Yu Ting Olgeta Lotu i Gutpela?

YUMI stap long taim we i gat planti kain kain lotu. Wanpela wok painimaut i kamapim olsem i gat 19 bikpela lotu na 10,000 liklik lotu long olgeta hap bilong graun. Dispela i mekim na i gat planti moa lotu long ol man inap skelim na makim wanem lotu ol i laik bihainim. Olsem na yu ting lotu yu makim em i bikpela samting, o nogat?

Sampela man i tok ol narapela narapela lotu i olsem ol narapela narapela rot bilong i go antap long wanpela maunten. Long tingting bilong ol, wanem wanem rot ol i bihainim em i no bikpela samting, long wanem, olgeta rot i go kamap long wanpela ples tasol. Ol i tok i gat wanpela God tasol em God i Gat Olgeta Strong, olsem na olgeta lotu i olsem rot bilong bringim yumi i go long em.

Yu Ting Olgeta Rot i Go Long God?

Jisas Krais em i nambawan tisa bilong lotu na ol man i bin rispektim em moa yet, winim olgeta arapela man long graun. Orait em i tok wanem long dispela samting? Em i tokim ol disaipel bilong em olsem: “Yupela i mas i go insait long liklik dua.” Bilong wanem? Long wanem, “dua i go long ples bilong lus, em i bikpela, na rot i go long dispela ples em i op tumas na em i isi long bihainim. Na planti manmeri i save bihainim dispela rot. Tasol dua i go long ples bilong kisim laip, em i liklik tru, na rot i go long dispela ples em i hat tru long bihainim. Na wanpela wanpela manmeri tasol i save lukim na bihainim dispela rot.”​—Matyu 7:​13, 14.

Yu ting tok bilong Jisas i makim olsem sampela lotu i bringim man i go “long ples bilong lus”? O yu ting em i tok ol man i no bilip ol tasol i bihainim bikpela rot, na ol man i bilip long God​—maski ol i gat wanem lotu​—ol i bihainim liklik rot i go long ples bilong kisim laip?

Bihain stret long Jisas i tok olsem i gat tupela rot tasol, em i tok: “Yupela lukaut long ol giaman profet. . . . Ol i olsem ol weldok i pasim skin bilong sipsip, bai ol i ken i go klostu long ol sipsip na holimpas ol.” (Matyu 7:15) Bihain Jisas i tok: “Yupela i no ken ting, olgeta manmeri i save kolim mi, ‘Bikpela, Bikpela,’ ol bai i go insait long kingdom bilong heven. Nogat. Man i bihainim laik bilong Papa bilong mi i stap long heven, em tasol bai i go insait long kingdom.” (Matyu 7:21) Sapos man i kolim wanpela man olsem profet, o em i tok Jisas em “Bikpela” bilong em, yumi ken tok em i man bilong lotu, na em i gat bilip. Em nau, i klia tru olsem Jisas i tok lukaut olsem i no olgeta lotu i gutpela, na yumi no ken bilipim olgeta tisa bilong lotu.

Yu Ting Yumi Inap Luksave Long Liklik Rot?

I no olgeta rot i go long God, olsem na namel long ol dispela planti tausen rot, olsem wanem bai yu inap painim dispela liklik rot i go long ples bilong kisim laip? Tingim dispela tok piksa: Yu lus insait long wanpela biktaun, na yu tingting long askim ol narapela long helpim yu. Wanpela man i tokim yu long i go long hap is. Narapela i tokim yu long i go long hap wes. Na narapela gen i tokim yu long makim wanem wanem rot yu ting i gutpela. Orait, bihain wanpela man i opim wanpela gutpela mep na em i soim yu long rot i stret long bihainim. Em i givim dispela mep long yu na bai yu ken lukluk long en taim yu wokabaut long rot. Ating yu bai pilim olsem nau yu inap tru long kamap long ples yu laik i go long en, a?

Na olsem tasol, taim yumi laik makim rot i stret, olsem lotu i stret long bihainim, yumi mas i gat gutpela mep yumi inap bilip tru long en. Olsem wanem? I gat kain mep olsem i stap? Yes, i gat. Dispela mep em Baibel, na em i tok: “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi na bilong skulim yumi long ol pasin i stret long ai bilong God.”​—2 Timoti 3:16.

Ating long tok ples bilong yu i gat wanpela Baibel yu inap mekim wok long en olsem mep bilong soim rot long yu. Ol lain bilong wokim dispela nius, em ol Witnes Bilong Jehova, ol i prinim wanpela Baibel ol i bin tanim, em New World Translation of the Holy Scriptures. Tasol sapos yu no wanpela Witnes Bilong Jehova, ating yu laik lukim narapela Baibel taim yu skelim wanem lotu i gutpela na wanem lotu i nogut. Olsem na dispela stori na ol narapela i kam bihain long en i kamapim ol tok bilong Buk Baibel, em planti narapela lotu i save rispektim tok bilong en.

Taim yu ritim ol dispela stori, skelim ol tok yu save pinis long en wantaim ol tok bilong Baibel. Tingim gut tok bilong Jisas long olsem wanem yumi ken luksave long wanem lotu i gutpela na wanem lotu i nogut. Em i tok: “Gutpela diwai i save karim gutpela kaikai. Na diwai nogut i save karim kaikai nogut. Gutpela diwai em i no inap karim kaikai nogut. Na diwai nogut em i no inap karim gutpela kaikai.” (Matyu 7:​17, 18) Yumi ken skelim 3-pela gutpela kaikai em Baibel i tok ol bai helpim yumi long luksave long “gutpela diwai.”

[Rait long pes 3]

Baibel i olsem gutpela mep bilong rot na em inap helpim man long painim rot i stret, olsem lotu i stret