Ol Man i Askim
Olsem Wanem na Adam Inap Mekim Sin Maski Em i Gutpela Olgeta?
Adam inap mekim sin, long wanem, God i wokim em bambai em yet inap makim wanem samting em i laik mekim. Adam i gutpela olgeta na dispela presen i stret long em. Tasol tru tru, God tasol em Man i gutpela olgeta winim olgeta arapela man. (Lo 32:3, 4; Song 18:30; Mak 10:18) Olgeta man na ol narapela samting, ol i no gutpela olgeta olsem God. Olsem: Wanpela naip i gutpela tru bilong katim mit, tasol yu ting yu inap yusim bilong dringim sup? Yumi inap tok wanpela samting i gutpela olgeta sapos em i inapim stret wok bilong en.
Orait, i gat wanem as na God i wokim Adam? Laik bilong God i olsem: Long rot bilong Adam, em i laik kamapim ol manmeri em ol yet inap makim wanem samting ol i laik mekim. Ol man husat i laik kisim pasin bilong laikim God na mekim ol pasin em i laikim, ol yet bai makim samting ol i laik mekim. Olsem: Ol bai makim olsem ol i laik bihainim ol lo bilong God. Olsem na pasin bilong bihainim tok i no wanpela samting we Jehova i putim pinis long man na dispela i stiaim tingting bilong em, nogat, bel yet bai kirapim man long mekim olsem. (Lo 10:12, 13; 30:19, 20) Olsem na sapos Adam i sot long dispela save long pasin bilong sakim tok, orait bai Adam i no gutpela olgeta. Olsem na Baibel i tokim yumi long samting i bin kirapim Adam long makim samting em i laik mekim. Baibel i tok em i bihainim meri bilong em long sakim lo God i putim bilong tambuim ol long kisim kaikai long “diwai bilong givim gutpela save long wanem samting i gutpela na wanem samting i nogut.”—Stat 2:17; 3:1-6.
Orait, yu ting God i bin wokim Adam na bai em i no gat strong long makim wanem samting i gutpela na wanem samting i nogut? Olsem na em i sot long pasin bilong wokim gutpela disisen o long sakim traim? Paslain long Adam i bin sakim tok, God Jehova i bin skelim olgeta samting em i bin wokim long graun—namba wan man na meri tu—na em i tok ol i “gutpela.” (Stat 1:31) Olsem na taim Adam i mekim sin, dispela i no makim olsem Man Bilong Wokim em i no wokim em gut, nogat. Olsem na i stret God i tok Adam i gat asua long samting em i mekim. (Stat 3:17-19) Adam i no bin larim pasin bilong laikim God na ol gutpela stiatok bilong em long kirapim em long bihainim tok bilong God wanpela tasol.
Na tingim, taim Jisas i bin stap long graun, em i gutpela olgeta wankain olsem Adam. Tasol Jisas i no wankain olsem ol tumbuna pikinini bilong Adam, mama i bin karim Jisas long rot bilong holi spirit, olsem na em i no kisim sampela pasin kranki we inap mekim em i hatwok long sakim traim, nogat. (Luk 1:30, 31; 2:21; 3:23, 38) Long laik bilong Jisas yet, em i stap gut long Papa bilong em maski ol narapela samting i putim bikpela presa long em. Adam yet i makim samting em i laik mekim, olsem na em i gat asua long sakim lo bilong Jehova.
Orait bilong wanem Adam i makim pasin bilong sakim tok bilong God? Ating em i pilim olsem em inap mekim i stap bilong em i kamap gutpela moa? Nogat. Aposel Pol i tok olsem “Adam i no bilipim tok giaman. Nogat.” (1 Timoti 2:14) Adam i laik bihainim laik bilong meri bilong em na meri bilong em i bin makim pinis samting em i laik mekim, olsem kaikai pikinini bilong dispela diwai tambu. Adam i gat bikpela laik moa long amamasim meri bilong em winim laik bilong em long bihainim tok bilong Man Bilong Wokim em. Taim meri i tokim em long kaikai prut tambu, Adam i no bin laik wet na tingim olsem sapos em i sakim tok bilong God, dispela inap mekim wanem long pasin bilong em long pas gut wantaim God. Pasin bilong Adam long laikim God i no strong tumas, olsem na Adam i no gat strong long sakim traim, na dispela i makim tu traim i kam long meri bilong em.
Adam i bin mekim sin paslain long em i kamapim ol pikinini, olsem na olgeta tumbuna pikinini bilong em i gat sin taim mama i karim ol. Tasol wankain olsem Adam, yumi olgeta i gat presen long stap fri long makim wanem samting yumi laik mekim. I gutpela sapos yumi tingim tingim long bel ol gutpela pasin bilong Jehova na mekim pasin bilong laikim God i kamap strong moa, em Man husat inap tru long yumi bihainim tok bilong em na lotuim em.—Song 63:6; Matyu 22:36, 37.