Ol i No Marit, Tasol Ol Inap Tru Long Mekim Wok Bilong God
“Man i maritim yangpela meri bilong en, em i mekim gutpela pasin. Na man i no maritim, em i mekim pasin i gutpela moa.”−1 KORIN 7:38.
1. Olsem wanem marit i gutpela samting?
JEHOVA i no wokim namba wan man bilong i stap singel. Nogat. God i wokim wanpela meri bilong Adam, olsem poroman bilong em, na long Adam olgeta lain manmeri i kamap. (Jenesis 2:20-24; Aposel 17:26) Marit em i gutpela samting! Taim yumi marit, nau yumi gat poroman, na narapela i ken helpim narapela, na marit i stretpela rot bilong kamapim pikinini, na marit inap helpim man na meri long i stap amamas. Ol manmeri i stap rabis na ol manmeri ol narapela man i daunim ol, ol inap kisim wanpela samting em bikpela mani tru i no inap baim, em sori i stap namel long man na meri i marit, em narapela i laikim tru narapela.−Song Bilong Solomon 8:6, 7.
2 Tasol sampela ol i gat narapela kain tingting long marit. Wanpela buk bilong wanpela misin i tok: ‘Sios long hap bilong Wes i tambuim marit, em lo bilong misin. Misin i tok, ol man i marit pinis ol i no ken kamap pris o pasto na ol man i kamap pris o pasto pinis ol i no ken marit. Ol i mekim tok tru antap pinis na ol i mas i stap klin tru. As bilong tambuim marit i olsem: Bambai ol dispela man ol i makim bilong mekim wok pris o pasto ol i ken givim bel long mekim wok bilong God tasol (1 Ko. 7:32), na sapos ol i tambuim skin bai ol i stap singel, na dispela i moa holi na moa gutpela, winim pasin bilong marit. Nupela Testamen i litimapim tru pasin bilong tambuim marit na i stap singel, winim tru pasin bilong marit.’−Buk The Catholic Encyclopedia, em Robert C. Broderick i bungim ol tok bilong en.
3 Olsem wanem? Tru pasin bilong tambuim marit i ‘moa holi na moa gutpela’ winim pasin bilong marit? Nupela Testamen i no tok olsem. Wanpela Baibel Katolik (Jerusalem Bible) i tok: “Holi Spirit i tok klia olsem: Long las taim bai sampela man ol i lusim bilip. Bai ol i harim maus bilong ol spirit bilong giaman na bai ol i bihainim tok bilong ol spirit nogut. Ol man bilong giaman bai ol i mekim pasin giaman na kamapim dispela giaman. Ol i pasim tingting na maus bilong bel bilong ol, na ol i no pilim sin moa. Bai ol dispela man i tambuim marit na tambuim kaikai long ol man. Tasol God i bin wokim ol dispela samting bilong yumi man i bilip na i save long tok i tru bilong em, yumi ken kisim na tenkyu long God.” (1 Timoti 4:1-3) Tru tumas, marit em i olsem wanpela gutpela presen God i givim long yumi; marit em i gutpela samting.−Rut 1:9.
4 Marit em i olsem wanpela gutpela presen God i givim long yumi, tasol aposel Pol i tok: “Man i maritim yangpela meri bilong en, em i mekim gutpela pasin. Na man i no maritim, em i mekim pasin i gutpela moa.” (1 Korin 7:38) Bilong wanem Pol i tok olsem man i no marit em i mekim gutpela pasin moa? Man o meri i stap singel, ating em i mas pilim olsem em i sot long samting? Na olsem wanem? Man o meri i stap singel, em inap i stap amamas?
Nambawan Samting Bilong Kristen
5 Maski yumi stap singel o yumi marit, tasol long tingting bilong yumi ol Kristen, wok bilong Jehova em i nambawan samting. Sapos yumi mekim wok bilong God na yumi amamas long mekim, bai yumi kamapim long ples klia olsem yumi givim bel long Em, em i Nambawan Bikpela King. Sapos yumi givim bel olgeta long bihainim tok na yumi wok strong long mekim wok Kristen, bai yumi kamapim bel bilong yumi, olsem yumi givim bel tru long God. (1 Jon 5:2, 3; 1 Korin 9:16) Maski man o meri i stap singel em inap tru long mekim dispela wok na mekim ol narapela samting bilong bihainim tok na laik bilong God.
