Bihainim Bilip Bilong Ol

Em i Lain Long Pasin Marimari

JONA i gat bikpela haptaim bilong tingting long ol samting em bai mekim. Em i mas mekim bikpela raun inap olsem 800 kilomita, na em bai raun inap wanpela mun samting, o longpela haptaim moa. Pastaim em i mas makim wanem ol rot em bai bihainim, olsem ol sotpela rot o rot we ating em i no inap painim bagarap long en, na nau em i mas wokabaut i go long planti ples daun na bihainim rot i go antap long planti maunten. Em i mas abrusim traipela Ples Wesan Nating Bilong Siria, na brukim ol bikpela wara olsem traipela wara Yufretis, na painim ples slip namel long ol man bilong ol narapela lain long ol taun na ol liklik ples bilong Siria, Mesopotemia, na Asiria. Em i wokabaut planti de i go i go na em i tingting long dispela ples em i mas i go long en na bel bilong em i pret, na olgeta de em i wok long i kam klostu moa long dispela taun​—Ninive.

Jona i save gut long wanpela samting: Em i no inap baut na ranawe long dispela wok bilong em. Em i traim pinis dispela samting. Long pastaim, taim Jehova i tokim em long i go na givim wanpela tok bilong kot long dispela strongpela taun bilong Asiria, wantu Jona i kalap long sip i laik i go long narapela hap olgeta. Orait Jehova i salim traipela win na ren, na i no longtaim na Jona i luksave olsem pasin bikhet bilong em bai mekim na olgeta man long sip bai lusim laip bilong ol. Bilong helpim ol dispela boskru long abrusim bagarap, em i tokim ol long tromoi em i go daun long solwara. Ol i no laik mekim, tasol bihain ol i tromoi em na Jona i ting nau bai em i dai. Tasol Jehova i salim traipela pis i kam bilong daunim Jona na bringim em gut long nambis olsem 3-pela de bihain. Jona i kirap nogut long samting i bin kamap, na dispela i skulim em long pasin bilong bihainim tok.a​​—Jona, sapta 1 na 2.

Taim Jehova i tokim Jona long i go long Ninive long namba tu taim, dispela profet i bihainim tok na em i kirapim longpela raun bilong em i go olsem long hap is. (Jona 3:​1-3) Tasol olsem wanem? Em i bin larim skul i kam long Jehova i senisim tru pasin bilong em? Olsem: Jehova i bin mekim pasin marimari long em, na em i lukautim Jona na em i no bagarap long solwara, na em i no givim strafe long Jona long pasin bikhet em i bin mekim, na Jehova i givim rot long em long namba tu taim long mekim wok Em i bin givim long em. Orait yu ting Jona i lain long mekim pasin marimari long ol narapela? I hatwok tru long ol sinman bilong graun i lain long mekim pasin marimari. Orait, yumi ken skelim ol samting i painim Jona na kisim skul long en.

Tok Bilong Kot na Samting Ol i Mekim

Jona i no gat wankain tingting olsem Jehova long dispela taun Ninive. Baibel i tok: “Ninive em i bikpela taun tumas [“long ai bilong God,” NW].” (Jona 3:3) Long Buk Jona, inap 3-pela taim Jehova i tok Ninive em i “bikpela taun.” (Jona 1:2; 3:2; 4:11) I gat wanem as na Ninive em i bikpela taun, o em i bikpela samting, long ai bilong Jehova?

Ninive em i wanpela olpela taun Nimrot i bin wokim long pastaim tru, bihain long Bikpela Tait. Em i wanpela traipela ples tru i karamapim bikpela hap graun na i luk olsem i gat sampela biktaun moa insait long en, olsem na sapos man i kirap wokabaut long wanpela sait bilong taun na em i laik i go long hapsait bilong taun, em i mas wokabaut inap 3-pela de olgeta. (Stat 10:11; Jona 3:3) Ninive em narakain taun tru, i gat ol bikpela tempel na ol strongpela banis i raunim taun, na ol naispela haus samting ol i bin wokim. Tasol i no ol dispela samting i mekim na taun hia i bikpela samting long ai bilong God Jehova. Nogat. Em i tingim ol manmeri bilong dispela taun. Long dispela taim, i gat bikpela lain manmeri tru i bin sindaun long Ninive. Maski ol i mekim ol pasin nogut, Jehova i tingim ol. Long ai bilong em, laip bilong man i bikpela samting, na em i save olsem olgeta wan wan man inap tanim bel na lain long mekim pasin i stret.

