Jehova i Save Blesim na Lukautim Gut Ol Man i Bihainim Tok
“Ol manmeri i putim yau gut long tok bilong mi, bai ol i stap gut. Na bai ol i no gat hevi na bai ol i no pret, long wanem, ol i save, samting nogut i no inap kamap long ol.”—SINDAUN 1:33.
1, 2. Bilong wanem pasin bilong bihainim tok bilong God em i bikpela samting? Mekim tok piksa long dispela.
OL NAISPELA pikinini kakaruk i wok long kisim kaikai namel long sotpela gras—ol i no save wanpela tarangau i flai antap long ol. Wantu mama kakaruk i krai strong na taitim wing. Ol pikinini i ran i go long em, na kwiktaim ol i stap hait aninit long wing bilong em. Tarangau i lusim ol.a Dispela i skulim yumi long wanem samting? Olsem: Pasin bilong bihainim tok inap helpim yumi long abrusim bagarap!
2 Samting dispela tok piksa i skulim yumi long en, em bikpela samting tru long ol Kristen long nau, long wanem, Satan i wok strong moa yet long bagarapim lain bilong God. (KTH 12:9, 12, 17) Em i laik bagarapim bilip bilong yumi bambai Jehova i no ken orait moa long yumi na yumi lus long kisim laip oltaim. (1 Pita 5:8) Tasol sapos yumi stap klostu long God na bihainim kwik ol tok yumi kisim long rot bilong Baibel na oganaisesen bilong em, yumi ken bilip tru olsem em bai lukautim gut yumi. Man bilong raitim song i tok: “Bai em i karamapim yu gut, olsem kakaruk i karamapim ol pikinini long wing bilong en. Yu ken hait gutpela tumas aninit long wing bilong Bikpela, na bai em i was long yu.”—Song 91:4.
Wanpela Lain i Sakim Tok na i Kisim Bagarap
3. Planti taim lain Israel i sakim tok na wanem samting i kamap long dispela?
3 Taim lain Israel i bihainim tok bilong Jehova, em i save was gut long ol. Tasol planti taim ol i lusim Man bilong wokim ol na ol i go bihainim ol god em ol man i bin wokim long diwai na ston—em ‘ol i samting nating tasol na i no inap helpim na kisim bek ol.’ (1 Samuel 12:21) Dispela lain i mekim pasin bikhet olsem i go inap planti handet yia na nau ol i strong tru long sakim tok bilong God na ol i no inap tru long stretim pasin bilong ol. Olsem na Jisas i tok: “Jerusalem, Jerusalem, yu save kilim ol profet i dai, na yu save kisim ol man God i salim i kam long yu na tromoi ston long ol bilong kilim ol i dai. Planti taim moa mi laik bungim ol pikinini bilong yu, olsem kakaruk meri i save bungim ol pikinini bilong en aninit long wing bilong en. Tasol yupela i no laik. Harim. Nau ples bilong yupela bai i bagarap na i stap nating.”—Matyu 23:37, 38.
4. Samting i kamap long yia 70 C.E., olsem wanem em i kamapim long ples klia olsem Jehova i bin lusim Jerusalem olgeta?
4 Samting i kamap long yia 70 C.E. i kamapim long ples klia olsem Jehova i bin lusim tru bikhetlain Israel. Long dispela yia, ol ami bilong Rom, em ol i holim plak i gat piksa bilong tarangau long en, ol i sut i kam stret long Jerusalem olsem wanpela tarangau na bagarapim planti man tru. Planti manmeri i bin kam long dispela taun bilong mekim Pasova. Maski ol i mekim planti ofa, God i no orait long ol. Dispela i kirapim yumi long tingim ol tok Samuel i bin givim long King Sol, em i bin sakim tok bilong Jehova. Em i tok: “Bikpela i laikim wanem pasin? Ating em i laikim olkain ofa tasol, a? O ating em i laikim yumi bihainim tok bilong en? Harim. Pasin bilong bihainim tok bilong en, em i namba wan pasin tru. Na pasin bilong ofaim ol gutpela abus long em, em i namba 2 tasol.”—1 Samuel 15:22.