6 Ol man bilong autim tok ol i wok nau long autim tok bilong Kingdom bilong God na ol i litimapim nem bilong Jehova. Maski yumi marit o yumi singel, tasol sapos yumi wok strong long autim tok bai yumi gat rot bilong givim taim na strong na sampela samting bilong yumi long mekim wok bilong God. Tasol yumi mas bosim gut sindaun bilong yumi bambai wok bilong autim tok i no ken i stap olsem nambatu samting. Yumi mas ‘painim Kingdom pastaim.’ (Matyu 6:33) Sapos yumi putim olgeta tingting bilong yumi i go long ol samting bilong God na yumi no tingim tasol ol samting bilong yumi yet, bai yumi stap amamas.
Inap Tru long Mekim Wok Bilong God
7 Ol Kristen ol inap tru long mekim wok bilong God maski ol i singel o ol i marit. Olsem na sapos man o meri i no marit, em i no ken painim rot bilong senisim dispela. (Lukim 1 Korin 7:24, 27.) Baibel i no bihainim tingting bilong sampela lain em ol i pilim olsem sapos man i no marit, em i no kamap man tru. Krais Jisas i stap singel i go inap long taim em i dai. Jehova i orait long wanpela meri tasol bilong Jisas, em lain bilong em long heven ol i olsem meri bilong em. (Revelesen 21:2, 9) Taim Pikinini bilong God i stap man long graun, em i no marit, tasol em inap tru long mekim wok bilong God.
8 Man o meri i no marit, i no gat planti samting bilong pulim nabaut tingting bilong em na em inap lusim bikpela hap taim moa long mekim wok bilong God. Pol i laik helpim pasin bilong i stap singel na em i tok: “Mi no laik planti samting i pulim nabaut tingting bilong yupela. Man i no marit, em i save tingting planti long pasin bilong Bikpela. Em i laik mekim pasin Bikpela i laikim. . . . Na meri i no marit, na yangpela meri, em i save tingting planti long pasin bilong Bikpela.” (1 Korin 7:32-34) Dispela tok i stret long ol Kristen i singel, na long ol Kristen bipo ol i marit na nau senis i kamap na ol i stap singel gen.−Matyu 19:9; Rom 7:2, 3.
9 Taim yumi kamap man tru long skin na tingting na spirit, nau yumi inap tru long mekim wok bilong God. Krais Jisas em i no marit, tasol em inap tru long mekim wok bilong em olsem Nambawan Wokman bilong God na Man bilong mekim ofa bilong baim bek yumi. (Matyu 20:28) Jisas i no marit, olsem na em inap putim olgeta tingting bilong em i go long wok bilong em. Ol Juda i strong long ol man i mas marit na kamapim pikinini, olsem na Jisas i stap narapela kain tru long ol narapela Juda. Tasol em inap tru long pinisim ol wok God i bin givim long em. (Luk 3:23; Jon 17:3, 4) Olsem na maski man i no marit, tasol i no olsem em i no inap mekim ol wok bilong Kristen.
Tingting Bilong Ol Marit i “Bruk”
10 Ol Kristen i marit ol i no olsem ol Kristen i singel. Kristen i marit, taim em i mekim wok bilong God, em i mas tingim poroman bilong em, em i stap “wanpela bodi” wantaim em. (Matyu 19:5, 6) Man o meri i marit em i pas wantaim poroman bilong em na i gat ol wok em i mas mekim, olsem na Pol i tok, tingting bilong ol marit i “bruk.” Em i tok: “Mi no laik planti samting i pulim nabaut tingting bilong yupela. Man i no marit, em i save tingting planti long pasin bilong Bikpela. Em i laik mekim pasin Bikpela i laikim. Tasol man i marit, em i save tingting planti long samting bilong dispela graun. Em i laik mekim pasin meri bilong en i laikim. Olsem na tingting bilong em i bruk. Na meri i no marit, na yangpela meri, em i save tingting planti long pasin bilong Bikpela. Em i laik i stap holi long bodi na long spirit tu. Tasol meri i marit, em i save tingting planti long samting bilong dispela graun. Em i laik mekim pasin man bilong en i laikim. Mi mekim dispela tok bilong helpim yupela i stap gut, em i no bilong pasim yupela. Nogat. Mi laik bai yupela i stap stret na oltaim mekim wok bilong Bikpela, bai wanpela samting i no ken pulim nabaut tingting bilong yupela.”−1 Korin 7:32-35.
