Go Klostu Long God

Taim Jehova i Stori Long Ol Pasin Bilong Em Yet

Kisim Bek 34:​6, 7

BAI yu stori olsem wanem long God​—long ol pasin bilong em na long pasin bilong em long mekim ol samting? Tingting olsem yu inap askim God long stori long em yet na nau yu ken putim yau taim em i stori long ol pasin bilong em. Kain samting olsem i bin painim profet Moses. Gutpela tru, God i bin tokim em long raitim ol samting i kamap long dispela taim.

Antap long maunten Sainai, Moses i askim Jehova: “Mi laik yu soim mi bikpela lait bilong pes bilong yu.” (Kisim Bek 33:18) Long de bihain, God i larim Moses i lukim bikpela lait, olsem glori, bilong em.a Moses i no stori long olgeta wan wan samting em i bin lukim long dispela gutpela piksa olsem driman. Tasol em i raitim ol bikpela samting moa​—em ol tok God i mekim. Orait yumi ken skelim tok Jehova i mekim long Kisim Bek 34:​6, 7.

Jehova yet i kamapim namba wan pasin bilong em olsem, em i God bilong “marimari na sori.” (Kisim Bek sapta 34 Ves 6) Wanpela saveman i tok, dispela tok “marimari” long tok Hibru i makim “bikpela sori bilong God, kain olsem wanpela papa i sori long ol pikinini bilong em.” Na dispela tok “sori,” long tok Hibru em i kam long wanpela tok i makim “wanpela man bel bilong em i kirapim em long helpim man i sot long ol samting.” Jehova i laik bai yumi ken save olsem em i save lukautim ol manmeri i lotuim em, olsem ol papamama i save lukautim ol pikinini bilong ol​—ol i mekim long pasin sori na ol i tingim tru ol samting ol pikinini i sot long en.​—Song 103:​8, 13.

Orait nau Jehova i tok em i “no save belhat kwik.” (Kisim Bek sapta 34 Ves 6) Em i no save belhat kwik long ol wokman bilong em long graun, nogat. Em i isi long ol na em i no save les kwik long ol pasin kranki bilong ol​—em i givim taim long ol bilong senisim pasin nogut bilong ol.​—2 Pita 3:9.

God i tok moa olsem em i save “laikim tru olgeta manmeri, na [em i] save bihainim olgeta tok bilong [em].” (Kisim Bek sapta 34 Ves 6) Dispela pasin bilong laikim tru olgeta manmeri, olsem mekim gutpela pasin sori long ol, em i wanpela gutpela pasin tru Jehova i mekim long ol manmeri bilong em na i olsem wanpela rop i pasim ol wantaim em na ol i pas strong wantaim na i no save bruk. (Lo 7:9) Na Jehova em i as bilong tok i tru. Em i no inap giamanim man, na ol man i no inap giamanim em. Em i “God bilong mekim pasin tru tasol,” olsem na yumi inap bilip tru long olgeta tok bilong em, na ol tok promis bilong em long ol samting bai kamap bihain.​—Song 31:5.

I gat narapela bikpela tok tru long pasin bilong Jehova em i laik bai yumi save long en, olsem: Em i save “lusim ol kain kain sin na bikhetpasin” bilong ol man. (Kisim Bek sapta 34 Ves 7) Em i redi long “rausim sin” bilong ol man i tanim bel. (Song 86:5) Tasol Jehova i no orait liklik long pasin nogut. Em i tok em bai “mekim save long ol man i gat asua.” (Kisim Bek sapta 34 Ves 7) God em i holi na em i gat stretpela pasin, olsem na em i no inap larim ol man bilong mekim sin i abrusim strafe. Bihain ol bai kisim nogut long ol pasin nogut ol i mekim.

Jehova i stori long ol pasin bilong em, na dispela i kamapim klia olsem em i laik bai yumi ken save gut long em na save long ol pasin bilong em. Ating bel bilong yu i kirapim yu na yu laik kisim sampela save moa long ol gutpela pasin bilong em, a?

[Futnot]