Kingdom?
4 Namba wan bilong lain pikinini bilong Abraham em Jisas. Long 29 C.E. God i kapsaitim holi spirit long em na em i kamap Mesaia o Krais. (Ga. 3:16) Inap 3 na hap yia Jisas bai autim gutnius bilong Kingdom long ol lain Juda. Bihain long ol i holim Jon Bilong Baptais, Jisas i soim olsem ol narapela i ken insait long dispela Kingdom taim em i tok: “Stat long taim Jon Bilong Baptais i autim tok na i kam inap nau, ol strongpela man bilong pait i bin wok strong long kisim kingdom bilong heven, na ol i bin mekim olkain pasin bilong pait na givim planti hevi long en.”—Mt. 11:12.
5 Paslain liklik long Jisas i stori long ol man husat bai ‘kisim’ Kingdom bilong heven, Jisas i tok: “Mi tok tru long yupela, Jon Bilong Baptais em i winim olgeta man i bin kamap long graun. Tasol man i stap liklik tru long kingdom bilong heven, em i winim Jon.” (Mt. 11:11) Bilong wanem em inap tok olsem? Long wanem, paslain long ol i kisim holi spirit long Pentikos 33 C.E. rot i no op yet long ol man i stap gut long God i insait long Kingdom. Long dispela taim Jon Bilong Baptais i dai pinis.—Ap. 2:1-4.
God i Kolim Lain Tumbuna Pikinini Bilong Abraham Olsem Stretpela Manmeri
6, 7. (a) Olsem wanem lain pikinini bilong Abraham bai “kamap planti tru olsem ol sta bilong skai”? (b) Abraham i kisim wanem blesing? Lain pikinini bilong em i kisim wanem blesing?
6 God i tokim Abraham olsem em bai mekim ol lain tumbuna pikinini bilong em i “kamap planti tru olsem ol sta bilong skai” na olsem wesan bilong nambis. (Stt. 13:16; 22:17) Dispela tok i makim olsem long taim bilong Abraham ol man bilong graun i no inap save hamas manmeri bai insait long dispela lain. Tasol bihain God i tokaut long namba stret bilong ol man bai insait long dispela lain, em Jisas wantaim 144,000 manmeri.—KTH 7:4; 14:1.
7 Baibel i stori long bilip bilong Abraham olsem: “Abram i bilipim tok bilong Bikpela. Olsem na Bikpela i kolim em stretpela man.” (Stt. 15:5, 6) Tru, i no gat wanpela man bilong graun i stretpela olgeta. (Jem. 3:2) Tasol maski i olsem, strongpela bilip bilong Abraham i mekim na Jehova i mekim ol samting long em olsem em i stretpela olgeta, na tu, Jehova i kolim Abraham olsem pren bilong em. (Ais. 41:8) Bilong truim tok promis God i bin mekim long Abraham, God i kolim lain 144,000 olsem stretpela manmeri.
8. Ol lain pikinini bilong Abraham bai kisim wanem ol gutpela samting?
8 Ol Kristen em God i bin makim, em i kolim ol stretpela manmeri, long wanem, ol i bilip long ofa bilong Jisas bilong baim bek ol man. (Ro. 3:24, 28) Long ai bilong Jehova, ol i no pas moa long sin na God i ken makim ol long holi spirit na bai ol i stap ol pikinini spirit bilong God, na ol brata bilong Jisas Krais. Ol i insait long nupela kontrak na ol i kamap nupela lain, em “lain Israel tru bilong God.” (Ga. 6:16; Lu. 22:20) Man! Em ol gutpela samting tru ol i kisim. God i mekim ol dispela samting bilong helpim ol, na ol Kristen God i bin makim ol i no tingting long i stap laip oltaim long graun. Nogat. Ol i orait long lusim dispela laip oltaim long graun bilong ol i ken kisim bikpela amamas long wok wantaim Jisas long taim bilong De Bilong Kot na wok king wantaim Jisas long heven.—Ritim Rom 8:17.
9, 10. (a) Wanem namba wan taim holi spirit i kapsait antap long ol Kristen? Bihain ol i mas mekim wanem? (b) Ol Kristen God i bin makim i kisim wanem helpim?
9 Long Pentikos 33 C.E., rot i op long sampela gutpela manmeri long insait long lain bai mekim wok king wantaim Jisas long De Bilong Kot. Holi spirit i kapsait antap long 120 disaipel bilong Jisas na ol i kamap namba wan lain Kristen em God i bin makim. Tasol dispela em kirap tasol bilong ol samting ol i mas mekim. Kirap long dispela taim na i go, ol i mas kamapim klia olsem ol bai stap gut long Jehova maski Satan i givim ol traim na hevi long ol. Ol i mas holim strong bilip bilong ol i go inap long taim ol i dai na bai ol i ken kisim laip long heven.—KTH 2:10.
