God i Save Laikim Olgeta Kain Lotu?

Bekim bilong planti man:

▪ “Olgeta lotu i rot bilong bringim yumi i go long God.”

▪ “Sapos yu gat gutpela bel, orait wanem bilip yu gat em i no bikpela samting.”

Jisas i tok wanem?

▪ “Yupela i mas i go insait long liklik dua. Dua i go long ples bilong lus, em i bikpela, na rot i go long dispela ples em i op tumas na em i isi long bihainim. Na planti manmeri i save bihainim dispela rot. Tasol dua i go long ples bilong kisim laip, em i liklik tru, na rot i go long dispela ples em i hat tru long bihainim. Na wanpela wanpela manmeri tasol i save lukim na bihainim dispela rot.” (Matyu 7:​13, 14) Jisas i no bilip olsem olgeta rot i bringim yumi i go long God.

▪ “Long de bilong bikpela kot bilong God, planti manmeri bai i tokim mi olsem, ‘Bikpela, Bikpela, mipela i bin mekim wok profet long nem bilong yu. Long nem bilong yu mipela i bin rausim ol spirit nogut. Long nem bilong yu mipela i bin wokim planti mirakel.’ Na long dispela taim mi bai tokaut long ol olsem, ‘Mi no save liklik long yupela. Yupela ol man bilong mekim pasin nogut, yupela klia long mi.’ ” (Matyu 7:​22, 23) Jisas i no orait long olgeta man i tok ol i save bihainim em.

PLANTI manmeri bilong lotu ol i save holim strong ol bilip bilong ol na tok bilong ol tumbuna. Tasol olsem wanem sapos ol dispela bilip i no stret wantaim ol tok i stap long Baibel? Jisas i mekim tok lukaut long pasin bilong bihainim tok bilong ol man taim em i tokim ol bikman bilong lotu: “Yupela i save daunim tok bilong God na litimapim pasin yupela i bin kisim long ol tumbuna.” Orait nau em i kamapim tok bilong God olsem: “Ol dispela lain manmeri ol i save litimapim nem bilong mi long maus bilong ol, tasol bel na tingting bilong ol i stap longwe tru long mi. Ol i save autim lo bilong ol man tasol na tok, ‘Dispela em i tok bilong God.’ Olsem na ol i lotu nating long mi.”​—Matyu 15:​1-9; Aisaia 29:13.

Pasin bilong man tu i bikpela samting, i no ol bilip tasol. Baibel i toktok long sampela man husat i tok ol i save lotuim God: “Maus bilong ol i save tok olsem, ‘Mi save long God.’ Tasol pasin bilong ol i soim olsem, ol i givim baksait pinis long em.” (Taitus 1:16) Na Baibel i tok long ol manmeri i stap long taim bilong yumi: “Ol bai i laikim tumas ol . . . amamas bilong dispela graun, na ol bai i no laikim God. Ol bai i bihainim pasin bilong God long skin tasol . . . Yu mas stap longwe long ol dispela kain man.”​—2 Timoti 3:​4, 5.

Tru, yumi mas i gat gutpela bel, tasol i mas i gat sampela samting moa. Bilong wanem? Long wanem, nogut yumi gat gutpela bel tasol bilip bilong yumi i no stret. Olsem na em i bikpela samting long kisim stretpela save long God. (Rom 10:​2, 3) Sapos yumi kisim dispela save na bihainim ol tok bilong Baibel, God bai amamas long yumi. (Matyu 7:21) Olsem na lotu i stret long ai bilong God i mas i gat ol samting olsem, tingting i stret, bilip i stret, na pasin i stret. Na bilong mekim pasin i stret yumi mas mekim laik bilong God long olgeta de!​—1 Jon 2:17.

 Sapos yu laik save long sampela tok moa Baibel i mekim long God, askim ol Witnes Bilong Jehova long stadi wantaim yu long Baibel, i no gat pe.

[Rait long pes 9]

Lotu i stret long ai bilong God i mas i gat ol samting olsem, tingting i stret, bilip i stret, na pasin i stret