Go Klostu Long God
Wanpela God i Redi Long Lusim Sin Bilong Man
“BIKPELA, yu gutpela tru na yu save rausim sin bilong mipela.” (Song 86:5) Dispela gutpela tok bilong Baibel i strongim yumi long bilip olsem God Jehova i redi long lusim ol rong bilong ol man. Wanpela samting i bin painim aposel Pita i soim yumi klia tru olsem Jehova i save ‘lusim sin bilong olgeta manmeri i kam bek long em.’—Aisaia 55:7.
Pita em i wanpela gutpela poroman tru bilong Jisas. Tasol long laspela nait bilong Jisas long graun, Pita i pret long ol man na em i mekim wanpela bikpela sin. Long wanpela ples bung klostu long hap ol i wokim kot giaman long Jisas, Pita i tokaut long ol man olsem em i no save long Jisas—em i no mekim wanpela taim tasol, nogat; em i mekim 3-pela taim. Taim Pita i tok strong long namba 3 taim olsem em i no save long Jisas, Jisas “i tanim na i lukluk long Pita.” (Luk 22:55-61) Yu inap piksaim long tingting bilong yu Pita i pilim olsem wanem taim Jisas i lukluk long em? Pita i pilim tru bikpela rong em i mekim, na em i “krai moa yet.” (Mak 14:72) Tru, Pita i pilim tru rong bilong em na em i tanim bel, tasol ating em i tingting planti long em i bin sakim Jisas inap 3-pela taim na nogut God i no inap fogivim rong bilong em.
Taim Jisas i kirap bek pinis long matmat, em i toktok wantaim Pita na tok bilong em inap kamapim klia olsem God i bin lusim rong bilong Pita. Jisas i no mekim hatpela tok long em o tok em bai bagarap, nogat. Em i askim Pita: “Ating yu laikim mi?” Na Pita i tok, “Yes, Bikpela, yu save, mi laikim yu.” Orait Jisas i tokim em: “Yu lukautim ol pikinini sipsip bilong mi long kaikai.” Namba 2 taim Jisas i askim Pita, na Pita i bekim wankain tok gen. Jisas i tok: “Yu was long ol sipsip bilong mi.” Orait namba 3 taim Jisas i askim em: “Ating yu laikim mi?” Nau “Pita i bel hevi” na em i tok: “Bikpela, yu save long olgeta samting. Yu save, mi laikim yu.” Na Jisas i tokim em: “Yu lukautim ol sipsip bilong mi long kaikai.”—Jon 21:15-17.
Bilong wanem Jisas i mekim ol askim em i save pinis long bekim bilong en? Em i save long tingting i stap long bel bilong man, olsem na em i save Pita i laikim em. (Mak 2:8) Taim Jisas i givim ol dispela askim long Pita, em i givim rot long Pita long strongim tok bilong em inap 3-pela taim olsem em i laikim Jisas. Jisas i bekim tok long Pita: “Yu lukautim ol pikinini sipsip bilong mi long kaikai . . . Yu was long ol sipsip bilong mi. . . . Yu lukautim ol sipsip bilong mi long kaikai,” ol dispela tok i strongim bel bilong dispela aposel i tanim bel pinis, na em inap bilip olsem Jisas i trastim em yet. Na Pita inap bilip olsem, long wanem, Jisas i givim wok long em long lukautim gutpela samting tru bilong Jisas—em ol gutpela lain bilong em ol i olsem sipsip. (Jon 10:14, 15) Ating bel bilong Pita i stap isi taim em i save pinis olsem Jisas i bilip yet long em!
Em i klia tru olsem Jisas i lusim rong bilong aposel bilong em i tanim bel pinis. Jisas i gat wankain pasin stret olsem Papa bilong em, olsem na yumi ken ting Jehova tu i lusim rong bilong Pita. (Jon 5:19) Jehova i no surik long lusim rong bilong man, nogat; em i God bilong marimari na em i redi long “rausim sin” bilong man i tanim bel tru. Dispela tok i mekim gut bel bilong yumi, laka?