Bihain Jona i kamap long Ninive na em i wokabaut i go insait long taun, na ating bel bilong em i pret moa yet taim em i lukim traipela lain manmeri bilong taun, winim 120,000 manmeri.b Em i wokabaut wanpela de olgeta na i go insait tru long taun namel long ol dispela bikpela lain manmeri, na ating em i wok long painim wanpela gutpela ples bilong kirap autim tok long en. Olsem wanem em inap givim tok long ol dispela manmeri? Em i bin lain long mekim tok ples Asiria? O Jehova i bin givim dispela save long em long rot bilong mirakel? Yumi no save. Ating Jona i autim tok long ol long tok Hibru, em tok ples bilong em, na wanpela man i tanim dispela tok long ol Ninive. Tasol maski em i mekim olsem wanem, tok em i autim i klia tru, na ating ol man i no laikim em taim ol i harim dispela tok. Em i tokaut olsem: “Bihain long 40 de pinis, orait Ninive bai i bagarap olgeta.” (Jona 3:4) Em i tokaut strong na em i mekim mekim planti taim. Taim em i autim dispela tok, em i soim olsem em i gat strongpela bel na strongpela bilip, em ol pasin ol Kristen i mas i gat long nau, winim ol narapela taim bipo.

Ol Ninive i putim yau long tok bilong Jona. Ating em i bin ting olsem ol bai belhat na mekim nogut long em long tok em i autim. Tasol samting ol i mekim i narapela kain tru. Ol i harim gut tok bilong em! Kwiktaim tok bilong em i go long olgeta hap bilong taun. I no longtaim na olgeta manmeri bilong taun i toktok long dispela tok profet bilong Jona long bagarap bai painim taun. Stori bilong Jona long Baibel i tok: “Ol manmeri bilong Ninive i bilipim dispela tok bilong God, na ol i tok olsem, ‘Yumi mas tambu long kaikai. Yumi ol bikman na ol man nating tu, yumi mas putim klos bilong sori, bilong makim sori bilong yumi.’ Na ol i mekim olsem ol i bin tok.” (Jona 3:5) Ol maniman na ol rabisman, ol man i gat strong na ol man i no gat strong, ol yangpela na ol lapun, olgeta i mekim pasin bilong tanim bel. I no longtaim na king i harim tok bilong dispela samting ol Ninive i mekim.

Orait nau king tu i pret long God na i laik tanim bel. Em i lusim sia king na rausim ol gutpela bilas bilong king na pasim wankain klos bilong sori olsem ol manmeri bilong em i pasim, na em i “sindaun long sit bilong paia.” Ol manmeri i kirap pinis long tambu long kaikai. Olsem na king wantaim ol bikman bilong em i salim tok i go long olgeta manmeri bilong Ninive long mekim dispela pasin bilong tambu long kaikai i kamap olsem wanpela lo bilong kantri. Na em i tok long olgeta manmeri i mas pasim klos bilong sori, na ol animal tu i mas mekim olsem.c Long pasin daun em i tokaut olsem ol manmeri bilong em i gat asua long mekim ol pasin nogut na bagarapim man. Na em i tokaut olsem em i laik bai God i ken marimari long ol taim em i lukim olsem ol i tanim bel. Em i tok: “Sapos yumi mekim olsem, ating God bai i senisim tingting na lusim kros, na bai yumi no ken i dai.”​—Jona 3:​6-9.

Sampela man bilong sutim tok long Baibel ol i tok ol Ninive i no inap tanim bel hariap olsem. Tasol sampela saveman bilong Baibel i tok, dispela samting ol i mekim i stret wantaim pasin bilong ol lain bilong bipo i holim ol bilip bilong ol tumbuna na bel bilong ol i save kirap wantu tasol. Tasol maski ol man i sutim tok long dispela stori, bihain Jisas Krais yet i toktok long ol Ninive i bin tanim bel. (Matyu 12:41) Jisas i no tok nating, long wanem, em i bin i stap long heven na em i lukim ol dispela samting i kamap. (Jon 8:​57, 58) Tasol Jehova i ting olsem wanem long pasin bilong ol Ninive long tanim bel?

Pasin Marimari Bilong God na Hatpela Pasin Bilong Ol Man

Bihain Jona i tok: “Ol i lusim pasin nogut bilong ol, na God i lukim dispela samting ol i mekim. Na God i senisim tingting bilong en, na em i no mekim dispela samting nogut em i tok pinis long mekim.”​—Jona 3:10.

