Ol Man i Askim
Yu Ting Ol Hevi Bilong Yu Em Strafe i Kam Long God?
Olsem wanem? Wanpela bikpela hevi i painim yu na dispela i kirapim yu long askim olsem em laik bilong God na yu karim dispela hevi? Wantu wanpela sik i kisim yu, o wanpela eksiden i bagarapim tru hap bodi bilong yu, o wanpela long famili i dai, ol dispela hevi inap mekim na yu pilim olsem God i givim strafe long yu wanpela tasol.
Tasol yu bai amamas long save olsem God i laik bai ol manmeri i stap amamas na i no gat hevi. Dispela samting i kamap ples klia taim God i wokim namba wan man na meri, em i putim ol long “gaden long Iden” em wanpela gutpela ples paradais we sindaun bilong ol bai i no gat wanpela hevi.—Stat 2:15.
Sori tru, long laik bilong ol yet, namba wan man na meri i sakim dispela gutpela samting na i bikhet long God. Dispela i kamapim bikpela hevi long ol yet na long olgeta tumbuna pikinini bilong ol, na long yumi tu. Bilong wanem? Yumi ken tok piksa long dispela olsem, taim papa bilong famili i no baim rent bilong haus, papa bilong haus bai rausim famili olgeta long haus na nau hevi i painim ol na ol i sot long ol samting. Na olsem tasol, kirap long taim namba wan man na meri i bikhet na i kam inap long nau, ol man i bin karim hevi. (Rom 5:12) Planti yia bihain long en, stretpela man Jop i tok sapos em i putim olgeta bel hevi na trabel bilong em “long wanpela skel,” orait hevi bilong ol dispela samting bai i “winim hevi bilong olgeta wesan long nambis.”—Jop 6:2, 3.
Narapela as na ol hevi i save painim yumi, em yumi no inap save tumas long ol samting bai kamap bihain. Olsem, tingim wanpela man bilong wokim na salim ol haus long wanpela ples we planti taim paia i save kamap long bus. Yu no save long dispela, na yu baim wanpela bilong ol dispela haus na sindaun long en. Yu ting bikpela hevi i no inap painim yu na famili bilong yu? Wanem wanem ol hevi i painim yu long dispela hap, yu no inap tok em strafe i kam long God, nogat. Baibel i tok stret olsem: “Ol man i gat liklik save tasol, ol i save bilipim olgeta kain tok. Tasol man i gat gutpela tingting, em i save was gut long ol pasin em i mekim.”—Sindaun 14:15.
Maski yumi olgeta i karim ol hevi, em i gutpela long save olsem klostu nau God i laik pinisim ol hevi bilong ol manmeri. Taim dispela samting i kamap, yu bai no inap karim hevi moa, lukim, o harim stori bilong ol hevi. Aiwara bilong sori, pen na indai, na krai sori bai “pinis olgeta.” (KTH 21:4) Na tu, narapela tok promis i mekim gut bel bilong yumi, em ol manmeri bai wokim ol haus na planim ol kaikai na bai i no gat woa o strongpela win na ren i bagarapim ol dispela samting. “Ol bai amamas” long ol samting ol yet i bin hatwok long kamapim.—Aisaia 65:21-25.
Taim yu wok long wetim God long pinisim tru olgeta hevi, yu ken mekim wanem na bai ol hevi i no ken daunim yu tumas? Namba wan bikpela samting, em “yu no ken ting save bilong yu yet inap helpim yu.” Baibel i tokim yumi long yumi “mas bilip strong long Bikpela.” (Sindaun 3:5) Yu mas lukluk long em bilong stiaim yu na mekim gut bel bilong yu. Yu mas bihainim savetingting bilong God i stap long Baibel. Dispela bai helpim yu long wokim ol gutpela disisen na banisim yu long ol kain hevi em yu inap abrusim.—Sindaun 22:3.