10 Bilong ol i ken mekim olsem, long rot bilong Baibel na kongrigesen Kristen, Jehova i givim tok bilong helpim ol long sanap strong. Aposel Pol i raitim pas long ol Kristen God i bin makim long Tesalonaika, na i tok: “Olsem papa i save mekim long ol pikinini bilong en, na mipela i mekim tok bilong kirapim tingting bilong yupela na strongim bel bilong yupela. Na mipela i tokaut long yupela i mas wokabaut long pasin inap tru long pasin bilong God yet, em God i bin singautim yupela long kam insait long kingdom bilong en na kisim gutpela sindaun tru long heven.”—1 Te. 2:11, 12.
11. Jehova i givim wanem samting long “lain Israel tru bilong God”?
11 Kirap long namba wan taim holi spirit i makim ol Kristen na i go inap 60 yia samting bihain long en, Jehova i ting i stret long kirapim ol man long raitim stori bilong wok bilong Jisas na ol samting Em i mekim na ol tok em i givim long ol Kristen em God i bin makim. Olsem na Jehova i kamapim Ol Skripsa Grik na bungim wantaim Ol Skripsa Hibru em ol man i bin raitim pinis. Ol Skripsa Hibru i bilong helpim lain Israel bilong skin long taim ol i stap lain manmeri tru bilong God. Ol Skripsa Grik i bilong helpim “lain Israel tru bilong God,” em ol man God i bin makim long holi spirit long kamap brata bilong Krais na ol pikinini bilong God. Tasol dispela i no makim olsem ol man em ol i no bilong lain Israel ol i no inap kisim gutpela helpim taim ol i stadi long Ol Skripsa Hibru, nogat. Olsem tasol, ol Kristen em holi spirit i no makim ol, ol tu i kisim gutpela helpim taim ol i stadi na bihainim ol tok i stap long Ol Skripsa Grik.—Ritim 2 Timoti 3:15-17.
12. Pol i kirapim ol Kristen God i bin makim long tingim wanem samting?
12 God i kolim ol Kristen long taim bilong ol aposel olsem ol stretpela manmeri na em i kapsaitim holi spirit long ol bambai ol i ken kisim laip long heven. Tru, God i makim ol, tasol taim ol i stap yet long graun ol i no kisim wok king na kirap bosim ol arapela wanbilip Kristen em God i bin makim, nogat. Sampela Kristen long bipo i no tingim dispela samting na ol i kirap mekim ol samting bilong kisim biknem insait long kongrigesen. Dispela i mekim na Pol i tok: “O yes, ating yupela i pulap pinis long ol gutpela samting. Ating yupela i gat olgeta samting na yupela i stap gut tru. Ating yupela i winim mipela pinis na i kamap olsem ol king. O sori, mi laikim tumas bai yupela i stap king tru, bai mipela tu i ken i stap king wantaim yupela.” (1 Ko. 4:8) Olsem na Pol i tokim ol Kristen em God i bin makim long taim bilong em, na i tok: “Mi no tok olsem mipela i bosim bilip bilong yupela. Nogat. . . . Mipela i save wok wantaim bilong kamapim amamas bilong yupela.”—2 Ko. 1:24.
Inapim Dispela Namba
13. Wok bilong singautim ol Kristen God i makim i bin kamap olsem wanem bihain long 33 C.E.?
13 God i no makim olgeta 144,000 Kristen long taim bilong ol aposel tasol, nogat. Em i wok long makim ol kirap long taim bilong ol aposel na insait long planti handet yia bihain em i makim wan wan Kristen tasol. Tasol God i wok long makim yet sampela i kam inap long taim bilong yumi. (Mt. 28:20) Bihain, taim Jisas i kirap mekim wok king long 1914, ol samting i wok long kamap hariap.
14, 15. Wanem ol samting i kamap long wok bilong bungim ol Kristen God i bin makim long taim bilong yumi?
14 Pastaim, Jisas i rausim olgeta lain long heven em ol i birua long wok king bilong God. (Ritim Kamapim Tok Hait 12:10, 12.) Orait bihain em i kirap bungim ol manmeri bilong inapim dispela namba 144,000, em ol manmeri husat bai mekim wok king wantaim em long Kingdom. Long yia 1935 samting, dispela wok i klostu pinis na planti man i harim tok bilong Kingdom i no gat laik long i go long heven. Holi spirit i no givim tingting long ol olsem ol i pikinini bilong God. Nogat. (Skelim Ro. 8:16.) Ol i luksave olsem ol i bilong lain “arapela sipsip,” em ol bai i stap oltaim long Paradais long graun. (Jo. 10:16) Olsem na bihain long 1935 ol i wok strong long autim tok na bungim “planti manmeri,” em lain aposel Jon i lukim long driman em ol bai abrusim taim bilong “bikpela hevi tru.”—KTH 7:9, 10, 14.
