Laikim Tru Haus Bilong Jehova!

“Mi laikim tru haus bilong yu, olsem na mi wok strong long mekim dispela haus i stap gut.”​​—JO. 2:​17.

1, 2. Long tempel long yia 30 C.E., Jisas i mekim wanem? Bilong wanem em i mekim olsem?

PIKSAIM dispela samting long tingting. Em taim bilong Pasova long yia 30 C.E. Sikspela mun paslain, Jisas i bin kirap mekim wok bilong em hia long graun. Orait nau em i go long Jerusalem. Long tempel, insait long Banis Bilong Ol Man Bilong Ol Arapela Lain, Jisas i lukim “ol man i wok bisnis long salim ol bulmakau na sipsip na pisin. Na em i lukim ol man bilong senisim mani ol i sindaun i stap.” Em i wokim wanpela wip long baklain na rausim olgeta animal i go ausait long tempel, na ol bisnisman i bihainim ol i go. Na tu, Jisas i kapsaitim mani bilong ol man i senisim mani na ol tebol bilong ol. Em i tokim ol man i salim ol pisin long kisim ol samting bilong ol i go.​​—Jo. 2:​13-​16.

² Samting Jisas i mekim i soim klia olsem em i tingim tru tempel. Em i tok: “Yupela i no ken mekim haus bilong Papa bilong mi i kamap olsem haus bilong maket”! Taim ol disaipel bilong Jisas i lukim ol dispela samting, ol i tingim tok em Devit, man bilong raitim song, i bin raitim planti handet yia bipo: “Mi laikim tru haus bilong yu, olsem na mi wok strong long mekim dispela haus i stap gut.”​​—Jo. 2:​16, 17; Sng. 69:9.

3. (a) Wanem narapela tok i wankain liklik long dispela tok laikim tru wanpela samting? (b) Yumi ken givim wanem askim long yumi yet?

³ Pasin bilong Jisas long tingim na laikim tru haus bilong God i bin kirapim em long mekim dispela haus i stap gut. Narapela tok i wankain liklik long pasin bilong laikim tru wanpela samting, em pasin bilong givim bel tru long wanpela samting. Nau long taim bilong yumi, winim 7 milion Kristen i soim olsem ol i tingim tru haus bilong God. Yumi wan wan i ken askim olsem, ‘Olsem wanem mi yet i ken laikim moa yet haus bilong Jehova?’ Bilong helpim yumi long bekim dispela askim, pastaim bai yumi skelim haus bilong God i makim wanem samting long nau. Bihain bai yumi stori long sampela gutpela man long Baibel em ol i bin laikim tru haus bilong God. Stori bilong ol long Baibel i bilong “skulim yumi” na inap kirapim yumi long laikim moa yet haus bilong God.​​—Ro. 15:4.

Haus Bilong God​​—Long Bipo na Long Nau

4. Tempel em Solomon i bin wokim i bilong mekim wanem wok?

⁴ Long Israel bilong bipo, haus bilong God em tempel long Jerusalem. Tasol Jehova yet i no sindaun long dispela hap. Em i tok: “Heven em i sia king bilong mi na graun em i ples mi putim lek bilong mi antap long en. Olsem na bai yupela i wokim haus bilong mi long wanem hap? Na wanem hap bai i stap ples malolo bilong mi?” (Ais. 66:1) Tasol maski i olsem, tempel ol i wokim long taim bilong King Solomon i stap olsem nambawan ples bilong lotu long Jehova na ples we ol man i beten long Em.​​—1 Kin. 8:​27-​30.

5. Tempel bilong Solomon i makim wanem samting long nau?

⁵ Long nau, haus bilong Jehova i no wanpela haus long Jerusalem o long narapela hap, nogat. Em i makim rot God i putim bambai yumi ken lotu long em long rot bilong ofa bilong Krais bilong baim bek ol man. Olgeta wokboi bilong God long graun ol i save lotu long Jehova long dispela tempel spirit.​​—Ais. 60:​4, 8, 13; Ap. 17:24; Hi. 8:5; 9:​24.

6. Wanem ol king bilong Juda i kamapim olsem ol i laikim tumas lotu i tru?

⁶ Bihain long Israel i bruk long tupela lain long 997 B.C.E., 4-pela bilong ol 19 king i bosim Juda long hap saut, ol i mekim wok i soim klia olsem ol i laikim tumas lotu i tru. Ol dispela king em Asa, Jehosafat, Hesekia, na Josaia. Yumi inap kisim wanem skul long ol?

Givim Bel Olgeta Long Wok Dispela i Save Kamapim Blesing

7, 8. (a) Bilong Jehova i ken blesim wok bilong yumi, yumi mas mekim long wanem kain pasin? (b) Yumi kisim wanem skul long pasin bilong King Asa?

