Go Klostu Long God

“Man i No Lusim Yu, Orait Yu No Save Lusim Em”

2 SAMUEL 22:26

SAMPELA samting inap bagarapim bel bilong yumi, tasol taim wanpela yumi trastim, em i givim baksait long yumi, dispela i bagarapim tru bel bilong yumi. Planti man i gat dispela pasin. (2 Timoti 3:​1-5) Olsem wanem? I gat wanpela man em yumi inap bilip olsem em bai stap gut long yumi oltaim? Yumi ken skelim samting i bin painim King Devit bilong lain Israel long bipo.

Long laip bilong em, Devit i bin pilim tru dispela hevi taim ol narapela i no bin stap gut long em. Sol, nambawan king bilong lain Israel i bin bel nogut long Devit olsem na Devit i mas ranawe. Na insait tu long famili bilong em, meri bilong em yet, Mikal, i no bin stap gut long em, nogat. “[Mikal] i bel nogut long em.” (2 Samuel 6:16) Ahitofel em man i save givim gutpela tingting long Devit, em tu i bin givim baksait long Devit na kirap bihainim ol narapela long bikhet long Devit. Yu ting husat i bin go pas long daunim wok king bilong Devit? Yumi kirap nogut olsem pikinini bilong Devit yet, Apsalom, em i bin go pas long dispela! Taim Devit i bin kisim ol dispela wankain hevi, yu ting em i no laik trastim moa wanpela man na ting olsem i no gat wanpela inap stap gut long em?

Yumi inap painim bekim long tok Devit yet i mekim long 2 Samuel 22:26. Devit em man bilong bilip strong long God Jehova, na long wanpela naispela song bilong em, em i mekim dispela tok long God Jehova, olsem: “Bikpela, sapos man i no lusim yu, orait yu no save lusim em.” Devit i no kisim tupela tingting long pasin bilong Jehova long stap gut long em maski ol narapela i no mekim wankain pasin.

Yumi ken skelim gut tok bilong Devit. Long tok Hibru dispela tok, “yu no save lusim,” ol inap tanim tu olsem “mekim gutpela-pasin-sori.” Pasin laikim i as bilong pasin bilong stap gut long narapela. Jehova i save pas gut tru wantaim man husat i stap gut long em.a

Tingim, pasin bilong stap gut long narapela i no makim tasol samting man i pilim long bel, nogat. Em i makim tu pasin man i mekim long narapela. Jehova i no save lusim man i stap gut long em, na Devit yet i bin kisim save long dispela. Long taim ol dispela hevi i painim Devit, Jehova i mekim ol samting bilong lukautim na soim rot long em. Devit i pilim tru na i tok tenkyu long Jehova taim Jehova ‘i bin kisim bek em long han bilong olgeta arapela birua bilong en.’​—2 Samuel 22:1.

Tok Devit i mekim i makim wanem samting long yumi? Jehova i no save senisim tingting na pasin bilong em. (Jems 1:17) Em i save bihainim ol stretpela lo bilong em na em i save stap gut long ol tok promis em i mekim. Long narapela song bilong Devit, em i tok: “God . . . i no inap larim ol manmeri bilong en i lus.”​—Song 37:28.

Jehova i save tingim tru pasin bilong yumi long stap gut long em na bihainim tok. Na em i kirapim yumi long bihainim pasin bilong em long stap gut long ol arapela. (Efesus 4:24; 5:1) Sapos yumi kamapim pasin bilong stap gut long ol arapela, yumi ken bilip olsem Jehova bai i no inap lusim yumi. Maski ol narapela i givim baksait long yumi, yumi inap bilip tru olsem Jehova bai stap gut long yumi na helpim yumi long winim ol hevi i painim yumi. Olsem wanem? Yu laik i go klostu long Jehova, em “Man i save stap gut long ol manmeri” bilong em?​—KTH 16:​5, NW.

[Futnot]