Palamen Bilong Olgeta Lotu—Em Inap Stretim Ol Hevi?
OL BIKMAN bilong planti handet lotu i bung long 1993 long Sikago long Ilinoi, Amerika, na ol i laik wokim namba 2 miting bilong Palamen Bilong Olgeta Lotu. I gat lotu Buda, na Hindu, na Juda, na Islam, na ol lotu i holim nating nem Kristen, ol i bung, na ol marilameri na ol lain i save lotuim god meri ol tu i kam long dispela miting. Ol i toktok long ol wok bilong ol long pinisim ol pait bilong graun. Siaman i tokaut olsem lotu i as bilong planti pait i bin kamap.
Wan Handet Yia Bipo
Olsem wanem? Dispela miting i kamapim gutpela wok? Inap wan handet yia bipo, long 1893, dispela palamen i bin kamap long Sikago, na planti lotu i bin bung, winim 40. Kaunsil bilong wanpela Palamen Bilong Olgeta Lotu i tok, “long 1893 ol i bin ting bihain bai i gat sampela miting moa bilong toktok long olsem wanem ol lain i ken kamap wanbel na ol pait bai pinis na gutaim bai kamap. Tasol dispela pasin i no bin kamap. Inap 100 yia ol lotu i insait long ol pait, na planti pait i kamap inap long nau.” Bilong wanem ol dispela bung bilong ol lotu i no inap mekim gut wok bilong en? Long wanem, God i no orait long ol lotu i bung wantaim. Baibel i tok: “Ol haiden ol i narakain, olsem na yupela i no ken pas wantaim ol na wok bung wantaim ol. . . . Nogut yupela i pas long ol samting i no klin long ai bilong God.”—2 Korin 6:14-17.
Long 1893 Wastaua (Zion’s Watch Tower) i bin tok, Baibel i no as bilong wok bilong dispela Palamen Bilong Olgeta Lotu. Wastaua i tok: “Ol i painim pinis sampela hap ston i gat rait long en long hap bilong Babilon na sampela taun moa bilong bipo, tasol ol i no painim yet sampela i stori long Moses na Josua i kamapim Palamen Bilong Olgeta Lotu na ol i miting wantaim ol Moap na Amon na Idom; na ol i no painim sampela rait i tok Samuel i askim Get na Ekron long salim ol pris bilong god Dagon i kam long Silo na miting wantaim ol pris bilong Jehova; na ol i no painim sampela stori i tok Elaija i laik bai ol pris bilong god Bal na Molek i ken bung inap wanpela wik samting na toktok long bilip bilong ol na olsem wanem ol lotu i ken stap wanbel wantaim.”
Kingdom Bilong God Tasol Inap
Palamen Bilong Olgeta Lotu i no inap pinisim ol pait. Ol nius na ol man i bin go long ol dispela bung ol i tok, taim ol dispela lotu i bung ol i kros pait, na wanpela ripot i tok, ol i tok pait long ol samting bilong politik tu na ol polis i mas kam na pasim pait. Long 1952 dispela palamen i tok, wanpela wok bilong ol i bilong helpim ol lotu long wok gut wantaim Yunaitet Nesen long pinisim ol pait na helpim ol man long kamap wanbel. Tasol Jisas i tok, Kingdom bilong em i no samting bilong dispela graun. Baibel i tok, Kingdom bilong God tasol inap stretim ol hevi bilong ol man.—Daniel 2:44; Jon 18:36.