11 Pol i tok, gutpela sapos man o meri i stap singel bambai i no gat planti samting bilong pulim nabaut tingting bilong em. Pol yet i stap singel. Ating bipo em i marit na meri bilong em i dai pinis, na em i no laik marit gen, o yumi no save. (1 Korin 9:5) Tasol em i save, man o meri i marit em i gat hevi long dispela graun. Em i tingim dispela samting na em i tok, Kristen i no marit i no gat planti samting bilong pulim nabaut tingting bilong em, tasol Kristen i marit, tingting bilong em i bruk−em i mas tingim samting bilong skin na samting bilong spirit tu wantaim. Man o meri i marit, em i no i stap bos olgeta bilong skin bilong em, long wanem poroman tu i stap bos bilong bodi bilong em−tupela i stap olsem wanpela bodi. (1 Korin 7:3-5) Olsem na i stret Pol i tok, Kristen i no marit em inap i stap holi long bodi na spirit, olsem em inap givim skin na tingting bilong em olgeta bilong mekim wok bilong God.
12 Kristen i stap singel, spirit o tingting bilong em i kirapim em long mekim wok bilong Kingdom bilong God na i no gat planti samting bilong pulim nabaut tingting bilong em. Em i no gat poroman bilong i stap bos bilong skin bilong em, olsem na em i ken bihainim dispela laik o tingting bilong em. No gat samting bilong pasim em na em i ken givim olgeta tingting na strong bilong skin bilong em long mekim wok bilong God. Olsem na man o meri i no marit, em i ken tingting long mekim ol pasin Bikpela i laikim na i no gat samting bilong pasim em long mekim olsem. I no stret sapos yumi gat tok long dispela tok bilong Pol, long wanem Jehova yet i kirapim em long raitim dispela tok bilong givim tingting long yumi.
Ating Maritman Em i Sot?
13 Sampela Kristen i marit ol i kisim tingting kranki na ol i ting bai ol inap mekim bikpela wok moa long wok bilong God na ol i no tingim gut poroman bilong ol. Olsem: Ating bai meri i kirap bihainim laik bilong em yet long sampela bikpela samting. O ating man bai tingim tumas ol samting bilong kongrigesen. Sapos man o meri marit i mekim olsem, ating bai em i ting em i mekim gut wok bilong Jehova. Tasol em i no tingim gut poroman bilong em, olsem em i stap wanpela bodi wantaim em. Na sapos em i mekim olsem, orait Jehova i no ken amamas long dispela.
14 Sapos man o meri marit i no tingim gut poroman bilong em, orait em i no mekim wok bilong God inap tru. Taim man o meri i marit, dispela i no inapim em moa yet long mekim wok bilong God. Nogat. Nau em i no inap putim olgeta tingting bilong em i go long dispela wok. (Lukim Luk 14:16, 17, 20.) Tasol man o meri marit, sapos em i laik bai God i amamas long em na em i laik mekim wok bilong God inap tru, orait em i mas mekim gut ol wok bilong em insait long marit.
Ol i Tingim Kingdom na Ol i No Marit
15 Ol wokman bilong Jehova i marit ol i mas mekim ol wok bilong ol insait long marit. Na ol Kristen i no marit ol i stap inap tru na ol i mas amamas long dispela. Olsem Pol i tok: “Long ol manmeri i no marit, na ol meri man bilong ol i dai pinis, long ol dispela mi tok olsem: Sapos ol i stap [singel] olsem mi, em i gutpela. Ating yu marit pinis long meri? Orait, yu no ken wok long painim rot bilong lusim em. Ating yu no marit? Orait, yu no ken ting long kisim meri.” (1 Korin 7:8, 27) Sapos yu stap singel, orait larim Jehova i helpim yu na bai yu inap kisim pasin bilong i stap bel isi na amamas. Yu no ken pilim olsem yu mas marit, long wanem em pasin bilong ples bilong yu o ol wanlain bilong yu ol i marit. Nogat. Samting Baibel i kolim, dispela samting tasol i mas kirapim yu long marit, em Pol i tok: “Sapos wanpela man i stap singel na em i ting em i mekim pasin i no stret long dispela, long wanem em i no yangpela moa, na sapos laik bilong em i strong tumas, na sapos em i lukim i no gat narapela rot, orait em i ken bihainim laik bilong em. Em i no mekim sin. Em i ken marit. Tasol, sapos wanpela man i strong long bel bilong em, na i no gat wanpela samting i hariapim em, na em inap long bosim laik bilong em yet, na sapos em i tok pinis long bel bilong em, na em i no marit, orait em i mekim gutpela pasin.”−1 Korin 7:36, 37, NW.
