Go Klostu Long God
God i Save Tingim Yumi Olsem Wanpela Gutpela Samting Tru
“BEL bilong yumi i kotim yumi.” Baibel i tokaut olsem sampela taim bel bilong yumi inap kotim yumi strong tumas. Bel bilong yumi inap strong long tok olsem yumi samting nating na God i no inap laikim na tingim yumi. Tasol Baibel i strongim yumi taim em i tok: “God em i save long olgeta samting, na save bilong en i winim tru save i stap long bel bilong yumi.” (1 Jon 3:19, 20) God i save gut tru long yumi, winim yumi yet. Ating tingting em i gat long yumi i narapela kain olgeta long tingting yumi gat long yumi yet. Orait, yumi laik save olsem God Jehova i gat wanem tingting long yumi? Yumi inap painim bekim bilong dispela askim insait long wanpela gutpela tok piksa Jisas i bin kamapim tupela taim.
Jisas i tok “ol man i save salim tupela liklik pisin long koin i gat liklik pe.” (Matyu 10:29, 31, NW) Long Luk 12:6, 7 (NW), Jisas i tok tu olsem: “Ol man i save salim 5-pela liklik pisin long 2-pela koin i gat liklik pe tru. Tasol God i no save lusim tingting long wanpela bilong ol. . . . Yupela i no ken pret; Yupela i winim tru ol dispela liklik pisin.” Dispela gutpela tok piksa i skulim yumi long tingting bilong Jehova long ol man i save lotuim em.
Ol dispela liklik pisin, pe bilong ol i liklik tru, ol man i save baim na kaikai. Yumi ken ting olsem Jisas i bin lukim ol rabismeri—ating mama bilong em yet tu—i baim ol kain liklik pisin olsem bilong givim kaikai long famili bilong ol. Long wanpela koin ol i kolim asarion, pe bilong en long nau i olsem 15 toea, man inap baim tupela liklik pisin. Pe bilong ol dispela liklik pisin i liklik tru olsem na man i tromoi tupela koin em inap kisim 5-pela pisin, i no 4-pela. Ol i givim nating wanpela pisin.
Jisas i tok i no gat wanpela liklik pisin “i pundaun long graun na Papa bilong [yumi] i no save long dispela.” (Matyu 10:29, NW) Taim wanpela liklik pisin i pundaun long graun—ating em i kisim bagarap na i pundaun long graun o em i wokabaut long graun bilong painim kaikai—Jehova i save long dispela. Yumi inap ting ol dispela pisin ol i samting nating, tasol Jehova i bin wokim ol na em i save tingim ol. Em i tingim ol i olsem samting i dia tumas bikos ol i stap laip. Olsem wanem? Yu kisim skul Jisas i givim long rot bilong dispela tok piksa?
Planti taim Jisas i bin skulim ol man long wanpela liklik samting na bihain em i soim olsem wanem skul ol man i kisim long dispela liklik samting i stret long ol bikpela samting tu. Em i mekim olsem taim em i tok: “Yupela tingim ol kotkot. Ol i no save planim kaikai na ol i no save bungim kaikai. Ol i no gat haus kaikai o haus bilong putim samting long en. Tasol God i save givim kaikai long ol. Na yupela manmeri i winim tru ol pisin.” (Luk 12:24) Em nau. As bilong tok Jisas i mekim long ol liklik pisin i kamap ples klia: Sapos Jehova i save lukautim ol dispela liklik pisin, orait em bai lukautim moa yet ol manmeri husat i laikim em na lotuim em!
Tok bilong Jisas i helpim yumi long save olsem i no stret long ting olsem yumi samting nating na God i no inap tingim na lukautim yumi, nogat. “Save bilong [God] i winim tru save i stap long bel bilong yumi.” Pasin bilong Man Bilong Wokim yumi long lukim ol gutpela samting bilong yumi, em ol samting yumi yet i no inap lukim, dispela i save strongim bel bilong yumi, a?
[Piksa Kredit Lain long pes 9]
Sparrows: © ARCO/D. Usher/age fotostock