Bai Yu Pilim Tru Ol Skul i Stap Long Baibel?

1, 2. Bilong wanem yumi bai skelim stori bilong 4-pela king bilong Juda?

SAPOS yu lukim wanpela man i wokabaut long rot na em i pundaun, ating yu bai was gut taim yu wokabaut long wankain rot, a? Taim yumi skelim ol popaia bilong ol narapela, dispela bai kirapim yumi long abrusim ol wankain popaia. Dispela i stret tu long sait bilong bilip. Yumi inap kisim planti gutpela skul taim yumi skelim popaia bilong ol narapela, na dispela i makim tu ol lain em Baibel i stori long ol.

² Fopela king bilong Juda em yumi stori long ol long stadi i go pinis, ol i givim bel olgeta long mekim wok bilong Jehova. Tasol ol i bin mekim sampela bikpela popaia. Yumi inap kisim wanem skul long ekspiriens bilong ol? Olsem wanem yumi inap abrusim ol popaia ol i bin mekim? Taim yumi tingim tingim stori bilong ol long Baibel, yumi bai kisim helpim long ol dispela stori.—Ritim Rom 15:4.

SAVETINGTING BILONG MAN I SAVE KAMAPIM HEVI

3-5. (a) Asa i givim bel olgeta long mekim wok bilong Jehova, tasol wanem hevi i bungim em? (b) Bilong wanem Asa i bilip long strong bilong ol man taim Basa i kam bilong pait long Juda?

³ Yumi ken skelim stori bilong Asa na skelim olsem wanem Tok Bilong God inap stiaim wokabaut bilong yumi. Asa i askim Jehova long helpim lain bilong em taim 1 milion soldia bilong Sudan i kam bilong pait long Juda. Tasol em i no askim God long helpim ol taim King Basa bilong Israel i strongim banis bilong taun Rama long boda bilong Juda na Israel. (2 Sto. 16:1-3) Asa i bihainim tingting bilong em yet na em i givim gol na silva bilong grisim King Benhadat bilong Siria long i go pait long Basa. Yu ting aidia bilong Asa i kamapim gutpela samting? Baibel i tok: “Taim King Basa i harim tok olsem ol Siria i kam pait long ol taun bilong Israel, orait em i lusim wok em i mekim long taun Rama na i no pinisim banis.” (2 Sto. 16:5) Olsem na i luk olsem aidia bilong Asa i kamapim gutpela samting!

⁴ Jehova i pilim olsem wanem long pasin Asa i mekim? God i salim Hanani long givim strongpela tok long Asa bikos em i no askim Jehova long helpim em. (Ritim 2 Stori 16:7-9.) Hanani i tokim Asa: “Oltaim bai ol birua i kam pait long yupela.” Basa i lusim wok em i mekim; tasol ol birua i wok yet long pait long Asa na ol manmeri bilong Juda long taim Asa i stap king.

⁵ Long stadi bilong las wik, yumi kisim save olsem God i bin skelim Asa na lukim olsem Asa i givim bel olgeta long mekim wok bilong Em. (1 Kin. 15:14) God i lukim olsem Asa i givim bel tru long lotuim em, na em i mekim ol samting God i laik bai em i mas mekim. Tasol em i karim hevi bilong popaia em i mekim. Taim Basa i birua long Asa, wanem samting i kirapim Asa long bilip long strong bilong Benhadat na em yet, na em i no bilip long strong bilong Jehova? Ating em i ting olsem wok politik na strongpela lain ami bai helpim em. O, ating tok kaunsel bilong Hanani i kirapim em long kisim kain tingting olsem.

6. Yumi kisim wanem skul long popaia bilong Asa?

⁶ Stori bilong Asa inap kirapim yumi long skelim gut ol samting yumi laik mekim. Taim yumi bungim ol hevi we i luk olsem i winim strong bilong yumi, nogut yumi lusim tingting long askim Jehova long helpim yumi. Yumi save mekim wanem taim yumi karim ol liklik hevi i save painim yumi long olgeta wan wan de? Yumi save bihainim tingting bilong ol man na yusim save bilong yumi yet long stretim ol dispela hevi? O, yumi save skelim na bihainim ol stiatok bilong Baibel, na soim olsem yumi bihainim wei bilong Jehova long stretim ol hevi? Ating famili i birua long yu taim yu go long miting o kibung. Yu ken askim Jehova long stiaim yu na helpim yu long luksave long stretpela rot bilong stretim hevi. Olsem wanem sapos bos i pinisim yu long wok na yu hatwok long painim narapela wok? Taim yu toktok wantaim man husat inap kamap bos bilong yu long ples wok, bai yu toksave long em olsem oltaim yu bai go long ol miting i kamap namel long wik? Maski wanem kain hevi i painim yumi, i gutpela yumi bihainim tok bilong man i raitim song, em i tok: “Yu mas putim laip bilong yu long han bilong Bikpela. Bilip strong long em, na em bai i helpim yu.”—Sng. 37:5.

