God i Save Tingim Mi?
Bekim bilong planti man:
▪ “God i bikpela tumas na em i no inap tingim ol hevi bilong mi.”
▪ “Mi no ting em i save tingim mi.”
Jisas i tok wanem?
▪ “Yupela i save, ol man i save baim 5-pela liklik pisin long 2 toea tasol. Na God i no save lusim tingting long wanpela bilong ol dispela liklik pisin. Na tu, God i kaunim pinis olgeta gras long het bilong yupela . . . Olsem na yupela i no ken pret. Yupela i winim planti lain liklik pisin.” (Luk 12:6, 7) Em nau, Jisas i bin skulim ol man olsem God i save tingim yumi.
▪ “Yupela i no ken tingting planti na tok, ‘Bai yumi kaikai wanem samting? Bai yumi dring wanem samting?’ Nogat. Ol haiden i save wari long painim olgeta dispela samting. Tasol Papa bilong yupela i stap long heven em i save pinis, yupela i mas kisim dispela olgeta kain samting.” (Matyu 6:31, 32) Jisas i bilip olsem God i save long ol samting yumi mas kisim.
BAIBEL i tok klia olsem God i save tingim yumi. (Song 55:22; 1 Pita 5:7) Orait sapos em i tingim yumi, olsem wanem na planti pen na hevi i save painim yumi long nau? Sapos God i laikim yumi na em i gat olgeta strong, bilong wanem em i no mekim sampela samting bilong pinisim pen na hevi?
Wanpela samting em planti man i no save long en—Satan yet em i bos bilong dispela graun i gat pasin nogut long en. Taim Satan i traim Jisas, em i tok long givim olgeta kingdom bilong dispela graun long Jisas, em i tok: “Bai mi givim yu strong bilong bosim olgeta dispela kantri, na bai yu gat biknem tru. Olgeta dispela samting ol i bilong mi pinis. Na sapos mi laik givim long wanpela man, orait mi ken givim.”—Luk 4:5-7.
Husat i bin putim Satan olsem bos bilong dispela graun? Taim tupela tumbuna bilong pastaim tru, em Adam na Iv, i bihainim tok bilong Satan na ol i givim baksait long God, ol i soim olsem ol i makim Satan long i stap bos bilong ol. Kirap long taim tupela i bin mekim dispela pasin bikhet, God Jehova i larim hap taim i lus pastaim bilong soim olsem Satan i pundaun tru long wok bilong em long bosim graun! Jehova i no bin subim ol man long mekim wok bilong em, tasol em i opim rot bambai yumi ken i kam bek long em.—Rom 5:10.
God i save tingim yumi, olsem na em i stretim rot bambai Jisas i ken kisim bek yumi long wok bos bilong Satan. Klostu nau Jisas bai “bagarapim Satan, em dispela man i gat strong bilong mekim ol manmeri i dai.” (Hibru 2:14) Taim em i mekim olsem, em bai “bagarapim na rausim wok bilong Satan.”—1 Jon 3:8.
God bai kamapim bek Paradais long dispela graun. Long dispela taim em “bai i mekim drai wara i stap long ai bilong olgeta [manmeri] . . . na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”—KTH 21:4, 5.a
[Futnot]
a Bilong kisim sampela save moa long as na God i larim pen na hevi i stap, lukim sapta 11 bilong buk Tru Tru Baibel i Tok Wanem?, em ol Witnes Bilong Jehova i wokim.
[Rait long pes 8]
God bai kamapim bek Paradais long dispela graun