God i Gat Wanpela Nem?

Bekim bilong planti man:

▪ “Nem bilong em, Bikpela.”

▪ “Em i no gat wanpela nem bilong em yet.”

Jisas i tok wanem?

▪ “Yupela i mas mekim kain prea olsem, ‘Papa bilong mipela, yu stap long heven, nem bilong yu i mas i stap holi.’ ” (Matyu 6:9) Jisas i bilip olsem God i gat wanpela nem.

▪ “Mi bin kamapim nem bilong yu long ol. Na bai mi kamapim moa yet, bai ol i ken kisim pasin bilong laikim ol arapela man, olsem yu save laikim mi. Na mi tu mi ken i stap long ol.” ( Jon 17:26) Jisas i bin kamapim nem bilong God long ol man.

▪ “Yupela bai i no lukim mi inap long taim yupela bai i tok, ‘God i ken mekim gut long dispela man i kam long nem bilong Bikpela!’ ” (Luk 13:35; Song 118:26) Jisas i bin kolim nem bilong God.

GOD yet i tokim yumi long nem bilong em. Long Baibel em yet i tok olsem: “Mi Jehova, em nem bilong mi.”a (Aisaia 42:​8, American Standard Version) Em nem God i bin kolim long em yet long tok Hibru, planti man i save kolim olsem Jehova. Ating yu kirap nogut olsem dispela nem i kamap planti tausen taim insait long ol olpela rait bilong Baibel. I no gat narapela nem long Baibel i kamap planti taim tru olsem dispela nem.

Bilong bekim dispela askim, “Wanem nem bilong God?” sampela bai tok, “Bikpela.” Tasol dispela i no givim save long yumi long nem bilong God. I olsem man i askim yumi, “Husat i winim ileksen?” na yumi tok, “kendidet i win.” Tupela bekim wantaim i no klia liklik, long wanem, dispela tok “Bikpela” na “kendidet” ol i no nem tru.

I gat wanem as na God i bin kamapim nem bilong em long yumi? Em i bin mekim olsem bambai yumi ken save gut long em. Yumi ken tok piksa olsem: Yumi save kolim sampela man olsem Bikman, Bos, Papa, o Bubu Man. Ol dispela nem i givim liklik save long yumi long dispela man. Tasol nem tru bilong man i kirapim yumi long tingim olgeta samting bilong em yumi save pinis long en. Na olsem tasol, ol biknem olsem Bikpela, God i Gat Olgeta Strong, Papa, na Man Bilong Wokim olgeta samting, ol i kirapim yumi long tingim sampela wok bilong God. Tasol nem bilong em Jehova, dispela nem tasol i save kirapim yumi long tingim olgeta samting bilong em yumi save pinis long en. Olsem wanem yu inap save gut long God sapos yu no save long nem bilong em? Yu no inap, a?

Em i bikpela samting long yumi mas save long dispela nem, na em i bikpela samting tu long yumi mas kolim dispela nem. Bilong wanem? Long wanem, Baibel i tokim yumi: “Olgeta manmeri i singaut long nem bilong Jehova, bai em i kisim bek ol.”​—Rom 10:​13, NW; Joel 2:​32, NW.

[Futnot]

[Rait long pes 6]

Yumi save kolim man olsem Bikman, Bos, Papa, o Bubu Man. Tasol nem tru bilong em i save kirapim yumi long tingim olgeta samting bilong em yumi save pinis long en