OL POROMAN NOGUT INAP MEKIM WANEM LONG YU?

7, 8. (a) Jehosafat i mekim wanem ol popaia? (b) Wanem ol hevi i painim em? (Lukim piksa long kirap bilong stadi.)

⁷ Olsem wanem long Jehosafat, em pikinini man bilong Asa? Em i gat planti gutpela pasin. Jehosafat i askim God long helpim em, olsem na em i bihainim stretpela pasin. Tasol sampela taim em i mekim ol disisen i no stret. Kain olsem, em i stretim tok long pikinini man bilong em bai maritim pikinini meri bilong King Ahap bilong hap not. Jehosafat i sakim tok lukaut bilong profet Mikaia na em i go wantaim Ahap long pait long lain Siria. Taim ol i stap long ples pait, klostu tru Jehosafat i lusim laip bilong em. Em i go bek long Jerusalem. (2 Sto. 18:1-32) Profet Jehu i bungim em na askim em: “Yu ting i gutpela pasin long helpim ol man nogut na poroman wantaim ol man i no laikim Bikpela, a?”—Ritim 2 Stori 19:1-3.

⁸ Olsem wanem? Jehosafat i kisim skul long hevi i painim em? Em i laik tru long amamasim God, tasol i luk olsem em i no kisim skul long hevi i laik painim em taim em i bung wantaim Ahap na taim Jehu i givim tok lukaut long em. Jehosafat i poroman gen wantaim narapela man husat i birua long God. Em i poromanim King Ahasia, em pikinini man bilong Ahap. Jehosafat na Ahasia i bung wantaim long wokim ol sip, na bihain ol dispela sip i bagarap na ol i no inapim wok bilong ol.—2 Sto. 20:35-37.

9. Wanem samting inap kamap sapos yumi bung wantaim ol poroman nogut?

⁹ Taim yumi ritim ol stori bilong Jehosafat, dispela i mas kirapim yumi long skelim laip bilong yumi yet. Em tru olsem Jehosafat em gutpela king. Em i bihainim stretpela pasin na “bihainim tru laik bilong Bikpela long tingting bilong em olgeta.” (2 Sto. 22:9) Maski i olsem, em i karim ol hevi i kamap long pasin bilong em long poromanim ol man nogut. Tingim dispela savetok: “Sapos man i wokabaut wantaim man i gat gutpela tingting, orait em tu bai i kisim gutpela tingting. Tasol sapos man i poroman wantaim ol man i no gat gutpela tingting, orait trabel bai i painim em.” (Snd. 13:20) Ating yumi laik helpim ol nupela man long kam insait long tok i tru. Jehosafat i bung nating wantaim Ahap, olsem na klostu em i lusim laip bilong em. Olsem tasol, hevi inap painim yumi sapos yumi bung nating wantaim ol man i no lotuim Jehova.

10. (a) Stori bilong Jehosafat i givim wanem skul long yumi long sait bilong marit? (b) Yumi mas tingim wanem samting taim yumi bungim ol hevi long sait bilong ol poroman nogut?

¹⁰ Yumi inap kisim wanem skul long stori bilong Jehosafat? Ating wanpela Kristen inap laikim wanpela man o meri husat i no stap long tok i tru. Em i pilim olsem em i no inap painim gutpela poroman marit namel long lain i lotuim Jehova. O, ol wanblut husat i no lotuim Jehova inap putim presa long Kristen long marit hariap paslain long em i kamap lapun. Na tu, sampela Kristen inap holim wankain tingting olsem wanpela sista husat i tok: “Em nomol long yumi laik bai narapela i laikim yumi na poromanim yumi.” Kristen i mas mekim wanem? Sapos Kristen i tingim tingim samting i kamap long Jehosafat, dispela inap helpim em. Em bai askim God long stiaim em. (2 Sto. 18:4-6) Tasol wanem samting i kamap taim Jehosafat i poroman wantaim Ahap, em man i no laikim Jehova? Hevi i no inap painim Jehosafat sapos em i tingim olsem oltaim Jehova i redi long helpim ol man i givim bel olgeta long mekim wok bilong em. Long nau tu, God “i save was gut long ol manmeri i save aninit long em wanpela tasol, maski ol i stap long wanem hap bilong graun” na em i redi long “helpim ol na strongim ol.” (2 Sto. 16:9) Em i kliagut long ol hevi i painim yumi na em i laikim yumi. Olsem wanem? Yu bilip tru olsem God bai opim rot long ol narapela inap laikim yu na stap gutpela pren bilong yu? Yu ken bilip tru olsem God bai mekim olsem!

