Kisim Amamas Long Wok Bilong Kamapim Disaipel
“Go mekim olgeta lain manmeri i kamap disaipel bilong mi.”—MT. 28:19.
1-3. (a) Planti i gat wanem tingting long wok bilong mekim Baibel stadi? (b) Bai yumi stori long wanem ol askim?
WANPELA sista long Amerika i wok wantaim wanpela grup bilong tok ples Hindi, em i tok: “Inap 11-pela wik mi bin stadi wantaim wanpela famili bilong Pakistan. Mipela i bin kamap pren. Aiwara i kamap long ai bilong mi taim mi tingim olsem i no longtaim na dispela famili bai go bek long Pakistan. Tru, mi bel hevi olsem mi no inap bung moa wantaim ol, tasol narapela samting i mekim na mi aiwara, em bikpela amamas mi bin kisim long helpim ol long kisim save long Jehova.”
2 Olsem wanem? Yu tu i bin kisim dispela kain amamas i save kamap long pasin bilong stadi wantaim wanpela long Baibel? Jisas na ol disaipel bilong em i bin kisim bikpela amamas long wok bilong kamapim disaipel. Taim ol 70 disaipel em Jisas i bin skulim, ol i kam bek na amamas long ol gutpela samting i bin kamap, Jisas tu i amamas. Baibel i tok: “Holi Spirit i mekim bel bilong [em] i amamas.” (Lu. 10:17-21) Na planti pablisa long nau ol tu i kisim bikpela amamas long wok bilong kamapim disaipel. Long 2007, ol pablisa i bin amamas na wok strong long mekim 6.5 milion Baibel stadi long olgeta mun!
3 Tasol sori tru, sampela pablisa ol i no bin mekim yet wanpela Baibel stadi o inap sampela yia ol i no bin i gat wanpela stadi. Taim yumi wok long painim wanpela Baibel stadi, wanem sampela hevi inap painim yumi? Olsem wanem yumi inap winim ol dispela hevi? Na yumi save kisim wanem ol blesing taim yumi wok strong long bihainim tok bilong Jisas: “Go mekim olgeta lain manmeri i kamap disaipel bilong mi”?—Mt. 28:19.
Sampela Hevi Em Ol Inap Tekewe Amamas
4, 5. (a) Long sampela hap, ol manmeri i gat wanem tingting long wok bilong yumi? (b) Long sampela narapela hap, ol pablisa i gat wanem hevi?
4 Long sampela hap bilong graun, ol manmeri i save amamas long kisim ol buk na nius bilong yumi na ol i amamas long stadi long Baibel wantaim yumi. Tupela marit bilong Australia em ol i bin mekim wok long Sambia inap liklik hap taim, ol i tok: “Ol stori yu bin harim, ol i tru. Sambia em i wanpela gutpela hap tru bilong autim tok. Autim tok long rot em i narapela kain! Ol manmeri i save kam long mipela, na sampela i kolim stret wanem nius ol i laikim.” Long wanpela yia i no longtaim i go pinis, ol bratasista long Sambia i bin mekim 200,000 Baibel stadi—em olsem wanpela Baibel stadi long olgeta wan wan pablisa.
5 Tasol long sampela narapela hap, ating ol pablisa i hatwok long tilim ol buk na nius na mekim Baibel stadi long olgeta mun. Bilong wanem? Long wanem, taim pablisa i go long ol haus, planti taim i no gat man i stap, na taim i gat sampela i stap, ol i les long harim tok bilong lotu. Ating ol i bin kamap bikpela insait long wanpela famili i no gat lotu o ating ol i les tru long ol pasin giaman ol i lukim insait long lotu giaman. Planti manmeri i bin kisim nogut long han bilong ol wasman bilong lotu giaman. (Mt. 9:36) Olsem na i gat as na ol i no laik toktok wantaim yumi long Baibel.
6. Wanem sampela hevi i painim sampela pablisa?
6 Sampela pablisa i gat narapela kain hevi em inap tekewe amamas bilong ol. Ating bipo ol i bin insait tru long wok bilong kamapim disaipel, tasol nau ol i gat sik o ol i lapun. Tingim tu sampela hevi yumi inap putim long yumi yet. Olsem wanem? Yu pilim olsem yu no winim mak long mekim Baibel stadi? Ating yu pilim wankain olsem Moses taim Jehova i givim wok long em long go toktok wantaim Fero. Moses i tok: “Tasol Bikpela, . . . mi no man bilong toktok gut long ai bilong planti man.” (Kis. 4:10) Samting i wankain long dispela tingting olsem yumi no inap long mekim Baibel stadi, em pasin bilong ting olsem wok bilong yumi i no inap kamap gutpela. Ating yumi wari olsem yumi no gutpela tisa tumas na dispela bai pasim man long kamap disaipel. Kain tingting olsem i mekim na yumi no laik mekim Baibel stadi. Orait, yumi ken mekim wanem bilong winim ol dispela hevi yumi kolim pinis?
