Yu Ting Olgeta Lotu i Bringim Man Long Wanpela God Tasol?

“Mi gat ol bilip bilong mi yet, na mi no inap senisim. Lotu yu bihainim i no bikpela samting, long wanem, olgeta lotu i bringim yumi i go long wanpela God tasol.”

OLSEM WANEM? Yu harim pinis wanpela man i mekim kain tok olsem? Planti man i ting olsem olgeta lotu inap long helpim yumi long save long God na kliagut long as bilong i stap bilong yumi. Na tu, planti man i ting olsem olgeta lotu i gat ol gutpela samting na ol samting nogut bilong en, na i no gat wanpela lotu i ken tok olsem ol tasol i gat tok i tru o ol tasol i rot bilong i go long God.

Long nau planti man i orait long olgeta samting, na ol i ting olgeta kain bilip i gutpela. Sapos man i gat narapela tingting, orait ol i tok tingting bilong em i pas, na em i strong tumas long ting olsem tingting bilong em tasol i stret. Yu gat wanem tingting long dispela? Yu ting olsem olgeta lotu i bringim man long wanpela God tasol? Yu ting em i bikpela samting long man i insait long wanem lotu?

Ol Lotu i Narapela Narapela Kain?

Wanpela dikseneri i tok, long nau i gat 9,900 lotu long olgeta hap, na sampela bilong ol i stap long planti hap na i gat planti milion manmeri insait long en. Sampela i ting inap olsem 70 pesen bilong olgeta manmeri bilong graun i stap long 5-pela bikpela lain lotu​—lotu Budis, Hindu, Islam, Juda, na Kristen. Sapos olgeta lotu i bringim man long wanpela God tasol, ating dispela 5-pela lain lotu i mas i gat planti tok ol i skulim ol man long en i wankain, olsem tok bilong ol long God i wanem kain, na ol samting God i tingting pinis long mekim. Tasol ol samting i kamapim klia wanem samting?

Wanpela tisa bilong lotu Katolik, Hans Küng, i tok ol bikpela lain lotu i gat wankain tingting long wanem pasin ol man i mas mekim long ol narapela. Olsem: Klostu olgeta i tok no ken kilim man i dai, no ken giaman, no ken stil, tupela wanblut i no ken slip wantaim, na ol i skulim ol man long ol i mas rispek long papamama, na laikim tru ol pikinini. Tasol long sampela samting, na moa yet long tingting bilong ol long God i wanem kain, ol dispela bikpela lain lotu i gat narapela narapela tingting.

Olsem: Ol Hindu i save lotu long planti god, tasol ol Budis i gat tupela tingting long God i wanem kain tru. Lotu Islam i skulim ol man olsem i gat wanpela God i stap. Na ol lotu i tok ol i Kristen ol tu i ting olsem, tasol planti bilong ol i bilip olsem God em i wanpela God Triwan. Na insait long ol narapela narapela lotu i gat kain kain bilip. Ol Katolik i lotuim Maria, mama bilong Jisas, tasol ol Talatala, nogat. Ol Katolik i tambuim pasin bilong pasim bel, tasol planti lotu Talatala i no tambuim. Na ol Talatala i no wanbel namel long ol yet long pasin bilong tupela man o tupela meri i slip wantaim.

Ol lotu i gat kain kain bilip, olsem na yu ting i stret long yumi ting olsem olgeta i lotuim wanpela God tasol? Nogat, a? Dispela i paulim ol man na ol i no save long God em i husat na em i laik ol man i lotuim em i mas mekim wanem.

Ol i Save Helpim Ol Lain i Stap Wanbel o Brukim Ol Lain?

Sapos olgeta lotu i bringim man i go long wanpela God tasol, bai yumi lukim olgeta wan wan lotu i wok strong long helpim olgeta lain manmeri long i stap wanbel wantaim. Olsem wanem? Ol lotu i save mekim olsem? Ol samting i kamap i soim olsem ol lotu i no save helpim ol lain manmeri long i stap wanbel, nogat, ol i brukim ol lain na ol i pait. Orait nau yumi ken skelim sampela eksampel.