5. Jehova i laik bai yumi kisim wanem kain pasin bilong bihainim tok? Olsem wanem yumi ken save yumi inap tru long bihainim dispela kain pasin bilong bihainim tok?
5 Maski Jehova i strong long yumi mas bihainim tok bilong em, em i save long ol samting yumi ol man bilong graun i no inap long mekim. (Song 130:3, 4) Tasol samting em i laikim i olsem: Em i laik bai yumi mas i gat gutpela bel na bihainim tok, na as na yumi mekim olsem, em pasin bilong bilip, na laikim tru God, na pret long mekim ol samting em i no laikim. (Lo 10:12, 13; Sindaun 16:6; Aisaia 43:10; Maika 6:8; Rom 6:17) Yumi ken save yumi ol man inap tru long mekim olsem, long wanem, bikpela lain “manmeri bilong bipo ol i sanap na raunim yumi i stap olsem bikpela klaut,” ol i bin i stap gut long God, maski bikpela hevi i bin painim ol, na dai tu. (Hibru 11:36, 37; 12:1) Dispela lain i bin mekim Jehova i belgut tru! (Sindaun 27:11) Tasol sampela, pastaim ol i bin stap gut long God tasol bihain ol i lusim pasin bilong bihainim tok. Wanpela man olsem, em King Joas bilong Juda long bipo.
Ol Poroman Nogut i Bagarapim Pasin Bilong Wanpela King
6, 7. Taim Jehoiada i stap yet, Joas i wanem kain king?
6 Taim King Joas i bebi yet, klostu ol birua i kilim em i dai. Taim Joas i gat 7-pela krismas, Hetpris Jehoiada i strongim bel na bringim em i kam ausait long ples hait na putim em i stap king. Jehoiada i stap olsem papa bilong Joas na man bilong givim gutpela tingting long em, olsem na “long taim pris Jehoiada i stap yet,” dispela yangpela king “i save mekim stretpela pasin long ai bilong Bikpela.”—2 Stori 22:10–23:1, 11; 24:1, 2.
7 Wanpela gutpela wok Joas i mekim, em i stretim bek tempel bilong Jehova—dispela em wanpela wok em i tingim tru. Em i kirapim tingting bilong Hetpris Jehoiada long em i mas kisim takis mani long ol Juda na ol Jerusalem—olsem Moses i bin putim tok long mekim—bilong baim ol samting bilong stretim bek tempel. Em nau, i luk olsem Jehoiada i bin mekim gut wok bilong strongim dispela yangpela king long stadi long Lo bilong God na bihainim. Olsem na ol i pinisim kwik wok bilong stretim bek tempel na bilong wokim ol kap plet samting bilong en.—2 Stori 24:4, 6, 13, 14; Lo 17:18.
8. (a) Wanem samting i mekim na Joas i givim baksait long Jehova? (b) Bihain pasin bikhet bilong king i kirapim em long mekim wanem?
8 Sori tru, bihain Joas i lusim pasin bilong bihainim tok bilong Jehova. Bilong wanem? Baibel i tok: “Taim Jehoiada i dai pinis, ol lida bilong Juda i grisim King Joas na em i bihainim tok bilong ol. Na king wantaim ol manmeri bilong Juda na Jerusalem i givim baksait long God, Bikpela bilong ol tumbuna bilong ol, na ol i no moa lotu long haus bilong Bikpela. Nogat. Ol i lotu long ol giaman god na long ol piksa bilong god meri Asera. Ol i mekim bikpela rong long ai bilong God, olsem na God i belhat long ol.” Na tu, tok gris bilong ol lida bilong Juda i mekim na king i no harim tok bilong ol profet bilong God, wanpela bilong ol em Sekaraia, pikinini man bilong Jehoiada. Sekaraia i bin strongim bel na krosim Joas na ol manmeri, long wanem, ol i bin sakim tok bilong God. Joas i no tanim bel—em i tokim ol man na ol i tromoi ston long Sekaraia na kilim em i dai. Man! Joas i no gat sore liklik long bel bilong em, na em i wanpela bikhetman stret—na i olsem, long wanem, em i bin larim ol poroman nogut i pulim em!—2 Stori 24:17-22; 1 Korin 15:33.