Orait yu ting Jehova i pilim olsem em i bin popaia long taim em i bin skelim ol Ninive long kot? Nogat. Baibel i tok Jehova i save mekim stret olgeta samting, na “pasin bilong en i gutpela na stretpela tasol.” (Lo 32:4) I stret Jehova i gat kros long Ninive, tasol em i larim dispela kros i dai. Em i lukim olsem ol dispela manmeri i senisim pasin bilong ol, na em i lukim olsem strafe bilong kot em i laik givim long ol, dispela i no stret moa wantaim pasin nau ol i mekim. Orait nau em taim bilong God long mekim pasin marimari.

Jehova i no hatpela God bilong mekim save long ol man, olsem ol bikman bilong lotu i save skulim ol man long en, nogat. Em i save isi long ol man na i redi long senisim samting em i bin tingting long mekim, na em i gat pasin marimari. Taim em i tingting pinis long givim strafe long ol man nogut, pastaim em i save givim wok long ol mausman bilong em long graun long givim toksave long ol, long wanem, em i laik bai ol man nogut i mekim olsem ol Ninive i bin mekim​—ol i ken tanim bel na senisim pasin bilong ol. (Esekiel 33:11) Jehova i bin tokim profet bilong em Jeremaia: “Sampela taim mi save tokaut long wanpela lain manmeri o long ol manmeri bilong wanpela kantri long mi bai rausim ol na daunim ol na bagarapim ol. Tasol sapos dispela lain manmeri i lusim pasin nogut bilong ol, orait mi save senisim tingting na mi no mekim ol dispela samting nogut mi bin tok long mekim long ol.”​—Jeremaia 18:​7, 8.

Orait yu ting tok profet bilong Jona em giaman? Nogat. Em i inapim wok bilong en olsem tok lukaut. Pasin nogut bilong ol Ninive i as bilong dispela tok lukaut, tasol ol i senisim pasin bilong ol. Sapos bihain ol i kirap long mekim gen ol pasin nogut, orait God bai givim strafe bilong kot long ol. Na tru tumas, bihain dispela samting i painim ol Ninive.​—Sefanaia 2:​13-15.

Orait Jona i mekim wanem taim bagarap i no painim ol Ninive olsem em i ting bai kamap? Baibel i tok: “Jona i bel nogut long dispela pasin bilong Bikpela na em i belhat.” (Jona 4:1) Jona i mekim wanpela beten i olsem em i krosim God i Gat Olgeta Strong! Em i kamapim tingting olsem mobeta em i bin stap tasol long ples bilong em. Em i tok em i save pinis olsem God i no inap bagarapim ol Ninive, na long dispela as em i bin ranawe na i laik i go long Tarsis. Orait nau em i askim God long pinisim laip bilong em. Em i tok i gutpela moa sapos em i dai, tasol sapos em i no i dai, dispela i no gutpela.​—Jona 4:​2, 3.

Jona i tingting planti long wanem samting? Yumi no save long olgeta tingting bilong em, tasol yumi save, Jona i bin tokaut long ol dispela manmeri olsem Ninive bai bagarap. Ol i bilipim tok bilong em. Na nau i no gat wanpela bagarap i kamap. Olsem wanem? Em i pret olsem ol bai tok bilas long em? O em i pret olsem ol bai kolim em giaman profet? Maski em i gat wanem tingting, em i no amamas long ol manmeri i tanim bel o long pasin marimari Jehova i mekim long ol. Em i bel nogut tru na em i sori long em yet, na em i sem na i ting dispela samting i kamap bai bagarapim gutnem bilong em. Tasol i luk olsem dispela God bilong Jona, em God i gat pasin marimari, em i lukim sampela gutpela pasin i stap yet long dispela man i stap bel hevi. Maski Jona i no soim rispek long Jehova, Jehova i no mekim save long Jona. Long pasin isi em i askim Jona: “Ating dispela kros bilong yu em i stret, a?” (Jona 4:4) Olsem wanem? Jona i bekim dispela askim? Baibel i no tokim yumi.

Jehova i Skulim Jona

Profet Jona i bel hevi na em i lusim Ninive na i wokabaut i go, tasol em i no i go bek long ples​—em i go long hap is we i gat sampela maunten i stap na em inap lukim taun Ninive. Em i wokim liklik haus win na em i sindaun i stap na lukluk i go long Ninive. Ating em i gat tingting yet olsem em bai lukim Ninive i bagarap. Olsem wanem Jehova bai skulim dispela man i gat strongpela het long mekim pasin marimari?

