Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • w08 12/1 p. 4-7
  • Jisas—Nambawan Gutpela Piksa Bilong Bihainim

No gat vidio bilong dispela seksen.

Sori, popaia kamap long lodim vidio.

  • Jisas—Nambawan Gutpela Piksa Bilong Bihainim
  • Wastaua i tokaut Long Kingdom Bilong Jehova—2008
  • Ol Liklik Het Tok
  • Wankain Infomesen
  • Em i No Stap Olsem Piksa Tasol Bilong Bihainim
  • Jisas Krais Em i Husat?
    Tok Baibel i Skulim Yumi Long En
  • Bai Yu Larim Sori Bilong Jisas i Kirapim Yu Long Wok?
    Wastaua i Tokaut Long Kingdom Bilong Jehova—1992
  • Jisas Krais Em i Husat?
    Tru Tru Baibel i Tok Wanem?
  • Krais Jisas—God i Salim Em i Kam?
    Yu Inap i Stap Oltaim long Paradais long Graun
Lukim Moa
Wastaua i tokaut Long Kingdom Bilong Jehova—2008
w08 12/1 p. 4-7

Jisas​​—Nambawan Gutpela Piksa Bilong Bihainim

YU LAIK kamap gutpela man moa na i stap amamas? Aposel Pita i tokim yumi long olsem wanem yumi ken mekim olsem. Em i tok: “Krais . . . i bin karim pen bilong helpim yupela. Em i soim yupela pinis dispela pasin bilong em, bai yupela i ken bihainim.” (1 Pita 2:21) Tru tumas, Jisas i bin mekim planti samting tru long i stap bilong em, na dispela inap skulim gut yumi. Sapos yumi kisim save long Jisas na bihainim pasin na wokabaut bilong em long i stap bilong yumi, yumi inap kamap gutpela man moa na i stap amamas. Orait yumi ken skelim sampela pasin bilong dispela bikpela man na olsem wanem pasin bilong em long i stap gutpela piksa inap helpim yumi.

Jisas i mekim ol samting long stretpela tingting. Tru, Jisas i tok “em i no gat ples bilong slip,” tasol em i no tokim ol man long ol i mas i stap rabis na i no kisim sampela amamas, na em yet i no mekim olsem, nogat. (Matyu 8:20) Em i bin i go long ol bikpela kaikai. (Luk 5:29) Namba wan mirakel bilong em long Baibel​—em i bin tanim wara i kamap gutpela wain long wanpela kaikai bilong marit​—i soim olsem Jisas i no givim baksait long ol man o long ol samting bilong amamas. (Jon 2:​1-​11) Tasol Jisas i kamapim klia olsem dispela i no bikpela samting long em. Em i tok: “God i bin salim mi na mi kam, na kaikai bilong mi, em long bihainim laik bilong em na long pinisim wok em i bin givim mi.”​—Jon 4:34.

□ Olsem wanem? Yu bin skelim gut i stap bilong yu bambai yu ken kisim stretpela tingting long painim ol samting bilong skin na bilong pas gut wantaim God?

Ol man i no pret long kam long Jisas. Baibel i soim olsem Jisas i save mekim gut long ol man na i save toktok gut wantaim ol. Em i no belhat taim ol man i kam long em na i kamapim ol hevi bilong ol o ol i gat ol askim ol i tingting planti long en. Wanpela taim em i stap namel long bikpela lain manmeri na wanpela meri i gat sik inap 12-pela yia i holim klos bilong Jisas bambai em i ken kamap orait gen. Jisas i no krosim em long dispela​—em i tok isi long meri olsem: “Pikinini, yu bilip long mi, olsem na yu kamap orait gen.” (Mak 5:​25-​34) Ol pikinini tu i laik i stap wantaim em, na ol i no pret long em bai givim baksait long ol. (Mak 10:​13-​16) Em i bin toktok gut wantaim ol disaipel olsem pren bilong ol. Ol i no surik long i go klostu long em.​—Mak 6:​30-​32.

□ Olsem wanem? Ol narapela i pret long i kam toktok wantaim yu?

Em i gat pasin sori na i pilim hevi bilong ol man. Wanpela pasin Jisas i strong tru long mekim, em i save pilim hevi bilong ol man na dispela i kirapim em long mekim ol samting bilong helpim ol. Aposel Jon i tok, taim Jisas i lukim Maria i krai long brata bilong em Lasarus i dai pinis, “bel bilong [Jisas] i sori tru na em tu i laik krai.” Ol manmeri i lukluk i stap, ol i luksave olsem Jisas i laikim tumas dispela famili, na em i no sem long kamapim long ples klia dispela samting. Na em i kamapim klia bikpela sori bilong em taim em i kirapim bek pren bilong em long matmat!​—Jon 11:​33-​44.

