Jehova i Save Lukautim Gut Yumi

“Bikpela i save was gut long ol manmeri i save aninit long em wanpela tasol, maski ol i stap long wanem hap bilong graun. Em i save helpim ol na strongim ol.”​—2 STO. 16:9.

1. Bilong wanem Jehova i save skelim yumi?

JEHOVA em i gutpela Papa tru. Em i save gut tru long yumi, na em i save tu long “tingting na laik bilong yumi.” (1 Sto. 28:9) Tasol em i no save skelim yumi bilong painim rong long yumi, nogat. (Sng. 11:4; 130:3) Em i laik lukautim yumi bambai i no gat wanpela samting i ken bagarapim pasin bilong yumi long pas gut wantaim em o pasim yumi long kisim laip oltaim.​—Sng. 25:​8-​10, 12, 13.

2. Jehova i save yusim strong bilong em long helpim husat?

² Jehova i gat olgeta strong na em i save lukim olgeta samting. Olsem na em inap helpim ol gutpela wokboi bilong em taim ol i singaut long em, na em inap strongim ol taim ol i gat hevi. Long 2 Stori 16:​9, Baibel i tok: “Bikpela i save was gut long ol manmeri i save aninit long em wanpela tasol, maski ol i stap long wanem hap bilong graun. Em i save helpim ol na strongim ol.” Tingim, Jehova i save yusim strong bilong em long helpim ol manmeri i givim bel olgeta long mekim wok bilong em na ol i gat stretpela tingting. Em i no mekim olsem long ol manmeri i save mekim tok giaman o ol i gat pasin bilong tupela maus.​—Jos. 7:​1, 20, 21, 25; Snd. 1:​23-​33.

Wokabaut Wantaim God

3, 4. Olsem wanem yumi inap wokabaut wantaim God? Wanem ol stori bilong Baibel i helpim yumi long kliagut long dispela samting?

³ Planti manmeri i hatwok long tingim olsem dispela Man Bilong Wokim traipela ples antap, em inap larim ol man bilong graun i wokabaut wantaim em. Tasol Jehova i laik bai yumi mekim olsem. Long taim bilong ol man i bin raitim Baibel, Enok na Noa ol i bin i stap “pren tru bilong God,” olsem ol i wokabaut wantaim em. (Stt. 5:24; 6:9) Moses “i mekim wankain pasin olsem man i bin lukim God, na em i stap strong tru.” (Hi. 11:27) King Devit i bin daunim em yet na wokabaut wantaim Papa bilong em i stap long heven. Devit i tok: “[Bikpela] i stap klostu [“long han sut bilong mi,” NW] na i givim strong long mi, olsem na i no gat wanpela samting i ken mekim mi i pret na guria.”​—Sng. 16:8.

⁴ Tru, i no olsem yumi inap holim tru han bilong Jehova na wokabaut wantaim em, nogat. Tasol yumi ken tok piksa olsem yumi wokabaut wantaim em. Olsem wanem yumi inap mekim olsem? Asap, man bilong raitim Song, em i tok: “Mi stap wantaim yu oltaim na yu save holim han bilong mi. Yu save givim mi gutpela tok bilong stiaim wokabaut bilong mi.” (Sng. 73:​23, 24) Em nau, yumi wokabaut wantaim Jehova taim yumi bihainim ol tok kaunsel bilong em, na yumi kisim ol dispela tok kaunsel long rot bilong Baibel na “wokboi i gat gutpela tingting.”​—Mt. 24:45; 2 Ti. 3:16.

5. Olsem wanpela papa, olsem wanem Jehova i save sambai long ol gutpela wokman bilong em? Yumi mas i gat wanem tingting long em?

