Rot Bilong Stap Amamas Taim Yu Singel

“NA TUPELA i marit na ol i stap amamas inap oltaim oltaim.” Ol kain tok olsem i save stap long pinis bilong planti stori ol man i raitim. Sampela muvi na ol buk i kamapim wankain tok, olsem yu mas marit bambai yu ken i stap amamas tru! Na long planti kantri ol i strong long ol yangpela man na meri i mas marit. Taim Debby i gat 25 krismas samting, em i tok: “Ol man i mekim na mipela i pilim olsem i gat wanpela mak tasol meri i ken tingting long winim​—em i mas marit. Ol i givim tingting olsem, taim yu marit, nau laip i gat as tru bilong en.”

Man o meri i gat tingting olsem bilong God, em i no gat dispela kain tingting. Tru, marit em i bikpela samting long ol Israel bilong bipo, tasol Baibel i stori long ol man na meri singel em ol i bin kisim amamas long i stap bilong ol. Long nau sampela Kristen i stap singel long laik bilong ol yet, tasol long planti Kristen, i gat sampela samting i mekim na ol i stap singel. Tasol maski i gat wanem as na Kristen i singel, bikpela samting i olsem: Olsem wanem Kristen i ken i stap singel na i stap amamas?

Jisas yet i no bin marit, na yumi save long as bilong dispela samting taim yumi tingim wok God i bin givim long em. Em i bin tokim ol disaipel olsem sampela long lain bilong em ol tu bai i stap singel. (Mt. 19:​10-12) Olsem na Jisas i laik tok olsem bilong i stap singel na stap amamas, long tingting na long bel bilong yumi, yumi mas orait long i stap olsem.

Yu ting tok bilong Jisas i go tasol long ol man na meri husat i laik stap singel bambai ol i ken putim tingting i go long mekim wok bilong God? (1 Ko. 7:​34, 35) Ating nogat. Tingim wanpela Kristen i gat laik long marit tasol em i no painim yet wanpela gutpela poroman bilong maritim. Ana, em wanpela sista singel i gat 35 krismas samting, em i tok: “I no longtaim i go pinis na wanpela wanwok i tok em i laik maritim mi. Bel bilong mi i amamas liklik, tasol kwiktaim mi daunim dispela tingting, long wanem, mi laik maritim wanpela husat bai helpim mi long i go klostu moa long Jehova.”

Laik bilong maritim poroman “i bilip long Bikpela” i helpim planti sista olsem Ana na ol i no maritim man i no bilip.a (1 Ko. 7:39; 2 Ko. 6:14) Ol i daun long ol tok kaunsel bilong God, olsem na ol i orait long i stap singel nau long dispela taim. Olsem wanem ol inap i stap singel na i stap amamas?

Lain Long Tingim Ol Gutpela Samting

Tingting bilong yumi inap helpim yumi na bai yumi orait long i stap singel, maski em i no laik bilong yumi yet. Carmen em i wanpela sista singel i gat 40 krismas samting, na em i tok: “Mi amamas long samting mi holim, na mi no save tingting oltaim long ol samting mi no gat.” Tru, ating sampela taim yumi bel hevi o pilim olsem yumi stap wanpis. Tasol yumi save planti ol narapela bratasista long olgeta hap ol i stap olsem, na dispela inap strongim yumi long wok i go yet na yumi no les. Jehova i bin helpim planti singel long stap amamas na long winim ol narapela hevi i painim ol.​—1 Pi. 5:​9, 10.

Planti brata na sista Kristen i lukim pinis olsem, pasin bilong i stap singel i gat ol gutpela samting long en. Ester, em wanpela sista singel i gat 35 krismas samting, em i tok: “Mi lukim olsem maski i stap bilong yumi i wanem kain, bilong i stap amamas, yumi mas tingim ol gutpela samting long i stap bilong yumi na kisim amamas long dispela.” Na Carmen i tok moa: “Mi ting maski mi bai marit o nogat, sapos mi putim ol wok bilong Kingdom i go pas, Jehova bai givim ol gutpela samting long mi.” (Sng. 84:11) Na em i tok moa: “Tru, ating i stap bilong mi i no olsem mi bin tingting long en, tasol mi stap amamas na bai mi wok yet long i stap olsem.”

Ol Stori Bilong Baibel Long Ol Singel

Pikinini meri bilong Jepta i no bin tingting long i stap singel. Tasol papa bilong em i bin mekim wanpela tok promis, na nau pikinini meri i mas mekim wok long haus lotu kirap long taim em i yangpela yet na i go inap long taim em i lapun. Em i no bin ting long em i mas mekim dispela wok, na ating dispela i senisim tru ol samting em i tingting pinis long mekim na long laik bilong em long marit. Em i krai sori inap tupela mun taim em i save pinis olsem em bai no inap marit na kamapim ol pikinini. Tasol em i orait long nupela sindaun bilong em na em i mekim wok bilong God i go inap long taim em i dai. Long olgeta yia ol meri Israel i mekim tok amamas long em long pasin bilong em long daunim ol laik bilong em yet.​—Het. 11:​36-40.