Long nait Jehova i mekim na wanpela rop bilong bus i kru na i kamap bikpela. Taim Jona i kirap long slip, em i lukim dispela rop i gat ol bikpela lip na i haitim gut san na i mekim ples i kol moa, winim liklik haus win em i bin wokim. Nau bel bilong em i amamas tru. “Jona i amamas tru long dispela rop” na ating em i tingting olsem dispela em mak bilong Jehova i mekim gut long em na i orait long em. Tasol Jehova i no tingting tasol long haitim Jona na bai san i no ken kukim em na em i no ken belhat moa, nogat. Em i laik kirapim Jona long pilim tru samting em i laik skulim em long en. Olsem na God i kirapim wanpela binatang long bagarapim dispela rop na rop i drai. Orait nau em i salim “hatpela win i kam long hap bilong sankamap” na san i kukim Jona na “ai bilong en i raun.” Em nau, Jona i bel hevi gen na em i askim God long em i ken i dai.​—Jona 4:​6-8.

Orait God i askim gen Jona olsem, ating i stret long em i kros long dispela rop i drai, o nogat? Tasol Jona i no tanim bel. Em i tok: “Yes, kros bilong mi em i stret. Mi belhat nogut tru na mi ting mobeta mi dai.” Orait nau em i gutpela taim bilong Jehova i ken kamapim klia dispela skul em i laik givim long Jona.​—Jona 4:9.

God i toktok gut wantaim Jona, olsem Jona i sori long wanpela rop nating bilong bus i kamap bikpela long wanpela nait tasol na i drai pinis, tasol Jona i no bin planim na em i no bin mekim rop i go bikpela. Orait nau God i tokim em: “Mi tu mi mas sori tumas long Ninive. Em i bikpela taun na i gat planti manmeri, namba bilong ol i winim 120,000. Na i gat planti bulmakau tu.”​—Jona 4:​10, 11.

Yu luksave long bikpela samting Jehova i laik skulim Jona long en? Jona i no bin mekim wanpela liklik wok bilong lukautim dispela rop. Tasol Jehova em i As bilong laip bilong ol dispela manmeri bilong Ninive na em i bin lukautim ol long kaikai samting olsem em i save mekim long olgeta samting i stap laip long graun. Olsem wanem Jona inap ting wanpela rop nating em i winim laip bilong 120,000 manmeri, na planti tausen bulmakau samting bilong ol tu? As bilong tingting bilong Jona i olsem, em i tingim em yet tasol. Em i sori long dispela rop, long wanem, rop i bin helpim em yet. Na em i belhat long Ninive, long wanem, em i tingim em yet tasol, olsem em i no laik kisim sem​—em i laik kamapim long ples klia olsem tok bilong em i stret.

Man! Jehova i givim gutpela skul tru long Jona! Tasol yumi laik save, Jona i bin pilim tru dispela skul? Buk Jona i pinisim stori bilong Jona long dispela askim bilong Jehova na i no kamapim bekim bilong en. Ating sampela man bai toktok planti olsem Jona i no bin bekim dispela askim. Tasol tru tru, bekim bilong Jona i stap. Dispela buk yet i olsem bekim long askim bilong Jehova. I gat ol samting i kamapim klia olsem Jona yet i bin raitim Buk Jona. Long tingting yumi ken lukim dispela profet i stap pinis long ples bilong em na em i raitim dispela stori. Na yumi ken tingim wanpela man i lapun na i gat pasin daun na gutpela tingting na save, na em i sem taim em i raitim stori bilong ol popaia bilong em yet, na pasin bikhet em i bin mekim, na em i bin pasim bel bilong em na i no laik mekim pasin marimari. Em nau, i klia tru olsem gutpela skul Jehova i givim long Jona i bin i go daun long bel bilong em. Em i lain long mekim pasin marimari. Olsem wanem? Yumi tu bai lain long mekim olsem?

[Ol Futnot]

[Rait long pes 16]

God i laik tru bai ol man nogut i tanim bel na senisim pasin bilong ol, olsem ol Ninive i bin mekim

[Rait long pes 17]

God i bin mekim wok long wanpela rop bilong bus bilong skulim Jona long mekim pasin marimari