Long Jemani, Bihain Long Pait, Mi Tingim Kingdom Pastaim
Stori bilong Gertrud Poetzinger
Taim yumi skelim ol samting yumi laik mekim, yumi mas bihainim wanem lo? Nambawan gutpela tisa, em Krais Jisas, em i tokim ol disaipel bilong em ol i mas ‘painim kingdom bilong God pastaim.’ Sapos ol i mekim olsem, bai ol i kisim ol narapela samting ol i mas kisim. (Matyu 6:33) Taim mi yangpela yet na i kam inap long nau mi save, sapos yumi putim olgeta hevi bilong yumi i go long Jehova na yumi autim tok long ol wok em i bin mekim na yumi tingim Kingdom pastaim, bai God i givim “planti gutpela samting” bilong spirit long yumi: (Provep 10:22; Sam 55:22; 71:5; 73:28) Nau mi laik stori long sampela samting i bin painim mi na i kamapim dispela samting.
LONG kirap bilong yia 1945, Namba Tu Pait Bilong Olgeta Hap i laik pinis. Ol Jeman i no strong moa long pait. Tingting bilong ol na tingting bilong gavman i senis. Ol i no tingting moa olsem ol bai winim pait. Ol i save ol i lus. Olsem na ol i no putim hevi moa long ol Witnes Bilong Jehova olsem ol i bin mekim long pastaim.
Mi stap long kalabus nogut bilong Ravensbruk, tasol ol i kisim mi wantaim sampela Witnes meri moa i go mekim wok long haus bilong ol ofisa bilong kalabus. Mipela lukautim pikinini bilong ol. Mi lukautim tupela pikinini bilong wanpela ofisa, nem bilong em Kiener. Sampela mun paslain long taim pait i pinis, wanpela apinun em i kam toktok wantaim mi long haus.
Em i tok: “Ami bilong Rasia i kam klostu. Yu harim pinis, a?” Mi tok: “Mi harim pinis.” Em i tok: “Sapos ol i kam, bai yu mekim wanem?” Mi lukluk stret long em na mi tok: “Ol i birua long mipela olsem yupela i birua long mipela. Olsem na bai mi mekim wanem?” Jehova i save strongim mipela na mipela i no pret long i stap namel na tokim ol man long Kingdom long dispela taim nogut.—Jon 15:19.
Mipela Ranawe
Ami bilong Jemani i surik i go bek na long pinis bilong Epril, Kiener i stretim rot bambai meri pikinini bilong em i ken ranawe. Mi tokim em na em i salim mi i go wantaim ol. Misis Kiener i givim klos long mi na mi no pasim moa klos bilong kalabus. Em i no laik bai ol man i save mi wanpela kalabusmeri na em i bilong lain Natsi. Mipela kalap long wanpela trak na i go long hap bilong not, long Bavaria. Mipela lusim dispela hap em ami bilong Rasia i kam long en na mipela i go klostu long hap ol ami bilong Amerika i stap long en.
Long namba wan taim insait long 7-pela yia hap mi lusim ol kalabus nogut. Tasol pait i stap yet na mipela i mas was gut. Trak i ran long rot na sampela balus bilong Englan na Amerika i kam. Ol i balus bilong pait. Mi sindaun long haus kepten bilong trak wantaim draiva na tupela pikinini bilong Misis Kiener. Draiva i tok, ol dispela balus bai kam bek na sutim mipela long masin-gan. Kwiktaim long bel mi beten strong long Jehova, olsem: “Jehova, yu bin lukautim mi long kain kain hevi, plis yu no ken larim mi i bagarap nau long dispela rot!
Tru tumas, ol dispela balus i baut na i kam bek. Draiva i spid tru, tasol mipela i no inap winim spid bilong balus. Wantu mipela lukim wanpela liklik han rot i go insait long bus. Kwiktaim draiva i bihainim dispela rot na mipela hait aninit long ol diwai. Ol balus i no inap lukim mipela na ol i abrusim mipela i go.
Long taim bilong pait, planti taim hevi olsem i kamap na klostu mi bagarap. Tasol nau, taim pait i pinis 10-pela de bihain, ol narapela kain hevi i painim mi.