⁵ Jehova i laikim tru ol man i wokabaut wantaim em, olsem na em i save sambai long ol olsem wanpela gutpela papa, na em i lukautim ol gut, na skulim ol. God i tok: “Mi laik skulim yu gut, na soim yu long rot yu mas wokabaut long en. Bai mi skulim yu na lainim yu.” (Sng. 32:8) Askim yu yet: ‘Long ai bilong tingting, mi inap lukim mi yet i holim han bilong Jehova na wokabaut wantaim em, olsem mi putim yau long ol gutpela tingting i kam long em, na mi save olsem em i tingim mi? Mi save olsem Jehova i stap, na dispela i stiaim tingting, toktok, na pasin bilong mi? Taim mi mekim rong, mi tingim Jehova olsem wanpela Papa husat i gat pasin marimari na em i laik helpim ol man i tanim bel long pas gut gen wantaim em, na mi no tingim em olsem wanpela God i gat hatpela pasin?’​—Sng. 51:17.

6. Jehova inap mekim wanem samting em ol papamama i no inap mekim?

⁶ Sampela taim Jehova inap helpim yumi paslain long yumi mekim rong. Olsem, em inap lukim olsem bel bilong yumi i kirapim yumi long laikim ol samting i no stret. (Jer. 17:9) Taim kain samting olsem i kamap, em inap kirap kwik long helpim yumi paslain long papamama i helpim yumi, long wanem, “ai” bilong em inap lukim ol tingting i stap insait tru long bel bilong yumi. (Sng. 11:4; 139:4; Jer. 17:10) Tingim samting God i bin mekim taim wanpela samting i kamap long laip bilong Baruk, em gutpela pren bilong Jeremaia na em i mekim wok olsem kuskus bilong Jeremaia.

Stap Olsem Gutpela Papa Long Baruk

7, 8. (a) Baruk em i husat? Ating wanem ol tingting kranki i wok long kamap long bel bilong em? (b) Olsem wanpela gutpela papa, Jehova i mekim wanem bilong helpim Baruk?

⁷ Baruk i bin mekim wok kuskus na em i poromanim gut Jeremaia long mekim wanpela wok i gat hatwok bilong en​—em long autim tok bilong strafe bilong Jehova long ol manmeri i stap long Juda. (Jer. 1:​18, 19) Ating Baruk i kam long wanpela famili i gat biknem, na em i bin kisim tingting long bungim “ol gutpela samting” bilong helpim em yet. Ating em i kisim tingting bilong bihainim laik bilong em yet o long bungim planti mani kago. Maski em i bin tingting long mekim wanem samting, Jehova i lukim olsem tingting kranki i wok long kamap strong long bel bilong Baruk. Long rot bilong Jeremaia, Jehova i tokim Baruk olsem: “Yu bin tok olsem, ‘Sori tru, mi gat planti hevi na pen, na Bikpela i skruim hevi bilong mi i go moa yet. Mi wok long krai i stap na mi les tru. Hevi bilong mi i no save pinis. Em i stap olsem tasol.’ ” Orait nau God i tok: “Bilong wanem yu laik bai ol gutpela samting tasol i ken kamap long yu? Yu mas lusim dispela kain tingting.”​—Jer. 45:​1-5.

⁸ Tru, Jehova i givim strongpela tok long Baruk, tasol em i no mekim wantaim belhat, nogat, em i mekim pasin olsem wanpela gutpela papa i tingim tru pikinini bilong em. Yumi ken ting God i luksave olsem ol dispela laik i no makim olsem Baruk i gat tingting nogut o laik nogut, nogat. Jehova i save tu olsem klostu nau bagarap bai painim Jerusalem na Juda, na em i no laik bai Baruk i pundaun long dispela taim nogut. Olsem na bilong helpim wokman bilong em long kisim stretpela tingting, God i tokim em olsem Em bai “mekim nogut long olgeta manmeri bilong graun.” Na God i tok moa olsem sapos Baruk i bihainim gutpela tingting, orait em bai abrusim bagarap. (Jer. 45:5) I olsem God i tok: ‘Baruk, yu mas tingting gut. Tingim ol samting em klostu nau bai kamap long ol sinman bilong Juda na Jerusalem. Yu mas bihainim tok na bai yu ken i stap laip! Mi bai lukautim yu.’ I luk olsem Baruk i pilim tru tok bilong Jehova, long wanem, em i stretim tingting bilong em na em i abrusim bagarap taim Jerusalem i bagarap inap 17 yia bihain.