15 Tasol insait long ol yia bihain long 1935 samting, God i bin makim sampela long i go long heven. Bilong wanem? Ating sampela bilong ol em God i makim bilong senisim sampela arapela em ol i lusim bilip. (Skelim KTH 3:16.) Pol i stori long sampela manmeri em yet i save long ol, em ol i lusim tok i tru. (Fl. 3:17-19) Jehova bai singautim husat long senisim ol dispela man? Em samting bilong Jehova yet long makim. Tasol yumi ken ting olsem em bai i no inap singautim ol man em nau tasol ol i kisim save long tok i tru, nogat. Ating em bai singautim ol man—wankain olsem ol disaipel em Jisas i toktok wantaim ol long taim em i kirapim bung bilong Memorial—em ol i kamapim klia olsem ol i stap gut long Jehova.a—Lu. 22:28.
16. Bilong wanem yumi amamas long ol Kristen God i bin makim? Yumi ken bilip tru long wanem samting?
16 Tasol i luk olsem i no olgeta man em Jehova i singautim ol i go long heven kirap long 1935 samting na i kam, ol i senisim ol arapela husat i lusim tok i tru. Yumi ken ting olsem Jehova i mekim ol samting na bai i gat sampela bilong ol Kristen em i bin makim i stap yet wantaim yumi i go inap long bagarap i painim “Bikpela taun Babilon.”b (KTH 17:5) Yumi ken bilip tru olsem wok bilong bungim 144,000 manmeri bai pinis long taim Jehova yet i makim, na olgeta bai i go long heven bilong mekim wok king long Kingdom. Na yumi ken bilip tu olsem tok profet long bikpela lain manmeri em ol i wok long i go bikpela, ol tu bai wok yet long holim strong bilip bilong ol. Klostu nau bikpela lain bai abrusim “bikpela hevi tru” i painim dispela graun bilong Satan na ol bai amamas long i go insait long nupela taim God bai kamapim.
Wok Bilong Bungim Ol Man Long Gavman Bilong Heven i Klostu Pinis!
17. Wanem samting i painim ol Kristen em God i bin makim olsem 1 Tesalonaika 4:15-17 na Kamapim Tok Hait 6:9-11 i tok?
17 Kirap long 33 C.E. na i kam, planti tausen Kristen God i bin makim ol i strong long kamapim na holimpas bilip bilong ol i go inap long taim ol i dai. God i tok ol inap tru long i stap insait long Kingdom na i luk olsem stat long kirap bilong taim Krais i kam bek na i stap king, ol i kirap bek na kisim laip long heven.—Ritim 1 Tesalonaika 4:15-17; Kamapim Tok Hait 6:9-11.
18. (a) Ol Kristen em God i makim na ol i stap yet long graun ol i bilip strong long wanem samting? (b) Ol arapela sipsip i gat wanem tingting long ol brata Kristen bilong ol em God i bin makim?
18 Ol Kristen God i bin makim em ol i stap yet long graun, ol i bilip tru olsem sapos ol i holimpas bilip, klostu ol tu bai kisim laip long heven. Planti milion arapela sipsip, taim ol i tingim bilip bilong ol brata bilong ol em spirit holi i makim ol, ol i wanbel long dispela tok aposel Pol i mekim long ol Tesalonaika. Em i tok: “Taim mipela i go nabaut long ol sios bilong God, mipela i save litimapim nem bilong yupela. . . . Na mipela i save tok olsem, ‘Ol Tesalonaika i save sanap strong na holimpas bilip bilong ol na karim olgeta dispela hevi na pen.’ Long ol dispela samting i kamap long yupela, God i soim yumi olsem, em i mekim stretpela pasin tasol na em i skelim pasin bilong yumi. Yupela i karim pen, long wanem, yupela i laik kirapim kingdom bilong God, na God bai i mekim yupela inap tru long i stap insait long kingdom bilong em.” (2 Te. 1:3-5) Taim laspela man long lain Kristen God i bin makim i dai, dispela bai inapim namba bilong ol man long gavman bilong God long heven. Man! Em bai taim bilong amamas—long heven na long graun wantaim.
[Ol Futnot]
a Lukim Wastaua bilong Mas 1, 1992, pes, 20, paragraf 17.
b Lukim “Askim” long Wastaua bilong Me 1, 2007.
Yu Inap Stori Long Dispela?
• God i tokim Abraham long wanem samting bilong De Bilong Kot?
• Bilong wanem Jehova i kolim Abraham stretpela man?
• God i kolim ol lain tumbuna pikinini bilong Abraham olsem stretpela manmeri na dispela i mekim wanem long ol?
• Olgeta Kristen i bilip long wanem samting?
[Piksa long pes 20]
Jisas i kirapim ol disaipel bilong em long mekim wok bilong Kingdom
[Piksa long pes 21]
Long Pentikos 33 C.E., Jehova i kirap makim ol namba tu hap lain pikinini bilong Abraham
[Ol Piksa long pes 23]
Ol arapela sipsip i amamas olsem sampela bilong ol Kristen God i bin makim i stap yet wantaim ol long dispela taim bilong las de