Redim Bel Bilong Yu
7. Wanem samting i kirapim Jisas long mekim wok autim tok?
7 Namba wan samting, yumi mas redim bel bilong yumi yet. Jisas i tok: “Kain tingting i pulap long bel, em maus i save autim.” (Lu. 6:45) Samting i kirapim Jisas long mekim wok autim tok, em i save tingim tru ol narapela na i laik helpim ol. Olsem: Taim em i lukim ol wanlain Juda i stap nogut tru long sait bilong spirit, em i “sori tru long ol.” Em i tokim ol disaipel: “Planti kaikai tumas i mau pinis long gaden . . . Beten long Papa bilong gaden, bai em i salim ol wokman i go bungim kaikai bilong en.”—Mt. 9:36-38.
8. (a) Em i gutpela yumi tingim wanem samting? (b) Ol tok wanpela Baibel sumatin i kamapim i lainim yumi long wanem samting?
8 Taim yumi mekim wok bilong kamapim disaipel, i gutpela sapos yumi tingim bikpela helpim yumi yet i bin kisim long narapela i bin lusim hap taim long stadi wantaim yumi long Baibel. Tingim tu ol manmeri yumi bai bungim long wok autim tok na olsem wanem ol tok yumi autim bai helpim ol. Wanpela meri i raitim pas i go long brens ofis long kantri em i sindaun long en, na i tok: “Mi tenkyu tru long ol Witnes i save kam long haus bilong mi na skulim mi. Mi save olsem sampela taim ol i mas les long mi, long wanem, mi gat planti askim na mi save pulim taim bilong ol. Tasol ol i no les long mi, ol i amamas long skulim mi long ol samting ol yet i bin lainim. Mi tenkyu long Jehova na Jisas long ol dispela meri i bin kam lukim mi.”
9. Jisas i putim tingting i go long wanem samting? Olsem wanem yumi ken bihainim dispela pasin bilong em?
9 Tru, i no olgeta manmeri i bihainim Jisas, nogat. (Mt. 23:37) Sampela i bihainim em inap liklik hap taim, tasol bihain ol i sakim sampela tok bilong em na “ol i no wokabaut moa wantaim em.” (Jo. 6:66) Tasol Jisas i no larim dispela i mekim na em i ting ol tok em i autim i no inap helpim man, nogat. Tru, planti pikinini kaikai em i planim i no karim kaikai, tasol Jisas i putim tingting i go long ol gutpela samting em i mekim. Em i lukim olsem ol kaikai i redi pinis na em i kisim bikpela amamas long helpim wok bilong kisim dispela kaikai. (Ritim Jon 4:35, 36.) Na olsem tasol, taim teritori i no kamapim kaikai, yumi no ken tingim dispela samting tasol, nogat, yumi mas tingim ol man i stap long teritori bilong yumi olsem kaikai i redi pinis long kisim. Orait nau yumi ken skelim olsem wanem yumi inap holimpas kain gutpela tingting olsem.
Tingting Long Kirapim Baibel Stadi
10, 11. Yu ken mekim wanem bilong holimpas amamas bilong yu?
10 Taim fama i planim pikinini kaikai, em i tingting long kisim kaikai. Na olsem tasol, taim yumi autim tok, yumi mas tingting long kirapim wanpela Baibel stadi. Tasol olsem wanem sapos oltaim yu autim tok, tasol yu no painim planti man i stap long haus o taim yu go bek lukim ol man, ol i no stap? Dispela inap mekim na yu bel hevi. Tasol yu ting yu mas lusim pasin bilong go long ol haus na autim tok? Nogat tru! Long rot bilong autim tok long ol haus—em longtaim pinis yumi bin painim ol Baibel stadi long dispela rot—yumi save bungim yet planti man em namba wan taim ol i harim tok.
11 Tasol bilong holimpas amamas bilong yu, yu ken traim sampela rot moa bilong bungim ol man. Olsem wanem? Yu bin traim pasin bilong autim tok long ol man long rot o long ples wok bilong ol? Yu inap toktok wantaim ol man long rot bilong telefon o kisim telefon namba bilong ol man yu autim tok pinis long ol na bai yu ken ringim ol long bihain? Sapos yu no les kwik na yu redi long senisim pasin bilong yu long autim tok, bai yu kisim amamas long painim ol man i laikim tok bilong Kingdom.
