Pas i Kam Long Nikaragua

“Taim Yu Kamap Long Wara Coco, Tanim i Go Long Han Sut”

“YU BAI nidim wanpela 4-wil draiv ka, winis bilong apim ka, na planti tin petrol. Bai i gat bikpela graun malumalum, olsem na yu mas redi tu long dispela. Taim yu kamap long wara Coco, tanim i go long han sut.”

Mi mas tokaut olsem tok bilong wanwok misineri bilong mi i no strongim bel bilong mi. Tasol long Tunde moning mi kirapim raun bilong i go long wanpela kibung Kristen bai kamap long Wamblán, em wanpela liklik taun long hap not bilong Nikaragua.

Long taim tulait i bruk mi kalap long olpela trak bilong mi na draiv long gutpela haiwe ol i kolim Pan-American Highway. Long biktaun Jinotega, mi tanim long wanpela rot i no gat kolta, ol asples i save kolim dispela rot feo, o rot nogut. Paslain long mi lusim taun, mi lukim tupela stua, nem bilong wanpela em Mirakel bilong God na nem bilong narapela em Kirap Bek.

Mi draiv isi isi arere long ol maunten long rot i krungut na i tanim tanim i go antap na i go daunbilo. Mi abrusim wanpela longpela raunwara i stap long wanpela ples daun long wanpela maunten i antap tru em klaut i karamapim. Smok i karamapim ples, tasol mi inap lukim ol diwai i gat ol okit na mosong i karamapim ol diwai.

Long wanpela kona, klostu mi bamim wanpela bas i ron namel long rot na i kam. Em i pamim blakpela smok na taia bilong en i tromoi nabaut ol ston taim em i abrusim mi. Long Nikaragua, yu bai lukim ol nem bilong ol rap draiva long bas, olsem Man i Win Pinis, Skopion, Moran, o Man Bilong Painim.

Long belo mi draiv i go brukim wanpela ples daun (Plain of Pantasma). Mi lukim wanpela haus diwai insait long wanpela banis ol i bin brumim gut. Wanpela lapun man i sindaun long fom, na dok i slip aninit long diwai, na tupela bulmakau i sanap i stap na i gat karis ol i pasim long baksait bilong ol. Wil bilong dispela karis ol i wokim long diwai. Long wanpela liklik taun, mi lukim planti pikinini i lusim skul na i wokabaut i kam. Ol i werim ol blupela skul yunifom na ol i pulap long bikrot na i luk olsem biksi i bruk long nambis.

San i strong tru taim mi kamap long Wiwilí, na em namba wan taim mi lukim wara Coco. Dispela bikpela wara i ron i go olsem long taun. Mi tingim tok bilong misineri na tanim i go long han sut na bihainim dispela rot nogut i go inap 37 kilomita samting bilong kamap long Wamblán.

Mi draiv long rot i gat planti ston na hul, na mi brukim 8-pela o 9-pela liklik wara. Mi laik abrusim ol bikpela hul long rot na mi kirapim bikpela das. Tru tumas, olsem ol asples i save tok, “Mi kaikaim das.” Em nau, mi kamap long pinis bilong rot. Ples Wamblán i stap insait long bikbus long wanpela ples daun, em ples mi laik go long en.

Long 4:30 long bikmoning, i luk olsem olgeta man i kirap pinis. Krai bilong kakaruk i bin mekim na mi kirap. Mi wokabaut i go long bikrot na mi smelim gutpela smel bilong bret tortilla i kuk long aven ol i bin wokim long ston.

Ol kala kala piksa bilong paradais i stap long ol banis, em atis bilong ples i bin mekim. Na ol sain i stap long ol kona stua i advetaisim kain kain loliwara. Ol piksa long banis i kirapim ol manmeri long tingim gen ol tok promis em 3-pela gavman i bin mekim bipo. Ol kapa toilet i sanap antap long simen plua.

Mi go pas long tok Adiós, em tok gude long tokples Nikaragua. Ol manmeri i smail na toktok gut long mi. Mipela i apim nek taim ol hos na donki i wokabaut i kam na nois bilong lek bilong ol i pairap.

Long Fraide apinun ol famili i kamap long dispela 2-pela de kibung. Sampela i bin wokabaut long lek, sampela i bin kalap long hos, na sampela i bin kalap long trak. Sampela liklik mangi na liklik meri i wokabaut inap 6-pela aua, na ol i pasim ol raba sandel. Maski i gat ol liklik bom i stap insait long graun long hap ol i laik brukim wara, na i gat ol liklik snek bilong dringim blut i stap long dispela wara, ol i go het na brukim wara. Sampela i kam long ol longwe ples, ol i bringim liklik kaikai tasol i kam​—em rais ol i abusim wantaim gris bilong pik. Bilong wanem ol i kam?

Ol i kam bilong strongim bilip bilong ol long wanpela gutpela taim bai i kamap. Ol i kam bilong harim tok bilong Baibel. Ol i kam bilong mekim samting God i laikim.

Nau em Sarere. Winim 300 manmeri i sindaun aninit long kapa. Ol i sindaun long ol diwai fom na ol plastik sia. Ol mama i givim kaikai long ol bebi bilong ol. Nois bilong ol pik na krai bilong ol kakaruk i kam long fam klostu.

Ples i go hat nogut tru, tasol ol manmeri i putim gut yau long ol tok bilong helpim na stiaim ol. Ol i lukim ol skripsa taim ol brata i kolim, na ol i mekim ol singsing em Baibel i as bilong ol tok bilong en, na ol i putim gut yau long beten ol brata i mekim.

Bihain long program i pinis, mi joinim ol arapela na pilai tats pegi wantaim ol pikinini. Bihain mipela i lukim ol tok ol yangpela i raitim long not buk. Mi soim ol piksa bilong ol sta na galaksi long kompiuta bilong mi. Ol pikinini i smail na ol papamama bilong ol i amamas.

Kibung i pinis na olgeta lain i mas go bek long ples bilong ol. Mi lusim dispela ples long neks moning, na mi tingim ol gutpela samting i bin painim mi long dispela hap na ol nupela pren mi bin kisim. Mi wokim tingting long mi laik bihainim pasin bilong ol, ol i save amamas tasol long ol liklik samting ol i gat na ol i wet long God i ken helpim ol.

[Ol Piksa long pes 17]

Planti famili i raun inap planti kilomita bilong i kam long kibung long Wamblán