9. Samting i painim Joas na ol lida, olsem wanem dispela i kamapim klia olsem pasin bilong sakim tok em pasin kranki stret?
9 Wanem samting i painim Joas na ol poroman nogut, em ol i givim baksait pinis long Jehova? Ol ami bilong Siria—em “liklik lain soldia tasol”—i kamap long kantri Juda na ol i “kilim i dai olgeta hetman.” Na tu, ol i subim king long givim olgeta gutpela samting bilong em long ol, wantaim olgeta gol na silva bilong haus bilong God. Maski Joas yet i no dai, em i no stap strong moa na em i gat bikpela sik. Bihain liklik, sampela wokboi bilong em ol i pasim tok na kilim em i dai. (2 Stori 24:23-25; 2 King 12:17, 18) Em nau, tok Jehova i bin givim long Israel i stret tru, em i tok: “Sapos yupela i sakim tok bilong God, Bikpela bilong yumi, na yupela i no bihainim gut olgeta lo bilong en nau mi givim long yupela, orait bai ol . . . samting nogut i kamap long yupela”!—Lo 28:15.
Pasin Bilong Bihainim Tok i Bin Lukautim Wanpela Kuskus
10, 11. (a) Bilong wanem i gutpela sapos yumi tingim ol tok Jehova i bin givim long Baruk? (b) Jehova i givim wanem tok long Baruk?
10 Olsem wanem? Sampela taim yu pilim bel hevi, long wanem, namel long ol man yu autim tok long ol, i no gat planti i amamas long harim gutnius? Na sampela taim yu bel kaskas liklik long ol maniman na long sindaun bilong ol? Sapos olsem, orait tingim kuskus bilong Jeremaia, em Baruk, na ol gutpela tok Jehova i bin givim long em.
11 Taim Baruk i wok long raitim wanpela tok profet, Jehova i putim tingting i go long Baruk yet. Bilong wanem? Long wanem, Baruk i kirap na bel hevi long i stap bilong em na em i laik kisim sampela gutpela samting moa, winim gutpela wok God i bin givim long em. Jehova i lukim dispela senis i kamap long tingting bilong Baruk na em i givim sampela gutpela tok long Baruk. Em i tok: “Bilong wanem yu laik bai ol gutpela samting tasol i ken kamap long yu? Yu mas lusim dispela kain tingting, long wanem, . . . mi wok long mekim nogut long olgeta manmeri bilong graun. Tasol bai mi helpim yu, na maski yu go long wanem hap, bai ol i no inap long kilim yu i dai.”—Jeremaia 36:4; 45:5.
12. I gat wanem as na yumi no ken wok long painim “ol gutpela samting tasol” long dispela graun nau yumi stap long en?
12 Olsem wanem? Long dispela tok Jehova i bin givim long Baruk, yu pilim olsem Em i tingim tru dispela gutpela man em i bin strongim bel na wok wantaim Jeremaia long wok bilong Jehova na stap gut long em? Na i wankain tu long nau, Jehova i tingting tru long ol man em ol samting bilong dispela graun i laik pulim ol long kisim bikpela wok mani samting. Tasol gutpela tru, olsem Baruk yet i bin mekim, planti man i bin larim ol strongpela brata spirit i stretim ol long pasin sori. (Luk 15:4-7) Yes, yumi olgeta i mas luksave olsem i no gat wanpela gutpela samting tru i wetim ol man i wok long painim “ol gutpela samting tasol” nau long dispela taim yumi stap long en. Ol i no painim amamas tru long nau, na samting i nogut moa yet, bihain ol bai pinis wantaim ol pasin bilong dispela graun na ol aigris bilong en.—Matyu 6:19, 20; 1 Jon 2:15-17.
