Banisim Yu Yet Long Ol Spirit Nogut

JAMES i bin kamap bikpela long wanpela liklik ples bilong ailan Malaita, long Solomon Ailan. Kirap long taim em i stap pikinini yet, em i bin lain long rispektim ol spirit. Em i tok: “Mi yet i no gat laik long askim ol spirit long nogutim ol narapela, tasol mi ting olsem mi mas mekim wok long rarafono [em pasin tumbuna we man i save askim ol spirit long helpim em] bambai mi ken i stap amamas na mi no kisim hevi.”

Wankain olsem ol manmeri long sampela narapela hap bilong graun, ol manmeri bilong Solomon Ailan tu ol i bilip olsem ol spirit inap helpim man o nogutim man. I gat sampela spirit em ol man i save kolim olsem gutpela spirit, na planti manmeri bilong lain Melanisia ol i save laikim ol dispela spirit, ol i no pret long ol.

I gat kain kain samting i soim olsem ol man i bilip long wok bilong ol spirit. Olsem: Taim James i stap mangi yet, ol meri long ples bilong em i save kisim ol pikinini na hariap i go insait long haus taim ol i harim singaut bilong pisin korokoro. Bilong wanem? Ol i bilip olsem singaut bilong dispela pisin i makim olsem samting nogut bai painim wanpela man.

Sampela man long ples ol i save putim wanpela kain waitpela ston antap long dua bilong haus. James i bin mekim olsem, em i bilip olsem dispela ston bai banisim em long ol spirit nogut. Na taim James i stap long ples wok, em i save bungim gut ol hap hap pipia bilong kaikai bilong em long belo na putim long wanpela beg na bihain em i save kisim i go tromoim. Samting em i tingting planti long en i olsem: Nogut wanpela posinman bai kisim ol hap hap pipia bilong kaikai na yusim bilong wokim posin bambai em i kisim sik.

Maski sapos ol dispela pasin i no kamap long hap yu stap long en, ating yu pilim wankain olsem James; yu pilim olsem yu mas bihainim sampela pasin tumbuna bambai ol spirit nogut i no ken givim hevi long yu. Ating yu tingting olsem yu mas bihainim ol kain kastam olsem na bai hevi i no ken painim yu.

Sapos yu save rispektim ol tok bilong Baibel, ating yu bai laik save long ol tok Baibel i mekim bilong bekim ol dispela askim: (1) Olsem wanem ol spirit nogut inap nogutim yu? (2) Sapos yu bihainim sampela kastam bilong ples, yu ting dispela inap opim rot long ol spirit nogut i nogutim yu? (3) Olsem wanem yu inap banisim gut yu yet long ol spirit nogut na stap amamas?

Samting Ol Spirit Nogut i Mekim Bilong Nogutim Man

Baibel i kamapim klia olsem ol spirit nogut ol i no tewel bilong ol man i dai pinis. Baibel i tok: “Ol man i gat laip . . . ol i save wanpela samting bai i kamap long ol. Ol i save bai ol i dai. Tasol ol man i dai pinis, ol i no inap save long wanpela samting.” (Saveman 9:​4, 5) Ol spirit nogut em ol ensel nogut husat i bihainim Satan na mekim ol samting bilong giamanim ol man.​​—KTH 12:9.

Baibel i tokaut klia olsem yumi mas banisim yumi yet long ol spirit nogut. Aposel Pol i tokim ol Kristen long Efesus: “Yumi no save pait long ol manmeri. Nogat. . . . Yumi pait long olgeta spirit nogut i stap antap.” Satan em i hetman bilong olgeta spirit nogut, na aposel Pita i tok em i olsem “wanpela laion i singaut strong. Oltaim em i save raun bilong painim ol manmeri bilong kaikai.”​​—Efesus 6:​12; 1 Pita 5:8.

Satan i save nogutim ol man long rot bilong giamanim o pulim ol long mekim samting em God i no orait long en. Baibel i tok Satan “i save senisim pasin bilong en na kamap olsem ensel bilong lait.” (2 Korin 11:14) Em i save giaman olsem em i gutpela spirit bilong lukautim man, tasol tingting tru bilong em i bilong nogutim man. Satan i save pasim ai bilong ol man bambai ol i no ken save long em i wanem kain man na God tu em i wanem kain man. (2 Korin 4:4) Bilong wanem em i laik giamanim ol man?

Satan i laik tru bai ol man i lotuim em, maski ol i luksave long dispela o nogat. Taim Pikinini Bilong God yet, em Jisas, i stap long graun, Satan i laik bai em i “brukim skru na lotu” long em. Jisas i tok: “Satan, yu klia. Buk bilong God i tok, ‘Yu mas aninit long God, Bikpela bilong yu.’ ” (Matyu 4:​9, 10) Jisas i no laik mekim samting we inap soim olsem em i rispek long Satan na lotuim em.

Jehova i gat bikpela strong tru winim olgeta narapela spirit, na em bai lukautim ol man i bihainim tok bilong em na em i no inap larim wanpela samting i bagarapim ol inap oltaim oltaim, nogat. (Song 83:18; Rom 16:20) Tasol sapos yumi laik amamasim God Jehova olsem Jisas i bin mekim, orait yumi mas abrusim olgeta kain pasin we inap soim olsem yumi rispektim Satan o ol spirit nogut bilong em. Bilong mekim olsem, yumi mas luksave long ol pasin tumbuna we i soim olsem man i rispektim na lotuim ol spirit nogut. Olsem wanem yu inap mekim olsem?

Luksave Long Ol Kastam Em God i No Laikim

God Jehova i bin tokim lain bilong em long bipo, em lain Israel, long ol i no ken bihainim sampela pasin tumbuna bilong ol lain i sindaun klostu long ol. Em i tok: “Yupela i no ken larim ol manmeri bilong yupela i mekim olkain pasin bilong glasman, na pasin tambaran na pasin sanguma na wokim posin na mekim marila.” Long ol manmeri husat i bihainim ol dispela kastam, Baibel i tok: “God, Bikpela bilong yumi, i no laikim tru ol manmeri i save mekim ol dispela kain pasin nogut.”​​—Lo 18:​10-​12.

Olsem na taim yu laik insait long ol kastam bilong ples, skelim ol dispela askim: Dispela kastam i kirapim ol man long bilip olsem sampela samting inap kamap olsem mak bilong tokaut long ol samting bai kamap bihain? Dispela kastam i makim olsem ston o lip bilong diwai samting i gat sampela kain strong? Dispela kastam i bilong mekim posin na marila o i bilong banisim man long pawa bilong marila? Dispela kastam bai pulim ol man long rispektim ol spirit nogut na i no daun long Jehova o dispela mausman em i bin makim, em Jisas?​​—Rom 14:11; Filipai 2:​9, 10.

Em i bikpela samting long yumi mas sakim olgeta kain kastam i kirapim ol man long mekim ol kain samting olsem. Bilong wanem? Holi spirit i kirapim aposel Pol long tok: “I no inap yupela i kaikai long tebol bilong Bikpela na long tebol bilong ol spirit nogut tu.” Em i mekim tok lukaut olsem ol man husat i laik amamasim God na amamasim ol arapela spirit tu, ol bai “mekim Bikpela i bel nogut na kros.” (1 Korin 10:​20-​22) God Jehova i laik bai yumi mas lotuim em wanpela tasol, na i stret yumi mekim olsem.​​—Kisim Bek 20:​4, 5.

Tingim tu dispela askim: Dispela kastam i strongim dispela tingting olsem man i no gat asua long ol samting em yet i mekim? Olsem: Pasin adaltri na pasin bilong man na meri i slip wantaim paslain long ol i marit, em ol pasin we planti man i no laikim na Baibel i tambuim ol dispela pasin. (1 Korin 6:​9, 10) Tasol long sampela kastam bilong ol lain Pasifik, ol man bai orait long ol dispela kain pasin sapos yangpela meri i tok olsem em i bin kisim “grinpela lip.”a Dispela i makim olsem em i bin bel kirap long slip wantaim man, long wanem, wanpela i bin mekim marila long em.

Tasol Baibel i skulim yumi olsem yumi yet i gat asua long ol samting yumi mekim. (Rom 14:12; Galesia 6:7) Olsem: Namba wan meri, Iv, i pilim olsem Satan i bin giamanim em na em i sakim tok bilong God, na em i tok: “Snek i grisim mi na mi kaikai pikinini bilong dispela diwai.” Tasol Jehova i tok Iv i gat asua long samting em i mekim. (Stat 3:​13, 16, 19) Na i wankain long yumi tu, Jehova bai skelim ol pasin yumi mekim.​​—Hibru 4:​13.

Yu Mas Mekim Wanem?

Sapos yu laik amamasim God na bihainim ol stiatok bilong Baibel, orait yu mas strong long mekim sampela samting. Long taim bilong ol aposel, ol manmeri bilong taun Efesus em ol i gat gutpela bel, ol i bin mekim gutpela pasin yumi ken bihainim. Bilong banisim ol yet long wok bilong ol spirit nogut, ol i bungim olgeta buk bilong ol i stori long wok bilong ol spirit nogut na ol i “kukim long paia long ai bilong olgeta manmeri.”​​—Aposel 19:19.

Paslain long ol i kukim ol dispela buk, ol i “kam na long ai bilong ol arapela manmeri, ol i autim olgeta pasin nogut bipo ol i bin mekim.” (Aposel 19:18) Ol i pilim tru ol tok em Pol i mekim bilong skulim ol long Krais, na dispela i kirapim ol long kukim ol buk i stori long wok bilong ol spirit nogut. Na tu, ol i senisim tingting bilong ol long ol pasin tumbuna.

Tru, em i no isi long givim baksait long sampela pasin tumbuna. James, em yumi bin stori long em long pastaim, em i bin bungim dispela hevi. Em i kirap stadi long Baibel wantaim ol Witnes Bilong Jehova na em i amamas long ol samting em i lainim. Tasol em i mekim wok yet long rarafono. Taim em i skelim tingting bilong em long ol dispela pasin tumbuna, em i lukim olsem em i bilip long ol tok promis bilong Jehova long ol samting bai kamap bihain, tasol em i pilim olsem em i mas mekim wok yet long ol dispela pasin tumbuna bilong lukautim em yet.

Wanem samting i helpim James long senisim tingting bilong em? Em i tok: “Mi beten askim Jehova long lukautim mi na helpim mi long bilip tru long em. Na long wankain taim, mi givim baksait long ol dispela pasin tumbuna.” Olsem wanem? Sampela hevi i bin painim em? James i tok: “Nogat. Wanpela samting tasol i kamap em olsem, mi lain long pasin bilong bilip tru long Jehova. Mi lukim olsem Jehova inap pas gut wantaim yumi olsem gutpela pren.” Inap sevenpela yia nau, James i bin mekim wok bilong autim tok fultaim, na helpim ol narapela long lain long ol tok bilong Baibel.

I gutpela yu bihainim pasin bilong James, a? Skelim ol kastam ol man i bihainim long hap yu stap long en, na yusim gut “tingting” bilong yu long skelim olsem ol dispela pasin i stret wantaim “laik bilong God” o nogat. (Rom 12:​1, 2) Taim yu skelim pinis, orait strongim bel na givim baksait olgeta long ol wok bilong ol spirit nogut. Sapos yu mekim olsem, orait yu ken bilip tru olsem Jehova bai ‘kisim yu’ na lukautim yu. (2 Korin 6:​16-​18) Olsem James, yu bai pilim tru dispela tok promis bilong Baibel: “Bikpela i olsem wanpela strongpela haus. Ol stretpela man i ken ran i go long en na i stap gut.”​​—Sindaun 18:10.

[Futnot]

[Piksa long pes 19]

“Korokoro”

[Kredit Lain]

Courtesy of Dr. Bakshi Jehangir

[Piksa long pes 19]

Yangpela meri i bungim ol pipia kaikai bambai narapela i no ken yusim bilong wokim posin