Bihainim Itai Long Stap Gut Long Narapela

“BIKPELA, yu God I Gat Olgeta Strong, yu save mekim ol narakain strongpela wok, na taim mipela i lukim mipela i save kirap nogut tru. King bilong olgeta lain manmeri, ol pasin bilong yu ol i stret na i tru olgeta. Bikpela, yu wanpela tasol yu stap holi [“stap gut long narapela,” NW].” Dispela song i tok long pasin bilong God long stap gut long narapela. Lain i mekim dispela song ol i stap long heven na ol “i bin winim pait na daunim dispela wel animal wantaim piksa bilong en.” (KTH 15:​2-4) Jehova i laik bai ol man i lotu long em ol i mas bihainim dispela gutpela pasin bilong em.

Tasol Satan i wok strong long bagarapim pasin laikim i stap namel long ol wokboi bilong God long graun na dispela God ol i lotuim. Tasol planti bilong ol i bin stap gut long God maski bikpela hevi tru i bin painim ol. Yumi ken amamas olsem Jehova i save laikim tumas pasin bilong givim bel tru long em! Baibel i tok: “God i save laikim tumas stretpela pasin. Em i no inap larim ol manmeri bilong en i lus.” (Sng. 37:28) Bilong helpim yumi long stap gut long em, Baibel i kamapim stori bilong planti man i bin stap gut long God. Wanpela man olsem, em Itai bilong Get.

Em i “Man Bilong Narapela Hap”

Itai i bilong Get, em wanpela taun bilong ol Filistia na em i as ples bilong traipela man Goliat na sampela birua moa bilong ol Israel. Namba wan taim yumi ritim stori bilong dispela soldia Itai, em long taim Apsalom i bikhet long King Devit. Long dispela taim, Itai na 600 man Filistia i bihainim em, ol i stap long hap klostu long Jerusalem, longwe long kantri bilong ol.

Ating i stap bilong Itai na ol man i bihainim em i bin kirapim Devit long tingim dispela taim em yet i bin stap olsem ranawe man na em wantaim 600 soldia Israel i stap long graun bilong ol Filistia, long hap bilong Akis, king bilong Get. (1 Sml. 27:​2, 3) Itai na ol man i bihainim em ol bai mekim wanem taim Devit i pait wantaim pikinini bilong em Apsalom? Ol bai helpim Apsalom o Devit o i no helpim wanpela bilong ol?

Piksaim long tingting Devit i ranawe lusim Jerusalem na i go sanap klostu long wanpela haus i stap long arere tru bilong taun. Ating em laspela haus long Jerusalem long hap i go long maunten Oliv paslain long ples daun bilong Kidron. (2 Sml. 15:17) Long dispela hap, Devit i sanap na i lukim ol lain bilong em i wokabaut i go pas. I gat ol Israel em ol i stap gut long em, na ol lain Keret na Pelet. Na tu, i gat ol lain Get​​—em Itai na 600 soldia bilong em.​​—2 Sml. 15:18.

Devit i tingim Itai na i tokim em: “Bilong wanem yu laik go wantaim mipela? Yu mas i go bek na stap wantaim King Apsalom. Long wanem, yu man bilong narapela hap, na yu kam i stap hia, longwe long kantri bilong yu. Yu bin i stap hia sotpela taim tasol, olsem na mi no laik mekim yu i lusim dispela ples na raun wantaim mipela. Mipela bai i go nabaut olsem tripman. I gutpela tru sapos yu kisim ol lain bilong yu na yupela i go bek. Na mi laik bai Bikpela i ken mekim gut long yu na lukautim yu oltaim.”​​—2 Sml. 15:​19, 20.

