Ol Man i Askim . . .

Ol Witnes Bilong Jehova i Gat Wanem Tingting Long Pasin Bilong Bung Wantaim Ol Narapela Lotu?

▪ Wanpela buk (World Christian Encyclopedia) i tok i gat olsem “10,000 narapela narapela lotu long graun olgeta.” Planti kros pait i bin kamap namel long ol kain kain lotu na planti man i bin kisim bagarap, olsem na planti man i ting olsem dispela pasin bilong olgeta arapela lotu long bung wantaim em gutpela bilong olgeta kain kain man bilong lotu. Ol i bilip olsem dispela pasin inap kamapim bel isi na pasin wanbel long graun olgeta.

Baibel i strongim pasin bilong stap wanbel. Aposel Pol i tok kongrigesen Kristen i olsem wanpela bodi bilong man, olgeta wan wan hap bilong en “i pas gut wantaim na i bihainim pasin bilong laikim tru ol arapela, na long dispela pasin bodi i save kamap bikpela na strongpela.” (Efesus 4:16) Na olsem tasol, aposel Pita i kirapim ol wanbilip bilong em: “Yupela olgeta i mas i stap wanbel.”​—1 Pita 3:8.

Ol Kristen bilong bipo i bin sindaun long hap we i gat kain kain man bilong narapela kantri, tokples, na lotu. Tasol taim Pol i toktok long pasin bilong ol lotu long bung wantaim, em i kamapim dispela askim: “Man i bilip long Krais na man i no bilip, tupela i ken holim wanpela kain tingting, a?” Na em i tokim ol Kristen long ol i “mas lusim ol.” (2 Korin 6:​15, 17) Em i klia stret, Pol i tokaut olsem i no stret long man i bilip na man i no bilip i ken lotu wantaim. Bilong wanem em i mekim kain tok olsem?

Aposel Pol i kamapim olsem pasin bilong bung na lotu wantaim wanpela Kristen na wanpela husat i no Kristen, dispela bai i no inap fit stret. (2 Korin 6:14) Dispela bai bagarapim bilip bilong Kristen. Tok Pol i mekim i kain olsem bilong wanpela papa husat i save olsem sampela pikinini long hap bilong em ol i bikhet pikinini. Papa i tingim tru pikinini bilong em, olsem na em i no larim pikinini i pilai wantaim ol dispela bikhet pikinini. Tru, ating ol narapela man bai ting pasin bilong papa em i no stret. Tasol nogat, papa i helpim pikinini bambai ol bikhet pikinini i no ken bagarapim gutpela pasin bilong pikinini bilong em. Wankain tu, Pol i luksave olsem ol Kristen i no ken bung wantaim ol narapela lotu, long wanem, dispela inap bagarapim bilip Kristen bilong ol.

Taim Pol i kamapim dispela tingting, em i bihainim pasin bilong Jisas. Tru, Jisas i bin stap nambawan gutpela piksa long kamapim pasin wanbel namel long ol manmeri, tasol em i no bin bung wantaim ol narapela lotu long mekim ol samting bilong lotu. I gat planti lain lotu, olsem ol lain Farisi na Sadyusi, taim Jisas i mekim wok bilong em hia long graun. Ol dispela lain lotu i bin bung wantaim long sutim tok na kilim Jisas i dai. Jisas i bin tokim ol disaipel bilong em “long ol i mas lukaut long tok bilong ol Farisi na ol Sadyusi.”​—Matyu 16:12.

Olsem wanem? Tok lukaut bilong Baibel long ol lotu i no ken wok bung wantaim, dispela i stret long nau tu? Yes. Olgeta lotu na bilip i no inap pas wantaim, kain olsem yu no inap miksim wara na oil wantaim. Olsem, taim ol lain bilong narapela narapela lotu i bung wantaim long beten long kamapim pasin wanbel, yu ting ol i beten long god bilong husat? Long God Triwan bilong Kristendom, o God Brama bilong Hindu, o Buda, o wanpela narapela god?

Profet Maika i bin tok profet olsem, “Wanpela taim bai i kamap bihain” na planti lain manmeri bai tok: “Kam, yumi go antap long maunten Saion, em maunten bilong Bikpela. Yumi go long haus bilong God bilong Israel, bilong em i ken skulim yumi long ol pasin em i laik yumi mekim, na bai yumi ken wokabaut long rot em yet i makim.” (Maika 4:​1-4) Dispela bai kamapim bel isi na pasin wanbel long graun olgeta. Dispela i no kamap long rot bilong bungim olgeta lotu na bilip wantaim, nogat, em bai kamap long rot bilong olgeta manmeri i orait long bihainim wanpela trupela bilip.

[Piksa long pes 27]

Ol bikman bilong ol lotu i bung wantaim, 2008

[Kredit Lain]

REUTERS/Andreas Manolis