Yumi Mas Litimapim Nem Bilong Jehova na Jisas

Ol Samting Yumi Ken Mekim na Memorial Long Epril 8 Inap Helpim Gut Olgeta Man i Bung

¹ Long nau ol man i save givim biknem long husat? Long ol man i mekim ol wok samting em ol man bilong graun i givim biknem long en. Tasol i no longtaim na planti man bai lusim tingting long wok bilong ol. Tasol olsem wanem long ol wok em inap helpim tru olgeta manmeri? Bai yumi tingim nambawan bikpela wok tru bilong helpim ol man taim yumi mekim Kaikai Bilong Bikpela, long taim san i go daun pinis long Epril 8, 2001.

² Yumi mas givim biknem tru long husat? Baibel i bekim dispela askim: “Bikpela, yu God bilong mipela. Yu tasol yu stap antap tru na inap tru long olgeta man i ken amamas long yu na litimapim nem bilong yu na i stap aninit long strong bilong yu. Long wanem, yu bin wokim olgeta samting.” (KTH 4:11) Jehova em Man bilong wokim olgeta samting, olsem na em i King bilong heven na graun. Wok bilong givim biknem long em i no inap pinis!​​—⁠1 Ti 1:​17.

³ Jisas Krais i bin mekim ol gutpela wok bilong helpim ol manmeri inap oltaim oltaim. Em i bihainim stret pasin bilong Papa bilong em. (Jo 5:19) Pasin bilong em long bihainim tok na stap gut long wok bilong God i mekim na em “inap tru long kisim namba na olgeta gutpela samting na gutpela save na bikpela strong. Em inap tru long olgeta man i litimapim nem bilong em na amamas long em na givim tenkyu long em.” (KTH 5:12) Papa bilong em i givim biknem long em na putim em i stap King. (Sng 2:​6-8) Na yumi bai i gat rot long givim biknem long Papa na Pikinini taim yumi mekim Kaikai Bilong Bikpela long Epril 8, 2001.

⁴ I stret ol man i mas givim biknem long Jehova na Pikinini bilong em, tasol sori tru, long bipo na i kam inap long nau wan wan man tasol i bin mekim olsem. Sampela taim ol manmeri bilong God long bipo, em lain Israel, ol tu i givim hap bel tasol long mekim wok bilong Jehova. Ol i no daun liklik long em. (Mal 1:⁠6) Bilong mekim pasin daun yumi mas bihainim tok, na pasin bilong laikim Jehova na pilim tru ol samting Jehova na Pikinini bilong em i bin mekim long yumi i mas kirapim yumi long mekim olsem. Taim yumi givim biknem na daun long God, dispela i makim olsem yumi pret long God na givim biknem long em, na yumi tingim tru Jehova na Jisas long olgeta wokabaut bilong yumi. Kongrigesen Kristen i save wok strong long skulim na helpim ol narapela long mekim wankain pasin olsem.

⁵ Wanpela Bikpela Bung Bilong Givim Biknem: Memorial em i wanpela bikpela bung tru em lain bilong Jehova i save mekim long olgeta yia. Olgeta manmeri i gat laik long mekim wok bilong Jehova na givim biknem long em, ol i mas kam long dispela bung. (Lu 22:19) I gat 6 milion Witnes i save autim tok, na mipela i ting olsem planti manmeri tru i laik harim tok na dispela bai mekim na namba bilong ol man i kam bung bai i go antap inap 14 milion. Em i wanpela gutpela rot tru bilong givim biknem long Papa bilong yumi long heven! Bai yumi tingim Jisas long dispela bung, tasol taim yumi givim biknem na daun long em long ol samting em i mekim, dispela i litimapim nem bilong Papa, em i bin salim em i kam.​​—⁠Jo 5:​23.

⁶ Yumi ken mekim wanem bilong dispela bikpela bung i ken kamap gutpela? Yumi ken mekim ol samting na Memorial bai helpim gut ol nupela man. Tokim ol long kam bung, na sapos ol i mas kisim helpim long i kam, mekim gutpela pasin na painim rot bilong kisim ol i kam. Stori gut long as bilong dispela bung. Kisim ol narapela i kam bungim ol. Ol samting ol i lukim na harim inap kirapim ol long painim rot bilong bung wantaim yumi long givim biknem long Jehova.

⁷ Yu no ken ting dispela bung i no inap helpim ol man. Wanpela sumatin bilong yunivesiti i tok olsem: “Mi save go long lotu bilong mi bilong kisim Komunio planti taim, tasol dispela bung i narapela kain. Mi lukim olsem dispela bung i bihainim stret samting Baibel i tok long en, na mi ting yupela i gat tok i tru.” Em i kirap kam long olgeta miting na i no longtaim na em i kisim baptais.

⁸ Helpim Ol Nupela Long Kamap Strong: Kisim nem bilong ol nupela man i kam long Memorial, na go lukim ol hariap na stori wantaim ol long ol samting ol i bin lukim na lain long en. Tokim ol long ol narapela miting bilong yumi, em long ol dispela miting ol i ken kisim sampela save moa long Baibel. Stori wantaim ol long tok bilong buk Save, sapta 17, “Yu Inap i Stap Gut Insait Long Lain Bilong God.” Dispela sapta bai soim ol olsem i gat planti samting bilong spirit kongrigesen i save helpim ol man long en, em ol i ken kisim. Sapos inap, stretim rot na bai ol i ken lukim video Our Whole Association of Brothers, na bai ol i lukim stret pasin bilong lain bilong Jehova long stap wanbel, amamas, na givim bel long wok bilong God!

⁹ Em i bikpela samting long ol nupela man i laik harim tok long ol i mas lain long pasin bilong givim biknem na daun long Jehova. Stori gut long ol olsem Jehova i save laikim ol beten yumi pilim gut long bel na oltaim ol beten i save givim nupela strong bilong spirit long yumi. (1 Jo 5:14) Mekim wok long stadi 8 i go long 12 long buklet Yumi Mas Mekim Wanem?, na stori long ol pasin i save givim biknem long Jehova. Taim yumi stori wantaim ol nupela man long ol tok i stap long buklet Mekim Wok Bilong God, long pes 16 na 17, kirapim ol long tingting long givim biknem long Jehova long rot bilong autim tok.

¹⁰ Pasin bilong yumi long pilim tru ofa bilong Jisas na gutpela wok yumi inap mekim olsem disaipel bilong em, i givim biknem long Papa na i helpim ol narapela. Jisas i tok promis olsem: “Sapos man i mekim wok bilong mi, orait Papa bai i givim biknem long em.”​—⁠Jo 12:26.