Olsem Wanem Dai Bilong Jisas Inap Kisim Bek Yu?

KLOSTU 2,000 yia i go pinis, long Pasova bilong ol Juda long yia 33 C.E., wanpela man i no gat asua em i dai bambai ol narapela man i ken i stap laip. Husat dispela man? Em Jisas bilong taun Nasaret. Na husat inap kisim helpim long dai bilong em? Olgeta lain manmeri bilong graun. Wanpela ves bilong Baibel i stori gut long dispela ofa bilong helpim ol man, em i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.”​—Jon 3:16.

Tru, planti man i save long dispela ves, tasol i no planti i save long mining bilong en. Ol i tingting: Bilong wanem Krais i mas i dai bilong helpim yumi? Olsem wanem dai bilong wanpela man inap kisim bek ol man na bai indai i no ken kalabusim ol inap oltaim oltaim? Baibel i kamapim klia ol gutpela bekim bilong ol dispela askim.

Dai i Kamap Olsem Wanem?

Sampela man i bilip olsem God i bin wokim ol man bilong i stap sotpela taim tasol long graun, na karim sampela hevi, na kisim sampela amamas, na bihain ol i dai na go long narapela ples i gutpela moa. Dispela kain tingting i makim olsem em laik bilong God na ol man i mas i dai. Tasol Baibel i soim olsem i gat narapela as na dai i painim ol man. Em i tok: “Wanpela man i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.” (Rom 5:12) Dispela ves i soim olsem, sin i mekim na ol man i dai. Tasol husat dispela “wanpela man” i bin mekim sin na dai kisim olgeta man bilong graun?

Buk The World Book Encyclopedia i tok, planti saientis i bilip olsem olgeta man i bin kamap long wanpela rot tasol, na Baibel i kamapim klia dispela rot​—em dispela “wanpela man.” Long Stat 1:​27, Baibel i tok: “God i wokim ol manmeri na ol i kamap olsem God yet. God i mekim ol i kamap man na meri.” Olsem na Baibel i kamapim olsem namba wan man na meri ol i nambawan gutpela samting em God i Gat Olgeta Strong i bin wokim.

Buk Stat i kamapim sampela stori moa long i stap bilong ol man bihain long taim God Jehova i bin wokim namba wan man. Long dispela stori olgeta, God i no bin toktok long dai​—em i tok tasol olsem, sapos man i no bihainim tok, em bai i dai. (Stat 2:​16, 17) God i laik bai ol manmeri i ken sindaun long naispela ples paradais long graun, na stap amamas na no gat sik i go inap oltaim oltaim. Em i no laik bai ol i go lapun na sik na bihain ol i dai. Orait, olsem wanem dai i kisim olgeta man?

Stat sapta 3 i stori long namba wan man na meri i bikhet na sakim tok bilong Man i givim laip long ol, em God Jehova. Olsem na God i givim strafe long ol olsem em i bin tokaut pinis long en. Em i tokim Adam: “Mi bin wokim yu long graun, na bai yu go bek gen long graun.” (Stat 3:​18, 19) Olsem God i tok pinis, bihain dispela man na meri i bin bikhet ol i dai.

Tasol dai i no painim namba wan man na meri tasol. Bikhet bilong tupela i mekim na olgeta pikinini bilong ol i no gat rot moa long kisim laip i gutpela olgeta. Olgeta pikinini bilong tupela i no kamap yet ol i insait long samting God i tingting pinis long mekim taim em i bin tokim Adam na Iv: “Yupela i mas kamap planti na i go sindaun long olgeta hap bilong graun na bosim olgeta samting i stap long en. Mi putim ol pis na ol pisin na olkain animal bilong graun aninit long yupela.” (Stat 1:28) Bihain ol manmeri bai pulap long graun na ol bai stap amamas tru na ol i no ken i dai. Tasol tumbuna bilong ol, Adam​—em dispela “wanpela man”​—em i givim sin long ol na ol i kalabus long sin, na bihain ol i mas i dai. Aposel Pol, em tumbuna pikinini bilong Adam, em i tok: “Sin i kalabusim mi na mi stap wokboi nating bilong em.”​—Rom 7:14.

