Yu Ting i Gat Rong Long Yusim Nem Bilong God?
LONG Ol Skripsa Hibru, em ol man i save kolim olsem “Olpela Testamen,” nem bilong God i stap klostu 7,000 taim long rait olsem יהוה (ritim long han sut i go han kais). Fopela leta Hibru i makim nem bilong God em Yohdh, He, Waw, na He, em planti taim ol i save raitim olsem YHWH.
Long bipo yet, ol Juda i bin kisim bilip giaman olsem i gat rong long yusim nem bilong God. Dispela em i as na ol i no kolim nem bilong God, na long ol rait bilong ol, ol i kirap raitim ol narapela tok olsem senis bilong dispela nem. Tasol planti lain bilong tanim tok bilong Baibel i bin raitim dispela nem olsem “Yawe,” o “Jehova.” Wanpela bilong ol Baibel i save yusim nem bilong God em Jerusalem Bible bilong ol Katolik. Dispela Baibel i tok, taim Moses i askim God long em bai i tok wanem sapos ol Israel i askim em long husat i bin salim em i go long ol, God i tok olsem: “Yu mas tokim ol manmeri bilong Israel olsem: ‘Yahweh, em God bilong ol tumbuna bilong yupela, God bilong Abraham, God bilong Aisak, na God bilong Jekop, em i bin salim mi i kam long yupela.’ Dispela em nem bilong mi inap oltaim oltaim; ol lain tumbuna i kamap bihain i mas kolim mi long dispela nem.”—Kisim Bek 3:15.
Taim Jisas i beten, em i tok long pasin bilong em yet long mekim wok long nem bilong God olsem: “Mi bin kamapim nem bilong yu long ol. Na bai mi kamapim moa yet.” Na long Beten Bilong Bikpela, em planti man i save long en, Jisas i tok: “Papa bilong mipela, yu stap long heven, nem bilong yu i mas i stap holi.”—Jon 17:26; Matyu 6:9.
Ating bai yumi kirap nogut long save olsem long buk Jesus of Nazareth, Pope Benedict Namba 16 i bin raitim i no longtaim i go pinis, em i tok long pasin bilong mekim wok long nem bilong God olsem: “Ol Israel i . . . mekim pasin i stret taim ol i tambu long kolim nem bilong God, em nem God i givim long em yet, em dispela nem ol i save raitim olsem YHWH, na ol i mekim olsem bilong ol man i no ken daunim na mekim dispela nem i kamap wankain olsem ol nem bilong ol god giaman bilong ol. Na olsem tasol, ol lain bilong tanim tok bilong Baibel long nau i mekim rong taim ol i raitim dispela nem—em nem lain Israel i ting em i narakain na i tambu long kolim—olsem wanpela nem tasol bilong bipo.”
Yu ting olsem wanem? I stret o i no stret long yusim nem bilong God? Sapos Jehova yet i tok: “Dispela em nem bilong mi inap oltaim oltaim; ol lain tumbuna i kamap bihain i mas kolim mi long dispela nem.” Orait, yu ting wanpela man i gat rait long sakim tok bilong God?
[Piksa long pes 30]
Jisas i kolim nem bilong God long beten bilong em