Mi Gat Bikpela Wok Moa Mi Mas Mekim
Mi wantaim Misis Kiener na tupela pikinini, mipela i slip long wanpela haus long wanpela liklik ples, nem bilong en Monsdegingen, klostu long Nodlingen. Sampela narapela ranaweman ol tu i stap wantaim mipela. Gavman i tokaut long pait i pinis na wanpela wik bihain mi tokim Misis Kiener mi mas lusim em. Em i no laik bai mi lusim em, long wanem nau olgeta manmeri i birua long ol Natsi wantaim famili bilong ol. Tasol mi gat bikpela wok moa mi mas mekim, em wok bilong Kingdom. Pait i pinis na ol Witnes Bilong Jehova i mas kirap gen long autim tok. Na mi laik painim man bilong mi, Matin.
Mitupela i marit inap tripela mun hap tasol na ol i holim Matin na bihain ol i putim em long kalabus nogut bilong Dakau. Bihain moa ol i holim mi na putim mi long kalabus bilong Ravensbruk. Inap tupela yia pinis mi no harim sampela tok long man bilong mi, na inap 9-pela yia pinis mi no lukim em. Mi no save, Matin i dai pinis o em i stap laip yet? Sapos em i stap laip yet, em i stap gutpela o nogat?
Wanpela De Mi No Inap Lusim Tingting long En
Long de mi makim bilong lusim em, mi kirap long bikmoning tru. Mi kisim liklik hap bret na mi kaikai. Tudak yet na mi lusim haus. Mi wokabaut long lek i go, no gat mani, no gat pepa bilong kisim skel, no gat samting. Mi holim tasol wanpela liklik paus bilong skulmanki em mi pulimapim liklik hap bret bilong moningtaim long en na sampela liklik samting bilong mi. Mi wokabaut bihainim rot i go long Munik, em as ples bilong man bilong mi. Mi ting sapos em i stap laip yet bai mi lukim em long dispela hap.
Long san olgeta mi wokabaut i go na long apinun mi kam klostu long wanpela liklik ples. I tambu long raun long rot long taim bilong tudak, olsem na sapos mi slip ausait bai ol ami i holim mi. Olsem na mi lusim rot na mi kirap long beten. Mi tok: “O Jehova, plis helpim mi. Mi bin mekim wok bilong yu inap planti yia pinis na no gat wanpela taim mi no gat ples bilong slip.” Mi beten pinis na mi go bek long rot. Mi lukluk lukluk, tasol olgeta samting i stap olsem tasol.
Mi wokabaut i go insait long dispela liklik ples na namba wan haus mi lukim i gat banis bilong en. Mi lukim wanpela meri i wok i stap insait long banis. Mi tokim em: “Yu save long wanpela ples mi inap slip long en?” Em i lukluk long mi na em i tok mi mas i go long baksait bilong haus na lukim man bilong em, long wanem ol i givim ples slip pinis long planti man.
Mi go long baksait bilong haus na taim mi go insait, mi lukim bikpela kaikai i stap, i gat ol gutpela gutpela kaikai bilong ol Jeman i stap. Nainpela man i sindaun pinis long tebol na ol i kaikai i stap. Mi pilim olsem ai bilong mi i laik raun, long wanem mi no bin kaikai na mi hangre nogut tru. Papa bilong haus i lukim mi na em i tok: “Yu no ken sanap i stap! Yu kam kisim kaikai, em inap long tenpela!”
Tasol pastaim mi tokim em mi no gat ples slip na mi laik slip long dispela haus. Em i tok mi ken i stap wantaim ol na meri bilong em i soim wanpela bet long mi i stap antap long lata long rot ol man i go i kam long en. Mi tingim ol man i pulap long dispela haus, tasol mi tokim em mi ken slip long dispela bet. Em i lusim haus i go long lotu.
Mipela kaikai i stap na wanpela yangpela meri, em tu i slip long dispela haus, em i harim gut ol toktok mipela mekim, long wanem kwiktaim mi kirap tokim ol long kingdom bilong God. Mi no save em i laikim ol tok em i harim o nogat, na bihain liklik em i go slip.
Mama bilong haus i kam bek na em i singautim mi i go long rum sindaun. Em i soim wanpela Baibel long mi, ol i kolim Eberfelder. Ol i raitim nem bilong Jehova insait long dispela Baibel. Em i tokim mi: “Mi bin kisim dispela Baibel long wanpela Witnes sampela yia bipo. Olsem wanem? Em i wanpela Baibel tru? Mi bin kaunim, tasol mi no save long as bilong ol dispela tok mi kaunim. Yu inap kamapim as bilong en long mi?”