16 Olsem na Pol i tok, sapos wanpela man i stap singel na em i mekim sampela pasin i no stret long dispela, orait gutpela sapos em i marit. Pol i no tok long man i mekim bikpela rong. Nogat. Bipo em i tok, “Sapos ol i no inap bosim gut bel wantaim bodi bilong ol yet, mobeta ol i marit.” (1 Korin 7:9) Sapos man “i no yangpela moa”−olsem i no nau tasol laik bilong marit i kamap long skin bilong em−na em i no inap bosim gut bel wantaim bodi, orait Pol i tok, gutpela sapos dispela man i marit. Sapos man i bikpela pinis na “em inap long bosim laik bilong em yet,” na em i pasim tok pinis long bel long i stap singel, orait em inap i stap singel na i stap amamas. Tasol sapos man i singel na em i gat strongpela laik long marit na kamapim pikinini na em i hatwok long daunim dispela laik, bai em i no i stap amamas. Kristen i laik i stap singel, em i mas bilip tru olsem i gutpela em i stap singel, na em i mas wok strong long i stap singel na i stap klinpela. Kristen i mekim olsem, i no gat planti samting bilong pulim nabaut tingting bilong em na i no gat planti wok em i mas mekim, olsem na em i gat bikpela hap taim moa bilong mekim wok bilong Bikpela.
17 O1 Kristen i no marit, sapos ol i kisim tingting bilong Krais Jisas, dispela bai helpim ol long holimpas pasin bilong i stap singel. Maski lain bilong Jisas, olsem lain Juda, ol i strong long marit, tasol Jisas yet i no marit; em i givim bel long mekim wok bilong God−em i givim taim na strong bilong em long mekim dispela wok i no ken kamap gen. Olsem Jisas, olsem tasol Kristen i no marit em i ken amamas long dispela “strong” God i save givim long ol man ol ‘inap long kisim dispela pasin.’ Jisas i stori long dispela samting na em i tok: “I no olgeta manmeri ol inap long kisim dispela [pasin]. Nogat. God i bin givim strong long sampela man tasol. Harim. I gat kain kain man ol i no inap long marit. Sampela hia mama bilong ol i bin karim ol olsem tasol. Na sampela gen ol man i bin katim na o1 i no inap long marit. Na sampela i bin ting long kingdom bilong heven na ol i tambuim ol yet na ol i no marit. Man em inap long kisim dispela [pasin], em i ken kisim.”−Matyu 19:11, 12.
18 Jisas i no tok man i stap singel em i winim man i marit. Nogat. Em i no laik kirapim ol manmeri long i stap singel bambai ol i no gat planti wok ol i mas mekim na ol i ken bihainim laik bilong ol yet; na em i no kirapim ol long i stap singel bambai ol i ken prenim planti poroman. Nogat tru. Ol manmeri i tingim kingdom na “ol i no marit,” ol dispela manmeri i stretpela manmeri na ol i bin stretim gut tingting long bel bambai ol i no ken marit. Wanem samting i pasim ol na ol i no marit? I no olsem ol i gat sik long skin samting na ol i no inap . Tasol ol i gat strongpela laik tru long mekim bikpela wok bilong God. Dispela wok em i bikpela samting tru long nau, long wanem Kingdom i kamap pinis long heven long yia 1914 na ol i mas “autim dispela gutnius bilong kingdom” paslain long taim bilong pinis bilong dispela pasin nogut nau i stap long graun. Dispela taim i kam klostu hariap.−Matyu 24:14.