Taim Ol Man i Les Long Harim Tok
12. Yumi ken mekim wanem sapos long teritori bilong yumi i olsem planti man i les long harim tok?
12 Olsem wanem sapos planti long teritori bilong yu i no laikim ol tok bilong lotu? Taim yu kirapim tok bilong yu, inap yu stori long samting ol yet i gat laik long harim? Aposel Pol i tokim ol wanbilip long Korin olsem: “Taim mi stap wantaim ol Juda mi save bihainim pasin bilong ol Juda . . . Long ai bilong ol man i no gat lo bilong Moses, mi save stap olsem man i no aninit long dispela lo. Tasol i no olsem mi lusim lo bilong God. Nogat.” Bilong wanem Pol i mekim olsem? Em i tok: “Mi bin kisim pasin bilong olgeta kain man, long wanem, mi laik traim olgeta rot bilong kisim bek sampela bilong ol.” (1 Ko. 9:20-22) Olsem wanem? Yumi tu inap stori long samting ol man long teritori bilong yumi i gat laik long harim? Planti man i no gat lotu ol i laik strongim pasin bilong famili bilong ol long pas gut wantaim. Na ating ol i wok long painim rot bilong mekim i stap bilong ol i gat as bilong en. Olsem wanem? Yumi inap autim tok bilong Kingdom long pasin we ol i gat laik long harim?
13, 14. Olsem wanem yumi inap mekim amamas bilong yumi i go bikpela moa long wok bilong kamapim disaipel?
13 Planti pablisa i bin mekim amamas ol i kisim long wok bilong kamapim disaipel i go bikpela, na ol i kisim tu amamas long ol hap we i olsem planti man i les long harim tok. Ol i bin kisim dispela amamas olsem wanem? Ol i bin lainim nupela tok ples. Tupela marit i gat 60 samting krismas ol i kisim save olsem planti tausen stiuden bilong Saina wantaim famili bilong ol, ol i sindaun long teritori bilong kongrigesen bilong ol. Man marit i tok: “Dispela i mekim, na mipela i kirap lainim tok ples Saina. Tru, long olgeta de mipela i mas lainim dispela tok ples, tasol dispela i mekim na mipela i kirapim planti Baibel stadi wantaim ol Saina long hap bilong mipela.”
14 Sapos yu no inap lainim narapela tok ples, yu ken mekim gutpela wok long buklet Good News for People of All Nations taim yu bungim ol man bilong narapela tok ples. Yu inap kisim ol buk na nius long tok ples bilong ol manmeri yu bungim. Tru, bilong toktok wantaim ol lain bilong narapela tok ples na pasin, yu mas lusim bikpela hap taim na strong. Tasol no ken lusim tingting long dispela stiatok bilong Baibel: “Man i planim planti, em bai i kisim planti.”—2 Ko. 9:6.
Kongrigesen Olgeta i Insait Long En
15, 16. (a) Olsem wanem na kongrigesen olgeta i insait long wok bilong kamapim disaipel? (b) Ol lapun inap mekim wanem wok?
15 Tasol wok bilong kamapim disaipel i no samting bilong wanpela tasol, nogat. Kongrigesen olgeta i insait long dispela samting. Bilong wanem yumi ken tok olsem? Jisas i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jo. 13:35) Tru tumas, taim ol Baibel sumatin i kam long ol miting, ol i pilim tru gutpela pasin laikim narapela i mekim long narapela. Wanpela Baibel sumatin i tok: “Mi amamas tru long kam long ol miting. Ol manmeri i save amamas long lukim mi!” Jisas i tok olsem taim ol man i kamap disaipel bilong em, famili bilong ol inap birua long ol. (Ritim Matyu 10:35-37.) Tasol em i tok promis olsem, long kongrigesen ol bai kisim “planti brata na planti susa na planti mama na planti pikinini” bilong spirit.—Mk. 10:30.
16 Ol bratasista bilong yumi i lapun pinis, ol tu i mekim bikpela wok bilong helpim ol Baibel sumatin long kamap strong. Long wanem rot? Maski sampela lapun i no inap mekim Baibel stadi, ol gutpela tok ol i bekim long ol miting i save strongim bilip bilong olgeta i harim. Ol i bihainim “stretpela pasin” na dispela i givim biknem long kongrigesen na i kirapim ol man i gat gutpela bel long kam long oganaisesen bilong God.—Snd. 16:31.