⁷ Taim Asa i stap king, Jehova i salim ol profet bilong stiaim lain bilong Em long bihainim stretpela rot. Asa i harim tok bilong profet Asaria, pikinini man bilong Odet. (Ritim 2 Stori 15:​1-8.) Wok bilong Asa bilong stretim bek lotu i tru, dispela i mekim na ol Juda, na planti manmeri bilong kantri Israel em ol i kam bung long Jerusalem, ol i wanbel long lotu. Olgeta wantaim i tokaut olsem ol bai wok strong long lotuim Jehova wanpela tasol. Baibel i tok: “Ol i mekim dispela strongpela promis long nem bilong Bikpela. Na ol i singaut strong na winim ol biugel bilong ol. Na olgeta manmeri bilong kantri Juda i amamas long dispela promis ol i bin mekim, long wanem, tingting bilong ol i strong tru long bihainim Bikpela. Ol i gat strongpela laik tru bilong painim Bikpela, na Bikpela i larim ol i kam klostu long em. Na em i lukautim gut kantri bilong ol na i no gat wanpela hevi i kamap long ol.” (2 Sto. 15:​9-15) Na olsem tasol, Jehova bai blesim yumi tu taim yumi mekim wok bilong em long bel olgeta.​​—Mk. 12:30.

⁸ Sori tru, bihain Asa i bel hevi taim profet Hanani i stretim em. (2 Sto. 16:​7-​10) Taim Jehova i givim ol gutpela tok long yumi long rot bilong ol elda Kristen, yumi mekim wanem? Kwiktaim yumi kisim na bihainim ol tok bilong ol em Baibel i as bilong en o yumi bel hevi?

9. Husat i kam pait long Jehosafat na ol Juda? Jehosafat na ol Juda i mekim wanem?

⁹ Jehosafat i kirap mekim wok king long Juda long 936 B.C.E. Ol Moap na Amon na Idom i kam pait long em na long olgeta Juda. Maski king i pret, em i mekim wanem? Em wantaim ol man, na ol meri pikinini, ol i bung long haus bilong Jehova bilong beten long Em. (Ritim 2 Stori 20:​3-6.) Olsem ol tok Solomon i bin mekim sampela yia paslain, taim ol i dediketim tempel, Jehosafat i beten long Jehova olsem: “O God bilong mipela, dispela bikpela lain ami i laik pait long mipela. Tasol yu mas mekim save long ol, long wanem, mipela i no gat strong bilong pait long ol. Na mipela i no save bai mipela i mekim wanem, olsem na mipela i lukluk long yu tasol long helpim mipela.” (2 Sto. 20:​12, 13) Taim Jehosafat i beten pinis, spirit bilong Jehova i kirapim Jahasiel, wanpela Livai i “stap namel long ol dispela lain manmeri,” long kamapim sampela gutpela tok bilong strongim bel bilong ol.​​—Ritim 2 Stori 20:​14-​17.

10. (a) Jehosafat na ol Juda i bin kisim tok bilong stiaim ol long rot bilong husat? (b) Yumi ken mekim wanem bilong soim olsem yumi pilim tru ol tok yumi kisim long Jehova long nau?

¹⁰ Long dispela taim bipo, Jehosafat na ol Juda i kisim tok long Jehova long maus bilong Jahasiel. Long nau, yumi save kisim ol tok bilong mekim gut bel bilong yumi na stiaim yumi, long rot bilong lain wokboi i gat gutpela tingting. Olsem na i stret yumi soim rispek na wok gut wantaim ol elda, em ol i wok strong long was long yumi na helpim yumi long bihainim ol tok i kam long “wokboi i gat gutpela tingting.”​​—Mt. 24:45; 1 Te. 5:​12, 13.

11, 12. Yumi kisim wanem skul long samting i bin painim Jehosafat na ol Juda?

¹¹ Olsem Jehosafat na ol Juda i bin bung wantaim bilong askim Jehova long stiaim ol, yumi no ken lusim pasin bilong bung oltaim long ol miting bilong kongrigesen wantaim ol bratasista bilong yumi. Sapos bikpela hevi i painim yumi na yumi no save wanem samting yumi mas mekim, orait yumi mas bihainim gutpela pasin bilong Jehosafat na ol Juda na beten long Jehova na bilip strong long Em. (Snd. 3:​5, 6; Fl. 4:​6, 7) Maski yumi stap longwe long kongrigesen, taim yumi beten long Jehova, dispela bai helpim yumi long pilim olsem yumi no stap wanpis, yumi insait long bikpela lain “manmeri bilong God, ol i stap long olgeta hap bilong graun.”​—1 Pi. 5:9.