NO KEN KISIM PASIN ANTAP

11, 12. (a) Olsem wanem Hesekia i kamapim tingting tru i stap long bel bilong em? (b) Bilong wanem God i no kamapim belhat bilong em long Hesekia?

¹¹ Stori bilong Hesekia i soim olsem yumi mas was gut long tingting i stap long bel bilong yumi. Wanpela taim, God i kamapim klia tingting i stap long bel bilong Hesekia. (Ritim 2 Stori 32:31.) Taim Hesekia i kisim bikpela sik, God i kamapim wanpela sain bilong soim olsem Hesekia bai kamap orait gen—wanpela sedo i surik i go bek. Ol ofisa bilong Babilon i salim ol man i go bilong painimaut long dispela sain. (2 Kin. 20:8-13; 2 Sto. 32:24) “Taim God i lusim Hesekia,” Hesekia i kamapim tingting tru bilong em na em i kisim lain Babilon i go na soim ol long “ol bakstua bilong en na em i soim olgeta mani na ol arapela samting bilong en.” Hesekia i kamapim klia olgeta samting i stap long “tingting bilong em.”

¹² Baibel i no stori long wanem samting i kirapim Hesekia long kisim pasin antap. Ating em i hambak long em i daunim ol Asiria, o ating em i hambak long God i wokim mirakel na oraitim em. Em i gat “planti mani” na em “i kamap strongpela king moa na em i gat biknem,” olsem na ating em i hambak long ol dispela samting. Sori tru olsem Hesekia “i no tingting long dispela gutpela samting Bikpela i bin mekim bilong helpim em”! Em tru olsem Hesekia i askim God long tingim stretpela pasin em i bin mekim taim em i givim bel olgeta long lotuim God, tasol inap sotpela haptaim Hesekia i mekim pasin i no stret long ai bilong Jehova. Tasol bihain, Hesekia ‘i daunim em yet,’ olsem na God i no kamapim belhat bilong em long Hesekia na ol manmeri bilong em.—2 Sto. 32:25-27; Sng. 138:6.

13, 14. (a) Wanem taim Jehova inap ‘lusim yumi, long wanem, em i laik traim yumi’ na painimaut tingting tru i stap long bel bilong yumi? (b) Yumi ken mekim wanem taim ol manmeri i tok amamas long wok yumi mekim?

¹³ Taim yumi ritim na tingim tingim stori bilong Hesekia, hau bai dispela inap helpim yumi? Tingim, pasin antap bilong Hesekia i kamap ples klia bihain tasol long Jehova i daunim Senakerip na oraitim sik nogut bilong Hesekia. Sapos yumi mekim wanpela gutpela wok, ating dispela inap makim olsem Jehova i ‘lusim yumi, long wanem, em i laik traim yumi’ na painimaut tingting tru i stap long bel bilong yumi. Kain olsem, ating wanpela brata i wok hat long redim wanpela tok na givim long ai bilong planti manmeri. Planti manmeri i givim biknem long em long tok em i mekim. Dispela brata bai pilim olsem wanem?

¹⁴ Taim ol narapela i givim biknem long yumi, yumi ken mekim wankain tok olsem Jisas i bin mekim, em i tok: “Taim yupela i mekim pinis ol wok bilong yupela, yupela i mas tok, ‘Mipela ol wokboi nating. Wok mipela i bin mekim, em wok bilong mipela na i stret mipela i mekim.’” (Luk 17:10) Yumi inap kisim skul long stori bilong Hesekia. Em i kisim pasin antap na “em i no tingting long dispela gutpela samting Bikpela i bin mekim bilong helpim em.” Taim yumi tingim tingim ol samting God i mekim bilong helpim yumi, dispela bai kirapim yumi long abrusim pasin em Jehova i heitim. Yumi ken stori long ol gutpela samting Jehova i mekim bilong helpim yumi. Em i givim ol tok i stap long Baibel na holi spirit long sambai long ol manmeri bilong em.