Kirap long yia 1000 i go inap long yia 1300 samting, ol lotu i tok ol i Kristen ol i pait long ol lain bilong lotu Islam long sampela Pait Holi Bilong Lotu. Bihain long yia 1600 samting long Yurop, ol Katolik na ol Talatala i insait long Pait Bilong 30 Yia. Long 1947, bihain stret long India i kisim independens long Inglan, ol Hindu na Muslim i pait wantaim. Long nau, ol Katolik na Talatala i pait inap planti yia pinis long Noten Aialan. Long Midel Is, ol Juda na ol Muslim i no stap bel isi wantaim. Na samting nogut moa i kamap long Wol Woa 2; olgeta 5-pela bikpela lain lotu i insait long dispela pait, na ol manmeri bilong wankain lotu i birua birua na narapela i pait long narapela.

Samting i kamap ples klia long dispela i olsem: Ol lotu bilong dispela graun i no bin kamapim bel isi na pasin wanbel, na ol i no bin bringim man long wanpela God tasol. Nogat tru. Ol i bin brukim ol lain man na paulim tingting bilong ol man long God em i husat na ol i mas lotuim em long wanem kain pasin. Olsem na olgeta husat i laik i kam long God tru, ol i mas skelim gut wanem rot ol i mas bihainim. Dispela i stret wantaim tok bilong Baibel, em olpela buk tru bilong lotu.

Makim Husat Yu Laik Lotuim

Baibel i kamapim klia olsem bilong painim rot i go long God tru, yumi mas tingting gut na makim stret. Josua, wanpela wokman bilong God Jehova, em i tok long lain Israel bilong bipo: “Yupela i tingting gut nau. Bai yupela i lotu long husat? Yupela bai i lotu long ol dispela giaman god bilong ol tumbuna bilong yupela long Mesopotemia? O long ol giaman god bilong ol Amor, nau yupela i sindaun long graun bilong ol? Tasol mi wantaim famili bilong mi, mipela bai i lotu long Bikpela tasol.” Sampela handet yia bihain, profet Elaija i kirapim ol manmeri long ol tu i mas makim husat ol i laik bihainim, em i tok: “Yupela manmeri bilong tupela tingting, wanem taim bai yupela i gat wanpela tingting tasol? Sapos Bikpela em i God tru, orait yupela i mas lotu long em wanpela tasol. Na sapos Bal i God tru, orait yupela i mas lotu long em wanpela tasol.”​—Josua 24:​15, 16; 1 King 18:21.

Ol dispela na sampela narapela skripsa long Baibel i kamapim ples klia olsem ol man i laik lotu long God tru, ol i mas skelim gut na makim stret. Na i wankain long nau. Sapos yumi laik lotu long God tru na mekim wok bilong em, yumi tu i mas makim stret. Tasol wanem samting inap helpim yumi long makim stret ol samting bilong lotu? Olsem wanem yumi ken save long husat i lotu tru long God?

Rot Bilong Luksave Long Ol Man i Lotu Tru Long God

Long ol man i lotu tru na ol man i no lotu tru long God, Jisas Krais i tok long ol disaipel bilong em olsem: “Olsem wanem? Ating ol man i save go long rop i gat nil bilong kisim ol pikinini bilong diwai wain, a? Na sapos ol man i laik kisim pikinini bilong diwai fik, ating ol i save go long gras nogut i gat mosong, a? Nogat tru. Olsem tasol olgeta gutpela diwai i save karim gutpela kaikai. Na diwai nogut i save karim kaikai nogut. Gutpela diwai em i no inap karim kaikai nogut. . . . Olsem na yupela i mas lukim pasin bilong ol yet na bai yupela i save long ol giaman profet.” Em nau, yumi inap luksave long ol man i lotu tru long God long ol pasin ol i kamapim. Ol i gat wanem ol pasin?​—Matyu 7:​16-20.

Namba wan, lotu i tru i save mekim ol man i stap wanbel. Jisas i tok long ol disaipel bilong em olsem: “Mi givim nupela lo long yupela olsem, yupela wan wan i mas laikim tru ol arapela. Mi bin laikim yupela tru, na olsem tasol yupela wan wan i mas laikim tru ol arapela. Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” Ol disaipel tru bilong Krais i mas kamapim olsem narapela i laikim tru narapela, na dispela pasin i mas strong tru bambai ol man i ken luksave olsem ol i lotu tru long God.​—Jon 13:​34, 35.