13. Stori bilong Baruk inap skulim yumi olsem wanem long pasin daun?
13 Na tu, stori bilong Baruk i skulim yumi gut long pasin daun. Tingim, Jehova yet i no givim dispela tok long Baruk, nogat; em i givim long rot bilong Jeremaia, em Baruk i save pinis long ol liklik pasin kranki bilong em. (Jeremaia 45:1, 2) Tasol Baruk i no mekim pasin antap, nogat; long pasin daun em i luksave olsem Jehova em i as tru bilong dispela tok. (2 Stori 26:3, 4, 16; Sindaun 18:12; 19:20) Olsem na sapos yumi popaia na “mekim sin” na yumi kisim sampela gutpela tok bilong Baibel bilong stretim yumi, orait i gutpela sapos yumi bihainim pasin bilong Baruk, em i gat pasin olsem man i bikpela pinis, na pasin bilong skelim gut ol samting bilong spirit, na pasin daun.—Galesia 6:1.
14. Bilong wanem i gutpela yumi bihainim tok bilong ol elda?
14 Na sapos yumi mekim pasin daun, dispela bai helpim ol man i givim dispela tok bilong stretim yumi. Hibru 13:17 i tok: “Ol lida bilong yupela ol i laik helpim yupela, na ol i save was long yupela oltaim. . . . Olsem na yupela i mas bihainim tok bilong ol na i stap aninit long ol. Sapos yupela i mekim olsem, orait ol bai i amamas na mekim wok bilong ol, na ol bai i no inap bel hevi. Sapos ol i bel hevi long lukautim yupela, dispela bai i no helpim yupela.” Planti taim ol elda i save beten strong long Jehova, na askim em long strongim bel bilong ol, na givim gutpela tingting na pasin isi long ol, inap tru long ol i ken mekim dispela hap wok bilong lukautim ol sipsip i gat hatwok liklik long en. Yumi mas “amamas long ol dispela kain man.”—1 Korin 16:18.
15. (a) Jeremaia i mekim wanem bilong soim olsem em i bilip tru long Baruk? (b) Baruk i mekim pasin daun na bihainim tok na em i kisim wanem gutpela pe?
15 Yumi ken save olsem Baruk i bin stretim tingting bilong em, long wanem, bihain Jeremaia i givim wanpela bikpela wok tru long em—em i mas go long tempel na ritim tokaut bilong kot em i bin kisim long maus bilong Jeremaia na em i raitim. Olsem wanem? Baruk i bihainim tok bilong Jeremaia? Yes, em i mekim “olgeta samting olsem Jeremaia i bin tokim em.” Na tu, em i ritim dispela tok long ol ofisa bilong Jerusalem, na bilong mekim olsem, em i mas strongim bel tru. (Jeremaia 36:1-6, 8, 14, 15) Taim ol Babilon i kisim Jerusalem 18 yia bihain, ating Baruk i tenkyu tru long em i bin abrusim bagarap long wanem em i bin bihainim toksave bilong Jehova na lusim pasin bilong painim “ol gutpela samting” bilong em yet!—Jeremaia 39:1, 2, 11, 12; 43:6.
Ol i Bihainim Tok na Abrusim Bagarap
16. Taim ol Babilon i banisim Jerusalem long 607 B.C.E., Jehova i mekim wanem bilong soim pasin sori long ol Juda insait long dispela taun?
16 Taim Jerusalem i bagarap long 607 B.C.E., pasin bilong God long sori long ol man i bihainim tok, em i kamap ples klia gen. Taim ol Babilon i banisim taun, Jehova i tokim ol Juda: “Mi soim yupela tupela rot. Narapela em i rot bilong laip na narapela em i rot bilong i dai. Ol manmeri i stap insait long dispela taun, bai ol i dai. Ol birua bai i kilim ol i dai, o ol bai i sot long kaikai na i dai, o sik nogut bai i bagarapim ol na ol i dai. Tasol sapos ol i laik i stap laip, ol i mas lusim taun na i go long ol dispela Babilon i wok long banisim taun. Na ol i mas larim ol Babilon i holimpas ol, na bai ol i no ken i dai.” (Jeremaia 21:8, 9) I stret ol lain bilong Jerusalem i mas i dai, tasol Jehova i mekim gutpela pasin sori long ol man i bihainim tok bilong em, maski liklik taim Jerusalem bai bagarap.b
17. (a) Taim Jehova i tokim Jeremaia long tokim ol Juda long “ranawe i go” long ol Babilon, dispela i traim pasin bilong Jeremaia long bihainim tok long wanem tupela samting? (b) Pasin bilong Jeremaia long strongim bel na bihainim tok i ken helpim yumi olsem wanem?