Long nau ol raskol i bagarapim sampela piksa i gat bikpela pe tru, na olsem tasol, taim Adam i bin mekim sin em i bagarapim nambawan gutpela wok bilong God, em ol manmeri bilong graun. Ol pikinini bilong Adam i gat ol pikinini bilong ol yet, na bihain ol i gat ol tumbuna pikinini, i go i go olsem. Olgeta wan wan lain ol i kamap na i go bikpela na kamapim ol pikinini na bihain ol i dai. Bilong wanem olgeta i dai? Long wanem, ol i tumbuna pikinini bilong Adam. Baibel i tok: “Sin bilong wanpela man i mekim na ol arapela manmeri i save dai.” (Rom 5:15) Sik, lapun, laik nogut bilong skin, na dai tu, em ol samting nogut i bin kamap long pasin Adam i bin mekim taim em i rongim famili bilong em yet. Yumi olgeta i insait long dispela famili.

Long pas aposel Pol i raitim long ol Kristen long Rom, em i stori long ol manmeri bilong graun​—na em tu​—ol i stap tarangu tru na i hatwok long daunim ol samting nogut sin i mekim long ol. Em i tokaut olsem: “O sori, dispela hevi i bagarapim tru tingting bilong mi! Husat bai i helpim mi na mi lusim dispela bodi bilong i dai?” Em wanpela gutpela askim, a? Husat bai helpim Pol​—na ol narapela man i gat dispela laik​—long lusim kalabus bilong sin na dai? Pol yet i bekim dispela askim na i tok: “Mi tenkyu long God! Long han bilong Jisas Krais, Bikpela bilong yumi, em bai i helpim mi.” (Rom 7:​14-​25) Tru tumas, Man Bilong Wokim yumi i stretim rot pinis bilong kisim bek yumi long rot bilong Pikinini bilong em, Jisas Krais.

Wok Bilong Jisas Long Kisim Bek Ol Man

Jisas i stori long wok bilong em long kisim bek ol man long kalabus bilong sin i save kamapim dai. Em i tok: “Pikinini Bilong Man . . . i kam bilong . . . givim laip bilong em bilong baim bek planti manmeri.” (Matyu 20:28) Olsem wanem laip bilong Jisas i olsem pe bilong baim bek ol man? Indai bilong em i helpim yumi olsem wanem?

Baibel i tok Jisas “i no mekim sin,” na em i “no gat wanpela rong i stap long em.” Taim em i stap long graun, long olgeta taim em i bihainim stret Lo Bilong God. (Hibru 4:15; 7:26) Olsem na dai bilong Jisas i no bin kamap long rot bilong sin na pasin bikhet olsem dai bilong Adam i bin kamap, nogat. (Esekiel 18:4) Jisas i orait long i dai, maski em i no gat asua, bambai em i ken kamapim laik bilong Papa bilong em long kisim bek ol man bilong graun long sin na dai. Olsem yumi lukim pinis, long laik bilong em yet Jisas i kam “bilong givim laip bilong em bilong baim bek planti manmeri.” Long bikpela pasin laikim tru bilong em, winim olgeta narapela man bilong graun, na long laik bilong em yet, Jisas i “kisim ples bilong olgeta manmeri na i dai.”​—Hibru 2:9.

Dispela laip Jisas i bin lusim olsem ofa, em i wankain stret olsem laip Adam i bin lusim taim em i mekim sin. Wanem samting i kamap long dai bilong Jisas? Jehova i orait long kisim dispela ofa bilong “baim bek olgeta manmeri.” (1 Timoti 2:6) God i bin mekim wok long pe bilong laip bilong Jisas bilong baim bek, o kisim bek, ol man bilong graun long kalabus bilong sin na dai.

Planti taim Baibel i toktok long dispela bikpela pasin laikim God i bin mekim. Pol i toksave long ol Kristen olsem ‘God i bin baim bek ol long bikpela pe tumas.’ (1 Korin 6:20; 7:23) Pol i tok God i no bin mekim wok long gol o silva, nogat; em i mekim wok long blut bilong Pikinini bilong em bilong kisim bek ol Kristen long indai. (1 Pita 1:​18, 19) Long ofa bilong Krais bilong baim bek ol man, Jehova i stretim rot bilong kisim bek ol man long samting i painim olgeta manmeri​—dai bilong oltaim oltaim.

Ofa Bilong Krais Bai Helpim Yu?