Strongim Ol Kristen i No Marit
19 Olgeta Kristen i mas strongim ol Kristen i tingim Kingdom na ol i no marit; ol i mas tokim ol: “Yupela i mekim gutpela pasin.” Ol i no marit; olsem na oltaim ol inap “mekim wok bilong Bikpela” na ‘i no gat wanpela samting i ken pulim nabaut tingting bilong ol.’ (1 Korin 7:35) Gutpela sapos ol papamama i lainim pikinini bilong ol long ol tok bilong Baibel long pasin bilong i stap singel na olsem wanem dispela inap helpim ol long mekim wok bilong Jehova. Yumi olgeta inap strongim ol wanlotu bilong yumi, em ol i no marit; sapos ol i tingting pinis long i stap singel bambai ol i ken mekim bikpela wok bilong Kingdom, orait yumi no ken wok long senisim tingting bilong ol.
20 Ol Kristen i ken amamas long i stap wokman bilong God ol inap tru long mekim wok. Yumi stap long las taim na yumi amamas bilong mekim wok bilong autim tok bilong Kingdom na mekim hariap. Olsem na sapos yu no marit, yu mas amamas long mekim wok Jehova i givim long yu, olsem wanpela wokman em inap tru long mekim wok. ‘Yu mas pret na guria na wok strong long kisim laip, na yu mas i stap olsem lait namel long ol lain man bilong dispela graun, na yu mas holimpas tok i gat laip.’ (Filipai 2:12-16) Yu mas tingting oltaim long ol samting bilong Kingdom na wok gut wantaim ol brata bilong yu i stap long olgeta hap bilong graun, em ol Witnes Bilong Jehova, na inapim wok Kristen. Sapos yu stap singel na yu mekim olsem, yu inap long i stap amamas. Narapela tok i kamap bihain long dispela bai stori long dispela samting.
Bai Yu Bekim Wanem Tok?
◻ Wanem samting i mas i stap olsem nambawan samting long tingting bilong ol Kristen?
◻ Ol wokman bilong Jehova i no marit, olsem wanem ol inap tru long mekim wok Kristen?
◻ Man o meri i marit, sapos em i mekim wanem bai i olsem em i sot?
◻ Man i tingim Kingdom na em i no marit, olsem wanem em i olsem man “i no inap marit”?
◻ Bilong wanem yumi mas strongim ol Kristen i no marit?
2, 3. (a) Wanpela buk bilong wanpela misin i tok wanem long pasin bilong tambuim marit? (b) Tasol yumi mas ting olsem wanem long marit, olsem Baibel i makim?
4. Yumi tingim tok bilong 1 Korin 7:38 na yumi gat wanem ol askim?
5. Wanem samting i mas i stap olsem nambawan samting long tingting bilong ol Kristen?
6. Maski yumi marit o yumi no marit, tasol sapos yumi wok strong long autim tok bai yumi gat rot bilong mekim wanem?
7. Husat i no marit, tasol em inap tru long mekim wok bilong God?
8. Man o meri i no marit em inap mekim wanem, olsem Pol i tok?
9. Olsem wanem long Jisas na yumi ken save, maski man i no marit, tasol i no olsem em i no inap tru long mekim wok bilong God?
10. Man na meri marit i stap olsem wanpela bodi, olsem na Pol i skelim ol marit na ol singel na em i tok wanem?
11. Wanem insait bilong tok bilong Pol long 1 Korin 7:32-35?
12. Man i no marit em i no gat poroman na em inap mekim wanem?
13, 14. Wanem tingting kranki em inap kirapim man o meri marit na bai em i no tingim gut marit bilong em?
15. (a) Ol Kristen i no marit ol i mas wok long kisim wanem pasin? (b) Long 1 Korin 7:36, 37 Pol i tok wanem long pasin bilong marit na pasin bilong i stap singel?
16. (a) Wanem insait bilong dispela tok “i no yangpela moa”? (b) Kristen i laik i stap singel em i mas bilip tru long wanem samting?
17. Bilong wanem sampela i no marit, olsem Jisas i tok?
18. Ol manmeri i tingim Kingdom na ol i no marit, wanem samting i pasim ol na ol i no marit?
19. Olgeta Kristen i mas mekim wanem long ol manmeri i tingim Kingdom na ol i no marit?
20. Sapos yu wanpela Kristen i no marit, yu mas mekim wanem?
[Piksa long pes 12]
Aposel Pol i no marit, tasol em inap tru
[Piksa long pes 14]
Jisas em i nambawan man em inap tru long mekim wok bilong God
[Piksa long pes 18]
Yu save strongim ol Kristen i tingim Kingdom na ol i no marit?