Sampela man long taim bilong Aisaia em ol i bin katim bol bilong ol, ating ol i bel hevi long dispela samting. Baibel i no tokaut long wanem samting i as bilong dispela. Ol i no inap i stap insait tru long lain manmeri bilong Israel, na ol i no inap marit na kamapim ol pikinini. (Lo 23:1) Tasol Jehova i save long bel hevi bilong ol, na em i mekim gutpela tok amamas long ol, long ol i bihainim gut olgeta tok bilong kontrak em i bin mekim wantaim lain Israel. Em i tokim ol, long haus bilong em bai em i putim “wanpela mak i gat nem bilong ol i stap long en,” na em “i no inap larim nem bilong ol i pinis.” I olsem: Ol dispela man i stap gut long Jehova ol inap wet long kisim laip i stap oltaim aninit long wok king bilong Mesaia Jisas. Jehova i no inap lusim tingting long ol.​—Ais. 56:​3-5.

Tasol samting i painim Jeremaia i narapela kain tru. Taim God i makim Jeremaia long mekim wok profet, God i tokim em long i stap singel, long wanem, em i stap long taim nogut na em i gat wanpela bikpela wok bilong mekim. Jehova i tokim em: “Taim yu stap long dispela ples, yu no ken maritim meri na kamapim ol pikinini.” (Jer. 16:​1-4) Baibel i no tokaut long tingting bilong Jeremaia long dispela tok. Tasol Baibel i kamapim klia olsem Jeremaia em i man bilong amamas long tok bilong Jehova. (Jer. 15:16) Long ol yia bihain, taim ol birua i banisim Jerusalem inap 18 mun na Jeremaia i karim bikpela hevi long dispela taim nogut, ating em i pilim pinis olsem em savepasin tru long em i bin bihainim tok bilong Jehova long i stap singel.​—Kra. 4:​4, 10.

Mekim i Stap Bilong Yu i Kamap Gutpela

Ol dispela man na meri em Baibel i stori long ol, ol i stap singel, tasol Jehova i bin helpim ol na ol i givim bel long mekim wok bilong em. Long nau tu, sapos yumi mekim ol gutpela wok i gat as bilong en, i stap bilong yumi inap kamap gutpela. Baibel i tok profet olsem ol meri i autim gutnius bai ol i kamap bikpela lain moa. (Sng. 68:11) Namel long ol i gat planti tausen sista singel. Wok bilong ol i bin karim gutpela kaikai, olsem na planti i gat ol pikinini man na pikinini meri bilong spirit.​—Mk. 10:​29, 30; 1 Te. 2:​7, 8.

Loli i bin mekim wok painia inap 14 yia pinis, na em i tok: “Wok painia i save stiaim gut i stap bilong mi. Mi wanpela sista singel na mi bisi long mekim planti wok, na dispela i helpim mi na mi no pilim olsem mi stap wanpis. Long pinis bilong olgeta de bel bilong mi i gutpela, long wanem, mi lukim olsem wok bilong mi i save helpim ol man. Dispela i givim bikpela amamas long mi.”

Planti sista i bin lainim nupela tok ples na mekim bikpela wok moa long rot bilong autim tok long ol lain i gat narapela tok ples. Ana, em yumi stori pinis long em, em i tok: “Long taun mi stap long en i gat planti tausen manmeri bilong ol narapela kantri.” Ana i save amamas long autim tok long ol lain i mekim tok Frans. Em i tok: “Mi lainim wanpela tok ples mi inap mekim wok long en bilong toktok wantaim planti man, na dispela i mekim na mi gat nupela rot bilong mekim dispela wok, na nau mi amamas moa long wok bilong mi long autim tok.”

Planti singel i no gat wok long lukautim famili samting, olsem na ol i go mekim wok long hap ol i sot long ol Witnes. Lidiana em wanpela sista singel i gat 35 krismas samting, na em i bin mekim wok autim tok long ol kantri i sot long ol Witnes, na em i tok: “Mi bilip olsem, taim yumi wok strong long mekim wok bilong Jehova, i no hatwok tumas long kisim sampela gutpela pren na pilim olsem ol i laikim yu tru. Mi kisim planti gutpela pren bilong ol narapela narapela lain na kantri, na dispela i mekim na laip bilong mi i gat bikpela amamas long en.”

Baibel i stori long Filip, em man bilong autim gutnius na em i gat 4-pela pikinini meri i no bin marit na ol i save mekim tok profet. (Ap. 21:​8, 9) I luk olsem ol i gat wankain pasin olsem papa bilong ol long givim bel tru long mekim wok bilong God. Ating ol i bin mekim wok long dispela presen bilong autim tok profet bilong helpim ol Kristen i stap long Sisaria. (1 Ko. 14:​1, 3) Long nau tu, planti sista singel ol i save strongim ol narapela long taim ol i go oltaim long ol miting Kristen na insait long ol tok i kamap long miting.