Aposel Jon i stori long gutpela samting tru em ofa bilong Krais bai mekim long ol man, em i tok: “[Jisas Krais] yet i bin mekim wok bilong tekewe sin bilong yumi. Na em i no mekim dispela wok bilong helpim yumi tasol. Nogat. Em i mekim bilong helpim olgeta manmeri i stap long graun.” (1 Jon 2:2) Tru tumas, ofa bilong Jisas bilong baim bek ol man em inap helpim olgeta manmeri. Orait yu ting dispela i makim olsem olgeta man inap kisim gutpela samting long dispela ofa i gat bikpela pe tru bilong en? Nogat. Tingim stori i kamap paslain long dispela. Ol lain i laik helpim ol wokman i stap daunbilo tru insait long main, ol i bin salim wanpela waia bokis i go daun long ol, tasol olgeta wan wan yet i mas i go insait long en bilong abrusim bagarap. Na olsem tasol, sapos ol man i laik bai ofa bilong Krais i helpim ol, ol i no ken wet tasol long God i mekim gut long ol. Ol yet i mas kirap mekim sampela samting.

God i laik bai ol i mekim wanem? Jon 3:36 i tokim yumi: “Man i bilip long Pikinini, em i gat laip i stap gut oltaim oltaim. Tasol man i no bihainim tok bilong Pikinini, em bai i no inap kisim laip. Nogat. Belhat bilong God i stap long em.” God i laik bai yumi bilip long ofa bilong Krais. Na i gat sampela samting moa. “Sapos yumi bihainim ol lo bilong [Jisas], orait yumi ken save tru olsem, yumi save gut long em.” (1 Jon 2:3) Em nau, i klia tru olsem, bilong kisim bek yumi long sin na dai, yumi mas bilip long ofa bilong Krais bilong baim bek ol man na bihainim ol tok bilong Krais.

Wanpela bikpela rot bilong kamapim olsem yumi bilip long ofa bilong Krais, em yumi tingim dai bilong em, olsem em i bin tokim yumi long mekim, na yumi soim olsem yumi tenkyu long em. Klostu long taim Jisas i dai, em i kamapim wanpela kaikai bilong makim wanpela samting, na em i tokim ol gutpela aposel bilong em: “Yupela i mas mekim olsem bilong tingim mi.” (Luk 22:19) Ol Witnes Bilong Jehova i bihainim dispela tok, na ol i ting em i gutpela samting tru long ol i ken i stap pren bilong Pikinini Bilong God. Long dispela yia, bung bilong tingim dai bilong Jisas Krais bai kamap long Sarere, Mas 22, taim san i go daun pinis. Mipela i laik singautim yu long kam long dispela bung olsem Jisas i tokim yumi long mekim. Ol Witnes Bilong Jehova long hap bilong yu ol inap toksave long yu long taim na ples ol bai mekim dispela bung. Long dispela bung bilong tingim dai bilong Krais, bai yu kisim sampela save moa long ol samting yu mas mekim bambai ofa bilong Krais i ken helpim yu long ol samting nogut em sin bilong Adam i bin kamapim.

I no planti manmeri long nau i pilim tru dispela bikpela samting em Man Bilong Wokim ol na Pikinini bilong em i bin mekim bilong kisim bek ol na bai ol i no ken bagarap. Ol man i bilip long en ol i gat wanpela kain amamas i gutpela tru. Aposel Pita i tok long ol wanlain Kristen: “Yupela i bilip long [Jisas] na amamas tru. Dispela amamas i winim olgeta amamas bilong dispela graun, na yumi no inap autim long maus. Nogat tru. Na God i wok long kisim bek yupela, long wanem, yupela i bilip long Krais.” (1 Pita 1:​8, 9) Sapos yu wok long kisim pasin bilong laikim tumas Jisas Krais na bilip long ofa bilong em bilong baim bek ol man, yu inap i stap amamas tru long nau, na yu ken tingting long God bai kisim bek yu long sin na dai.

[Piksa long pes 6]

Jisas i bin givim laip bilong em bilong rausim ol samting nogut sin bilong Adam i kamapim

[Piksa long pes 7]

Bung bilong tingim dai bilong Jisas Krais bai kamap long Sarere, Mas 22, 2008, taim san i go daun pinis