Skin Bilong Snek

OL SNEK i no gat han na lek samting, olsem na ol i mas i gat strongpela skin na bai ol i ken muv gut na i no kamapim bagarap long skin. Sampela snek inap go antap long ol diwai em skin bilong ol i raf na sampela inap wokim hul i go insait long wesan. Wanem samting i mekim na skin bilong snek i strong?

Tingim: I gat ol narapela narapela kain snek na skin bilong ol i no wankain. Tasol i gat wanpela samting long skin bilong olgeta snek i wankain: Skin bilong ol i strong long ausait, tasol insait i no strong tumas. Wai na dispela i gutpela? Savemeri Marie-Christin Klein i tok: “Ol samting we ausait bilong ol i strong, tasol insait i no strong tumas, taim wanpela samting i bamim ol, fos bilong dispela samting i go long olgeta hap bilong en.” Dispela narakain disain long skin bilong snek i mekim na bodi bilong en i save gripim gut graun na bai em i ken muv, na long seim taim em i save stretim gut bodi bilong en na bai sap ston samting i no ken bagarapim skin bilong en. Em i bikpela samting long skin bilong snek i stap strong, bikos em i save rausim olpela skin bilong en bihain long olgeta 2-pela o 3-pela mun.

Ol samting i wok wankain olsem skin bilong snek, ol man inap yusim long wokim ol marasin samting, olsem, ol inap yusim dispela long wokim ol giaman hap bilong bodi em ol i bagarap long rot bilong sik samting. Na tu, ol masin samting em ol i bihainim disain long skin bilong snek na wokim, ol bai i no nidim planti gris o oil samting.

Yu ting wanem? Skin bilong snek i kamap long rot bilong evolusen? O wanpela i bin wokim?