Baibel i Tok Wanem?
Yu Ting Olgeta Lotu i Narapela Narapela Rot i Go Long God?
MAN bilong raitim buk Marcus Borg i tok: “Mi no inap bilip tru olsem God bilong heven na graun i makim wanpela lotu olsem rot bilong ol man i ken kisim save long em.” Desmond Tutu, em i winim Prais Nobel long wok bilong em long kamapim gutaim, em i tok: “I no gat wanpela lotu inap tok ol i gat olgeta tok i tru bilong ol tok hait” bilong bilip. Wanpela tok ol Hindu i save mekim em “Jotto moth, totto poth,” insait bilong en i olsem, olgeta lotu i narapela narapela rot bilong i go long wanpela ples tasol. Ol Buda tu i gat wankain bilip olsem. Tru tumas, planti milion manmeri i bilip olsem olgeta lotu i narapela narapela rot bilong i go long God.
Saveman Geoffrey Parrinder i tok: “Sampela man i tok olsem olgeta lotu i gat wankain mak, o ol i wankain rot bilong bringim man long tok i tru, o olgeta i skulim ol man long ol wankain bilip.” Ol tok ol lotu i skulim ol man long en, ol pasin, na ol god bilong ol i wankain tasol. Planti lotu i save toktok long pasin bilong sori na ol i lainim ol man olsem pasin bilong kilim man, stil, na tok giaman i no stret. Long planti lotu, sampela man i wok strong long helpim ol narapela. Olsem na sapos wanpela man i givim bel tru long ol bilip bilong em na em i laik bihainim stretpela pasin, orait yu ting em i no bikpela samting long wanem lotu em i insait long en? O olgeta lotu i narapela narapela rot bilong i go long God?
Givim Bel Tru—Em Inap?
Tingim wanpela man Juda long taim bilong ol aposel, nem bilong em Sol, na bihain em i kamap wanpela aposel Kristen ol i kolim em Pol. Em i save givim bel long bihainim lotu Juda, na dispela i mekim na em i wok long bagarapim lotu bilong lain bilong Krais, em lotu em i ting i no stret. (Aposel 8:1-3; 9:1, 2) Tasol long rot bilong marimari bilong God Sol i kisim save olsem, ol man i givim bel tru long lotu na God olsem em i bin mekim, ating bilip bilong ol i no stret, long wanem, ol i no save gut long olgeta tok bilong God. (Rom 10:2) Taim Sol i kisim sampela save moa long laik na pasin bilong God, em i senis na i kirap lotu wantaim dispela lain em i bin birua long ol—em ol disaipel bilong Jisas Krais.—1 Timoti 1:12-16.
Yu ting Baibel i tok olsem i gat planti handet lotu i stap bilong yumi ken makim na bihainim, na wanem lotu yumi makim em i gutpela long ai bilong God? Ol tok aposel Pol i kisim long Jisas Krais i bin kirap bek pinis i narapela kain long dispela. Jisas i salim em i go long ol manmeri bilong ol narapela lain “bilong opim ai bilong ol, bai ol i ken givim baksait long tudak na tanim bel na i kam long lait. Ol i ken lusim strong bilong Satan na i kam long God.” (Aposel 26:17, 18) Olsem na em i klia tru, lotu yumi makim em i bikpela samting. Ol man Jisas i salim Pol i go long ol, planti ol i gat lotu pinis. Tasol ol i stap long “tudak.” Tru tumas, sapos olgeta lotu i narapela narapela rot i bringim ol man long laip oltaim na bilong God i orait long ol, bai i no gat wok long Jisas long skulim ol disaipel bilong em long mekim wok bilong kamapim disaipel, olsem em i bin tokim ol long mekim.—Matyu 28:19, 20.
Long bikpela tok bilong em antap long maunten, Jisas i tok: “Yupela i mas i go insait long liklik dua. Dua i go long ples bilong lus, em i bikpela, na rot i go long dispela ples em i op tumas na em i isi long bihainim. Na planti manmeri i save bihainim dispela rot. Tasol dua i go long ples bilong kisim laip, em i liklik tru, na rot i go long dispela ples em i hat tru long bihainim. Na wanpela wanpela manmeri tasol i save lukim na bihainim dispela rot.” (Matyu 7:13, 14) Baibel i tok klia stret olsem i gat “wanpela pasin bilong bilip.” (Efesus 4:5) Planti man i stap long “bikpela” rot ol i gat lotu. Tasol ol i no gat “wanpela pasin bilong bilip.” I gat wanpela pasin bilong mekim lotu i tru, olsem na husat man i laikim lotu i tru ol i mas wok long painim dispela.
Wok Long Painim God Tru
Kirap long taim ol man i kamap nupela long graun, God i tokim ol long ol samting em i laik ol i mas mekim. (Stat 1:28; 2:15-17; 4:3-5) Long nau Baibel i kamapim klia ol samting God i laik yumi mas mekim. Dispela i helpim yumi long skelim wanem lotu God i laikim na wanem lotu God i no laikim. (Matyu 15:3-9) Sampela man i kisim lotu bilong papamama bilong ol, na sampela ol i bihainim tasol lotu bilong ol man i stap long hap bilong ol. Planti manmeri i save bihainim nating lotu i strong long ples bilong ol o i strong long taim mama i karim ol. Olsem wanem? Bai yu kirap bihainim nating tasol wanpela lotu o larim ol narapela i makim lotu bilong yu?
Taim yu laik makim lotu bilong bihainim, yu mas skelim Baibel na ol tok bilong en i mas stiaim tingting bilong yu. Long taim bilong ol aposel, sampela man i kisim gutpela skul ol i no bihainim nating tasol ol tok aposel Pol i autim. Ol i “save ritim na skelim tok i stap long buk bilong God, bilong ol i ken save, tok bilong Pol em i tru, o nogat.” (Aposel 17:11; 1 Jon 4:1) Gutpela sapos yu mekim wankain, a?
Baibel i tok God bilong heven na graun i wok long painim ol manmeri i laik lotuim em long pasin i tru. Long Jon 4:23, 24, Jisas i tok: “Tasol taim i laik kamap, na nau i kamap pinis, na olgeta man i laik lotu tru bai ol i lotu long Papa long strong bilong Holi Spirit na long pasin i tru. Na Papa i laikim tumas bai ol kain man olsem i mas lotu long em. God em i Spirit. Na ol man i lotu long em, ol i mas lotu long strong bilong Holi Spirit na long pasin i tru.” Lotu “i stap stret olgeta na i no gat asua long ai bilong God Papa bilong yumi,” em i save laikim kain lotu olsem. (Jems 1:27) God i blesim hatwok bilong planti milion manmeri i wok long painim liklik rot i go long laip. Em i no inap givim laip oltaim long ol man i ting olgeta lotu i gutpela, nogat; em bai givim laip long ol man i wok strong long painim liklik rot em i makim na ol i bihainim dispela rot.—Malakai 3:18.