Tasol Itai i no laik lusim Devit. Em i bekim tok: “Long nem bilong Bikpela i stap oltaim, mi tok tru tumas, bai mi stap wantaim yu oltaim. Na wanem ples yu go long en, bai mi go wantaim yu. Na sapos ol i kilim yu i dai, orait ol i ken kilim mi tu.” (2 Sml. 15:21) Ating dispela tok i kirapim Devit long tingim wankain tok tumbuna meri bilong em Rut i bin mekim. (Rut 1:​16, 17) Devit i pilim tru dispela tok bilong Itai, na i tokim em: “I orait, yupela i ken i go wantaim mi.” Olsem na “Itai na ol soldia bilong en, wantaim ol famili bilong ol,” ol i brukim ples daun bilong Kidron na bihainim em i go.​​—2 Sml. 15:22.

“Bilong Skulim Yumi”

Rom 15:4 i tok: “Olgeta tok bipo ol i bin raitim long buk bilong God, em ol i bin raitim bilong skulim yumi.” Olsem na i gutpela yumi askim yumi yet, Pasin bilong Itai inap skulim yumi long wanem samting? Tingim samting ating i bin kirapim Itai long stap gut long Devit. Maski Itai i man bilong narapela hap, bilong kantri Filistia, em i luksave olsem Jehova em i God i stap oltaim na Devit em man Jehova i bin makim bilong kamap king. Maski pasin birua i stap namel long ol Israel na ol Filistia, Itai i no tingim dispela. Em i no tingim Devit olsem man i bin kilim i dai Goliat, em man Filistia, wantaim planti wanples moa bilong Itai, nogat. (1 Sml. 18:​6, 7) Itai i luksave olsem Devit i laikim tru Jehova na em man i gat planti gutpela pasin. Na Devit yet i gat bikpela rispek long Itai. Taim Devit i brukim ami bilong en long tripela bikpela lain, em i larim “Itai bilong taun Get, i bosim wanpela lain” taim ol i pait long ami bilong Apsalom!​​—2 Sml. 18:2.

Yumi tu i mas tingim ol gutpela pasin bilong ol narapela na no ken tingim ples, skin, o lain bilong ol. Yumi mas lusim tru pasin bilong bel nogut long ol man bilong narapela lain. Pasin pren i kamap namel long Devit na Itai i kamapim klia olsem pasin bilong kisim save long Jehova na laikim em tru, dispela inap helpim yumi long daunim pasin bilong bel nogut long ol narapela lain.

Taim yumi wok long tingim gutpela pasin bilong Itai, yumi ken askim yumi yet: ‘Mi tu i kamapim ples klia olsem mi stap gut long Man i Winim Devit, em Krais Jisas? Mi soim olsem mi stap gut long em long pasin bilong wok strong long autim tok bilong Kingdom na kamapim ol disaipel?’ (Mt. 24:14; 28:​19, 20) ‘Mi redi long karim wanem kain hevi bilong kamapim klia pasin bilong mi long stap gut long God?’

Ol het bilong famili tu i mas tingim pasin bilong Itai long stap gut long narapela. Pasin bilong em long stap gut long Devit na disisen em i wokim bilong helpim dispela man God i bin makim long kamap king, dispela i bin mekim sampela samting long ol man i bihainim Itai. Na olsem tasol, ol disisen ol het bilong famili i wokim bilong helpim lotu i tru, dispela i save mekim sampela samting long famili bilong ol, na inap kamapim sampela hevi tu bilong sotpela taim. Tasol Baibel i strongim bel bilong yumi olsem: “Bikpela, sapos man i no lusim yu, orait yu no save lusim em.”​​—Sng. 18:25.

Bihain long pait Devit i mekim wantaim Apsalom, Baibel i no stori moa long Itai. Tasol dispela sotpela stori bilong em long Tok Bilong God i helpim yumi long save em i stap wanem kain man long dispela taim we hevi i bin painim Devit. Stori bilong Itai i stap long Baibel na dispela i kamapim klia olsem Jehova i save tingim na mekim gut long ol man i stap gut long em na ol narapela.​​—Hi. 6:​10.