TINGTING GUT TAIM YU MEKIM DISISEN

15, 16. Bilong wanem God i no lukautim Josaia na laip bilong em i lus?

¹⁵ Yumi inap kisim wanem tok lukaut long stori bilong King Josaia? Tingim wanem samting i stiaim em long i go pait na dai i painim em. (Ritim 2 Stori 35:20-22.) Josaia “i go bilong pait” long King Neko bilong Isip, maski dispela king i tokim Josaia olsem em i no gat kros long em. Baibel i tok God i givim tok long Josaia “long maus bilong King Neko.” Orait bilong wanem Josaia i go long pait? Baibel i no stori long dispela samting.

¹⁶ Hau bai Josaia i save olsem Jehova i yusim Neko long givim tok long em? Josaia inap askim profet Jeremaia. (2 Sto. 35:23, 25) Tasol Baibel i no stori long dispela samting. Neko i laik go long Karkemis long “pait long ol birua bilong [em],” na em i no tingting long pait long Jerusalem. Na tu, Neko i no tok bilas long nem bilong Jehova na lain bilong Em. Olsem na Josaia i no bihainim stretpela tingting taim em i laik pait long Neko. Yumi inap kisim wanem skul long dispela stori? Taim hevi i painim yumi, yumi mas mekim ol samting i stret wantaim laik bilong Jehova.

17. Taim hevi i painim yumi, hau bai yumi no ken mekim wankain popaia olsem Josaia i bin mekim?

¹⁷ Taim hevi i kamap, yumi mas skelim gut na bihainim ol stiatok bilong Baibel we inap helpim yumi long stretim hevi. Sampela taim yumi ken toktok wantaim ol elda na kisim tingting bilong ol. Yumi inap tingim save yumi gat pinis long rot bilong stretim dispela hevi, na skelim ol tok i stap long ol pablikesen bilong yumi. Tasol ating i gat ol narapela stiatok bilong Baibel em ol elda inap kirapim yumi long skelim. Kain olsem, wanpela sista i save olsem em i gat wok long autim gutnius. (Apo. 4:20) Man bilong dispela sista i no stap long tok i tru, olsem na wanpela taim sista i laik i go autim tok, tasol man i laik bai sista i stap long haus. Man bilong sista i tok tupela i no bin lusim sampela haptaim long stap na mekim sampela samting o sampela wok bilong ol yet. Sista inap tingim ol stiatok bilong Baibel i stori long pasin bilong bihainim tok bilong God na kamapim ol disaipel. (Mat. 28:19, 20; Apo. 5:29) Tasol sista i mas tingim tu olsem maritmeri i mas i stap daun long man bilong em na bihainim gutpela tingting. (Efe. 5:22-24; Fili. 4:5) Sista i ken skelim olsem: Man bilong em i tambuim em long mekim wok autim tok, o em i laik bai sista i mekim narapela samting long wanpela de tasol? Em tru olsem yumi mas mekim laik bilong God, tasol yumi no ken mekim samting we bel inap kotim yumi.

GIVIM BEL OLGETA NA STAP BELGUT

18. Stori bilong 4-pela king long dispela stadi inap helpim yu olsem wanem?

¹⁸ Yumi gat sin, olsem na sampela taim yumi inap mekim wankain popaia olsem ol dispela 4-pela king em yumi stori pinis long ol. Yumi inap (1) bilip long savetingting bilong ol man, (2) kisim helpim long ol poroman nogut, (3) kisim pasin antap, o (4) yumi mekim disisen na yumi no painimaut laik bilong God. Yumi amamas tru olsem Jehova i tingim gutpela pasin bilong yumi, wankain olsem em i tingim gutpela pasin bilong ol dispela 4-pela king! Jehova i luksave olsem yumi laikim em tru na yumi laik tru long mekim wok bilong em. Olsem na em i redim ol stori long Baibel bilong givim tok lukaut long yumi bambai yumi no ken mekim ol bikpela popaia. Yumi ken tingim tingim ol dispela stori na yumi ken tenkyu tru long Jehova i redim ol dispela stori bilong helpim yumi!