Long dispela as ol Kristen tru i no inap pait long woa. Olsem wanem? Ol lain bilong ol lotu i save bihainim dispela pasin? Long Wol Woa 2, i gat wanpela bikpela lotu tasol em long olgeta taim ol i bin sakim pasin bilong sapotim pait​—em ol Witnes Bilong Jehova. Saveman Hanns Lilje, bipo em bisop bilong lotu Talatala long Hannover, Jemani, em i tok long ol Witnes olsem: “I stret ol i tok olsem ol tasol i no bin insait long ol samting bilong sapotim Gavman Bilong Hitler.” Long dispela woa, ol Witnes long planti kantri i redi long karim hevi, long wanem, ol i no helpim o sapotim pait.

Jisas i tingim wanem ol narapela pasin i olsem mak bilong ol disaipel tru bilong em? Long wanpela beten planti man i save kolim Papa Bilong Mipela, Jisas i kirapim beten olsem: “Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” Namba wan samting Jisas i kolim em nem bilong God, em Jehova, i mas i stap holi. Em i tok long rot bilong Kingdom Bilong God, laik bilong Jehova i mas kamap long graun. Wanem lotu i save autim nem bilong Jehova na i autim tok olsem Kingdom Bilong God tasol inap long kamapim bel isi long graun? Ol Witnes Bilong Jehova i save autim tok bilong Kingdom long 236 kantri samting, na ol i tilim ol buk na nius long 470 tok ples.​—Matyu 6:​9, 10.

Na tu, ol Witnes Bilong Jehova i bihainim pasin bilong Jisas na ol i no insait long ol samting bilong politik na sindaun bilong ol man em ol i save tok pait long en. Jisas i tok long ol disaipel bilong em: “Ol manmeri bilong mi ol i no bilong dispela graun, olsem mi tu mi no bilong dispela graun.” Na tu, ol Witnes i save tingim Baibel olsem Tok Bilong God na ol i bilip tru olsem “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi na bilong skulim yumi long ol pasin i stret long ai bilong God. Olsem na dispela tok i mekim yumi ol manmeri bilong God i kisim tru olgeta gutpela pasin, na em i mekim yumi i redi long mekim olgeta kain gutpela wok.”​—Jon 17:​14, 17; 2 Timoti 3:​16, 17.

Lotu Tru i Narapela Kain

Ol pasin olsem laikim tru ol narapela na i no tingim ol yet, laik bilong mekim nem bilong Jehova i stap holi, autim tok bilong Kingdom Bilong God, no ken insait long pasin bilong dispela graun, na bilip long Baibel, ol dispela pasin i mak bilong ol man i lotu tru long God. Ol dispela pasin i mekim na ol man i lotu tru long God ol i stap narapela kain long ol narapela lotu. Wanpela meri, em i bin toktok sampela taim wantaim ol Witnes Bilong Jehova em i tok: “Mi save long planti lotu, na olgeta i wankain liklik. Yupela tasol i narapela kain olgeta long ol narapela lotu.”

Tru tumas, olgeta lotu i no bringim man long wanpela God tasol, nogat. Tasol i gat wanpela lain i narapela kain long ol narapela lotu​—em ol Witnes Bilong Jehova, nau ol i winim 7 milion long olgeta hap. Ol i autim na bihainim Tok Bilong God, em Baibel, na long dispela rot ol i mekim wanpela samting em ol narapela lain o oganaisesen i no inap mekim. Ol i mekim na ol manmeri bilong kain kain kantri, tok ples, na lain i wanbel long lotuim dispela wanpela God tru, Jehova. Ol bai amamas long helpim yu long kisim save long God tru, kisim save long God i laik yu mas mekim wanem, na kisim amamas na bel isi i kam long rot bilong lotuim God long pasin em i laikim. Em wanpela gutpela mak bilong winim, a?

[Piksa long pes 14]

Wanpela pris Otodoks i blesim ol nupela soldia long Yukren long 2004

[Kredit Lain]

GENIA SAVILOV/AFP/Getty Images

[Piksa long pes 15]

Ol Witnes Bilong Jehova i helpim ol man long olgeta hap long kisim save long God na Kingdom bilong em

[Ol Piksa Kredit Lain long pes 12]

Page 12: Buddhist woman: © Yan Liao/Alamy; Hindu holy man: © imagebroker/Alamy; page 13: Man reading Koran: Mohamed Amin/Camerapix; Jewish man: Todd Bolen/Bible Places.com