“Jehova Em i Helpim Bilong Mi”

Stap Singel na Belgut Long Mekim Wok Bilong Jehova

WANPELA meri Kristen long Spen i tok: “Maski mipela i no marit, planti bilong mipela i stap amamas tru.” I gat wanem as na em i stap amamas? “Mipela i amamas long mipela i stap fri long planti samting em ol marit i mas tingting planti long en, na mipela inap mekim bikpela wok moa bilong Jehova, God bilong mipela.”

Kain tingting olsem i stret wantaim tok Baibel i mekim long pasin bilong i stap singel. Taim aposel Pol i stori long ol samting bilong marit, spirit bilong God i kirapim em long tok: “Ol manmeri i no marit, na long ol meri man bilong ol i dai pinis, mi tok olsem. Sapos ol i stap singel olsem mi, em i gutpela.” Pol yet i no marit. Tasol i gat wanem as na Pol i strongim pasin bilong i stap singel? Em i tok tingting bilong ol marit i bruk, tasol man o meri i stap singel em “i save tingting planti long pasin bilong Bikpela.” (1 Korin 7:​8, 32-34) Pasin bilong mekim wok bilong Jehova i nambawan as na man singel i stap amamas na belgut.

Stap Singel Bilong Mekim Wanpela Gutpela Wok

Long sampela ples we pasin bilong marit na kamapim famili em bikpela samting, ating ol bai i no klia long tok Pol i mekim. Tasol Jisas Krais​​—em yet i no bin marit, tasol em i stap amamas na belgut​​—i tok long wanpela gutpela wok bilong ol Kristen i stap singel. Em i tok: “Sampela i bin ting long mekim wok bilong kingdom bilong heven na ol i tambuim ol yet na ol i no save marit. Tasol man em inap long kisim dispela tok, em i ken kisim.”​​—Matyu 19:12.

Olsem dispela tok i kamapim, planti i bin kisim save olsem taim man o meri i stap singel em inap mekim wok bilong God na i no gat ol samting bilong pulim nabaut tingting bilong em olsem i save painim ol marit. (1 Korin 7:​35) Planti tausen Kristen i amamas long lotuim Jehova maski ol i no gat poroman marit, na ol i kisim amamas long helpim ol narapela.a

Planti Kristen i no marit i save olsem amamas i no samting bilong ol marit tasol, na i no olsem ol manmeri i stap singel i no save stap amamas, nogat. Namel long ol marit na singel, sampela i kisim amamas na stap bel hevi tu. Na Baibel i tokaut stret olsem “ol manmeri i marit bai i painim planti hevi long laip bilong ol.”​​—1 Korin 7:28.

Sindaun Bilong Man i Mekim na Em i Stap Singel

Sindaun bilong planti i mekim na ol i stap singel, i no olsem ol i laik stap singel. Ating ol i laikim wanpela poroman bilong pas gut wantaim na narapela i ken laikim na mekim gut long narapela, em dispela pasin inap i stap insait long marit. Tasol ol samting bilong mani o ol narapela samting i mekim na sampela i no inap marit long nau. Sampela Kristen​​—planti bilong ol em ol gutpela sista spirit​​—i stap singel, long wanem, ol i laik bihainim tok bilong Baibel i tok long “maritim man i bilip long Bikpela.” (1 Korin 7:39) Ol i painim poroman marit namel long lain i dediket na baptais na i lotuim Jehova.

Long sampela taim, sampela singel i pilim olsem ol i stap wanpis. Bihain long em i tokaut long em i pilim olsem, wanpela singel Kristen i tok: “Mipela ol singel Kristen i save long lo bilong Jehova na mipela i no laik mekim wanpela samting Jehova i no save laikim. Ating mipela i gat laik long kisim wanpela poroman marit, tasol maski planti taim ol man bilong graun i laik makim wanpela poroman bilong mipela, mipela i strong long i stap singel. Mipela i no laik bung wantaim ol man o meri i no bilip.” Yumi mas tok amamas long ol kain Kristen olsem long ol i bihainim tok bilong Baibel na stretpela pasin. Ol i mekim olsem bilong Jehova i ken amamas long ol maski dispela inap mekim na sampela taim ol i bel hevi.

Jehova i Givim Planti Helpim

Jehova i no save lusim ol manmeri i stap gut long em na i no laik maritim ol man i no lotuim em. Devit i pilim pinis dispela samting, olsem na em inap tokaut olsem: “Bikpela, sapos man i no lusim yu, orait yu no save lusim em.” (Song 18:25) Na long ol manmeri i bihainim tok bilong God, em i tok promis: “Bai mi no lusim yu. Bai mi no larim yu i stap nating. Nogat tru.” (Hibru 13:5) Yumi ken bihainim pasin bilong Jehova na tok amamas long ol Kristen singel i gat kain kain krismas na ol i strong long bihainim Tok Bilong God. Na tu, yumi ken beten askim Jehova long strongim ol long karim hevi bilong ol.​​—Hetman 11:​30-40.

Planti Kristen singel i luksave olsem taim ol i insait olgeta long wok bilong skulim ol man long tok bilong Baibel, dispela i mekim na i stap bilong ol i gat as bilong en. Olsem: Tingim Patricia, em wanpela singel meri i gat 35 krismas samting na em i wanpela painia, olsem em i save autim tok fultaim. Em i tok: “Maski i gat sampela hatwok long i stap singel, dispela i opim rot long mi long kamap wanpela painia oltaim. Mi wanpela singel meri, olsem na mi inap senisim sediul bilong mi na long dispela rot mi gat bikpela haptaim moa bilong mekim stadi. Mi lain long bilip na wetim Jehova, na moa yet long taim bilong hevi.”

Tok promis bilong Baibel i as bilong kain tingting olsem: “Yu mas putim laip bilong yu long han bilong Bikpela. Bilip strong long em, na em bai i helpim yu.” (Song 37:5) Tru tumas, olgeta manmeri i lotuim Jehova, ol marit na singel, i ken kisim strong na belgut long dispela tok: “Jehova em i helpim bilong mi.”​—Song 121:​2, NW.

[Futnot]

[Rait long pes 9]

“Man i no marit, em i save tingting planti long pasin bilong Bikpela. Em i laik mekim pasin Bikpela i laikim.”—1 KORIN 7:32

[Blok long pes 8]

STAP AMAMAS TAIM YU SINGEL

Jisas, em i no bin marit, i tok: “Kaikai bilong mi, em long bihainim laik bilong em na long pinisim wok em i bin givim mi.”—Jon 4:34.

Fopela pikinini meri bilong Filip, em ol i no bin marit, ol i bisi long “autim tok bilong God olsem profet.”​—Aposel 21:​8, 9.

Ol singel sista Kristen i hap bilong bikpela lain meri i save autim gutnius bilong Kingdom.​—Song 68:11.