17 Jeremaia i tokim ol Juda long go long ol Babilon, na dispela i traim pasin bilong Jeremaia tu long bihainim tok. Olsem: Em i strong long nem bilong God i mas stap gut. Em i no laik bai ol birua i tok bilas long en na tok ol i winim pait long strong bilong ol god bilong ol, em ol god i no gat laip. (Jeremaia 50:2, 11; Krai 2:16) Na tu, Jeremaia i save olsem taim em i tokim ol Juda long larim ol Babilon i kisim ol, em yet inap kisim bagarap, long wanem, planti bai ting olsem em i laik helpim ol birua. Tasol em i no pret—em i bihainim tok na autim ol tok bilong Jehova. (Jeremaia 38:4, 17, 18) Olsem Jeremaia, yumi tu i save autim wanpela tok em planti man i no laikim. Wankain tok olsem i bin mekim na ol man i no laikim Jisas. (Aisaia 53:3; Matyu 24:9) Olsem na yumi no ken ‘pret long ol man.’ Olsem Jeremaia, yumi mas strongim bel na bihainim tok bilong Jehova, na bilip tru long em.—Sindaun 29:25.
Bihainim Tok na Pait Bilong Gok
18. Bihain, wanem samting bai kamap bilong traim pasin bilong ol wokboi bilong Jehova long bihainim tok?
18 Klostu nau, olgeta pasin nogut Satan i bin kamapim long graun, em bai pinis long taim bilong wanpela “bikpela hevi tru,” em kain hevi olsem i no bin kamap bipo. (Matyu 24:21) Long dispela taim, na paslain liklik tu, sampela bikpela samting bai kamap bilong traim bilip bilong lain bilong God na pasin bilong ol long bihainim tok. Olsem: Baibel i tok ‘Gok bilong Magok,’ em Satan, em bai pait long ol wokboi bilong Jehova—em bai stiaim ol lain bilong em i go pait, em Baibel i stori long ol olsem “bikpela lain ami . . . i karamapim graun olsem bikpela klaut.” (Esekiel 38:2, 14-16) Lain bilong God i no planti na ol i no gat ol samting bilong pait, olsem na ol bai go painim ples hait aninit long “wing” bilong Jehova, em i opim i stap bilong lukautim gut ol man i bihainim tok.
19, 20. (a) Bilong wanem pasin bilong bihainim tok em i bikpela samting taim ol Israel i stap long solwara Retsi? (b) Taim yumi beten na tingim gut stori bilong solwara Retsi, dispela inap helpim yumi olsem wanem?
19 Dispela samting i kirapim yumi long tingim ol Israel taim ol i lusim Isip. Jehova i bin salim 10-pela bikpela hevi long kantri Isip, na nau em i bringim lain bilong em i go long Graun Bilong Promis, tasol em i no bringim ol i go long sotpela rot, nogat; em i bringim ol long rot i go daun long solwara Retsi, we ol birua inap pasim rot bilong ol na pait long ol. I luk olsem dispela rot ol i bihainim i bringim ol long ples bilong bagarap. Orait sapos yu yet yu bin i stap wantaim ol, bai yu bihainim dispela tok Jehova i bin givim long ol long rot bilong Moses na bilip strong na wokabaut i go daun long solwara Retsi, maski yu save Graun Bilong Promis i stap long narapela hap?—Kisim Bek 14:1-4.
20 Olsem yumi ritim long Kisim Bek sapta 14, Jehova i bin kisim bek lain bilong em na mekim ol narapela narapela kain samting bilong kamapim strong bilong em. Taim yumi lusim hap taim long stadi na tingim gut ol dispela stori, dispela i save strongim tru bilip bilong yumi! (2 Pita 2:9) Na strongpela bilip bai strongim yumi long bihainim ol tok bilong Jehova, maski i luk olsem ol samting em i tokim yumi long mekim i no stret wantaim tingting bilong yumi ol man bilong graun. (Sindaun 3:5, 6) Olsem na askim yu yet, ‘Mi save wok long strongim bilip bilong mi long rot bilong stadi long Baibel, na beten, na tingim gut ol tok long bel, na oltaim bung wantaim lain bilong God?’—Hibru 10:24, 25; 12:1-3.
