Baibel i Tok Wanem?

Ol Hevi i Painim Yu Em Strafe i Kam Long God?

“Mi pilim olsem God i panisim mi.” Wanpela meri i gat 55 krismas samting i mekim dispela tok taim em i painimaut olsem em i gat sik kensa. Em i tingim wanpela rong em i bin mekim planti yia bipo, na em i tok, “Ating God i laik tokim mi olsem mi bin wokim sin.”

TAIM hevi i kamap long ol, planti i pilim olsem God i panisim ol long wanpela rong ol i bin mekim bipo. Sapos wantu planti hevi i kamap long ol, ol i save singaut: “Wai na mi? Mi bin mekim wanem na dispela samting i painim mi?” Olsem wanem? I stret yumi ting ol hevi i makim olsem God i no orait long yumi? Yu ting ol hevi bilong yumi em strafe i kam long God?

Ol Gutpela Wokboi Bilong God i Bin Kisim Hevi

Tingim ol tok Baibel i mekim long wanpela man, nem bilong em Jop. Wantu tasol, olgeta mani kago bilong em i pinis. Bihain, wanpela bikpela win i kirap na kilim i dai olgeta 10-pela pikinini bilong em. Bihain moa, wanpela sik nogut tru i kisim em. (Jop 1:​13-19; 2:​7, 8) Ol dispela hevi i kirapim Jop long singaut olsem: “God i bin paitim mi long han bilong en na mi bagarap i stap.” (Jop 19:21) Wankain olsem planti man long nau, Jop i bin ting olsem God i panisim em.

Tasol Baibel i kamapim klia olsem paslain long ol hevi bilong Jop i kamap, God i bin stori long Jop olsem: “Em i gutpela man tru na i no gat asua long ai bilong mi. Em i save lotu na aninit long mi, na i save bihainim olgeta tok bilong mi. Em i no save mekim wanpela pasin nogut.” (Jop 1:⁠8) Dispela tok i kamapim klia olsem God i orait long Jop, olsem na yumi ken save olsem ol hevi i bin kamap long Jop i no olsem strafe i kam long God.

Baibel i stori long planti gutpela man em hevi i bin painim ol. Josep i gutpela wokboi bilong God, tasol em i stap tupela yia

samting long kalabus, maski em i no bin mekim rong. (Stat 39:​10-20; 40:15) Timoti em i gutpela Kristen, tasol planti taim em i save “sik.” (1 Timoti 5:23) Jisas Krais, em man i no bin mekim wanpela rong, em tu i bin kisim nogut long han bilong ol birua, na bihain em i kisim bikpela pen tru na em i dai. (1 Pita 2:​21-24) Olsem na taim hevi i painim yumi, yumi no ken ting dispela hevi i makim olsem God i no amamas long yumi, nogat. Tasol sapos God i no as bilong ol hevi, orait husat i as bilong en?

Sampela As Bilong Ol Hevi Bilong Yumi

Baibel i kamapim klia olsem Satan em i as bilong ol hevi i bin painim Jop. (Jop 1:​7-12; 2:​3-8) Na tu, Baibel i tok Satan i as bilong ol hevi bilong nau: “Yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.” (KTH 12:12) Satan i “hetman i save bosim dispela graun” na em i bin kirapim planti man long mekim kain kain pasin nogut na dispela i bin mekim nogut tru long ol narapela.​—⁠Jon 12:31; Song 37:​12, 14.a

Tasol yumi no ken kirap kwik na putim asua i go long Satan long olgeta hevi i painim yumi, nogat. Yumi bin kisim sin long Adam, olsem na sampela taim yumi save mekim ol disisen i no gutpela na dispela inap givim hevi long yumi. (Song 51:5; Rom 5:12) Olsem: Long tingting bilong yu, tingim wanpela man em long laik bilong em yet em i no kaikai gut o kisim gutpela malolo. Sapos bihain em i kisim bikpela sik, em i ken putim asua i go long Satan? Nogat, long wanem, longlong pasin bilong em yet i bin kamapim dispela hevi. (Galesia 6:⁠7) I olsem wanpela savetok bilong Baibel i kamapim: “Sampela manmeri i save mekim longlong pasin na bagarapim ol yet.”​—⁠Sindaun 19:⁠3.

Narapela as bilong planti hevi, em “taim nogut i save painim yumi olgeta.” (Saveman 9:11) Tingim man em wantu tasol bikpela ren i pundaun na wasim em. Hap we em i bin sanap long en taim ren i kam, inap makim olsem em bai wet liklik o wet nogut tru. Na olsem tasol, long dispela ‘taim bilong planti hevi nogut tru,’ kwiktaim ol liklik hevi inap kamap olsem bikpela hevi. (2 Timoti 3:​1-5) Hap yumi stap long en taim hevi i kamap, dispela inap makim olsem yumi bai kisim bikpela hevi o liklik hevi tasol. Orait, yu ting dispela i makim olsem oltaim bai yumi gat hevi?

Klostu Nau Olgeta Hevi Bai Pinis

Klostu nau, God Jehova bai mekim na olgeta hevi bai pinis olgeta. (Aisaia 25:8; KTH 1:3; 21:​3, 4) Tasol long nau yet, em i soim olsem em i save tingim tru yumi. Long rot bilong Baibel em i save “skulim” na “strongim bel” bilong yumi na bai yumi inap karim ol hevi i painim yumi long nau, taim yumi wet long dispela gutpela taim em klostu nau bai kamap. (Rom 15:4; 1 Pita 5:⁠7) Long dispela taim, ol man i bin stap stret long ai bilong God ol bai stap oltaim oltaim long dispela nupela taim we i no gat moa ol hevi.​—⁠Song 37:​29, 37.

[Futnot]

YU LAIK SAVE?

◼ Ol man i mekim rong, ol tasol i save kisim hevi?​—⁠Jop 1:⁠8.

◼ Satan i as bilong olgeta hevi i painim yumi?​—⁠Galesia 6:⁠7.

◼ Ol hevi bai pinis?​—⁠KTH 21:​3, 4.

[Rait long pes 29]

“Taim nogut i save painim yumi olgeta.”​—⁠Saveman 9:⁠11