Aiwara i Stap Insait Long Wanpela Skin Botol
WANPELA yangpela man i stap olsem ranaweman. Bikpela hevi i painim em, na aiwara i pulap long ai taim em i askim God bilong em, Jehova, long mekim gutpela pasin na pasin sori long em, em i tok: “Putim aiwara bilong mi long skin botol.” (Song 56:8, NW) Dispela man em Devit, bihain em i kamap king bilong lain Israel. Tasol dispela skin botol em i toktok long en em wanem samting? Olsem wanem God i ken putim aiwara long skin botol?
Skin botol em samting Devit i save gut long en. Em wanpela kain botol bilong holim wara, oil, wain o bata samting. Ol lain i save raun long Sahara, olsem ol lain Tuareg, ol i save yusim yet ol skin botol em ol i save wokim long skin bilong wanpela meme o wanpela sipsip. Kain botol olsem inap holim planti wara tru, inap long sais bilong animal em ol i bin kisim skin bilong en. Wara em skin botol i holim i save stap kol maski ples drai nating i hat nogut tru. Long bipo, ol donki na ol kamel i save karim ol dispela botol. Long nau, ol i save hangamapim kain botol olsem long nus bilong 4-wil draiv ka!
Tok bilong Devit long skin botol i gat mining long yumi long nau tu. Olsem wanem dispela tok i gat mining long yumi? Baibel i tok, Satan i bosim dispela graun, na long nau em i gat bikpela “belhat nogut tru.” Dispela i mekim na planti hevi i kamap long dispela graun. (KTH 12:12) Long dispela as, planti man, wankain olsem Devit long bipo, ol i karim bikpela hevi long ol samting bilong bel, tingting, na skin—na moa yet ol man husat i laik amamasim God. Olsem wanem? Ol dispela samting i save painim yu? Ol dispela gutpela wokboi i gat strongpela bel, na maski ol i “krai” tu, ol i no lusim pasin bilong i stap gut long God. (Song 126:6) Ol i ken save olsem Papa bilong ol long heven i no lukim tasol ol hevi ol i karim, nogat, em i lukim tu samting ol dispela hevi i mekim long bel na tingting bilong ol. Em i save tru long pen na hevi i save painim ol wokboi bilong em na long pasin sori em i tingim krai bilong ol na pen ol i karim, i olsem em i putim aiwara bilong ol long skin botol.