Man i Bihainim Tok Em Inap Bilip Strong
21. Ol man i bihainim tok bilong Jehova ol bai kisim wanem ol blesing long nau na long bihain?
21 Ol man i bihainim tok bilong Jehova long nau, tok bilong Sindaun 1:33 i kamap tru long ol, em i tok: “Ol manmeri i putim yau gut long tok bilong mi [olsem bihainim], bai ol i stap gut. Na bai ol i no gat hevi na bai ol i no pret, long wanem, ol i save, samting nogut i no inap kamap long ol.” Dispela gutpela tok bai mekim gut bel bilong ol long de bilong Jehova long bekim pe nogut, em klostu nau bai kamap! Jisas i tokim ol disaipel: “Taim ol dispela samting i stat long kamap, orait yupela i mas sanap na litimapim het bilong yupela, long wanem, taim bilong God i kisim bek yupela em i kam klostu pinis.” (Luk 21:28) Tru tumas, ol man i bihainim tok bilong God, ol tasol bai bilip strong long em na bai ol inap bihainim dispela tok.—Matyu 7:21.
22. (a) I gat wanem as na ol manmeri bilong Jehova inap bilip strong? (b) Stori i kamap bihain long dispela bai toktok long wanem samting?
22 Narapela as na yumi ken bilip strong, i olsem: “Olgeta samting God, Bikpela i laik mekim, em i save autim pastaim long ol wokman bilong en, em ol profet, na bihain em i save mekim olsem em i bin tok.” (Amos 3:7) Long nau, Jehova i no save givim tok long ol man long maus bilong ol profet olsem bipo, nogat; em i bin givim wok long wanpela gutpela lain wokboi bilong givim kaikai bilong spirit long ol manmeri bilong em long taim stret. (Matyu 24:45-47) Olsem na i bikpela samting long yumi mas bihainim tok bilong dispela “wokboi”! Olsem stori i kamap bihain long dispela bai kamapim, pasin bilong bihainim tok bilong dispela wokboi bai kamapim tingting bilong yumi long Jisas yet, em bikman bilong dispela “wokboi.” Em i Man bilong kisim wok bilong “bosim olgeta lain manmeri.”—Stat 49:10.
[Ol Futnot]
a Long planti piksa ol i wokim bilong mama kakaruk, i luk olsem em i save pret liklik, tasol buk bilong wanpela lain bilong lukautim ol animal i tok: “Bilong lukautim ol pikinini na bai ol i no ken bagarap, mama kakaruk bai pait i go inap long em i dai.”
b Olsem Jeremaia 38:19 i tok, sampela Juda “i ranawe i go” long ol Babilon na ol i no dai—ol i go kalabus tasol. Ating ol i bin bihainim tok bilong Jeremaia na long dispela as ol i go long ol Babilon, em yumi no save. Tasol ol i no dai na dispela i kamapim klia olsem tok bilong dispela profet i tru.
Yu Inap Tingim?
• Planti taim ol Israel i sakim tok na wanem samting i kamap long dispela?
• Ol poroman bilong King Joas i bin mekim wanem long em long taim em i yangpela na bihain tu?
• Stori bilong Baruk inap skulim yumi long wanem ol samting?
• I gat wanem as na lain bilong Jehova, em ol i save bihainim tok bilong em, ol i no ken pret taim pinis bilong dispela pasin bilong nau i wok long kam klostu?
[Piksa long pes 13]
Taim Jehoiada i soim rot long yangpela Joas, Joas i bihainim tok bilong Jehova
[Piksa long pes 15]
Ol poroman nogut i pulim Joas long kilim i dai profet bilong God
[Piksa long pes 16]
Sapos yu bin stap wantaim ol Israel, bai yu bihainim tok bilong Jehova na lukim ol bikpela samting em i mekim bilong lukautim ol?