Planti Man i Ting Lotu i No Inap Mekim Ol Man i Stap Wanbel
“YU MAS laikim ol wantok.” (Matyu 22:39) Planti lotu i save litimapim tru dispela lo. Sapos ol dispela lotu i skulim gut lain bilong ol long laikim tru ol narapela, orait lain bilong ol bai pas gut wantaim na stap wanbel. Tasol yu bin lukim dispela samting i kamap? Yu ting ol lotu i gat strong long mekim ol man i stap wanbel? Wanpela lain bilong skelim dispela samting long Jemani i askim ol man olsem: “Ol lotu i save mekim ol man i stap wanbel, o ol i save brukim ol man?” Namel long ol man i bekim dispela askim, 22 pesen i ting ol lotu i save mekim ol man i stap wanbel, tasol 52 pesen i ting ol i save brukim ol man. Ating ol man long kantri bilong yu ol tu i ting olsem.
Bilong wanem planti man i no bilip tumas olsem lotu inap mekim ol lain i stap wanbel? Ating ol i tingim ol samting i bin kamap bipo. Planti taim lotu i no bin mekim ol man i stap wanbel—em i bin brukim ol man. Planti taim ol man i bin bagarapim nogut tru planti lain na kilim ol i dai, na ol i mekim long nem bilong lotu. Yumi ken tingim sampela pasin olsem i bin kamap insait long 100 yia i go pinis.
Lotu i Stiaim Ol
Long taim bilong Wol Woa 2, ol lain Kroesia bilong Misin Katolik na ol Serbia bilong Misin Otodoks long Bolkan ol i stap birua birua na pait wantaim. Tupela lain wantaim i tok ol i bihainim Jisas, em i bin skulim lain bilong em long laikim tru narapela man. Tasol dispela pait bilong ol i mekim na olsem wanpela saveman i tok, “ol i kilim i dai planti planti manmeri nating bilong ples, na i no gat planti pasin nogut olsem i bin kamap bipo.” Long olgeta hap ol man i kirap nogut tru long 500,000 man, meri, pikinini ol i bin bagarap long dispela taim.
Long 1947, kantri India i gat olsem 400 milion manmeri—olsem 20 pesen bilong olgeta manmeri bilong graun—ol i bilong lotu Hindu, Muslim, na lotu Sik. Taim ol i brukim India, kantri Pakistan i kamap. Long dispela taim bikpela pait bilong lotu i kamap na ol i kilim i dai planti handet tausen refiuji bilong tupela kantri wantaim—kukim ol long paia, paitim ol nogut tru, givim pen nogut tru long ol, na sutim ol long gan.
Na i no dispela tasol. Kirap long yia 2000 ol lain teroris i wok strong long kamapim ol bikpela bagarap. Long nau ol teroris i mekim na olgeta kantri i was i stap, na planti lain teroris i tok ol i bilong wanpela lotu. Long nau ol man i no ting lotu i save mekim ol man i stap wanbel. Planti ol i ting lotu i kirapim ol pait na brukim ol man. Olsem na nius FOCUS bilong Jemani i tok, ol bikpela lotu olsem lotu Buda, ol lotu i gat nem Kristen, lotu Konfusas, Hindu, Islam, lotu Juda, na lotu Tao, ol i olsem katres bilong gan i redi long pairap.
Ol Kros Pait Insait Long Lotu
Sampela lotu i stap birua birua na pait wantaim, tasol sampela lotu i gat ol kros pait insait long lain bilong ol yet. Olsem: Long nau i gat planti tok pait i kamap insait long ol misin bilong Kristendom long ol bilip bilong ol, na dispela i brukim lain bilong ol. Ol pris na lain bilong ol tu i askim olsem: Pasin bilong pasim bel i orait long mekim? Olsem wanem long pasin bilong rausim bel? I stret long makim ol meri long kamap pris? Misin i mas ting olsem wanem long pasin sodom, olsem man i slip wantaim man? I stret wanpela lotu i orait long ol pait? Em nau, ol i no wanbel long ol dispela bilip, olsem na planti man i tingting: ‘Olsem wanem wanpela lotu inap mekim ol man i stap wanbel sapos em i no inap mekim lain bilong em yet i stap wanbel?’
I klia tru olsem ol lotu i no gat strong long mekim ol man i stap wanbel. Tasol yu ting olgeta lotu i gat dispela pasin bilong bruk bruk? I gat wanpela lotu i narapela kain—olsem em inap mekim ol lain manmeri i stap wanbel?
[Piksa long pes 3]
Sampela plisman i kisim bagarap long pait namel long ol lain bilong lotu long India long 1947
[Kredit Lain]
Photo by Keystone/Getty Images