Daunim Pasin Bilong Pilim Olsem Yumi No Inap Mekim Gutpela Wok
17. Olsem wanem yumi ken daunim pasin bilong pilim olsem yumi no inap mekim Baibel stadi?
17 Olsem wanem sapos yu pilim olsem yu no inap long mekim Baibel stadi? Tingim: Jehova i bin helpim Moses na givim em holi spirit na wanpela wanwok, em brata bilong em, Aron. (Kis. 4:10-17) Jisas i bin tok promis olsem spirit bilong God bai helpim wok autim tok bilong yumi. (Ap. 1:8) Na tu, Jisas i bin salim ol wokman i go autim tok tupela tupela. (Lu. 10:1) Olsem na sapos yu hatwok long mekim Baibel stadi, beten long spirit bilong God i ken givim yu savetingting na bihain stretim rot bilong wok wantaim wanpela husat inap strongim yu na helpim yu. Taim yu tingim olsem Jehova i bin makim ol man nating—ol “man i no gat strong”—long mekim dispela bikpela wok, dispela bai strongim tru bilip bilong yu.—1 Ko. 1:26-29.
18. Olsem wanem yumi inap daunim pasin bilong pilim olsem wok bilong yumi i no inap kamap gutpela?
18 Olsem wanem yumi ken daunim pasin bilong pilim olsem wok bilong yumi i no inap kamap gutpela? Yumi mas save olsem wok bilong kamapim disaipel i no wankain long wok bilong kukim kaikai. Bilong kaikai i kamap gutpela o nogat em samting bilong wanpela tasol—em man o meri i kukim kaikai. Tasol long wok bilong kamapim disaipel i gat 3-pela i insait long en: Jehova i mekim nambawan bikpela wok, em i bringim man i kam long em. (Jo. 6:44) Yumi na ol narapela long kongrigesen i wok strong long mekim gutpela wok tisa bilong helpim sumatin long kamap strong. (Ritim 2 Timoti 2:15.) Na sumatin i gat wok long bihainim ol tok em i lainim. (Mt. 7:24-27) Sapos wanpela i no laik stadi moa long Baibel, dispela inap mekim na yumi bel hevi. Tru, yumi laik bai ol Baibel sumatin i stadi yet, tasol olgeta wan wan i mas ‘tokim God long as bilong olgeta pasin ol i bin mekim.’—Ro. 14:12.
Wanem Sampela Blesing?
19-21. (a) Taim yumi mekim ol Baibel stadi, dispela i save helpim yumi olsem wanem? (b) Jehova i gat wanem tingting long olgeta husat i insait long wok autim tok?
19 Wok bilong mekim Baibel stadi i save helpim yumi long tingim Kingdom pastaim. Na tu, dispela wok i putim ol tok i tru bilong Baibel i go daun tru long bel na tingting bilong yumi. Olsem wanem i olsem? Wanpela painia, nem bilong em Barak, i tok: “Taim yumi mekim ol Baibel stadi, dispela i kirapim yumi long kamap gutpela sumatin bilong Tok Bilong God. Bilong mi ken lainim gut narapela, pastaim mi mas strongim tingting bilong mi yet long ol samting mi bilip long en.”
20 Sapos yu no gat Baibel stadi, yu ting dispela i makim olsem God i no tingim wok bilong yu? Nogat tru! Jehova i save tingim ol wok yumi mekim bilong litimapim nem bilong em. Olgeta husat i insait long wok autim tok ol i “wanwok bilong God.” Tasol taim yumi mekim Baibel stadi na yumi lukim olsem wanem God i mekim kaikai yumi planim i kamap, amamas bilong yumi i go bikpela moa. (1 Ko. 3:6, 9) Wanpela painia, nem bilong em Amy, i tok: “Taim yumi lukim Baibel sumatin i kamap strong, yumi tenkyu tru long Jehova i bin mekim wok long yumi bilong givim sumatin wanpela gutpela presen tru—rot bilong kisim save long Jehova na kisim laip oltaim.”
21 Pasin bilong wok strong long kirapim na mekim ol Baibel stadi bai helpim yumi long tingting strong long mekim wok bilong God long nau na em bai strongim tingting bilong yumi long abrusim bagarap na go insait long nupela taim. Long rot bilong helpim i kam long Jehova, ating bai yumi inap helpim tu ol lain i harim tok bilong yumi long abrusim bagarap. (Ritim 1 Timoti 4:16.) Kain samting olsem bai kamapim bikpela amamas tru!
Yu Inap Tingim?
• Wanem sampela hevi inap pasim sampela long mekim Baibel stadi?
• Yumi ken mekim wanem sapos long teritori bilong yumi i luk olsem planti i les long harim tok?
• Yumi kisim wanem ol blesing long wok bilong mekim Baibel stadi?
[Ol piksa long pes 9]
Yu save autim tok long kain kain rot na bai yu inap painim ol man i gat gutpela bel?