Long narapela taim, wanpela man i gat sik lepra, em wanpela sik nogut tru i mekim na em i mas i stap wanpis, em i krai long Jisas: “Bikpela, sapos yu laik, yu inap long mekim mi i kamap klin long ai bilong God.” Samting Jisas i mekim i soim bikpela bel sori bilong em: “Jisas i putim han long dispela man na i tok, ‘Mi laik. Yu kamap klin.’ ” (Matyu 8:​2, 3) Jisas i no bin oraitim tasol sik bilong ol man bambai em i ken truim tok profet, nogat. Em i gat laik long rausim wara i stap long ai bilong ol. I gat wanpela tok bilong em i stiaim olgeta samting em i bin mekim, olsem: “Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol.”​—Luk 6:31.

□ Olsem wanem? Bel sori bilong yu long ol man i kamap klia long ol samting yu mekim bilong helpim ol?

Jisas i pilim ol hevi bilong sindaun bilong ol na em inap skelim bel bilong ol. Jisas i no bin mekim wanpela rong, tasol em i no strong tumas long ol man i mas mekim stret olgeta samting, na em i no mekim olsem em i winim ol narapela, na em i no soim olsem em i no pilim hevi na tingting bilong ol, nogat. Wanpela taim i gat wanpela meri “i save mekim ol kain kain pasin nogut em i stap long dispela taun,” na em i soim olsem em i bilip long Jisas. Em i krai na wasim lek bilong Jisas long aiwara bilong em. Jisas i larim em i mekim olsem, tasol man i bin singautim Jisas i kam em i kirap nogut long dispela, long wanem, em i ting meri hia em meri nogut. Jisas i save meri i gat gutpela bel na em i no kotim meri long ol sin em i bin mekim. Jisas i tokim em: “Bilip bilong yu i mekim na nau yu stap gut wantaim God. Yu go, na bel bilong yu i ken i stap isi.” Yumi ken ting gutpela pasin bilong Jisas i kirapim meri long lusim ol pasin nogut em i bin mekim.​—Luk 7:​37-​50.

□ Olsem wanem? Yu gat nem olsem man bilong hariap long givim gutpela tok long ol man na yu no hariap long kotim ol?

Em i mekim wankain pasin long olgeta man na i rispek long ol. Jisas i laikim moa yet disaipel Jon, long wanem, ating pasin bilong tupela i wankain na ol i bilong wanpela lain famili.a Tasol Jisas i no mekim gut long em winim ol narapela disaipel, nogat. (Jon 13:23) Taim Jon wantaim brata bilong em Jems i askim Jisas long givim nambawan sia long tupela long Kingdom Bilong God, Jisas i tok: “Husat bai i sindaun long han sut na long han kais bilong mi, dispela em i no samting bilong mi long makim.”​—Mak 10:​35-​40.

Long olgeta taim Jisas i save soim rispek long ol man. I no olsem em i laikim sampela lain tasol na bel nogut long ol narapela lain olsem ol man long taim bilong em ol i bin mekim, nogat. Olsem: Ol man i bin tingim ol meri i samting nating. Tasol Jisas i mekim gut long ol meri olsem ol i gat nem. Taim em i tokaut long namba wan taim olsem em i Mesaia, em i givim dispela tok long wanpela meri i no bilong lain Juda​—em wanpela Samaria, em lain ol Juda i tingim olsem ol pipia lain tasol, na ol i no save tok gude long ol. (Jon 4:​7-​26) Na taim Jisas i kirap bek long matmat, em i larim ol meri i lukim em paslain long ol arapela.​—Matyu 28:​9, 10.

□ Olsem wanem? Yu save mekim wankain pasin tasol long ol manmeri maski ol i bilong narapela skin, o ol i man o meri, o ol i gat narapela tok ples, o ol i bilong narapela lain?

Em i bin mekim gut ol wok olsem gutpela pikinini na gutpela brata. I luk olsem waspapa bilong Jisas, em Josep, em i bin dai taim Jisas i yangpela yet. Yumi ken ting Jisas i bin mekim wok kamda bilong lukautim mama na ol bratasusa bilong em. (Mak 6:3) Taim em i laik i dai, em i putim mama bilong em long han bilong disaipel Jon bilong lukautim em.​—Jon 19:​26, 27.

□ Olsem wanem? Yu inap bihainim pasin bilong Jisas na mekim ol wok bilong lukautim famili?

Jisas i stap pren tru. Jisas em i nambawan pren tru. Olsem wanem na yumi ken tok olsem? Em i no givim baksait long ol pren bilong em taim ol i mekim popaia o pasin kranki, maski ol i mekim wankain popaia planti taim. Sampela taim ol disaipel i no mekim ol samting olsem Jisas i laikim. Tasol em i tingim ol gutpela pasin bilong ol na em i no ting ol i gat tingting nogut na ol i mekim, na long dispela rot em i soim olsem em i pren tru bilong ol. (Mak 9:​33-​35; Luk 22:​24-​27) Em i no strong long ol i mas bihainim olgeta tingting bilong em, em i tokim ol long kamapim tingting bilong ol yet long em.​—Matyu 16:​13-​15.

Na bikpela samting moa, Jisas i laikim tumas ol pren bilong em. (Jon 13:1) Em i laikim ol inap long wanem mak? Em i tok: “Sapos wanpela man i laikim tumas ol pren bilong en na i lusim laip bilong em yet bilong helpim ol, orait dispela pasin . . . i winim tru ol arapela pasin bilong laikim ol arapela manmeri.” (Jon 15:13) Orait yu ting man inap givim wanpela samting long ol pren bilong em i winim laip bilong em yet? Nogat, a?

