Liklik Rot i Mekim Man i Kamap Fri

OL MAN i gat tingting ol i save, i gat ol lo i bosim olgeta samting long ples antap na graun, maski ol i liklik samting tru olsem atom o ol bikpela bikpela lain sta i gat ol bilion bilion sta long en. Sapos i no gat ol dispela lo, bai ol man i no inap tingim o stretim gut ol wok ol i mas mekim; na bai i no gat wanpela samting i stap laip. Tasol ol man i kisim save long ol dispela lo i bosim ol samting, na ol i wok gut wantaim ol dispela lo, olsem na ol inap mekim ol bikpela wok tru yumi kirap nogut long en, olsem wokabaut long mun, na long olgeta hap bilong graun na long ples antap tru ol inap sutim ol piksa i gat kala kala i kam long televisen i stap long haus bilong yumi.

Tasol olsem wanem long ol lo i bosim pasin na wokabaut bilong ol man? Sapos yumi bihainim ol dispela lo, dispela bai helpim yumi na kamapim gutpela samting? I olsem planti manmeri i ting i no gat sampela lo i bosim pasin bilong yumi, na ol i laik bihainim sampela tingting bilong graun o lotu i stret wantaim ol laik bilong ol yet.

Tasol sampela ol i laik bihainim narapela rot, em liklik rot “i go long ples bilong kisim laip,” olsem Baibel i makim. Yumi no ken kirap nogut long save, wan wan tasol i laik bihainim dispela rot, long wanem, Jisas i tok long dispela liklik rot olsem: “Wanpela wanpela manmeri tasol i save lukim na bihainim dispela rot.” (Matyu 7:14) Bilong wanem wan wan tasol i save bihainim?

Long wanem, dispela liklik rot i gat planti lo bilong God i stap long en na i hatwok long wokabaut long en. Ol man i laik tru long stretim pasin bilong ol na bai i stret wantaim mak God i putim bilong yumi mas bihainim, ol tasol i laik wokabaut long dispela rot. Bikpela rot em i op tru na ol man i ting ol i stap fri long en, tasol em i save kalabusim ol. Tasol liklik rot, em ol i ting i pas tumas na i hatwok long wokabaut long en, em i save mekim man i kamap fri long olgeta bikpela samting. Samting i makim arere bilong dispela rot, em “dispela lo i save . . . mekim yumi i stap fri.”​—⁠Jems 1:⁠25.

Em i Helpim Man Long Lusim Kalabus

Tru, sampela taim i hatwok long i stap long liklik rot. Olgeta man bilong graun i gat sin, na taim mama i karim ol, pasin bilong mekim rong i stap pinis long skin bilong ol. Olsem na sampela taim ating man bai lusim rot liklik. Tasol sapos em i bosim gut skin o stretim sampela pasin bilong em na stap gut long dispela rot i liklik tru, em bai kisim ol gutpela samting long en, long wanem, God ‘i save skulim yumi na bai yumi stap gut.’​—⁠Aisaia 48:17; Rom 3:⁠23.

Yumi ken tok piksa olsem: Ol papamama i gat gutpela tingting ol i save putim lo na makim wanem ol kaikai ol pikinini bilong ol i mas kisim. Tru, long taim bilong kaikai sampela taim papamama i mas strong long ol pikinini i bihainim ol dispela lo. Tasol taim ol pikinini i go bikpela, bai ol i tenkyu long papamama i bin tingim ol na mekim olsem. Taim ol i bikpela pinis ol i lain pinis long laikim ol kaikai i save strongim skin. Na i gat planti kain kaikai i save strongim skin, olsem na ol i no ting dispela pasin i pasim ol tumas.

Long ol samting bilong spirit God i save mekim wankain pasin long ol man i wokabaut long liklik rot. Em i wok long kamapim ol gutpela laik long bel bilong ol man i gat pasin daun, na dispela i mekim ol i stap amamas na i stap fri. Bilong mekim dispela wok, em i givim Baibel long yumi, em Tok bilong em. Na tu, em i tokim yumi long beten askim em long spirit bilong em bilong helpim yumi; na em i tok, yumi mas bung wantaim ol narapela Kristen, em ol inap kirapim yumi long i stap long liklik rot na no ken lusim. (Hibru 10:​24, 25) Tru tumas, God i save laikim yumi tru, na dispela nambawan pasin bilong em i bosim olgeta samting em i laik mekim na pasin bilong em long mekim ol dispela samting.​—⁠1 Jon 4:⁠8.

