Go Klostu Long God

“God Bilong Mekim Isi Bel”

2 Korin 1:​3, 4

PLANTI samting long laip bilong yumi​—pen na hevi, ol samting i no kamap olsem yumi laikim, stap wanpis​—ol inap mekim yumi bel hevi tru. Long kain taim olsem, yu inap ting, ‘Bai mi kisim helpim long we?’ Tok bilong aposel Pol long 2 Korin 1:​3, 4 i makim stret man bilong givim bel isi tru​—em God Jehova.

Ves 3 i tok, God em i “as bilong olgeta pasin marimari.” Dispela i makim wanem samting? Tok Grik ol i tanim olsem “olgeta pasin marimari” inap makim pasin bilong sori long man i karim pen na hevi.a Wanpela dikseneri bilong Baibel i tok ol i ken tanim dispela tok olsem “pilim sori long narapela” o “tingim tru narapela.” “Pasin marimari” bilong God i kirapim em long mekim sampela samting. Yumi kisim save long dispela pasin bilong God na yumi laik i go klostu long em, a?

Pol i tok tu olsem Jehova em i “God bilong mekim isi bel bilong olgeta man i gat hevi.” Pol i yusim wanpela tok long hia i makim “pasin bilong mekim isi bel bilong man i gat hevi o i bel hevi, na i makim pasin bilong mekim samting bilong helpim man o strongim bel bilong em.” Baibel The Interpreter’s Bible i tok: “Yumi mekim isi bel bilong man i karim hevi taim yumi strongim bel bilong em long sanap strong na karim hevi.”

Ating yu laik save, ‘Olsem wanem God i mekim isi bel bilong yumi na strongim bel bilong yumi long sanap strong na karim hevi?’ Em i mekim olsem long rot bilong tok bilong em i stap long Baibel, na long rot bilong wanpela presen, em beten. Pol i tokim yumi olsem God i laikim yumi tru na i givim Tok bilong em long yumi, em i mekim olsem bai dispela Tok i ken “strongim bel bilong yumi na mekim yumi sanap strong na wetim God i kisim yumi.” Na tu, taim yumi kamapim tru bel bilong yumi long rot bilong beten, yumi inap kisim “bel isi God i save givim yumi.”​—Rom 15:4; Filipai 4:7.

Olsem wanem? Jehova i save mekim isi bel bilong lain bilong em i go inap long wanem mak? Pol i tok ‘long olgeta hevi i kamap long yumi, em i save mekim isi bel bilong yumi.’ (2 Korin 1:4) Maski wanem samting i givim presa long yumi, mekim yumi bel hevi, o wanem pen na hevi yumi karim, God inap strongim bel bilong yumi long sanap strong na karim hevi. Dispela i mekim gut bel bilong yumi, a?

Taim man i kisim bel isi God i givim, i gat narapela samting tu i kamap. Pol i tok God i mekim isi bel bilong yumi na bai ‘yumi inap long mekim isi bel bilong ol man i gat kain kain hevi, olsem God i save mekim isi bel bilong yumi.’ God i mekim isi bel bilong yumi taim yumi karim hevi, olsem na dispela i helpim yumi long pilim hevi bilong ol arapela na i kirapim yumi long helpim ol.

Jehova em i “God bilong mekim isi bel bilong olgeta man i gat hevi.” Tasol dispela i no makim olsem em i pinisim nating ol hevi bilong yumi, nogat. Tasol yumi ken bilip tru olsem, sapos yumi lukluk long em long mekim isi bel bilong yumi, orait em inap strongim yumi long karim olgeta hevi i kamap long laip bilong yumi. I stret tru long yumi lotuim na litimapim nem bilong kain God olsem i save sori long man.

[Futnot]