9. Bai yu bekim ol askim i stap long dispela paragraf olsem wanem?

⁹ Taim yu skelim stori bilong Baruk, tingim ol askim na ol skripsa olsem: Samting Jehova i mekim long Baruk i kamapim klia olsem Em i gat wanem tingting long ol wokman bilong em? (Ritim Hibru 12:9.) Yumi stap long taim nogut, olsem na yumi inap kisim wanem skul long tok kaunsel God i givim long Baruk na long ol samting Baruk i mekim taim em i kisim dispela tok? (Ritim Luk 21:​34-​36.) Olsem Jeremaia i bin mekim, olsem wanem ol elda Kristen i ken bihainim pasin bilong Jehova long tingim ol wokman bilong Em?​—Ritim Galesia 6:1.

Pikinini i Bihainim Pasin Laikim Bilong Papa

10. Olsem wanem na Jisas inap tru long mekim wok olsem Het bilong kongrigesen Kristen?

¹⁰ Paslain long taim bilong ol Kristen, Jehova i yusim ol profet na ol arapela gutpela wokman bilong em long kamapim pasin laikim bilong em long lain bilong em. Long nau, nambawan rot bilong Jehova long kamapim dispela pasin em long rot bilong Het bilong kongrigesen Kristen, em Jisas Krais. (Ef. 1:​22, 23) Olsem na long Buk Kamapim Tok Hait, Baibel i kolim Jisas olsem pikinini sipsip i gat “7-pela ai, em ol 7-pela spirit bilong God. God i bin salim ol i go nabaut long olgeta hap bilong graun.” (KTH 5:6) Yes, holi spirit bilong God i inapim tru Jisas na em inap skelim gut ol samting. Em inap lukim tu tingting i stap long bel bilong yumi, na em i save long olgeta samting yumi mekim.

11. Krais i holim wanem wok? Olsem wanem pasin em i mekim long yumi i kamapim pasin bilong Papa bilong em?

¹¹ Olsem Jehova, Jisas tu i no olsem wanpela polisman i stap long heven, nogat. Em i mekim pasin olsem wanpela gutpela papa na em i skelim yumi. Wanpela biknem bilong Jisas em “Papa bilong i stap oltaim oltaim,” na dispela i kirapim yumi long tingim wok em bai mekim long givim laip oltaim long olgeta man i bilip long em. (Ais. 9:6) Na tu, olsem Het bilong kongrigesen Kristen, Krais inap kirapim ol strongpela Kristen, na moa yet ol elda, long givim gutpela tok na mekim gut bel bilong ol man i gat hevi.​—1 Te. 5:14; 2 Ti. 4:​1, 2.

12. (a) Ol pas i go long ol 7-pela kongrigesen long Esia Maina i kamapim klia wanem pasin bilong Jisas? (b) Olsem wanem ol elda i kamapim klia tingting em Krais i gat long ol manmeri bilong God?

¹² Krais i tingim tru ol manmeri bilong kongrigesen na dispela i kamap klia long ol pas em i salim i go long ol elda bilong ol 7-pela kongrigesen long Esia Maina. (KTH 2:1–3:22) Long ol dispela pas, Jisas i kamapim klia olsem em i save long ol samting i kamap insait long olgeta wan wan kongrigesen na em i tingim tru ol disaipel bilong em. Tasol long nau Krais i tingim moa yet lain bilong em, long wanem, dispela visen bilong Kamapim Tok Hait i kamap tru long “de bilong Bikpela.”a (KTH 1:10) Yumi inap pilim pasin laikim bilong Krais long rot bilong ol elda, em ol i mekim wok olsem ol wasman bilong kongrigesen. Em inap kirapim ol dispela man i olsem “ol presen” long strongim na mekim gut bel bilong yumi, o long givim ol gutpela tok bilong helpim yumi taim i gat wok long mekim olsem. (Ef. 4:8; Ap. 20:28; ritim Aisaia 32:​1, 2.) Olsem wanem? Yu tingim wok bilong ol olsem samting i kamapim klia olsem Krais i tingim tru yu?