Em i olsem 10 klok samting, tasol mitupela i toktok wantaim i go inap long biknait. Long biknait, dispela yangpela meri em i bin harim ol toktok mi mekim taim mipela i kaikai, em i kam sindaun wantaim mipela. Em i tok em i no inap slip long wanem em i tingim tingim ol tok em i bin harim. Na em i tok em i laik helpim mi na em i givim 20 mak long mi. Long dispela taim bipo dispela em i bikpela mani.
Mi tokim tupela mi go long Munik na long moningtaim tru bai mi lusim haus i go. Mama bilong haus i tok, “Yu laik kirap long wanem taim?” Em i biknait pinis, tasol mi tok mi laik kirap long 5 klok. Mi kirap sanap na mi laik i go slip long dispela bet ol i bin soim long mi, tasol em i pasim mi. Em i tok: “Yu no ken slip long dispela bet. Yu kam.” Em i go opim dua bilong wanpela rum na mi lukim gutpela bet i stap na i gat gutpela laplap long windo. Em i tok: “Yu mas slip hia.”
Narapela Kain Hevi
Mi kirap long 5 klok long moningtaim na dispela meri wantaim man bilong em ol i kirap pinis na wetim mi i stap. Ol i redim pinis kaikai bilong mi. Mipela i kaikai na bihain meri i kisim dispela liklik paus bilong skulmanki na em i pulimapim sanwis long en. Bihain em wantaim man bilong em i kam sanap ausait long haus na ol i gutbai long mi. Ol i sanap i stap na lukim mi wokabaut long rot i go inap mi no inap lukim ol moa.
Mi tingim ol samting i bin painim mi insait long dispela 24 aua. Taim mi lusim Misis Kiener mi no gat samting bilong skin. Mi gat tingting tasol long painim Kingdom bilong Jehova pastaim. Tasol Jisas i tok, yumi mas painim Kingdom bilong God na “stretpela pasin bilong em” tu. Taim mi no kamap yet long Munik, traim i painim mi long dispela samting.—Matyu 6:33.
Long belo bek skin bilong mi i les na lek bilong mi i pen, olsem na mi pasim wanpela trak bilong Amerika i karim ol ranaweman i go long Munik. Mi no save gut long tok Inglis, tasol mi tokim draiva mi laik bai em i kisim mi i go long Munik. Em i tok, baksait bilong trak i pulap, tasol mi ken sindaun wantaim em. Mi amamas na mi kalap sindaun.
Taim mipela i kam klostu long Munik, draiva i pasim trak planti taim na sampela pasendia i lusim trak. Taim mipela i kam klostu pinis long taun, em i lusim bikrot na bihainim wanpela rot i go long ol maunten. Mi tokim em, mi laik i go long taun, tasol em i tok: “Nogat! Bai yumi go long maunten.”
Nau mi save olgeta narapela pasendia i lusim trak pinis na mitupela tasol i stap. Mi laik opim dua, tasol dua i lok na mi no inap. Mipela bihainim dispela rot i go long maunten na mi wok long mekim tok Inglis na tokim em mi no laik insait long dispela samting em i laik mekim. Tasol em i draiv i go na bihain mipela i kamap long wanpela hap i gat ol diwai long en na em i pasim trak. Em i lusim trak i go daun na em i kam opim dua long hap bilong mi. Mi kalap i go daun na mi sanap lukluk long em. Em i tok, em i gutpela san na gutpela ples na i no gat man bai lukim mipela.
Mi tok, “Tru, em i gutpela san na gutpela ples na i no gat wanpela man i stap, tasol God Jehova i stap na em i lukim yumi.” Na mi laik tok, sapos mitupela i mekim dispela pasin bai Jehova i givim strafe long mipela, tasol mi no inap tingim tok Inglis bilong strafe. Olsem na mi bikmaus na singaut strong long em na mi tromoi nabaut han bilong mi! Em i pret na em i tokim mi long kalap gen long trak. Mitupela i no toktok moa na em i kisim mi i go namel long biktaun Munik. Em i pasim trak na em i tok: “Yu laik go daun hia?” Mi tok, “Yes,” na em i kam opim dua gen. Mi sanap lukluk gen long em, tasol dispela taim em i holim han bilong mi na em i tok: “Yu stretpela meri. Yu mas beten askim God long helpim mi bambai meri bilong mi i stap gut long mi olsem yu stap gut long man bilong yu.”