□ Olsem wanem? Yu save stap pren maski ol narapela i skrapim bel bilong yu o mekim tok i sutim bel bilong yu?

Em i gat strongpela bel na em i stap olsem man tru. Jisas i no wankain liklik olsem ol piksa ol man i droim, ol i droim piksa bilong em olsem em i no gat bun na em i no inap mekim wanpela strongpela wok. Fopela Gutnius bilong Baibel i soim olsem em i wanpela strongpela man na man i gat bun. Tupela taim long tempel, Jisas i bin rausim ol man bilong mekim wok bisnis wantaim ol kago bilong ol. (Mak 11:​15-​17; Jon 2:​14-​17) Taim ol birua i kam bilong holimpas “Jisas bilong Nasaret,” em i no pret​—em i go klostu long ol bilong kamapim em yet long ol na bai ol i no ken mekim nogut long ol disaipel, na em i tokaut strong: “Em mi tasol. Na sapos yupela i painim mi, orait larim ol dispela man i go.” (Jon 18:​4-9) Olsem na taim Pailat i lukim pasin bilong Jisas long i gat strongpela bel long taim ol man i holimpasim em na mekim nogut long em, Pailat i tok: “Lukim. Em hia dispela man.”​—Jon 19:​4, 5.

□ Olsem wanem? Taim yu save pinis long samting yu mas mekim, yu save strongim bel na kirap mekim dispela samting?

Ol dispela gutpela pasin na sampela pasin moa i mekim na Jisas em i nambawan piksa tru yumi ken bihainim. Sapos yumi larim pasin bilong em i stiaim yumi, bai yumi kamap gutpela man moa na i stap amamas. Long dispela as aposel Pita i tokim ol Kristen long bihainim gut lek bilong Jisas. Yu save wok strong long bihainim gut lek bilong Jisas?

Em i No Stap Olsem Piksa Tasol Bilong Bihainim

Tasol Jisas i no stap olsem piksa tasol bilong bihainim, nogat. Em i tok: “Mi yet mi rot, na mi as bilong tok tru, na mi as bilong laip. I no gat wanpela man inap i kam long Papa long narapela rot. Nogat. Long mi tasol.” (Jon 14:6) Jisas i bin tokim ol man long ol tok tru bilong God na long dispela pasin em i opim rot long ol i ken i go klostu long God; na tu, Jisas i bin wokim rot bambai ol man i stap gut long God ol i ken kisim laip.​—Jon 3:16.

Jisas i tokaut long as na em i bin kam long graun, em i tok: “Pikinini Bilong Man i no bin i kam bilong ol man i ken mekim wok bilong helpim em. Nogat. Em i kam bilong helpim ol, na bilong givim laip bilong em bilong baim bek planti manmeri.” (Matyu 20:28) Jisas i bin givim laip bilong em olsem ofa na em i wokim rot bambai ol man i ken kisim laip i stap oltaim oltaim. Orait yumi wan wan i mas mekim wanem bilong kisim dispela gutpela samting? Jisas i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.”​—Jon 17:3.

Tru tumas, sapos yumi laik kisim laip i stap oltaim oltaim, yumi mas kisim save long Jisas, bihainim pasin na wokabaut bilong em, na bilip long em i bin i dai olsem ofa. Mipela i laik bai yu lusim hap taim bilong stadi long Baibel, em as bilong dispela save, na wok strong long bihainim ol tok bilong en olsem Jisas i bin mekim.b

I stap bilong Jisas em i gutpela piksa tru na i skulim yumi olsem yumi mas i stap wanem kain man. Dai bilong em olsem ofa i helpim yumi long lusim kalabus bilong sin na dai, em pe bilong sin. (Rom 6:23) Bai yumi stap tarangu tru sapos Jisas Krais i no bin soim rot long yumi! Yumi no ken tru larim ol wok samting bilong skin na ol hevi bilong graun i pasim rot bilong yumi long tingim na bihainim gut pasin bilong nambawan man tru i winim olgeta narapela man i bin stap long graun​—em Jisas Krais.

[Ol Futnot]

a Mama bilong Jon, em Salome, ating em i susa bilong Maria, mama bilong Jisas. Skelim Matyu 27:​55, 56 wantaim Mak 15:40 na Jon 19:25.

b Bilong kisim sampela save moa long i stap bilong Jisas long graun, lukim buk Nambawan Man Tru i Winim Olgeta Narapela Man, ol Witnes Bilong Jehova i wokim.

[Blok/Ol Piksa long pes 7]

◼ Jisas i mekim wankain pasin long olgeta man na em i rispek long ol

◼ Em i stap pren tru i go inap long taim em i dai

◼ Em i gat strongpela bel

Yu save wok strong tru long bihainim gut lek mak bilong Jisas?

[Ol Piksa long pes 5]

Jisas i mekim ol samting long stretpela tingting . . .

ol man i no pret long i kam long em . . .

em i bel sori long ol man

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim