Askim

Wanem taim ol i bin rausim Satan long heven?​—KTH 12:​1-9.

Buk Kamapim Tok Hait long Baibel i no kolim wanem taim stret ol i bin rausim Satan long heven, tasol em i kolim ol samting bai kamap na dispela inap helpim yumi long save long wanem taim em i bin raus long heven. Namba wan bilong ol dispela samting em Kingdom long han bilong Mesaia i kamap nupela. Long dispela taim “bikpela pait i kirap long heven,” na Satan i lus long pait na ol i rausim em long heven.

Baibel i soim klia olsem dispela “taim God i bin makim bilong ol arapela lain man” i bosim graun, em i pinis long 1914 na Kingdom i kamap long dispela taim.a (Lu. 21:24) Bihain long dispela, hamas taim i bin lus pastaim na pait i kirap long heven na ol i rausim Satan?

Kamapim Tok Hait 12:4 i tok: “Dispela snek i sanap long pes bilong meri i laik karim pikinini, na em i wetim meri i karim pikinini pinis, bai em i ken kaikai dispela pikinini.” Dispela i soim olsem Satan i laik pinisim kwik dispela nupela Kingdom sapos em inap. Jehova i pasim rot bilong Satan long mekim dispela samting nogut, tasol Satan i strong tru long bagarapim dispela Kingdom. Olsem na yumi save, “Maikel wantaim ol ensel bilong en” bai kirap wantu tasol long mekim ol samting bilong rausim “snek wantaim ol ensel bilong en” long heven bambai em i no inap bagarapim Kingdom. Dispela i makim olsem ol i bin rausim Satan long heven kwiktaim bihain long taim Kingdom i kamap nupela long 1914.

I gat narapela samting tu yumi mas tingim: Ol tok bilong Baibel i kamapim klia olsem ol Kristen God i bin makim, ol i bin kirap bek kwiktaim bihain long taim Kingdom i kamap.b (KTH 20:6) Ol brata bilong Krais em God i bin makim, Baibel i no stori liklik olsem ol i bin poromanim Jisas long pait long snek wantaim ol ensel bilong en. Olsem na dispela pait long heven na wok bilong rausim Satan wantaim ol spirit nogut bilong en i bin kamap paslain long ol brata bilong Krais i stat long kirap bek.

Olsem na Baibel i no kolim wanem taim stret Satan wantaim ol spirit nogut bilong en i bin raus long heven. Tasol yumi save olsem dispela samting i bin kamap kwiktaim bihain long taim Jisas Krais i kamap King long heven long 1914.

[Ol Futnot]