Wantu mi kirap mekim wok painia. Long olgeta de mi autim tok bilong Kingdom long Munik. Mi wok long painim ol narapela Witnes bambai mipela inap bung na mekim gen ol miting na ol narapela wok bilong mipela. Long taim bilong pait na taim ol man i mekim nogut long mipela, klostu olgeta wok bilong autim tok bilong Kingdom i pinis.
Man Bilong Mi i Stap Laip!
Mi kamap pinis long Munik na liklik taim bihain mi harim tok olsem Matin i stap laip na em i stap gutpela. Ol i bin putim em long wanpela kalabus bilong kilim ol man i dai. Dispela kalabus i stap long Mathausen, long Austria. Tasol em i no i dai. Em wantaim wan handet samting narapela Witnes ol i wet i stap long dispela hap bilong kisim ol pepa bilong ol. Ol dispela pepa bai makim ol i man em lain bilong Hitler i bin mekim nogut long ol. Sapos ol i no gat dispela pepa ol i no inap raun o kisim kaikai.
Taim mi harim pinis dispela tok, mi yet mi go long bikpela kepten bilong ami bilong Amerika long Munik na tokim em: “Man bilong mi i stap long wanpela kalabus nogut long Austria, mi laik bai yu salim ka i go na kisim em i kam!” Dispela kepten i salim tupela bas i go na kisim olgeta Witnes i kam bek.
Narapela Hevi Gen!
Nau mi gat narapela hevi gen! Man bilong mi i laik kam bek na mipela i no gat haus. Mi bin slip long wanpela liklik haus ol i save putim tul long en. Mi save slip long wanpela sia namel long ol tul bilong wokim gaden. Mitupela i no gat ples slip, tasol mi save ol wokboi bilong Jisas i mas tingim Kingdom pastaim.
Olsem na mi beten na mi tokim Jehova, inap wanpela de mi no ken mekim wok painia, long dispela de bai mi raun painim ples slip bilong mitupela. Mi go long dipatmen bilong painim haus, em ol Amerika i bosim na mi kisim lista bilong ol haus. Long dispela de mi makim bilong painim haus, mi kirap long moningtaim tru na mi go long olgeta haus ol i makim long dispela lista. Tasol ol man i kisim pinis ol dispela haus. Nau san i laik go daun na mi kamap long laspela haus long dispela lista. Ol i tokim mi, dispela haus tu ol man i kisim pinis. Bai mi mekim wanem?
Mi beten askim Jehova long helpim mi. Em i save long ol samting mi sot long en na em i tok promis long lukautim ol man i painim Kingdom pastaim. Inap wanpela de olgeta mi bin lusim wok painia na mi no kisim haus. Mi beten pinis na mi lukim ol samting i stap olsem tasol. Tasol mi bilip tru long Jehova, em i Man bilong harim beten. (Sam 65:2) Olsem na mi mas wokabaut i go na wetim Jehova i helpim mi. Mi laik wokabaut i go na mi lukim tripela meri i sanap arere long rot na ol i toktok wantaim. Mi go klostu long ol na mi tok, “Mi painim haus. Yupela i save long wanpela haus i stap em mi inap kisim?”
Wanpela meri i tok kros, olsem: “Yu yet yu mas i go painim!” Mi kirap nogut, tasol mi tingim dispela tok em i mekim na mi tingting olsem: ‘Ating Jehova i harim beten bilong mi na soim rot long mi. Mi yet mi mas kirap long painim. Bai mi kirap long dispela kona bilong rot na go long olgeta haus na askim ol.’ Mi go long namba wan haus na meri i opim dua na tok: “Ating dipatmen bilong ol haus i salim yu i kam?” Tasol namba bilong haus bilong em i no stap long lista bilong mi. Em i kisim mi i go long namba tu plua bilong haus na soim wanpela gutpela rum long mi i gat liklik haus kuk tu i stap na long windo mi inap lukim ol gutpela maunten bilong Bavaria!
Blesing Bilong Man i Stap Gut long Wok
Mitupela Matin i go i stap long dispela rum. Mitupela wantaim i save mekim bikpela wok bilong autim tok bilong Kingdom. Mi mekim wok painia na Matin i go lukim ol Witnes i stap long ol liklik grup klostu long Munik bilong strongim ol. Em i go long wanpela o tupela de tasol na em i kam bek, long wanem i hatwok yet long raun.