¹² Jehosafat na ol Juda ol i bihainim ol tok em Jahasiel i bin kisim long God bilong stiaim ol. Wanem samting i kamap long dispela? Ol i winim pait na ol i go bek long Jerusalem, “wantaim bikpela amamas.” Ol i “paitim ol gita samting na winim ol biugel na . . . ol i go stret long haus bilong Bikpela.” (2 Sto. 20:​27, 28) Yumi tu i mas rispek long ol tok Jehova i givim yumi long rot bilong lain gutpela wokboi na bung wantaim ol manmeri bilong Em na givim biknem long Em.

Lukautim Gut Ol Ples Bilong Miting

13. Taim Hesekia i kirap mekim wok king, em i mekim wanem wok?

¹³ Long namba wan mun bilong Hesekia i mekim wok king, em i kamapim pasin bilong em long laikim tru lotu bilong Jehova na em i opim gen tempel na i wok long stretim. Em i givim wok long ol pris na ol Livai long mekim haus bilong God i kamap klin. Ol i mekim insait long 16 de. (Ritim 2 Stori 29:​16-​18.) Dispela i kirapim yumi long tingim wok bilong stretim ol ples bilong miting bilong yumi, em kain wok olsem i kamapim klia yumi laikim tru lotu bilong Jehova. Ating yu bin harim planti ekspiriens i stori long ol manmeri i kirap nogut long lukim ol bratasista i givim bel long mekim kain wok olsem. Tru tumas, hatwok bilong ol i givim biknem tru long Jehova.

14, 15. Wanem wok long nau i bin givim biknem tru long Jehova? Kamapim sampela stori.

¹⁴ Long wanpela biktaun long hap not bilong Inglan, wanpela man i no amamas long bikpela wok ol brata i laik mekim bilong stretim Haus Kingdom i stap hapsait long banis bilong em. Ol brata i mekim gutpela pasin long em. Ol i lukim olsem banis i stap namel long Haus Kingdom na hap graun bilong dispela man, dispela banis i bruk, na ol i tok ol bai amamas long stretim na em i no ken baim. Ol i no stretim tasol, nogat, i gat planti hap bilong banis we ol i wokim nupela gen. Pasin bilong ol i kirapim dispela neiba long senisim tingting bilong em. Nau em i save was long Haus Kingdom.

¹⁵ Ol manmeri bilong Jehova ol i insait long wanpela wok i kamap long olgeta hap bilong graun. Ol bratasista i amamas long wok wantaim ol fultaim intenesenel sevan long sanapim ol Haus Kingdom, na ol Haus Kibung na Haus Betel tu. Sam wantaim meri bilong em, Ruth, ol i bin go long planti kantri long Yurop na Afrika bilong mekim wok konstraksen. Long olgeta hap ol i go long en, ol i amamas tu long autim tok wantaim ol kongrigesen. Sam i stori long samting i bin kirapim em long insait long ol intenesenel projek: “Em pasin bilong ol bratasista i bin wok long Betel long hia na long ol narapela kantri. Taim mi lukim pasin bilong ol long amamas na givim bel tru long mekim wok, dispela i bin kirapim mi na mi gat laik long mekim kain wok olsem.”

Bihainim Ol Tok Bilong God

16, 17. Ol manmeri bilong God i bin givim bel long mekim wanem spesel wok? Wanem samting i bin kamap long dispela?

¹⁶ Hesekia i stretim tempel, na tu, em i kamapim gen bung bilong mekim Pasova em Jehova i bin tok long mekim long olgeta yia. (Ritim 2 Stori 30:​1, 4, 5.) Hesekia na ol manmeri long Jerusalem ol i singautim olgeta Juda​​—ol Israel long hap not tu​​—long kam bung. King i givim ol pas long ol man na tokim ol long bringim i go long olgeta hap bilong Israel na Juda, bilong singautim ol man long kam bung.​​—2 Sto. 30:​6-9.

¹⁷ Inap sampela yia pinis, yumi tu i bin insait long wanpela wok i wankain liklik. Yumi bin yusim ol naispela invatesen pepa bilong singautim ol man long teritori bilong yumi long kam bung long Kaikai Bilong Bikpela, olsem Jisas i bin tok. (Lu. 22:​19, 20) Long ol Miting Bilong Wok, yumi bin harim ol tok i stori long rot bilong mekim dispela wok, na yumi bin givim bel tru long mekim. Jehova i bin blesim tru dispela wok! Long yia i go pinis, 7 milion bilong yumi i bin tilim ol invatesen, na 17,790,631 i bin kam long Memorial!