Taim ol man bilong wokabaut long liklik rot i bihainim ol pasin em spirit bilong God i save kamapim, olsem laikim tru ol arapela, stap bel isi, amamas, daunim laik bilong olpela bel, na ol narapela pasin olsem, i olsem dispela liklik rot i no pas na i no hatwok long wokabaut long en. Olsem Baibel i tok, “i no gat wanpela lo i tambuim ol dispela kain pasin.” (Galesia 5:​22, 23) “Sapos Spirit bilong Bikpela i stap long wanpela man, orait . . . em i stap fri.” (2 Korin 3:17) Long nau tu, ol Kristen tru i pilim pinis dispela pasin bilong i stap fri. Ol i no pret long planti samting ol man i save pret long en long nau, olsem ol i pret long ol samting bai kamap bihain, na bilip bilong ol i mekim na ol i pret long i dai. Yumi amamas tru long tingim ol samting bai kamap bihain, taim “olgeta samting long graun bai i save tru long Bikpela”! (Aisaia 11:⁠9) Long dispela taim bihain, ol man i no ken pret moa long ol raskol samting. Bai i no gat ol lok na ol strongpela ain long ol windo. Long san na nait, long haus na ausait tu, olgeta man bai pilim olsem ol i stap fri na i no gat wanpela samting bai bagarapim ol. Em pasin bilong i stap fri tru!

God Bai Helpim Yumi Tru

Tru, yumi mas taitim bun bambai yumi ken inapim ol mak em God i putim bilong yumi mas bihainim, tasol “ol lo bilong en i no givim hevi long yumi.” (1 Jon 5:⁠3) Taim yumi stretim pinis pasin bilong yumi long wokabaut long liklik rot, na yumi pilim ol gutpela samting yumi kisim taim yumi wokabaut long en, yumi nolaik tru long pasin na tingting bilong ol man i stap long bikpela rot. (Song 97:10) Pasin bilong bihainim lo bilong God, em i stret long maus bilong bel God i bin givim long yumi olgeta. Planti man ol i stap bel hevi tru na ol “i krai strong tru,” tasol God i tok promis olsem: “Bel bilong ol wokman bilong mi bai i pulap long amamas na bai ol i singim ol song bilong amamas.” Tru tumas, taim Jehova i skulim bel bilong yumi, yumi stap amamas na i stap fri.​—⁠Aisaia 65:⁠14.

Jisas i bin dai bambai yumi ken i stap fri. Baibel i tok: “God i laikim tumas olgeta manmeri bilong graun, olsem na em i givim dispela wanpela Pikinini [bilong em] long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3:16) Nau Jisas i stap King long Kingdom bilong God na em i mekim wok long ofa bilong em bilong helpim yumi. Klostu nau, taim “bikpela hevi tru” i pinis na bikpela rot wantaim ol man i wokabaut long en ol i pinis, Jisas bai kirap na isi isi em bai stiaim ol man bilong harim tok i go bihainim hap liklik rot i stap yet na bringim ol i go long pinis bilong en, olsem ol bai kamap gutpela olgeta. (Matyu 24:​21, 29-31; KTH 7:​14-17) Em nau, long dispela taim wanpela gutpela tok promis bai kamap tru long yumi, olsem: “God bai i pinisim dispela kalabus bilong bagarap nau olgeta samting i stap long en, na bai olgeta samting i stap gutpela tru wantaim yumi ol pikinini bilong God.” I no gat narapela pasin bilong i stap fri i winim dispela. Na dai tu bai pinis olgeta.​—⁠Rom 8:21; KTH 21:​3, 4.