Wanpela taim Matin i kam bek na mi laik lusim haus i go autim tok. Em 9 klok long moningtaim. Em i tokim mi long putim ol klinpela klos bilong em, long wanem long belo bek em i mas i go raun gen. Mi tok, mi go mekim ol go-bek na Baibel-stadi bilong mi na mi bai kam bek long belo na redim kaikai bilong em na pulimapim ol samting long switkes bilong em. Tasol mi no kam long belo na em i no gat klinpela klos redi bilong putim long switkes. Em i wetim mi i go, tasol 4 klok pinis na mi no kam yet, na 8 klok apinun mi no kam yet. Mi kam bek long haus long 11 klok long tudak. Mi amamas tru long ol gutpela ekspiriens mi bin kisim long autim tok, tasol sori! mi lusim tingting long man bilong mi. Pastaim mi stap mi wanpela tasol, tasol nau man bilong mi i kam bek pinis na i stap wantaim mi na mi mas tingim em.
Bihain mi no lusim tingting moa long man bilong mi. Oltaim mi tingim em, long wanem planti taim em i mas lusim mi. Mi save bel hevi na mi krai. Tasol mi no laik bai mama bilong haus i lukim mi i krai, olsem na mi save go long wanpela ples matmat na mi sindaun long as bilong wanpela diwai na mi krai. Mi ting olsem dispela em i ples bilong krai, olsem na sapos ol man i lukim mi i krai ol i no ken kirap nogut. Mi krai, tasol dispela samting i no helpim mi. Em i no stretim hevi bilong mi.
Mi gat planti gutpela ekspiriens. Mi save mekim Baibel-stadi wantaim 22 famili! Tasol mi laik bai man bilong mi tu i ken amamas long ol dispela gutpela ekspiriens bilong mi. Tru, man bilong mi i kam bek pinis, tasol mitupela i no save stap wantaim. Olsem na mi beten long Jehova na tokim em long dispela hevi bilong mi, na mi tokim Brata Erich Frost tu, em i wasman bilong wok bilong autim tok long Jemani long dispela taim. Mi tokim Brata Frost, man bilong mi i kam bek pinis, tasol mi gat wok tasol long wasim soks samting bilong em. Brata Frost i tok, mi mas amamas mi inap mekim dispela liklik wok bilong helpim man bilong mi. Em i laik strongim mi, tasol mi no amamas long dispela bekim! Tasol maski, mi karim dispela hevi.
Bihain ol i singautim Matin i go long Magdebeg bilong lain long kamap wanpela wasman sekit. Pinis nau na Brata Frost i tok, em i gat wanpela gutpela samting bilong mi. Em i tok, namba wan ofis bilong Sosaiti long Bruklin i salim tok na i tok, olgeta meri i bin mekim wok painia na man bilong ol i kamap wasman sekit, ol i ken i go wantaim man bilong ol taim man i go lukim ol kongrigesen. Jehova i harim beten bilong mi na helpim mi!
Mi Tingting Bek
Mi tingim ol planti planti samting i bin painim mi wantaim man bilong mi na mi save, Papa bilong yumi long heven em i save long ol samting yumi sot long en na em i save helpim yumi long ol dispela samting sapos yumi tingim Kingdom pastaim na yumi mekim tru. Ol samting mi no sot tru long en, em mi no kisim.—Matyu 6:32.
Pait i pinis na inap 31 yia mi raun long olgeta hap bilong Jemani wantaim man bilong mi taim em i go lukim ol kongrigesen na strongim ol. Kirap long 1978 mi wok long namba wan ofis bilong ol Witnes Bilong Jehova long Bruklin, Nu Yok, na Matin i wanpela bilong Lain Bilong Bosim Ol Witnes. Nau mi gat 72 krismas, tasol mi tenkyu long Jehova, long wanem skin bilong mi i stap strong yet na mi inap mekim wok bilong Kingdom long olgeta de!
[Piksa long pes 24]
Taim mi lukautim ol pikinini bilong ofisa mi pasim klos bilong kalabus
[Piksa long pes 26]
Mipela pret—ating ol balus bai kam bek na sutim trak long masin-gan
[Piksa long pes 28]
Nau mi amamas long autim tok wantaim man bilong mi, Matin, long rot na long ol haus long Bruklin, Nu Yok
[Rait long pes 29]
“Yupela i mas wok pastaim long painim kingdom bilong God wantaim stretpela pasin bilong em. Na bihain bai em i givim dispela olgeta arapela samting tu long yupela.”—Matyu 6:33.