18. Bilong wanem pasin bilong laikim tumas lotu i tru i bikpela samting long yu?

¹⁸ Baibel i tok: “Hesekia i bilip strong long God, Bikpela bilong ol Israel. I no gat wanpela king bilong Juda i bin bilip strong long God olsem Hesekia. Bilip bilong en i winim bilip bilong ol king i stap paslain long em na bilong ol king i kamap bihain long em. Em i pas tru long Bikpela na oltaim em i no lusim Bikpela. Nogat. Em i bihainim gut olgeta lo Bikpela i bin givim long Moses.” (2 Kin. 18:​5, 6) Olsem Hesekia, yumi tu i mas mekim olsem. Pasin bilong laikim tru haus bilong God bai helpim yumi long “pas tru” long Jehova na wet long kisim laip i stap gut oltaim oltaim.​​—Lo 30:16.

Bihainim Kwik Ol Tok

19. Long taim bilong Memorial, yumi save givim bel long mekim wanem?

¹⁹ Taim Josaia i stap king, em tu i stretim rot na mekim bikpela wok bilong mekim Pasova. (2 Kin. 23:​21-​23; 2 Sto. 35:​1-​19) Yumi tu i mas stretim ol samting bai yumi inap go long ol kibung distrik, ol kibung sekit, ol spesel de kibung, na Memorial tu. Long sampela kantri, ol brata i redi long lusim laip bilong ol bambai ol inap bung wantaim bilong tingim dai bilong Krais. Ol elda i save givim bel long mekim wok, ol i save stretim rot na bai olgeta long kongrigesen i ken kam bung. Ol lapun na ol sikman ol tu i kisim helpim long kam bung.

20. (a) Wanem samting i bin kamap long taim Josaia i stap king? Em i mekim wanem? (b) Yumi kisim wanem skul long dispela?

²⁰ Taim King Josaia i wok long stretim haus bilong Jehova, Hetpris Hilkia “i lukim buk i gat tok bilong lo bipo Bikpela i bin givim long ol Israel long han bilong Moses.” Hilkia i givim long Safan, em kuskus bilong king, na Safan i ritim long Josaia. (Ritim 2 Stori 34:​14-​18.) Wanem samting i kamap? Wantu king i bel hevi tru na i brukim klos bilong em na i tokim sampela man long go askim Jehova long samting buk i toktok long en. Long rot bilong profet meri Hulda, God i givim tok i makim olsem em i no laik tru long sampela pasin bilong lotu ol manmeri long Juda i mekim. Tasol em i tingim gutpela wok Josaia i bin mekim long rausim ol pasin bilong lotuim ol imis, na Jehova i orait long em maski Em i tok bagarap bai painim lain bilong Em. (2 Sto. 34:​19-​28) Yumi kisim wanem skul long dispela? Yumi mas i gat wankain laik olsem Josaia, a? Yumi mas bihainim kwik ol tok bilong Jehova, na tingim ol samting em inap kamap sapos yumi harim tok bilong ol apostet na yumi no stap gut long em. Na yumi ken bilip strong olsem Jehova bai lukim na amamas long pasin bilong yumi long laikim tumas lotu i tru, olsem em i bin mekim long Josaia.

21, 22. (a) Bilong wanem yumi mas laikim tru haus bilong Jehova? (b) Yumi bai stori long wanem samting long stadi i kamap bihain long dispela?

²¹ Ol dispela 4-pela king bilong Juda​​—Asa, Jehosafat, Hesekia, na Josaia​​—ol i stap gutpela piksa long pasin bilong laikim tru haus bilong God na lotu bilong em. Pasin bilong laikim tumas lotu i tru i mas kirapim yumi tu long bilip strong long Jehova na givim bel long sapotim lotu bilong em. Tru tumas, em i savepasin na rot bilong kisim amamas long bihainim ol tok bilong God na ol tok bilong stretim yumi em yumi kisim long rot bilong kongrigesen na ol elda.

²² Stadi i kamap bihain long dispela bai stori long pasin bilong givim bel tru long wok autim tok na em bai strongim ol yangpela long givim bel tru long mekim wok bilong gutpela Papa bilong yumi. Na yumi bai stori tu long olsem wanem yumi inap sakim wanpela rot nogut em Satan i mekim wok long en. Taim yumi givim bel long bihainim olgeta tok i kam long Jehova, yumi save bihainim pasin bilong Pikinini bilong Jehova, Jisas, em Baibel i stori long em olsem: “Mi laikim tru haus bilong yu, olsem na mi wok strong long mekim dispela haus i stap gut.”​​—Sng. 69:9; 119:​111, 129; 1 Pi. 2:21.

Yu Inap Tingim?

• Bilong Jehova i ken blesim wok bilong yumi, yumi mas mekim long wanem kain pasin, na bilong wanem?

• Yumi ken mekim wanem bilong kamapim olsem yumi bilip strong long Jehova?

• Olsem wanem pasin bilong laikim tumas lotu i tru inap kirapim yumi long bihainim ol tok bilong God?

[Ol Piksa long pes 9]

Asa, Jehosafat, Hesekia, na Josaia ol i mekim wanem bilong soim olsem ol i laikim tru haus bilong Jehova?