Go Klostu Long God
Man Bilong Wokim Olgeta Samting Em Inap Tru Long Yumi Litimapim Nem Bilong Em
OLSEM WANEM? Sampela taim yu save tingting olsem, ‘I stap bilong yumi gat wanem as bilong en?’ Ol man husat i bilip olsem laip i kamap long rot bilong evolusen, ol i no inap painim bekim bilong dispela askim. Tasol ol man husat i bilip long tok tru olsem God Jehova em i As bilong laip, ol i save long bekim bilong en. (Song 36:9) Ol i save olsem i gat as na God i wokim yumi. Kamapim Tok Hait 4:11, i kamapim dispela as. Yumi laik skelim olsem wanem ol tok aposel Jon i raitim i kamapim klia as na yumi stap.
Jon i stori long singsing i kamap long heven bilong litimapim nem bilong God olsem: “Bikpela, yu God bilong mipela. . . . [“Yu inap tru long kisim glori, na biknem, na pawa,” King Jems Nupela Testamen] Long wanem, yu bin wokim olgeta samting. Long laik bilong yu yet yu bin mekim olgeta samting i kamap, na nau dispela olgeta samting i stap.” Jehova wanpela tasol em inap tru long kisim kain biknem olsem. Bilong wanem? Long wanem, em i bin “wokim olgeta samting.” Dispela i mas kirapim ol manmeri long mekim wanem samting?
Baibel i tok, Jehova wanpela tasol em inap tru long “kisim” glori, na biknem, na pawa. Tru tumas, em Man i gat olgeta glori, biknem na pawa long heven na long graun. Tasol planti manmeri i no daun long em olsem Man Bilong Wokim olgeta samting. Maski i olsem, i gat ol man husat i save long ol “pasin bilong God i stap hait” long rot bilong lukim ol samting em i bin wokim. (Rom 1:20) Ol i pilim tru long bel na dispela i kirapim ol long givim glori na biknem long Jehova. Ol i tokim olgeta man husat i laik harim tok olsem Jehova wanpela tasol em Man i bin wokim gut olgeta samting, olsem na i stret yumi daun tru long em.—Song 19:1, 2; 139:14.
Olsem wanem Jehova i kisim strong o pawa long ol man i lotuim em? Tru, i no gat wanpela samting em God i bin wokim inap givim pawa long God i Gat Olgeta Strong. (Aisaia 40:25, 26) Tasol God i wokim yumi i kamap olsem em yet olsem na yumi gat ol pasin bilong em, na wanpela bilong ol dispela pasin em pawa o strong. (Stat 1:27) Sapos yumi pilim tru ol samting em Man Bilong Wokim yumi i bin mekim long yumi, yumi bai yusim strong o pawa bilong yumi long givim biknem na glori long em. Yumi no yusim strong bilong yumi bilong inapim laik bilong yumi yet tasol, nogat, yumi pilim olsem i stret yumi givim olgeta strong bilong yumi long Jehova taim yumi mekim wok bilong em.—Mak 12:30.
I gat wanem as na yumi stap? Laspela hap bilong Kamapim Tok Hait 4:11 i tok: “Long laik bilong yu yet yu bin mekim olgeta samting i kamap, na nau dispela olgeta samting i stap.” I no long laik bilong yumi yet yumi kamap na i stap, nogat. Long laik bilong God yet em i bin wokim yumi na yumi stap. Long dispela as, taim yumi inapim laik bilong yumi yet tasol, laip bilong yumi i no gat as bilong en. Bilong stap bel isi na amamas long laip bilong yumi, na inapim ol samting yumi gat laik long mekim, yumi mas kisim save long laik bilong God na mekim ol samting i stret wantaim laik bilong em. Long dispela rot, bai yumi save long as na God i wokim yumi na yumi stap.—Song 40:8.
[Piksa Kredit Lain long pes 31]
NASA, ESA, na A. Nota (STScI)