Helpim i Kamap Long Taim Stret

13-15. God inap bekim ol beten bilong yumi long wanem ol rot? Kamapim sampela stori.

¹³ Olsem wanem? Sampela taim yu bin beten strong long God i ken helpim yu na bihain wanpela strongpela Kristen i kam lukim yu na em i strongim yu? (Jem. 5:​14-​16) O ating yu kisim helpim long rot bilong wanpela tok i kamap long wanpela miting Kristen o long rot bilong ol tok i stap long ol buk na nius bilong yumi. Jehova i save bekim ol beten long ol kain rot olsem. Olsem: Bihain long wanpela elda i givim tok pinis long wanpela miting, wanpela sista i go toktok long em. Sampela wik paslain, dispela sista i bin kisim bikpela hevi long ol arapela i mekim pasin i no stret long em. Em i no komplein long hevi bilong em, nogat, em i tokaut olsem em i amamas tru long sampela gutpela poin i kamap long dispela tok. Ol dispela tok i stret long hevi i painim em, na dispela i mekim gut bel bilong em. Dispela sista i amamas tru olsem em i bin i go long dispela miting!

¹⁴ Long pasin bilong kisim helpim long rot bilong beten, tingim stori bilong tripela kalabusman em ol i bin kisim save long tok i tru bilong Baibel taim ol i stap long kalabus, na ol i kamap ol pablisa i no baptais yet. Ol kalabusman i kamapim trabel, olsem na ol lain bilong kalabus i putim sampela tambu long olgeta kalabusman. Dispela i kirapim ol kalabusman na ol i laik mekim pasin bikhet. Ol i pasim tok olsem bihain long ol i kisim kaikai bilong moningtaim, ol bai sakim tok na ol i no inap givim bek ol plet bilong ol. Tripela pablisa i no baptais yet ol i tingting planti long samting ol bai mekim. Sapos ol i bihainim ol arapela kalabusman na mekim pasin bikhet, ol bai sakim tok bilong Jehova long Rom 13:1. Na sapos ol i no bihainim ol arapela kalabusman na mekim pasin bikhet, orait ol arapela kalabusman inap belhat na birua long ol.

¹⁵ Tripela pablisa hia i no inap toktok namel long ol yet, olsem na ol i beten long God i ken givim savetingting long ol. Long moningtaim long de bihain, tripela wantaim i luksave olsem ol i bin mekim wankain disisen​—ol bai i no kisim kaikai bilong moningtaim. Bihain, taim ol gad i kam long kisim bek ol plet, ol dispela tripela man i no gat plet bilong givim i go bek. Ol i amamas tru olsem Man bilong “harim beten” i bin sambai long ol!​—Sng. 65:2.

Wetim Ol Gutpela Samting Bai Kamap Bihain

16. Olsem wanem wok autim tok i kamapim pasin bilong Jehova long tingim tru ol man i gat pasin olsem bilong sipsip?

¹⁶ Wok bilong autim tok long olgeta hap bilong graun, dispela tu i kamapim olsem Jehova i tingim tru ol man i gat gutpela bel, maski ol i sindaun long wanem wanem hap. (Stt. 18:25) Jehova i save yusim ol ensel long stiaim ol wokman bilong em i go long ol man i gat pasin olsem bilong sipsip​—maski ol dispela man i sindaun long ol hap we ol man i no harim yet gutnius. (KTH 14:​6, 7) Olsem: Long rot bilong wanpela ensel, God i bin stiaim Filip, em man bilong autim gutnius long taim bilong ol aposel, long i go painim wanpela man Itiopia na stori gut long em long ol tok bilong Baibel. Wanem samting i kamap long dispela? Dispela man i orait long gutnius na em i kisim baptais na kamap wanpela disaipel bilong Jisas.b​—Jo. 10:14; Ap. 8:​26-​39.

17. Bilong wanem yumi no ken tingting planti tumas long ol samting bai kamap bihain?

¹⁷ Nau yumi stap klostu long pinis bilong pasin nogut bilong dispela graun, olsem na ol bikpela hevi olsem “pen” em Baibel i tok profet long en i wok yet long kamap. (Mt. 24:8) Olsem: Ating pe bilong kaikai bai i go antap tru, long wanem, namba bilong ol manmeri i kamap planti tru, o win na ren i bagarapim kaikai, o strong bilong mani i wok long pinis. Ating bai i hatwok tru long painim wok mani, na ol wokman i mas wok planti aua moa. Maski wanem wanem hevi i kamap, ol manmeri husat i putim ol samting bilong spirit i stap namba wan na ‘ai bilong ol i gutpela,’ ol i no inap tingting planti. Ol i save olsem God i laikim ol na em bai lukautim ol. (Mt. 6:​22-​34) Tingim olsem wanem Jehova i bin lukautim Jeremaia taim bagarap i painim Jerusalem long 607 B.C.E.

18. Long taim ol birua i banisim Jerusalem, olsem wanem Jehova i kamapim klia olsem em i laikim tru Jeremaia?

¹⁸ Ol Babilon i banisim Jerusalem na klostu long pinis bilong en, Jeremaia i stap kalabus long hap bilong ol soldia. Em bai kisim kaikai olsem wanem? Sapos em i stap fri, em inap painim kaikai. Tasol nau em i mas wet tasol long ol lain i stap klostu long helpim em, na klostu olgeta i heitim em! Maski i olsem, Jeremaia i no bilip long ol man, nogat, em i bilip long God, em Man i tok promis long lukautim em. Olsem wanem? Jehova i bin truim tok bilong em? Yes, em i bin truim tok bilong em! Jehova i wokim rot na long olgeta de ol i save givim “wanpela bret” long Jeremaia, na ol i mekim olsem i go inap long “taim olgeta bret long taun i pinis.” (Jer. 37:21) Jeremaia, Baruk, Ebetmelek, na sampela moa, ol i bin abrusim bagarap long dispela taim bilong bikpela hangre, sik, na dai.​—Jer. 38:​1-3; 39:​15-​18.

19. Taim yumi wetim ol samting bai kamap bihain, yumi mas tingting strong long mekim wanem?

¹⁹ Yes, “Bikpela i save lukautim ol stretpela manmeri, na em i save putim yau long ol beten bilong ol.” (1 Pi. 3:12) Olsem wanem? Yu save amamas long Papa bilong yu long heven i sambai long yu? Yu pilim seif taim yu save olsem em i sambai long yu bilong helpim yu? Sapos olsem, orait yu mas tingting strong long wokabaut yet wantaim God​—maski wanem samting bai kamap bihain. Yumi ken bilip tru olsem Jehova bai mekim pasin olsem wanpela papa na oltaim em bai sambai long ol gutpela wokman bilong em.​—Sng. 32:8; ritim Aisaia 41:13.

[Ol Futnot]

Yu Inap Stori Long Dispela?

• Olsem wanem yumi inap kamapim olsem yumi wokabaut wantaim God?

• Olsem wanem Jehova i kamapim olsem em i laikim tru Baruk?

• Olsem Het bilong kongrigesen Kristen, olsem wanem Jisas i bihainim ol pasin bilong Papa bilong em?

• Nau long dispela taim nogut, olsem wanem yumi inap soim olsem yumi bilip tru long God?

[Ol Piksa long pes 9]

Olsem Jeremaia i bin mekim long Baruk, ol elda Kristen long nau i save kamapim pasin bilong Jehova long tingim lain bilong em

[Piksa long pes 10]

Olsem wanem Jehova inap givim helpim long taim stret?