Sapos man inap lukim na save tru olsem dispela rot bai bringim em we, em inap makim dispela rot na wokabaut long en oltaim na no ken lusim. God i helpim ol yangpela tu na bai ol i no ken lukluk tasol long ol samting i stap klostu, na ol i no ken bikhet long samting ol i ting i pasim ol tumas, em ol mak God i putim bilong yumi mas bihainim. Ol i lain long ting olsem ol dispela lo i kamapim klia sori bilong God na i olsem hap plang bilong lukautim yumi na ol samting nogut bilong bikpela rot i no ken bagarapim yumi. (Hibru 12:​5, 6) Tru yumi no ken les kwik​—⁠yumi save, i mas i gat bikpela hap taim liklik long kisim ol pasin na laik i kain olsem bilong God; na i olsem tu long diwai​—⁠i mas i gat bikpela hap taim liklik bambai em i ken karim gutpela kaikai. Tasol diwai bai karim kaikai sapos yumi lukautim gut na givim wara long en.

Olsem na yu mas stadi long Baibel, na bung wantaim ol narapela Kristen, na “beten oltaim” na askim God long givim spirit holi long yu. (1 Tesalonaika 5:17) Bilip tru olsem God bai “soim yu stretpela rot long bihainim.” (Sindaun 3:​5, 6) Tasol sapos yu mekim olsem, yu ting dispela inap helpim yu tru? Em inap. Em i bin helpim Mary na Tom tu, em yumi bin stori long ol long stori i kam paslain long dispela.

Ol i No Bihainim Moa Bikpela Rot

Tom i tok: ‘Long 1975 wanpela Witnes Bilong Jehova i kam long haus na autim tok long mipela. Dispela i mekim na mi kirap stadi long Baibel na isi isi mi wok long stretim ol pasin bilong mi. Mi kisim baptais long 1982 na nau mi insait long kongrigesen bilong dispela hap. Nau pikinini man bilong mipela tu em i baptais pinis. Mi tenkyu long meri bilong mi, em i no bin les long mi long ol dispela yia mi no bin save yet long tok i tru. Na mi tenkyu moa yet long Jehova na Pikinini bilong em Krais Jisas long ol gutpela samting tru ol i bin givim long mipela, na long gutpela samting nau mipela i wetim i kamap bihain.’

Na olsem wanem long Mary? Em i ting God i no inap lusim rong bilong em, tasol em i laik kisim save long God bambai em i ken helpim ol pikinini bilong em. Bihain em i harim olsem ol Witnes Bilong Jehova i wok long skulim meri i sindaun long haus klostu, na em tu i askim ol long helpim em. Tasol em i hatwok long kamap strong, long wanem, ol pasin nogut i strong tru long skin bilong em. Olsem na sampela taim stadi i kamap gutpela na sampela taim nogat. Tasol liklik pikinini meri bilong em i gat 7-pela krismas em i save strongim bel bilong em na i tok: “Mama, yu no ken les. Yu inap mekim!” Dispela i kirapim Mary na em i wok strong moa long stretim pasin bilong em.

Man bilong em tu i save kisim ol drak. Bihain em i kam bek na em tu i kirap long stadi. Bihain tupela i lusim ol pasin nogut bilong ol, na taim tupela i stretim marit bilong ol na kisim baptais, ol i stap amamas tru na ol i pilim olsem ol i wanpela famili tru. Sori tru, bihain Mary i dai long dispela sik AIDS em i bin kisim. Tasol bel bilong em i strong tru long tingim tok promis bilong Baibel long ol man i dai pinis bai kirap bek na i stap long Paradais long graun, na bai i no gat wanpela liklik hap moa bilong dispela bikpela rot i save bagarapim ol man.

Tru tumas, man inap lusim dispela bikpela rot i op tumas na i bringim ol man long ples bilong lus. Krais Jisas i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jon 17:⁠3) Olsem na i gutpela sapos yu tingting strong long kirap wokabaut long dispela liklik rot i go long laip, a? Ol tok bilong Baibel yu lain long en, sapos yu putim gut long bel na yu bihainim, orait gutpela tok promis bilong Baibel inap painim yu tu, olsem: “Yupela bai i save long tok tru, na tok tru bai i mekim yupela i kamap fri.”​—⁠Jon 8:⁠32.