Tasol Lidia em i wanpela Kristen bilong bipo i stap long Filipai na Baibel i mekim gutpela tok amamas long em i bin singautim ol brata i kam long haus bilong em na lukautim ol. (Ap. 16:​14, 15, 40) Lidia​—ating em i meri singel o man bilong em i dai pinis​—em i meri bilong givim ol samting long ol man, na dispela i mekim na em i kisim amamas long bung wantaim ol wasman raun, olsem Pol, Sailas, na Luk. Ol sista singel bilong nau i gat wankain pasin olsem, ol i kisim planti gutpela blesing.

Mas i Gat Sampela i Laikim Tru Ol

Tru, yumi mas i gat ol gutpela wok bilong mekim, olsem wok i gat as bilong en, na tu, yumi olgeta i mas i gat sampela bilong laikim yumi tru na mekim gut long yumi. Olsem wanem ol singel bai inapim dispela laik? Namba wan, oltaim Jehova i stap bilong laikim yumi tru, strongim yumi, na putim yau long tok bilong yumi. Sampela taim King Devit i ‘stap wanpis na strong bilong em i pinis,’ tasol em i save, long olgeta taim em inap singaut long Jehova i helpim em. (Sng. 25:16; 55:22) Em i tok: “Maski papa na mama i givim baksait long mi, Bikpela bai i lukautim mi.” (Sng. 27:10) God i singautim olgeta wokman bilong em long i go klostu long em, bilong kamap gutpela pren bilong em.​—Sng. 25:14; Jem. 2:23; 4:8.

Na insait long bikpela lain brata i stap long olgeta hap, yumi inap painim tu ol papa, mama, brata, susa bilong spirit em pasin laikim bilong ol bai amamasim tru i stap bilong yumi. (Mt. 19:29; 1 Pi. 2:17) Planti Kristen singel i belgut tru taim ol i bihainim pasin bilong Dorkas, “em i save mekim ol gutpela pasin na em i save helpim ol manmeri i sot long ol samting.” (Ap. 9:​36, 39) Loli i tok: “Maski mi go we, mi painim ol pren tru insait long kongrigesen em ol bai laikim mi na helpim mi taim mi bel hevi. Bilong strongim pasin bilong pren gut wantaim, mi soim olsem mi laikim ol tru na tingim ol. Mi bin mekim wok insait long 8-pela kongrigesen, na oltaim mi bin painim ol trupela pren. Sampela i no gat wankain krismas olsem mi​—sampela ol i lapun bubu na sampela ol i yangpela yet.” Long olgeta kongrigesen i gat ol sampela i sot long sampela bilong laikim ol tru na poroman wantaim ol. Sapos yumi soim olsem yumi tingim ol, dispela inap helpim gut ol na inapim laik bilong yumi yet long laikim tru ol narapela na ol tu i ken laikim yumi.​—Lu. 6:38.

God i No Inap Lusim Tingting

Baibel i tok olsem olgeta Kristen i mas lusim sampela laik bilong ol yet, long wanem, yumi stap long taim nogut. (1 Ko. 7:​29-31) Ol sista i strong long bihainim tok bilong God long maritim man i bilip long Bikpela na long dispela as ol i stap singel, yumi mas rispek moa yet long ol na tingim ol. (Mt. 19:12) Tasol dispela gutpela pasin bilong lusim sampela laik bilong ol yet i no makim olsem ol i no inap kisim amamas long i stap bilong ol.

Lidiana i tok: “Mi kisim amamas long i stap bilong mi, long wanem, mi pas gut wantaim Jehova na mi mekim wok bilong em. Mi save long sampela marit em ol i stap amamas, na sampela i no amamas. Olsem na mi save, maski bihain mi marit o nogat, mi inap i stap amamas.” Olsem Jisas i tok, bilong i stap amamas, yumi mas givim samting long ol narapela man na mekim wok bilong helpim ol, em samting olgeta Kristen inap mekim.​—Jo. 13:​14-17; Ap. 20:35.

Nambawan as tru na yumi ken amamas, em yumi save Jehova bai mekim gut long yumi sapos yumi lusim sampela laik bilong yumi yet bambai yumi ken mekim laik bilong em. Baibel i tokim yumi: “God em i no man nogut, na bai em i lusim tingting long ol gutpela wok yupela i bin mekim. Nogat.”​—Hi. 6:10.

[Futnot]

[Rait long pes 25]

“Mi amamas long samting mi holim, na mi no save tingting oltaim long ol samting mi no gat.”​—Carmen

[Piksa long pes 26]

Loli na Lidiana i amamas long mekim wok autim tok long hap ol i sot long ol Witnes

[Piksa long pes 27]

God i singautim olgeta wokman bilong em long i go klostu long em