Yu Tingim Yet?

Olsem wanem? Yu bin amamas long ritim ol tok bilong ol nupela Wastaua? Traim bekim ol dispela askim i stap daunbilo:

• Sampela Kristen i gat wanem bikpela hevi taim ol i marit pinis? Ol i mas wok strong long mekim wanem?

Ating sampela Kristen i luksave olsem planti samting long ol yet na poroman marit bilong ol i no wankain. Ol i save olsem i no stret long katim nating marit bilong pinisim ol hevi bilong ol, olsem na ol i wok strong bilong lukautim marit bilong ol.​—4/15, pes 17.

• Ating lapun Kristen i stap long haus bilong lukautim ol lapun em inap i gat wanem ol hatwok?

Ating dispela haus i stap long hap bilong wanpela kongrigesen em i no save long en. Planti lapun i stap long dispela haus ol i gat kain kain bilip na ating ol i wok long pulim em long insait long ol wok bilong lotu. Ol famili bilong em na ol bratasista long kongrigesen i mas save long ol dispela hevi na helpim em.​—4/15, pes 25-​27.

• Wanem fopela rot em inap helpim ol marit long stretim ol hevi bilong ol?

Makim wanpela taim long toktok long ol hevi. (Sav. 3:​1, 7) Kamapim stret tingting bilong yu long pasin rispek. (Ef. 4: 25) Putim gut yau na luksave long tingting bilong poroman bilong yu. (Mt. 7:12) Wanbel long wanpela rot bilong stretim hevi, na wok wantaim long bihainim dispela rot. (Sav. 4:​9, 10)​—5/1, pes 10-​12.

• Taim Jisas i tok yumi mas beten long God i ken lusim rong bilong yumi, Jisas i tok long wanem ol rong?

Taim yumi skelim tok bilong Matyu 6:12 wantaim Luk 11:​4, em i klia olsem Jisas i toktok long ol sin. Yumi mas bihainim pasin bilong God na redi long lusim rong bilong narapela.​—5/15, pes 9.

• Ol memba bilong Gavening Bodi ol i wok insait long wanem ol komiti?

Komiti Bilong Ol Kodineta; Komiti Bilong Lukautim Ol Wokman; Komiti Bilong Wokim Ol Buk Samting; Komiti Bilong Wok Autim Tok; Komiti Bilong Wok Tisa; Komiti Bilong Raitim Tok.​—5/15, pes 29.

• Olsem wanem yumi ken save tru olsem Bikpela Tait long taim bilong Noa i bin kamap long olgeta hap bilong graun?

Jisas i bilip olsem Bikpela Tait i bin kamap tru na i kamap long olgeta hap. Bikpela Tait i bin kamap tru long olgeta hap bilong graun, dispela i as na Baibel i givim ol tok lukaut long yumi.​—6/1, pes 8.

• Pasin em Rom 1:​24-​32 i stori long en, em i stret long ol Juda o ol manmeri bilong narapela lain?

Ol tok long dispela ves inap makim dispela tupela lain wantaim, tasol taim aposel Pol i mekim dispela tok, tok bilong em i makim lain Israel bilong bipo em inap planti handet yia ol i no bin bihainim Lo. Ol i save long ol stretpela lo bilong God, tasol ol i no bin bihainim.​—6/15, pes 29.

• Tel Arat i stap we? Bilong wanem em i bikpela samting?

Dispela graun i hip i go antap olsem liklik maunten long Israel​— na i makim olsem taun Arat bilong bipo​—em i stap long hap wes bilong solwara Detsi. Long dispela liklik maunten, ol man bilong digim graun ol i bin painim ol samting em ol man i bin wokim long graun bilong raitim ol tok long en. Sampela i gat ol nem em ol i stap long Baibel, na ol dispela samting i kamapim olsem ol man i bin yusim nem bilong God taim ol i raitim ol tok.​—7/1, pes 23-​24.

• Bilong wanem pasin bilong kisim stretpela tingting long ol samting yumi inap long mekim i save givim amamas moa long yumi?

Sapos yumi putim ol mak i antap tumas na yumi strong strong long winim, maski yumi kisim hevi long en, bel na tingting bilong yumi bai i no stap isi. Tasol yumi no ken ting olsem yumi no gat strong, olsem na yumi no inap mekim bikpela wok moa bilong autim tok, nogat.​—7/15, pes 29.

• Ating wanem samting inap pasim rot bilong ol papamama long toktok gut wantaim ol yangpela pikinini bilong ol?

Ating ol samting i pasim rot em pasin bilong yangpela long sem, em i laik bosim em yet, na em i no laik papamama i save long ol samting em i mekim. Papamama i ken kirapim em long toktok taim ol i stori long ol kain kain samting, na long rot bilong ol tok em i kamapim ol i mas traim long kisimgut tingting bilong em.​—8/1, pes 10-​11.