Skul Yumi Kisim Long Jisas

Long “Pinis” Bai Kamap

Wanem samting bai pinis?

Ol disaipel bilong Jisas i askim em: “Wanem mak bai i kamap pastaim, na mipela i ken save, yu laik i kam bek na dispela graun i laik pinis?” (Matyu 24:3) Taim Jisas i bekim dispela askim, em i no tok dispela graun yet bai pinis. Pastaim em i bin toktok long “ol samting bilong graun,” na em i kolim dispela tok bilong makim olgeta wok politik, na bisnis, na lotu em Satan i bosim. (Matyu 13:​22, 40, 49) Olsem na Jisas i tingim ol dispela samting bilong graun taim em i tok: “Bai las de [olsem, pinis] i kamap.”​—Matyu 24:14.

Jisas i stori olsem wanem long pinis bai kamap?

Pinis bilong dispela pasin i no stret em “gutnius.” Jisas i tok: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” Jisas i stori long pinis bilong dispela pasin bilong graun olsem: “Long dispela taim bai i gat bikpela hevi tru. Stat long taim graun i nupela yet na i kam inap long nau, kain hevi olsem i no bin kamap bipo. Na bihain tu bai i no gat kain hevi olsem i kamap gen. Na sapos God i no bin sotim taim bilong ol dispela hevi, orait olgeta manmeri bai i lus.”​—Matyu 24:​14, 21, 22.

Husat bai bagarap?

Ol manmeri husat i no laikim Jehova na Jisas na mekim wok bilong tupela, ol tasol bai bagarap. Ol dispela lain i no save bihainim tok bilong God. Jisas i tok: “Kain pasin ol i bin mekim long taim bilong Noa, ol bai i mekim wankain pasin tasol long taim Pikinini Bilong Man i kamap. Taim bikpela tait i no kamap yet, . . . ol i no save long dispela samting bai i kamap long ol, na ol i stap olsem tasol i go inap long taim bikpela tait i kamap na i pinisim olgeta dispela manmeri.” (Matyu 24:​36-39) Jisas i tok planti man ol i stap long rot bilong kisim bagarap. Tasol em i tok promis olsem i gat wanpela rot “i go long ples bilong kisim laip.”​—Matyu 7:​13, 14.

Wanem taim pasin bilong dispela graun bai pinis?

Taim ol i askim Jisas long mak bai kamap bilong makim olsem em i kam i stap na pasin bilong “dispela graun i laik pinis,” Jisas i tokim ol: “Ol lain bilong sampela king bai i kirapim pait long ol lain bilong ol narapela narapela king. Long sampela hap ol bai i gat taim bilong bikpela hangre, na graun bai i guria. . . . Pasin nogut bai i kamap bikpela, olsem na planti man bai i lusim pasin bilong laikim ol arapela.” (Matyu 24:​3-12) Olsem na taim yumi harim tok bilong ol hevi i kamap long nau, yumi ken strongim bel​—liklik taim nau na Kingdom, olsem gavman, bilong God bai bringim bel isi long olgeta manmeri i bihainim tok bilong God. Jisas i tok: “Taim yupela i lukim ol dispela samting i kamap, yupela i ken save, kingdom bilong God i kam klostu pinis.”​—Luk 21:31.

Yu mas mekim wanem?

Jisas i tok God “i gat wanpela Pikinini tasol i stap . . . na em i givim dispela wanpela Pikinini . . . bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3:16) Bilong yu ken bilip long God na long Pikinini bilong em, yu mas save gut long tupela. Olsem na Jisas i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.”​—Jon 17:3.

Yu mas was gut, nogut ol wari na hevi i pasim yu long lain long pasin bilong kamapim klia olsem yu laikim tru God. Jisas i tok: “Yupela lukaut gut. Nogut yupela i . . . wari long ol samting bilong bodi. Sapos kain pasin olsem i daunim yupela, orait dispela de bilong Bikpela bai i kamap long yupela wantu tasol, olsem umben i save holimpas abus, long wanem, dispela de bai i kamap.” Sapos yu harim gut dispela tok lukaut bilong Jisas, bai yu “abrusim olgeta dispela samting i laik kamap.”​—Luk 21:​34-36.

Bilong kisim sampela save moa, lukim buk Tru Tru Baibel i Tok Wanem?, sapta 9, “Yu Ting Yumi Stap Long ‘Taim Bilong Las De’?”a

[Futnot]